Read Moroccan Standard Translation الْأَعْمَالْ 25 Bible Online

الْأَعْمَالْ 25 - Moroccan Standard Translation bible

الْأَعْمَالْ 25

¹الْفَصْلْ خَمْسَة وْعْشْرِينْ وْمْلِّي خْدَا فَسْتُوسْ الْحُكْمْ، طْلَعْ مْنْ قَيْصَرِيَّة لْأُورْشَلِيمْ مْنْ بَعْدْ تْلْتْ يَّامْ.

²وْقَدّْمُو لِيهْ الرُّؤَسَا دْ رْجَالْ الدِّينْ وْالزُّعَمَا دْيَالْ لِيهُودْ الدَّعْوَة دْيَالْهُمْ ضْدّْ بُولُسْ وْرَغْبُوهْ،

³وْبَاشْ يْرْضِيهُمْ طْلْبُو مْنُّه يْجِيبْ لِيهُمْ بُولُسْ لْأُورْشَلِيمْ، حِيتْ دَارُو لِيهْ حِيلَة بَاشْ يْقْتْلُوهْ فْالطّْرِيقْ.

⁴وْجَاوْبْهُمْ فَسْتُوسْ بْلِّي بُولُسْ غَادِي يْبْقَى مْسْجُونْ فْقَيْصَرِيَّة، وْبْلِّي هُوَ بْرَاسُه قْرِيبْ يْرْجَعْ لِيهَا.

⁵وْݣَالْ لِيهُمْ: «صِيفْطُو مْعَايَ الزُّعَمَا دْيَالْكُمْ لْقَيْصَرِيَّة، وْإِلَا كَانْ هَادْ الرَّاجْلْ دْنَبْ فْشِي حَاجَة، يْقَدّْمُو دْعَوْتْهُمْ ضْدُّه قُدَّامِي».

⁶وْݣْلَسْ عَنْدْهُمْ فَسْتُوسْ تْمَنْ يَّامْ وْلَا عَشْرْ يَّامْ، وْمْنْ بَعْدْ رْجَعْ لْقَيْصَرِيَّة. وْالْغَدّْ لِيهْ ݣْلَسْ عْلَى الْكُرْسِي دْ الْحُكْمْ، وْآمْرْ بَاشْ يْجِيبُو بُولُسْ.

⁷وْمْلِّي وْصَلْ بُولُسْ ضَارُو بِيهْ لِيهُودْ اللِّي جَاوْ مْنْ أُورْشَلِيمْ، وْتَّهْمُوهْ بْبْزَّافْ دْيَالْ التُّهَمْ الصّْعِيبَة، اللِّي مَا قَدْرُوشْ يْتَبْتُوهَا عْلِيهْ.

⁸وْدَافْعْ بُولُسْ عْلَى رَاسُه وْݣَالْ: «مَا دْنَبْتْ حْتَّى فْشِي حَاجَة، لَا فْشْرَعْ لِيهُودْ وْلَا فْبِيتْ اللَّهْ وْلَا فْحَقّْ الْقَيْصَرْ».

⁹وَلَكِنْ حِيتْ فَسْتُوسْ بْغَا يْرْضِي لِيهُودْ، ݣَالْ لْبُولُسْ: «وَاشْ تْبْغِي تْطْلَعْ لْأُورْشَلِيمْ، وْتّْحَاكْمْ تْمَّ قُدَّامِي عْلَى هَادْ الْأُمُورْ؟»

¹⁰وْهُوَ يْجَاوْبُه بُولُسْ: «أَنَا وَاقْفْ دَابَا قُدَّامْ الْمَحْكَمَة دْيَالْ الْقَيْصَرْ، وْفِيهَا خَاصّْنِي نْتّْحَاكْمْ. أَنَا مَا غْلَطْتْ حْتَّى فْشِي حَاجَة فْحَقّْ لِيهُودْ، وْنْتَ عَارْفْ هَادْشِّي مْزْيَانْ.

¹¹وْإِلَا لْقِيتُو بْلِّي دْنَبْتْ، وْلَا دْرْتْ شِي حَاجَة كَتْسْتَاهْلْ الْمُوتْ، أَنَا رَاهْ مَا كَنْتّْهَرّْبْشْ مْنْ الْمُوتْ. وَلَكِنْ إِلَا كَانْ هَادْشِّي اللِّي كَيْتَّهْمُونِي بِيهْ بَاطْلْ، حْتَّى شِي وَاحْدْ مَا يْقْدَرْ يْسَلّْمْنِي لِيهُمْ. أَنَا كَنْسْتَانْفْ الدَّعْوَة دْيَالِي لْقَيْصَرْ».

¹²وْدِيكْ السَّاعَة تّْشَاوْرْ فَسْتُوسْ مْعَ اللِّي كَيْعَاوْنُوهْ، وْهُوَ يْجَاوْبْ بُولُسْ: «نْتَ سْتَانْفْتِي الدَّعْوَة دْيَالْكْ لْقَيْصَرْ، إِيوَا رَاهْ لْقَيْصَرْ غَادِي تْمْشِي».

¹³وْمْنْ بَعْدْ شِي يَّامَاتْ، جَا الْمَلِكْ أَݣْرِيبَاسْ وْبَرْنِيكَة لْقَيْصَرِيَّة بَاشْ يْسَلّْمُو عْلَى فَسْتُوسْ.

¹⁴وْمْلِّي ݣَلْسُو تْمَّ يَّامَاتْ كْتَارْ، حْكَى فَسْتُوسْ لْلْمَلِكْ أَݣْرِيبَاسْ عْلَى قَضِيَّةْ بُولُسْ وْݣَالْ لِيهْ: «كَايْنْ هْنَا وَاحْدْ الرَّاجْلْ خْلَّاهْ الْحَاكْمْ فِيلِكْسْ فْالْحَبْسْ.

¹⁵وْمْلِّي كْنْتْ فْأُورْشَلِيمْ، شْكَاوْ لِيَّ بِيهْ الرُّؤَسَا دْ رْجَالْ الدِّينْ وْشْيُوخْ لِيهُودْ، وْطْلْبُو مْنِّي نْحْكَمْ عْلِيهْ.

¹⁶وْجَاوْبْتْهُمْ بْلِّي مْنْ الْعَادَة دْيَالْ الرُّومَانْ مَا يْسَلّْمُوشْ شِي وَاحْدْ عْلِيهْ شِي تُهْمَة حْتَّى يْوَاجْهْ اللِّي مْتَّهْمِينُه وْيْدَافْعْ عْلَى رَاسُه ضْدّْ الدَّعْوَة دْيَالْهُمْ.

¹⁷وْمْلِّي جَاوْ لّْهْنَا، مَا ضَيّْعْتْشْ الْوَقْتْ، وْالْغَدّْ لِيهْ ݣْلَسْتْ عْلَى الْكُرْسِي دْ الْحُكْمْ، وْآمْرْتْ بَاشْ يْجِيبُو هَادْ الرَّاجْلْ.

¹⁸وْمْلِّي وْقْفُو هَادُوكْ اللِّي مْتَّهْمِينُه، مَا دْكْرُو حْتَّى شِي تُهْمَة مْنْ دَاكْشِّي اللِّي كْنْتْ كَنْتّْسَنَّى،

¹⁹وَلَكِنْ كَانْ بِينْهُمْ وْبِينُه شِي قَضِيَّة عْلَى الدِّينْ دْيَالْهُمْ، وْعْلَى وَاحْدْ الرَّاجْلْ سْمِيتُه يَسُوعْ مَاتْ، وْبُولُسْ كَيْݣُولْ بْلِّي هُوَ حَيّْ.

²⁰وْمْلِّي حَرْتْ فْهَادْ الْقَضِيَّة، سْوّْلْتْ بُولُسْ وَاشْ يْبْغِي يْطْلَعْ لْأُورْشَلِيمْ بَاشْ يْتّْحَاكْمْ فِيهَا عْلَى هَادْ الْأُمُورْ.

²¹وَلَكِنْ بُولُسْ سْتَانْفْ الدَّعْوَة دْيَالُه لْقَيْصَرْ بَاشْ يْقَرّْرْ فِيهَا، دَاكْشِّي عْلَاشْ آمْرْتْ بَاشْ يْبْقَى فْالْحَبْسْ حْتَّى نْصِيفْطُه لْقَيْصَرْ».

²²وْهُوَ يْݣُولْ أَݣْرِيبَاسْ لْفَسْتُوسْ: «حْتَّى أَنَا بْغِيتْ نْسْمَعْ هَادْ الرَّاجْلْ». وْجَاوْبُه فَسْتُوسْ: «غْدَّا غَتْسَمْعُه».

²³وْالْغَدّْ لِيهْ، جَا أَݣْرِيبَاسْ وْبَرْنِيكَة وْسْتَقْبْلُوهُمْ النَّاسْ سْتِقْبَالْ كْبِيرْ. وْدَخْلُو لْلْبْلَاصَة فِينْ غَيْسَمْعُو الْحُكْمْ، مْعَ الرُّؤَسَا دْ الْعَسْكَرْ وْالنَّاسْ اللِّي مْعْرُوفِينْ فْالْمْدِينَة. وْآمْرْ فَسْتُوسْ بَاشْ يْجِيبُو بُولُسْ.

²⁴وْݣَالْ فَسْتُوسْ: «بْغِيتْ نْݣُولْ لِيكُمْ آ سَعَادَةْ الْمَلِكْ أَݣْرِيبَاسْ وْنْتُمَ آ اللِّي حَاضْرِينْ مْعَانَا هْنَا، بْلِّي هَادْ الرَّاجْلْ اللِّي كَتْشُوفُو فِيهْ شْكَا لِيَّ بِيهْ ݣَاعْ الشَّعْبْ دْ لِيهُودْ فْأُورْشَلِيمْ وْهْنَا. وْكَانُو كَيْغَوّْتُو وْكَيْݣُولُو بْلِّي مَا خَاصُّوشْ يْبْقَى حَيّْ.

²⁵أَمَّا أَنَا، رَاهْ كَنْشُوفْ بْلِّي مَا دَارْ حْتَّى شِي حَاجَة كَتْسْتَاهْلْ الْمُوتْ، وَلَكِنْ هُوَ سْتَانْفْ الدَّعْوَة دْيَالُه لْقَيْصَرْ، وْقَرّْرْتْ بَاشْ نْصِيفْطُه.

²⁶وْمَا عَنْدِي حْتَّى شِي حَاجَة مْتْأَكّْدْ مْنّْهَا بَاشْ نْكْتَبْهَا لْقَيْصَرْ. عْلَى دَاكْشِّي جْبْتُه قُدَّامْكُمْ، وْبْالضَّبْطْ قُدَّامْكْ آ سَعَادَةْ الْمَلِكْ أَݣْرِيبَاسْ، بَاشْ إِلَا حَقّْقْتُو مْعَاهْ فْالْقَضِيَّة دْيَالُه نْلْقَا مَا نْكْتَبْ.

²⁷حِيتْ كَنْشُوفْ بْلِّي مَاشِي مْعْقُولْ نْصِيفْطْ مْسْجُونْ بْلَا مَا نْبَيّْنْ التُّهَمْ اللِّي ضْدُّه».