Read Moroccan Standard Translation الْأَعْمَالْ 24 Bible Online

الْأَعْمَالْ 24 - Moroccan Standard Translation bible

الْأَعْمَالْ 24

¹الْفَصْلْ رْبْعَة وْعْشْرِينْ وْمْنْ بَعْدْ خَمْسْ يَّامْ، مْشَى رَئِيسْ رْجَالْ الدِّينْ حَنَانْيَا لْقَيْصَرِيَّة وْمْعَاهْ الشّْيُوخْ وْمُحَامِي سْمِيتُه تَرْتُلُّسْ، وْدْعَاوْ بُولُسْ لْعَنْدْ الْحَاكْمْ فِيلِكْسْ.

²وْمْلِّي سْتَدْعَى الْحَاكْمْ بُولُسْ، بْدَا تَرْتُلُّسْ كَيْتَّهْمْ بُولُسْ وْكَيْݣُولْ: «كَيْرْجَعْ الْفْضَلْ دْيَالْ هَادْ الْهْنَا اللِّي كَنْعِيشُو فِيهْ وْدْيَالْ الْبْلَادْ اللِّي تّْصْلْحَاتْ، لْلْخْدْمَة دْيَالْكْ،

³وْحْنَا آ سِيدْ الْحَاكْمْ فِيلِكْسْ، كَنْقْبْلُو هَادْشِّي كُلُّه حَامْدِينْ وْشَاكْرِينْ فْكُلّْ وَقْتْ وْفْكُلّْ بْلَاصَة.

⁴وْبَاشْ مَا نْطَوّْلْشْ عْلِيكْ فْالْكْلَامْ، كَنْطْلَبْ مْنّْكْ تْوَسّْعْ خَاطْرْكْ مْعَانَا وْتْسْمَعْ لِينَا شْوِيَّة:

⁵رَاهْ لْقِينَا هَادْ الرَّاجْلْ مُفْسِدْ، وْكَيْنَوّْضْ الصّْدَاعْ وَسْطْ لِيهُودْ فْكُلّْ بْلَاصَة، وْمْتْرَأّْسْ جْمَاعْةْ النّْصَارَى.

⁶وْكْتَرْ مْنْ هَادْشِّي بْغَا يْنَجّْسْ بِيتْ اللَّهْ. وْحْنَا نْشَدُّوهْ، [وْبْغِينَا نْحَاكْمُوهْ عْلَى حْسَابْ الشّْرَعْ دْيَالْنَا.

⁷وَلَكِنْ جَا قَايْدْ الْقُيَّادْ دْ الْعَسْكَرْ لِيسِيَاسْ وْحَيّْدُه لِينَا بَزّْزْ مْنْ يْدِّينَا،

⁸وْآمْرْ هَادُوكْ اللِّي كَيْتَّهْمُوهْ بَاشْ يْجِيوْ لْعَنْدْكْ.] [٣]وْإِلَا سْوّْلْتِي بُولُسْ عْلَى هَادْشِّي كُلُّه، غَادِي تْعْرَفْ بْلِّي هَادْ الْكْلَامْ اللِّي كَنْتَّهْمُوهْ بِيهْ صْحِيحْ».

⁹وْوَافْقُوهْ لِيهُودْ اللِّي كَانُو حَاضْرِينْ حْتَّى هُمَ، وْݣَالُو بْلِّي هَادْ الْأُمُورْ صْحِيحَة.

¹⁰وْݣَالْ بُولُسْ مْنْ بَعْدْ مَا شْيّْرْ الْحَاكْمْ لِيهْ بَاشْ يْتّْكَلّْمْ: «كَنْعْرَفْ بْلِّي نْتَ قَاضِي عْلَى هَادْ الشَّعْبْ هَادِي مُدَّة طْوِيلَة، وْعْلَى دَاكْشِّي كَنْدَافْعْ عْلَى رَاسِي وْأَنَا مْرْتَاحْ.

¹¹وْنْتَ قَادْرْ تْعْرَفْ بْلِّي هَادِي قَلّْ مْنْ طْنَاشْرْ يُومْ بَاشْ طْلَعْتْ لْأُورْشَلِيمْ نْعْبَدْ اللَّهْ.

¹²وْعَمّْرْهُمْ مَا لْقَاوْنِي فْبِيتْ اللَّهْ كَنْتّْنَاقْشْ مْعَ شِي وَاحْدْ، وْلَا كَنْتّْكَلّْمْ مْعَ شِي جْمَاعَة بَاشْ تْدِيرْ الْفُوضَى لَا فْدْيُورْ الصّْلَاة وَلَا فْالْمْدِينَة كُلّْهَا.

¹³وْمَا يْقَدْرُوشْ يْتَبْتُو عْلِيَّ هَادْشِّي اللِّي كَيْتَّهْمُونِي بِيهْ دَابَا.

¹⁴وَلَكِنْ كَنْعْتَرْفْ لِيكْ بْلِّي كَنْعْبَدْ إِلَاهْ جْدُودْنَا عْلَى حْسَابْ الطّْرِيقْ اللِّي كَيْݣُولُو هُمَ رَاهْ عْوَجْ، وْكَنْآمْنْ بْݣَاعْ دَاكْشِّي اللِّي جَا فْالشّْرَعْ وْكْتُبْ الْأَنْبِيَا.

¹⁵وْكَنْتّْرَجَّا مْنْ اللَّهْ دَاكْشِّي اللِّي كَيْتّْسْنَّاوْ حْتَّى هُمَ، بْلِّي ݣَاعْ النَّاسْ الصَّالْحِينْ وْالضَّالْمِينْ غَادِي يْتّْبَعْتُو مْنْ الْمُوتْ.

¹⁶عْلَى هَادْشِّي حْتَّى أَنَا كَنْدِيرْ دِيمَا جْهْدِي بَاشْ يْكُونْ الضَّمِيرْ دْيَالِي صَافِي قُدَّامْ اللَّهْ وْقُدَّامْ النَّاسْ.

¹⁷وْمْنْ بَعْدْ غِيبَة طْوِيلَة رْجَعْتْ لْأُورْشَلِيمْ وْجَبْتْ مْعَايَ تَبَرُّعَاتْ لْلشَّعْبْ دْيَالِي، وْجِيتْ بَاشْ نْقَدّْمْ التَّقْدِمَاتْ لْلَّهْ.

¹⁸وْمْلِّي كْنْتْ كَنْدِيرْ هَادْشِّي لْقَاوْنِي فْبِيتْ اللَّهْ، وْكْنْتْ تْنَقِّيتْ، وْمَا كَانْتْ مْعَايَ حْتَّى شِي جْمَاعَة دْ النَّاسْ وْلَا دْرْتْ شِي فُوضَى.

¹⁹وْكَانْ وَاجْبْ عْلَى لِيهُودْ اللِّي مْنْ آسْيَا يْجِيوْ لْعَنْدْكْ وْيْتَّهْمُونِي، إِلَا كَانْتْ عَنْدْهُمْ شِي حَاجَة ضْدِّي.

²⁰وْلَا هَادُو بْرَاسْهُمْ اللِّي حَاضْرِينْ هْنَا يْݣُولُو، آشْ مْنْ دَنْبْ حَصّْلُو عْلِيَّ مْلِّي وْقَفْتْ نْدَافْعْ عْلَى رَاسِي قُدَّامْ الْمَجْلِسْ؟

²¹مْنْ غِيرْ عْلَى هَادْ الْكْلَامْ اللِّي ݣْلْتُه وْأَنَا وَاقْفْ وَسْطْهُمْ: نْتُمَ كَتْحَاكْمُونِي الْيُومْ حِيتْ كَنْآمْنْ بْلِّي الْمُوتَى كَيْتّْبَعْتُو».

²²وْحِيتْ كَانْ فِيلِكْسْ عَارْفْ بْزَّافْ عْلَى طْرِيقْ يَسُوعْ، أَجّْلْ الْجَلْسَة وْݣَالْ: «وَقْتْمَا وْصَلْ قَايْدْ الْقُيَّادْ دْ الْعَسْكَرْ لِيسِيَاسْ لّْهْنَا، غَادِي نْشُوفْ الدَّعْوَة دْيَالْكُمْ».

²³وْآمْرْ الْحَاكْمْ وَاحْدْ مْنْ الْقُيَّادْ دْ الْعَسْكَرْ اللِّي مْكَلّْفْ بْبُولُسْ، بَاشْ يْحْضِيهْ وَلَكِنْ يْخَلِّيهْ حُرّْ شْوِيَّة، وْمَا يْمْنَعْ حْتَّى شِي وَاحْدْ مْنْ صْحَابُه بَاشْ يْتّْسَخّْرْ عْلِيهْ وْلَا يْزُورُه.

²⁴وْمْنْ بَعْدْ شِي يَّامَاتْ، جَا فِيلِكْسْ وْمْعَاهْ مْرَاتُه دُرُوسِلَا وْهِيَ يْهُودِيَّة، وْسْتَدْعَى بُولُسْ وْسْمَعْ كْلَامُه عْلَى الْإِيمَانْ بْالْمَسِيحْ يَسُوعْ.

²⁵وْمْلِّي تّْكَلّْمْ بُولُسْ عْلَى التَّقْوَى وْالرّْزَانَة وْيُومْ الْحِسَابْ، خَافْ فِيلِكْسْ وْݣَالْ لِيهْ: «تْقْدَرْ تْمْشِي دَابَا، وْمْلِّي نْلْقَا شِي وَقْتْ غَنْصِيفْطْ عْلِيكْ».

²⁶وْكَانْ فِيلِكْسْ كَيْتّْمَنَّى يْعْطِيهْ بُولُسْ الْفْلُوسْ بَاشْ يْطَلْقُه، عْلَى دَاكْشِّي كَانْ كَيْصِيفْطْ عْلِيهْ بْزَّافْ دْيَالْ الْمَرَّاتْ وْكَيْتّْكَلّْمْ مْعَاهْ.

²⁷وْمْنْ بَعْدْ عَامَيْنْ وْلَّى بُورْكِيُّوسْ فَسْتُوسْ حَاكْمْ فْبْلَاصْةْ فِيلِكْسْ. وْحِيتْ كَانْ فِيلِكْسْ بَاغِي يْرْضِي لِيهُودْ، خْلَّا بُولُسْ فْالْحَبْسْ.