Read Moroccan Standard Translation الْأَعْمَالْ 28 Bible Online

الْأَعْمَالْ 28 - Moroccan Standard Translation bible

الْأَعْمَالْ 28

¹الْفَصْلْ تْمَنْيَة وْعْشْرِينْ وْمْلِّي تّْعْتَقْنَا عْرَفْنَا بْلِّي الْجَزِيرَة سْمِيتْهَا مَالْطَا.

²وْعَامْلُونَا النَّاسْ دْ الْبْلَادْ بْوَاحْدْ الضّْرَافَة كْبِيرَة، رَحّْبُو بِينَا وْشَعْلُو لِينَا الْعَافْيَة عْلَاحْقَّاشْ كَانْ الْبَرْدْ وْكَانْتْ الشّْتَا كَتّْصَبْ.

³وْجْمَعْ بُولُسْ حْزْمَة دْيَالْ الْحْطَبْ وْرْمَاهَا فْالْعَافْيَة، وْبْكْتْرَةْ السّْخُونِيَّة خْرْجَاتْ وَاحْدْ اللّْفْعَى تْعَلّْقَاتْ لِيهْ فْيْدُّه وْعْضَّاتُه.

⁴وْمْلِّي شَافُو السُّكَّانْ دْ الْبْلَادْ اللّْفْعَى لَاصْقَة فْيْدُّه، ݣَالُو لْبَعْضِيَّاتْهُمْ: «مَا يْكُونْ هَادْ الرَّاجْلْ غِيرْ شِي قْتَّالْ، حِيتْ الْحَقّْ مَا خْلَّاهْشْ يْعِيشْ وَاخَّا تّْعْتَقْ مْنْ الْبْحَرْ».

⁵وَلَكِنْ بُولُسْ سَاسْ اللّْفْعَى مْنْ يْدُّه فْالْعَافْيَة مْنْ غِيرْ مَا يْتْآدَى.

⁶وْبْدَاوْ كَيْتّْسْنَّاوْهْ يْتّْنْفَخْ وْلَا يْطِيحْ مْيّْتْ فْالْبْلَاصَة. وَلَكِنْ مْلِّي تّْسْنَّاوْ بْزَّافْ وْشَافُو بْلِّي مَا طْرَا لِيهْ وَالُو، بَدّْلُو النَّضْرَة دْيَالْهُمْ فِيهْ وْݣَالُو: «هَادَا رَاهْ إِلَاهْ!».

⁷وْكَانُو شِي فْدَادْنْ دْيَالْ بُوبْلِيُوسْ الْحَاكْمْ دْيَالْ الْجَزِيرَة ضَايْرِينْ بْدِيكْ الْبْلَاصَة، وْهُوَ يْرَحّْبْ بِينَا وْضَايْفْنَا مُدَّةْ تْلْتْ يَّامْ.

⁸وْكَانْ بَّاهْ مْرِيضْ شَادّْ الْفْرَاشْ، فِيهْ السّْخَانَة وْضَارَّاهْ كَرْشُه، وْدْخَلْ عَنْدُه بُولُسْ لْلْبِيتْ دْيَالُه وْصْلَّى وْحَطّْ يْدِّيهْ عْلِيهْ وْهُوَ يْشَافِيهْ.

⁹وْمْلِّي طْرَا هَادْشِّي، جَاوْ ݣَاعْ الْمَرْضَى اللِّي فْالْجَزِيرَة لْعَنْدْ بُولُسْ وْشْفَاهُمْ.

¹⁰وْتّْهَلَّاوْ فِينَا بْزَّافْ، وْمْلِّي بْغِينَا نْسَافْرُو عْطَاوْنَا ݣَاعْ دَاكْشِّي اللِّي غَادِي نْحْتَاجُو لِيهْ.

¹¹وْمْنْ بَعْدْ تْلْتْ شْهُورْ، رْكَبْنَا فْوَاحْدْ السّْفِينَة جَاتْ مْنْ الْإِسْكَنْدَرِيَّة وْمْرْسُومْ فِيهَا عَلَامَة دْيَالْ «الْإِلَاهَيْنْ التّْوَامْ»، كَانْتْ مْدَوّْزَة الشّْتْوَا فْالْجَزِيرَة.

¹²وْوْصَلْنَا لْسِرَاكُوسَا اللِّي فْصِقِلِيَّة وْݣْلَسْنَا تْمَّ تْلْتْ يَّامْ،

¹³وْمْنْ تْمَّ، كَمّْلْنَا السّْفَرْ فْالْبْحَرْ حْتَّى وْصَلْنَا لْرِيغِيُونْ. وْالْغَدّْ لِيهْ تْحَرّْكَاتْ رِيحْ مْنْ الْجَنُوبْ، وْفْالنّْهَارْ التَّانِي وْصَلْنَا لْبُوطِيُولِي

¹⁴فِينْ لْقِينَا شِي خُوتْ مُومْنِينْ، وْهُمَ يْطْلْبُو مْنَّا بَاشْ نْݣَلْسُو مْعَاهُمْ سْبَعْ يَّامْ. وْهَكَّا وْصَلْنَا لْرُومَا.

¹⁵وْمْلِّي سْمْعُو الْخُوتْ فْرُومَا بْلِّي وْصَلْنَا، خَرْجُو حْتَّى لْسُوقْ أَبِّيُوسْ وْهَبْطُو لْلْبْلَايْصْ دْيَالْ الْفْنَادْقْ بْتْلَاتَة بَاشْ يْتّْلَاقَاوْنَا. وْمْلِّي شَافْهُمْ بُولُسْ، شْكَرْ اللَّهْ وْزَادْ تْشَجّْعْ.

¹⁶وْمْلِّي وْصَلْنَا لْرُومَا، سْمْحُو لْبُولُسْ بَاشْ يْسْكُنْ بُوحْدُه مْعَ الْعَسْكْرِي اللِّي كَانْ كَيْحْضِيهْ.

¹⁷وْمْنْ بَعْدْ تْلْتْ يَّامْ صِيفْطْ بُولُسْ لْلنَّاسْ الْمُهِمِّينْ دْيَالْ لِيهُودْ بَاشْ يْجِيوْ لْعَنْدُه، وْمْلِّي تّْجَمْعُو ݣَالْ لِيهُمْ: «آ الْخُوتْ، أَنَا مَا دْرْتْ حْتَّى شِي حَاجَة ضْدّْ شَعْبْنَا وْلَا ضْدّْ التَّقَالِيدْ دْيَالْ جْدُودْنَا، وْدَخّْلُونِي لِيهُودْ لْلْحَبْسْ فْأُورْشَلِيمْ وْسَلّْمُونِي لْلْيْدِّينْ دْ الرُّومَانْ،

¹⁸اللِّي شَافُو فْالْقَضِيَّة دْيَالِي، وْبْغَاوْ يْطَلْقُو سْرَاحِي عْلَاحْقَّاشْ مَا لْقَاوْ حْتَّى شِي تُهْمَة اللِّي نْسْتَاهْلْ عْلِيهَا الْمُوتْ.

¹⁹وَلَكِنْ مْلِّي مَا بْغَاوْشْ لِيهُودْ، كَانْ مْلْزُومْ عْلِيَّ نْسْتَانْفْ الدَّعْوَة دْيَالِي لْلْقَيْصَرْ بْلَا مَا يَعْنِي هَادْشِّي بْلِّي بَاغِي نْتَّهْمْ الشَّعْبْ اللِّي أَنَا مْنُّه بْشِي حَاجَة.

²⁰عْلِيهَا طْلَبْتْ نْشُوفْكُمْ وْنْتّْكَلّْمْ مْعَاكُمْ، حِيتْ رَانِي مْكَتّْفْ بْهَادْ السّْنْسْلَة عْلَى قْبَلْ الرّْجَا دْيَالْ شَعْبْ إِسْرَائِيلْ».

²¹وْهُمَ يْݣُولُو لِيهْ: «مَا جَاتْنَا حْتَّى شِي رِسَالَة عْلَى قْبْلَكْ مْنْ بْلَادْ الْيَهُودِيَّة، وَلَا جَا عَنْدْنَا شِي وَاحْدْ مْنْ الْخُوتْ مْنْ تْمَّ وْخَبّْرْنَا وْكَلّْمْنَا بْشِي حَاجَة خَايْبَة عْلِيكْ.

²²وَلَكِنْ حْسَنْ لِينَا نْسَمْعُو مْنّْكْ آشْ كَتْفَكّْرْ، حِيتْ كَنْعَرْفُو بْلِّي النَّاسْ فْكُلّْ بْلَاصَة ضْدّْ هَادْ الجّْمَاعَة اللِّي نْتَ مْنّْهَا».

²³وْتَّافْقُو مْعَ بُولُسْ عْلَى وَاحْدْ النّْهَارْ، وْجَاوْ عَنْدُه لْدَارُه وْمْعَاهُمْ نَاسْ كْتَارْ. وْبْدَا بُولُسْ كَيْخَبّْرْهُمْ عْلَى مَمْلَكَةْ اللَّهْ مْنْ الصّْبَاحْ حْتَّى لْلعْشِيَّة. وْحَاوْلْ يْقْنَعْهُمْ شْكُونْ هُوَ يَسُوعْ مْنْ شْرَعْ مُوسَى وْكْتُبْ الْأَنْبِيَا،

²⁴شِي وْحْدِينْ مْنّْهُمْ قْتَنْعُو بْكْلَامُه وَلَكِنْ وْحْدِينْ خْرِينْ مَا آمْنُوشْ.

²⁵وْقْبَلْ مَا يْخَرْجُو مْنْ عَنْدُه وْهُمَ مَا مْتَّافْقِينْشْ مْعَ بْعْضِيَّاتْهُمْ، ݣَالْ لِيهُمْ بُولُسْ هَادْ الْكْلَامْ: «الرُّوحْ الْقُدُسْ تّْكَلّْمْ بْالْحَقّْ مْعَ جْدُودْكُمْ عْلَى لْسَانْ النّْبِي إِشْعِيَا

²⁶وْݣَالْ: سِيرْ لْعَنْدْ هَادْ الشَّعْبْ وْݣُولْ: وَاخَّا تْسَمْعُو اللِّي سْمَعْتُو مَا كَتْفَهْمُو وَالُو. وْوَاخَّا تْشُوفُو اللِّي شْفْتُو مَا كَيْبَانْ لِيكُمْ وَالُو.

²⁷حِيتْ قَلْبْ هَادْ الشَّعْبْ قْسَاحْ، السّْمَعْ دْيَالْهُمْ قْلَالْ، وْغَمّْضُو عِينِيهُمْ، بَاشْ مَا يْشُوفُوشْ بْعِينِيهُمْ، وْمَا يْسَمْعُوشْ بْوْدْنِيهُمْ، وْمَا يْفَهْمُوشْ بْقَلْبْهُمْ، وْيْرْجْعُو لِيَّ بَاشْ نْشَافِيهُمْ.

²⁸بْغِيتْكُمْ تْعَرْفُو بْلِّي اللَّهْ صِيفْطْ هَادْ النّْجَا لْلشّْعُوبْ اللِّي مَاشِي يْهُودْ وْهُمَ غَادِي يْسَمْعُو لِيهْ». [

²⁹وْمْلِّي ݣَالْ بُولُسْ هَادْ الْكْلَامْ، خَرْجُو لِيهُودْ وْبْدَاوْ كَيْتّْنَاقْشُو مْعَ بْعْضِيَّاتْهُمْ وْهُمَ مْقَلّْقِينْ.][٤]

³⁰وْسْكَنْ بُولُسْ عَامَيْنْ كَامْلَة فْالدَّارْ اللِّي كْرَاهَا لْرَاسُه، وْكَانْ كَيْرَحّْبْ بْكُلّْ مْنْ زَارُه،

³¹وْكَيْخَبّْرْ النَّاسْ بْمَمْلَكَةْ اللَّهْ وْكَيْعَلّْمْهُمْ عْلَى الرَّبّْ يَسُوعْ الْمَسِيحْ بْلَا مَا يْخَافْ، وْبْلَا مَا يْمَنْعُه حْتَّى حَدّْ.