Read Moroccan Standard Translation الْأَعْمَالْ 27 Bible Online

الْأَعْمَالْ 27 - Moroccan Standard Translation bible

الْأَعْمَالْ 27

¹الْفَصْلْ سْبْعَة وْعْشْرِينْ وْمْلِّي تّْقَرّْرْ بَاشْ نْسَافْرُو فْالْبْحَرْ لْإِيطَالِيَا، سَلّْمُو بُولُسْ وْشِي مْسْجُونِينْ خْرِينْ لْوَاحْدْ الْقَايْدْ دْ الْعَسْكَرْ مْنْ الْفَرْقَة الْإِمْبْرَاطُورِيَّة سْمِيتُه يُولِيُوسْ.

²وْرْكَبْنَا فْوَاحْدْ السّْفِينَة مْنْ مْدِينْةْ أَدْرَامِيتْ غَادْيِينْ لْشِي مْرَاسِي فْبْلَادْ آسْيَا، وْمْشَى مْعَانَا أَرِسْتَرْخُسْ وْهُوَ مَكِدُونِي مْنْ تْسَالُونِيكِي.

³وْالْغَدّْ لِيهْ، وْصَلْنَا لْصَيْدَا. وْتْعَامْلْ يُولِيُوسْ مْزْيَانْ مْعَ بُولُسْ، وْخْلَّاهْ يْمْشِي لْعَنْدْ صْحَابُه بَاشْ يَاخُدْ مْنّْهُمْ دَاكْشِّي اللِّي كَانْ مْحْتَاجْ لِيهْ.

⁴وْمْنْ بَعْدْ، سَافْرْنَا مْنْ تْمَّ وْدْزْنَا مْنْ حْدَا قُبْرُصْ، عْلَاحْقَّاشْ الرِّيحْ كَانْتْ ضْدّْنَا.

⁵وْمْنْ بَعْدْمَا فْتْنَا جْوَايْهْ كِيلِيكِيَّة وْبَمْفِيلِيَّة، نْزَلْنَا فْمِيرَا فْبْلَادْ لِيكِيَّة.

⁶وْتْمَّ لْقَا الْقَايْدْ دْ الْعَسْكَرْ يُولِيُوسْ سْفِينَة مْنْ الْإِسْكَنْدَرِيَّة غَادْيَة لْإِيطَالِيَا، وْطَلّْعْنَا لِيهَا.

⁷وْبْقَاتْ السّْفِينَة غَادْيَة بِينَا بْشْوِيَّة يَّامَاتْ كْتَارْ، وْبَزّْزْ بَاشْ قَرّْبْنَا لْكِنِيدُسْ وَلَكِنْ الرِّيحْ مَا خْلَّاتْنَاشْ نّْزْلُو فِيهَا، وْحْنَا نْكَمّْلُو السّْفَرْ دْيَالْنَا حْدَا كِرِيتْ لْجِهْةْ سَلْمُونَة.

⁸وْقَرّْبْنَا لْجَنْبْ الْبْحَرْ، وْبَزّْزْ بَاشْ وْصَلْنَا لْوَاحْدْ الْبْلَاصَة سْمِيتْهَا «الْمْرَاسِي الْمْزْيَانِينْ»، قْرِيبَة لْمْدِينْةْ لَسَائِيَة.

⁹وْمْلِّي دَازْ وَقْتْ طْوِيلْ وْوْلَّى السّْفَرْ فْالْبْحَرْ خَطَرْ، حِيتْ كَانْ وَقْتْ الصّْيَامْ فَاتْ، بْدَا بُولُسْ كَيْنَبّْهْ الْبْحَّارَة

¹⁰وْݣَالْ لِيهُمْ: «آ الْخُوتْ، كَنْشُوفْ بْلِّي السّْفَرْ دْيَالْنَا مْنْ هْنَا لْلْقُدَّامْ فِيهْ خَطَرْ وْخْسْرَانْ كْبِيرْ مَاشِي غِيرْ عْلَى السّْفِينَة وْالسّْلْعَة اللِّي فِيهَا، وَلَكِنْ حْتَّى عْلِينَا حْنَا».

¹¹وَلَكِنْ الْقَايْدْ دْ الْعَسْكَرْ دَارْ بْكْلَامْ الرَّايْسْ وْمُولْ السّْفِينَة وْمَا دَّاهَاشْ فْكْلَامْ بُولُسْ.

¹²وْكَانْتْ الْمَرْسَى مَا صَالْحَاشْ يْدَوّْزُو فِيهَا الشّْتْوَا. وْالْأَغْلَبِيَّة شَافُو بْلِّي خَاصّْهُمْ يْرَحْلُو مْنْ تْمَّ، لَعَلَّ وَعَسَى يْقَدْرُو يْوَصْلُو لْفِينِكْسْ، وْيْدَوّْزُو فِيهَا الشّْتْوَا. وْهِيَ مَرْسَى فْكِرِيتْ مْحْلُولَة لْجِهْةْ الْجَنُوبْ الْغَرْبِي وْالشَّمَالْ الْغَرْبِي.

¹³وْمْلِّي تْحَرّْكَاتْ نْسْمَة خْفِيفَة دْيَالْ الرِّيحْ مْنْ جِهْةْ الْجَنُوبْ، ضْنُّو بْلِّي نَالُو الْمُرَادْ دْيَالْهُمْ، وْهْزُّو الْفِيسَانْ دْيَالْ السّْفِينَة وْمْشَاوْ لْجَنْبْ الْبْحَرْ دْيَالْ كِرِيتْ.

¹⁴وَلَكِنْ مْنْ بَعْدْ وَقْتْ قْلِيلْ، نَاضْتْ وَاحْدْ الرِّيحْ قْوِيَّة سْمِيتْهَا الشَّمَالِيَّة الشَّرْقِيَّة مْنْ جِهْةْ الْجَزِيرَة

¹⁵وْهِيَ تْضْرَبْ السّْفِينَة. وْمْلِّي صْعَابْ عْلَى السّْفِينَة تْقَاوْمْهَا، سَلّْمْنَا أَمْرْنَا وْوْلَّاتْ الرِّيحْ غَادْيَة بِينَا.

¹⁶وْتْضَرّْݣْنَا مْنْ الرِّيحْ مْلِّي دْزْنَا حْدَا وَاحْدْ الْجَزِيرَة صْغِيرَة سْمِيتْهَا كُودَا، وْبَزّْزْ بَاشْ قْدَرْنَا نْعَتْقُو الْفْلُوكَة دْيَالْ النّْجَا.

¹⁷وْمْلِّي هْزُّوهَا لْلسّْفِينَة دَوّْزُو الْحْبَالْ عْلَى السّْفِينَة بَاشْ يْأَمّْنُو الْفْلُوكَة. وْخَافُو لَتْدْفَعْ الرِّيحْ السّْفِينَة لْجِهْةْ الرّْمْلَة اللِّي كَتّْحَرّْكْ تَحْتْ الْمَا، وْهُمَ يْنَزّْلُو الْقْلُوعَ وْبْدَاوْ الْمَّاجْ كَيْجَرُّو السّْفِينَة.

¹⁸وْالْغَدّْ لِيهْ تّْزَادْتْ الرِّيحْ، وْبْدَاوْ كَيْرْمِيوْ السّْلْعَة فْالْبْحَرْ.

¹⁹وْفْالنّْهَارْ التَّالْتْ لَاحُو شْوِيَّة مْنْ الْعْدَّة دْيَالْ السّْفِينَة فْالْبْحَرْ بْيْدِّيهُمْ.

²⁰وْدَازْتْ يَّامَاتْ كْتِيرَة مَا قْدَرْنَا نْشُوفُو فِيهَا لَا شْمْسْ وَلَا نْجُومْ. وْبْقَاتْ الرِّيحْ كَتْسُوطْ بْزَّافْ حْتَّى قْطَعْنَا الرّْجَا فْالنّْجَا.

²¹وْمْلِّي دَازْتْ مُدَّة طْوِيلَة مَا كْلَاوْ فِيهَا الرّْجَالْ اللِّي فْالسّْفِينَة وَالُو، وْقَفْ بُولُسْ وَسْطْهُمْ وْݣَالْ: «آ الْخُوتْ، كَانْ خَاصّْكُمْ تْسَمْعُو لْكْلَامِي، رَاهْ مَا كَانْشْ عْلِيكُمْ تْسَافْرُو فْالْبْحَرْ مْنْ كِرِيتْ، بَاشْ مَا تْوَقْعُوشْ فْهَادْ الْمْصَايْبْ وْالْخْسَارَة.

²²وْدَابَا كَنْطْلَبْ مْنّْكُمْ بَاشْ تّْشَجّْعُو، حِيتْ حْتَّى وَاحْدْ مْنّْكُمْ مَا غَادِي يْمُوتْ، وَلَكِنْ السّْفِينَة بُوحْدْهَا اللِّي غَادْيَة تْتْهَرّْسْ.

²³عْلَاحْقَّاشْ وْقَفْ عْلِيَّ هَادْ اللِّيلَة مَلَاكْ مْنْ عَنْدْ اللَّهْ اللِّي أَنَا مْلْكُه وْكَنْعَبْدُه،

²⁴وْݣَالْ لِيَّ: مَا تْخَافْشْ آ بُولُسْ! لَابْدّْ مَا تْوْقَفْ قُدَّامْ الْقَيْصَرْ. وْاللَّهْ وْهَبْ لِيكْ الْحَيَاةْ دْيَالْ ݣَاعْ النَّاسْ اللِّي مْسَافْرِينْ مْعَاكْ.

²⁵وْدَابَا تْشَجّْعُو آ الْخُوتْ حِيتْ أَنَا كَنْتِيقْ فْاللَّهْ، وْالْأُمُورْ كُلّْهَا غَادِي تْمْشِي كِمَا تّْݣَالْ لِيَّ.

²⁶وَلَكِنْ لَابْدّْ مَا يْدَفْعُونَا الْمَّاجْ لْشِي جَزِيرَة».

²⁷وْفْاللِّيلَة الرّْبَعْطَاشْ وْحْنَا مَازَالْ مُّوضّْرِينْ فْالْبْحَرْ دْيَالْ أَدْرِيَا، ضْنُّو الْبْحَّارَة مْعَ نَصّْ اللِّيلْ بْلِّي كَيْقَرّْبُو لْلْبْرّْ.

²⁸وْعَبْرُو الْغُرْقْ دْيَالْ الْبْحَرْ وْلْقَاوْ تْقْرِيبًا رْبْعِينْ مِتْرُو، وْمْلِّي زَادُو شْوِيَّة، عَبْرُو عَاوْتَانِي وْهُمَ يْلْقَاوْ تْقْرِيبًا تْلَاتِينْ مِتْرُو.

²⁹وْخَافُو لَتّْضْرَبْ السّْفِينَة بْالصّْخَرْ، وْلَاحُو رْبْعَة دْيَالْ الْفِيسَانْ مْنْ اللُّورْ دْيَالْ السّْفِينَة، وْبْدَاوْ كَيْتّْرَجَّاوْ فُوقَاشْ يْطْلَعْ النّْهَارْ.

³⁰وْمْلِّي بْغَاوْ الْبْحَّارَة يْهَرْبُو مْنْ السّْفِينَة، وْدَارُو رَاسْهُمْ بْحَالْ إِلَا غَادِي يْلُوحُو الْفِيسَانْ مْنْ الْقُدَّامْ دْيَالْ السّْفِينَة وْنَزّْلُو الْفْلُوكَة لْلْبْحَرْ،

³¹ݣَالْ بُولُسْ لْلْقَايْدْ دْ الْعَسْكَرْ وْلْلْعَسْكَرْ: «إِلَا مَا بْقَاوْشْ هَادْ الْبْحَّارَة فْالسّْفِينَة، رَاهْ مَا تْقَدْرُوشْ تْنْجَاوْ».

³²دِيكْ السَّاعَة قَطّْعُو الْعَسْكَرْ الْحْبَالْ دْيَالْ الْفْلُوكَة وْخْلَّاوْهَا تْطِيحْ.

³³وْمْلِّي قَرّْبْ يْطْلَعْ النّْهَارْ، طْلَبْ مْنّْهُمْ بُولُسْ كُلّْهُمْ بَاشْ يَاكْلُو شِي حَاجَة، وْݣَالْ لِيهُمْ: «رَاهْ دَازْتْ رْبَعْطَاشْرْ يُومْ وْنْتُمَ كَتّْسْنَّاوْ جِيعَانِينْ بْلَا مَا دُّوقُو النّْعْمَة.

³⁴وْدَابَا كَنْطْلَبْ مْنّْكُمْ بَاشْ تَاكْلُو شِي حَاجَة، حِيتْ رَاكُمْ مْحْتَاجِينْ لْلْمَاكْلَة بَاشْ تْنْجَاوْ، وْرَاهْ حْتَّى شَعْرَة وَحْدَة مْنْ رْيُوسْكُمْ مَا غَادِي تّْقَاسْ».

³⁵وْمْلِّي ݣَالْ بُولُسْ هَادْ الْكْلَامْ، خْدَا الْخُبْزْ وْشْكَرْ اللَّهْ قُدَّامْهُمْ كُلّْهُمْ، وْمْنْ بَعْدْ قْطّْعُه وْبْدَا كَيَاكُلْ.

³⁶وْهُمَ يْتْشَجّْعُو كُلّْهُمْ وْكْلَاوْ.

³⁷وْكْنَّا كُلّْنَا فْالسّْفِينَة مْيَتَايْنْ وْسْتَّة وْسْبْعِينْ وَاحْدْ.

³⁸وْمْنْ بَعْدْمَا شْبْعُو، بْدَاوْ كَيْلُوحُو الْݣْمْحْ فْالْبْحَرْ بَاشْ يْخَفّْفُو الْحْمَلْ عْلَى السّْفِينَة.

³⁹وْمْلِّي طْلَعْ النّْهَارْ، صْعَابْ عْلَى الْبْحَّارَة يْعَرْفُو إِينَ بْلَادْ وْصْلُو. وَلَكِنْ شَافُو الدّْخْلَة دْيَالْ الْبْرّْ عَنْدْهَا وَاحْدْ الجَّنْبْ فْالْبْحَرْ، وْقَرّْرُو بَاشْ يْدِّيوْ السّْفِينَة لْجِهْتْهَا إِلَا قَدْرُو.

⁴⁰وْهُمَ يْطَلْقُو الْفِيسَانْ وْخْلَّاوْهُمْ يْطِيحُو فْالْبْحَرْ، وْدِيكْ السَّاعَة نِيتْ حْلُّو الْحْبَالْ اللِّي كَتْرْبَطْ الدّْفَّة اللِّي كَتّْحَكّْمْ فْالسّْفِينَة، وْطَلّْعُو الْقَلْعْ الصّْغِيرْ لْجِهْةْ الرِّيحْ وْبْدَاوْ غَادْيِينْ جِهْةْ جَنْبْ الْبْحَرْ.

⁴¹وَلَكِنْ السّْفِينَة تّْضْرْبَاتْ مْعَ وَاحْدْ الْكُدْيَة دْيَالْ الرّْمْلَة، ضَايْرْ بِيهَا الْمَا مْنْ جُوجْ جْوَايْهْ وْوْحْلَاتْ فِيهَا، وْالْقُدَّامْ دْيَالْهَا مَا بْقَاشْ كَيْتّْحَرّْكْ. وْتّْهَرّْسْ اللّْخْرْ دْيَالْهَا بْالْقُوَّة دْيَالْ الْمَّاجْ.

⁴²وْتَّافْقُو الْعَسْكَرْ يْقْتْلُو الْمْسْجُونِينْ بَاشْ حْتَّى وَاحْدْ فِيهُمْ مَا يْهْرَبْ بْالْعُومَانْ.

⁴³وَلَكِنْ الْقَايْدْ دْ الْعَسْكَرْ بْغَا يْنَجِّي بُولُسْ، وْهُوَ يْمْنَعْهُمْ مْنْ دَاكْشِّي اللِّي فَكّْرُو فِيهْ، وْآمْرْ هَادُوكْ اللِّي قَادْرِينْ يْعُومُو بَاشْ يْتّْلَاحُو وْيْقْطْعُو لْلْبْرّْ هُمَ اللّْوّْلِينْ،

⁴⁴وْيْتْبْعُوهُمْ وْحْدِينْ مْنْ هَادُوكْ اللِّي بْقَاوْ عْلَى اللّْوَاحْ، وْلْخْرِينْ عْلَى الطّْرَافْ دْ الْخْشَبْ دْيَالْ السّْفِينَة. وْهَكَّا وْصْلُو كُلّْهُمْ سَالْمِينْ لْلْبْرّْ.