Read Moroccan Standard Translation الْأَعْمَالْ 26 Bible Online

الْأَعْمَالْ 26 - Moroccan Standard Translation bible

الْأَعْمَالْ 26

¹الْفَصْلْ سْتَّة وْعْشْرِينْ وْهُوَ يْݣُولْ أَݣْرِيبَاسْ لْبُولُسْ: «كَنْسَمْحُو لِيكْ بَاشْ تْدَافْعْ عْلَى رَاسْكْ». وْدِيكْ السَّاعَة بْدَا بُولُسْ كَيْدَافْعْ عْلَى رَاسُه وْݣَالْ:

²«آ سَعَادَةْ الْمَلِكْ أَݣْرِيبَاسْ! كَيْفَرّْحْنِي نْدَافْعْ عْلَى رَاسِي قُدَّامْكْ الْيُومْ، وْنْرَدّْ عْلَى كُلّْ حَاجَة كَيْتَّهْمُونِي بِيهَا لِيهُودْ،

³بْالْخُصُوصْ حِيتْ نْتَ كَتْعْرَفْ مْزْيَانْ التَّقَالِيدْ دْيَالْ لِيهُودْ وْالْمُنَاقَشَاتْ دْيَالْهُمْ. عْلَى هَادْشِّي كَنْطْلَبْ مْنّْكْ بَاشْ تْوَسّْعْ خَاطْرْكْ وْتْسْمَعْ لْكْلَامِي.

⁴ݣَاعْ لِيهُودْ كَيْعَرْفُو كِيفَاشْ كَانْتْ حْيَاتِي مْنْ الصّْغُرْ، وْكِيفَاشْ تْرَبِّيتْ وْعْشْتْ وَسْطْ الشَّعْبْ دْيَالِي فْأُورْشَلِيمْ.

⁵وْرَاهُمْ كَيْعَرْفُونِي مْنْ وَقْتْ طْوِيلْ، وْكُونْ بْغَاوْ، كُونْ شْهْدُو لِيَّ بْلِّي عْشْتْ فْرِّيسِي مْنْ الجّْمَاعَة اللِّي مْتْعَصّْبَة بْزَّافْ فْالدِّينْ دْيَالْنَا.

⁶وْأَنَا دَابَا وَاقْفْ كَنْتّْحَاكْمْ حِيتْ كَنْتّْرَجَّا دَاكْشِّي اللِّي وْعَدْ بِيهْ اللَّهْ جْدُودْنَا،

⁷وْهُوَ اللِّي كَيْتّْرَجَّاوْ الْقْبَايْلْ دْيَالْنَا بْطْنَاشْ بَاشْ يْتّْحَقّْقْ وْهُمَ كَيْعَبْدُو اللَّهْ بْاللِّيلْ وْبْالنّْهَارْ. وْعْلَى هَادْ الرّْجَا كَيْتَّهْمُونِي لِيهُودْ، آ سَعَادَةْ الْمَلِكْ.

⁸عْلَاشْ مَا كَتْصَدّْقُوشْ بْلِّي اللَّهْ كَيْبْعَتْ الْمُوتَى؟

⁹رَاهْ أَنَا بْرَاسِي كْنْتْ كَنْضَنّْ بْلِّي وَاجْبْ عْلِيَّ نْضَادّْ إِسْمْ يَسُوعْ النَّاصِرِي بْالْقُوَّة دْيَالِي كُلّْهَا.

¹⁰وْهَادْشِّي اللِّي دْرْتْ حْتَّى فْأُورْشَلِيمْ، وْبْالسُّلْطَة اللِّي خْدِيتْ مْنْ الرُّؤَسَا دْ رْجَالْ الدِّينْ حْبَسْتْ بْزَّافْ دْ الْمُومْنِينْ، وْمْلِّي كَانُو كَيْتّْقْتْلُو كْنْتْ مْوَافْقْ عْلَى الْمُوتْ دْيَالْهُمْ.

¹¹وْكْنْتْ كَنْعَاقْبْهُمْ فْدْيُورْ الصّْلَاة شْحَالْ مْنْ مَرَّة، وْكَنْبَزّْزْ عْلِيهُمْ يْݣُولُو كْلَامْ الْكُفْرْ. وْتّْزَادْ الْكُرْهْ دْيَالِي لِيهُمْ وْبْدِيتْ كَنْجْرِي مْنْ وْرَاهُمْ فْالْمْدُونْ اللِّي خَارْجَة عْلَى بْلَادْ الْيَهُودِيَّة بَاشْ نْعَدّْبْهُمْ».

¹²«وْسَافْرْتْ لْدِمَشْقْ، وْعَنْدِي السُّلْطَة وْالْوْكَالَة مْنْ عَنْدْ الرُّؤَسَا دْ رْجَالْ الدِّينْ بَاشْ نْشَدّْ الْمُومْنِينْ بْيَسُوعْ.

¹³وْفْالطّْرِيقْ مْعَ وَقْتْ الضّْهُرْ، شْفْتْ آ سَعَادَةْ الْمَلِكْ، ضَوّْ كَيْلْمَعْ مْنْ السّْمَا قْوَى مْنْ ضَوّْ الشّْمْسْ، ضَايْرْ بِيَّ وْبْهَادُوكْ اللِّي مْسَافْرِينْ مْعَايَ.

¹⁴وْطْحْنَا كُلّْنَا لْلْأَرْضْ، وْسْمَعْتْ صُوتْ كَيْݣُولْ لِيَّ بْاللُّغَة الْعِبْرِيَّة: شَاوُلْ! شَاوُلْ! عْلَاشْ كَتّْعَدَّى عْلِيَّ؟ رَاهْ صْعِيبْ عْلِيكْ تْوْقَفْ فْوَجْهِي.

¹⁵وْأَنَا نْسْوّْلُه: شْكُونْ نْتَ آ سِيدِي؟ وْهُوَ يْجَاوْبْنِي الرَّبّْ: أَنَا يَسُوعْ اللِّي نْتَ كَتّْعَدَّى عْلِيهْ.

¹⁶نُوضْ وْقَفْ عْلَى رْجْلِيكْ، حِيتْ رَانِي بَنْتْ لِيكْ بَاشْ نْدِيرْ مْنّْكْ خْدَّامْ دْيَالِي، وْتْكُونْ شَاهْدْ عْلَى هَادْ الرُّؤْيَا اللِّي شْفْتِينِي فِيهَا، وْعْلَى غِيرْهَا مْنْ الرُّؤْيَاتْ اللِّي غَادِي نْبَانْ لِيكْ فِيهُمْ.

¹⁷وْغَادِي نّْجِّيكْ مْنْ الشَّعْبْ، وْمْنْ ݣَاعْ الشّْعُوبْ اللِّي غَادِي نْصِيفْطْكْ لِيهُمْ،

¹⁸بَاشْ تْحَلّْ لِيهُمْ عِينِيهُمْ وْيْرْجْعُو مْنْ الضّْلَامْ لْلنُّورْ، وْمْنْ السُّلْطَة دْيَالْ الشِّيطَانْ يْرْجْعُو لْلَّهْ. وْمْلِّي يْآمْنُو بِيَّ يْتّْغَفْرُو لِيهُمْ دْنُوبْهُمْ، وْيْوَرْتُو مْعَ النَّاسْ الْمْقَدّْسِينْ.

¹⁹وْمْنْ دِيكْ السَّاعَة، آ سَعَادَةْ الْمَلِكْ أَݣْرِيبَاسْ، مَا عْصِيتْشْ هَادْ الرُّؤْيَا اللِّي جَاتْنِي مْنْ السّْمَا،

²⁰وْخَبّْرْتْ فْاللّْوّْلْ النَّاسْ دْيَالْ دِمَشْقْ، وْمْنْ بَعْدْ، النَّاسْ دْيَالْ أُورْشَلِيمْ وْالْبْلَادْ دْيَالْ الْيَهُودِيَّة كُلّْهَا، وْمْنْ بَعْدْ، ݣَاعْ الشّْعُوبْ اللِّي مَا كَيْآمْنُوشْ بْاللَّهْ، بْلِّي خَاصّْهُمْ يْتُوبُو وْيْرْجْعُو لْطْرِيقْ اللَّهْ، وْيْدِيرُو الْحْوَايْجْ الْمْزْيَانِينْ اللِّي كَيْبَيّْنُو التُّوبَة دْيَالْهُمْ.

²¹وْعْلَى هَادْشِّي شْدُّونِي لِيهُودْ وْأَنَا فْبِيتْ اللَّهْ، وْبْغَاوْ يْقْتْلُونِي،

²²وَلَكِنْ اللَّهْ عَاوْنِّي حْتَّى لْهَادْ النّْهَارْ، وْبْقِيتْ كَنْشْهَدْ بْيَسُوعْ لْلصّْغِيرْ وْالْكْبِيرْ. وْأَنَا مَا كَنْݣُولْ غِيرْ دَاكْشِّي اللِّي ݣَالُو الْأَنْبِيَا وْمُوسَى بْلِّي لَابْدّْ مَا يْطْرَا.

²³رَاهْ الْمَسِيحْ غَادِي يْتّْعَدّْبْ، وْغَادِي يْكُونْ هُوَ اللّْوّْلْ اللِّي غَادِي يْتّْبْعَتْ مْنْ الْمُوتْ، وْيْخَبّْرْ بْالنُّورْ هَادْ الشَّعْبْ وْݣَاعْ الشّْعُوبْ لْخْرِينْ».

²⁴وْمْلِّي كَانْ بُولُسْ كَيْدَافْعْ عْلَى رَاسُه بْهَادْ الْكْلَامْ، غَوّْتْ عْلِيهْ فَسْتُوسْ بْصُوتْ عَالِي وْݣَالْ: «نْتَ رَاكْ حْمَاقِتِي آ بُولُسْ! وْالْعِلْمْ دْيَالْكْ الْكْتِيرْ تَلّْفْ لِيكْ عَقْلَكْ!».

²⁵وْهُوَ يْجَاوْبْ بُولُسْ: «أَنَا مَاشِي حْمَقْ آ سَعَادَةْ فَسْتُوسْ، وْمَا كَنْݣُولْ غِيرْ الْحَقّْ وْالصَّحْ.

²⁶حِيتْ الْمَلِكْ أَݣْرِيبَاسْ اللِّي كَنْتّْكَلّْمْ مْعَاهْ دَابَا بْكُلّْ صَرَاحَة كَيْعْرَفْ هَادْشِّي، وْكَنْتِيقْ بْلِّي مَا كَتْخْفَى عْلِيهْ حْتَّى شِي حَاجَة مْنْ هَادْ الْأُمُورْ، حِيتْ مَا طْرَاتْشْ فْشِي قَنْتْ مَا مْعْرُوفْشْ.

²⁷وَاشْ كَتْآمْنْ آ سَعَادَةْ الْمَلِكْ أَݣْرِيبَاسْ بْالْأَنْبِيَا؟ أَنَا كَنْعْرَفْ بْلِّي رَاكْ كَتْآمْنْ بِيهُمْ».

²⁸وْݣَالْ أَݣْرِيبَاسْ لْبُولُسْ: «وَاشْ كَتْضَنّْ بْلِّي فْهَادْ الشّْوِيَة دْ الْوَقْتْ بْغِيتِي تْرَدّْنِي مَسِيحِي؟».

²⁹وْهُوَ يْجَاوْبُه بُولُسْ: «بْالْقْلِيلْ وْلَا بْالْكْتِيرْ مْنْ الْوَقْتْ، كَنْطْلَبْ مْنْ اللَّهْ لِيكْ وْلْݣَاعْ هَادُو اللِّي كَيْسَمْعُونِي الْيُومْ بَاشْ تْوَلِّيوْ بْحَالِي، وَلَكِنْ بْلَا هَادْ السّْنَاسْلْ».

³⁰وْمْلِّي ݣَالْ هَادْ الْكْلَامْ نَاضْ الْمَلِكْ وْالْحَاكْمْ وْبَرْنِيكَة وْاللِّي ݣَالْسِينْ مْعَاهُمْ،

³¹وْݣَالُو لْبَعْضِيَّاتْهُمْ وْهُمَ خَارْجِينْ: «هَادْ الرَّاجْلْ مَا دَارْ حْتَّى شِي حَاجَة اللِّي كَتْسْتَاهْلْ الْمُوتْ وْلَا الْحَبْسْ».

³²وْݣَالْ أَݣْرِيبَاسْ لْفَسْتُوسْ: «كَانْ مُمْكِنْ يْتّْطْلَقْ هَادْ الرَّاجْلْ كُونْ مَا سْتَانْفْشْ الدَّعْوَة دْيَالُه لْقَيْصَرْ».