Read Moroccan Standard Translation الْأَعْمَالْ 3 Bible Online

الْأَعْمَالْ 3 - Moroccan Standard Translation bible

الْأَعْمَالْ 3

¹الْفَصْلْ التَّالْتْ وْفْسَاعْةْ الصّْلَاة دْيَالْ التّْلَاتَة دْ الْعْشِيَّة، مْشَى بُطْرُسْ وْيُوحَنَّا لْبِيتْ اللَّهْ.

²وْكَانْ وَاحْدْ الرَّاجْلْ زْحَّافْ مْنْ كَرْشْ مُّه، كَيْهَزُّوهْ النَّاسْ كُلَّ نْهَارْ وْكَيْحَطُّوهْ حْدَا الْبَابْ دْيَالْ بِيتْ اللَّهْ، اللِّي سْمِيتُه الْبَابْ الزّْوِينْ، بَاشْ يْطْلَبْ الصَّدَقَة مْنْ النَّاسْ اللِّي كَيْدَخْلُو لْبِيتْ اللَّهْ.

³وْمْلِّي شَافْ هَادْ الرَّاجْلْ بُطْرُسْ وْيُوحَنَّا غَادْيِينْ يْدَخْلُو، طْلَبْ مْنّْهُمْ الصَّدَقَة.

⁴وَلَكِنْ بُطْرُسْ شَافْ فِيهْ مْزْيَانْ هُوَ وْيُوحَنَّا، وْمْنْ بَعْدْ ݣَالْ لِيهْ: «شُوفْ فِينَا!»

⁵وْشَافْ فِيهُمْ وْهُوَ كَيْتّْسَنَّى يَاخُدْ مْنّْهُمْ شِي حَاجَة.

⁶وَلَكِنْ بُطْرُسْ ݣَالْ لِيهْ: «مَا عَنْدِي لَا فْضَّة وَلَا دْهَبْ، وَلَكِنْ اللِّي عَنْدِي غَادِي نْعْطِيهْ لِيكْ: بْإِسْمْ يَسُوعْ الْمَسِيحْ النَّاصِرِي نُوضْ وْسِيرْ».

⁷وْشْدُّه مْنْ يْدُّه لِيمْنَى وْنَوّْضُه، وْدْغْيَا صْحَاحُو رْجْلِيهْ وْكْعَابُه،

⁸وْهُوَ يْنَقّْزْ وْوْقَفْ وْبْدَا كَيْمْشِي، وْدْخَلْ مْعَاهُمْ لْبِيتْ اللَّهْ وْهُوَ كَيْتّْمَشَّى وْكَيْنَقّْزْ وْكَيْسَبّْحْ اللَّهْ.

⁹وْالنَّاسْ كُلّْهُمْ شَافُوهْ وْهُوَ كَيْتّْمَشَّى وْكَيْسَبّْحْ اللَّهْ،

¹⁰وْعَرْفُوهْ بْلِّي هُوَ اللِّي كَانْ كَيْݣْلَسْ بَاشْ يْسْعَى حْدَا الْبَابْ دْيَالْ بِيتْ اللَّهْ، اللِّي سْمِيتُه الْبَابْ الزّْوِينْ، وْهُمَ يْتّْعَجّْبُو وْحَارُو فْهَادْشِّي اللِّي طْرَا لِيهْ.

¹¹وْمْلِّي كَانْ الرَّاجْلْ اللِّي تّْشَافَى شَادّْ فْبُطْرُسْ وْيُوحَنَّا، جْرَّاوْ لْعَنْدْهُمْ النَّاسْ كُلّْهُمْ لْجِهْةْ الْقَاعَة اللِّي سْمِيتْهَا الْقَاعَة دْ سُلَيْمَانْ وْهُمَ حَايْرِينْ.

¹²وْمْلِّي شَافْ بُطْرُسْ هَادْشِّي، ݣَالْ لْلنَّاسْ: «آ وْلَادْ إِسْرَائِيلْ، مَالْكُمْ كَتّْعَجّْبُو مْنْ هَادْشِّي؟ وْعْلَاشْ كَتْشُوفُو فِينَا بْحَالْ إِلَا بْالْقُوَّة وْلَا بْالتَّقْوَى دْيَالْنَا رْدِّينَا هَادْ الرَّاجْلْ كَيْتّْمَشَّى؟

¹³رَاهْ إِلَاهْ إِبْرَاهِيمْ وْإِسْحَاقْ وْيَعْقُوبْ، إِلَاهْ جْدُودْنَا، عْطَى الْعَزّْ لْلْخْدَّامْ دْيَالُه يَسُوعْ اللِّي قَدّْمْتُوهْ نْتُمَ وْنْكَرْتُوهْ قُدَّامْ الْحَاكْمْ بِيلَاطُسْ اللِّي قَرّْرْ بَاشْ يْطَلْقُه.

¹⁴وَلَكِنْ نْتُمَ نْكَرْتُو الْقُدُّوسْ اللِّي بْلَا دَنْبْ وْطْلَبْتُو بَاشْ يْتّْطْلَقْ لِيكُمْ رَاجْلْ قْتَّالْ.

¹⁵نْتُمَ قْتَلْتُو اللِّي كَيْعْطِي الْحَيَاةْ وَلَكِنْ اللَّهْ بَعْتُه مْنْ الْمُوتْ، وْحْنَا شَاهْدِينْ عْلَى هَادْشِّي.

¹⁶وْبْالْإِيمَانْ بْإِسْمْ يَسُوعْ، صْحَاحْ هَادْ الرَّاجْلْ اللِّي كَتْشُوفُو فِيهْ وْكَتْعَرْفُوهْ. وْالْإِيمَانْ بْيَسُوعْ هُوَ اللِّي عْطَى الصّْحَّة لْهَادْ الرَّاجْلْ قُدَّامْكُمْ كُلّْكُمْ.

¹⁷وْدَابَا آ الْخُوتْ، رَانِي كَنْعْرَفْ بْلِّي نْتُمَ وْحْتَّى الرُّؤَسَا دْيَالْكُمْ دْرْتُو هَادْشِّي لْيَسُوعْ وْنْتُمَ مَا عَارْفِينْشْ.

¹⁸وَلَكِنْ اللَّهْ هَكَّا كَمّْلْ دَاكْشِّي اللِّي خَبّْرْ بِيهْ عْلَى لْسَانْ الْأَنْبِيَا دْيَالُه كُلّْهُمْ، بْلِّي الْمَسِيحْ خَاصُّه يْتّْعَدّْبْ.

¹⁹إِيوَا تُوبُو وْرْجْعُو لْلَّهْ بَاشْ تّْمْحَا دْنُوبْكُمْ.

²⁰وْتْجِي سَاعْةْ الْفَرَجْ مْنْ عَنْدْ الرَّبّْ، وْيْصِيفْطْ الْمَسِيحْ يَسُوعْ اللِّي خْتَارُه لِيكُمْ مْنْ قْبَلْ،

²¹وْاللِّي خَاصّْ يْبْقَى فْالسّْمَا، حْتَّى تّْصْلَحْ ݣَاعْ الْأُمُورْ اللِّي تّْكَلّْمْ عْلِيهَا اللَّهْ مْنْ قْدِيمْ بْلْسَانْ الْأَنْبِيَا دْيَالُه الْمْقَدّْسِينْ كُلّْهُمْ.

²²وْرَاهْ مُوسَى ݣَالْ لْجْدُودْنَا: الرَّبّْ إِلَاهْكُمْ غَيْصِيفْطْ لِيكُمْ نْبِي بْحَالِي مْنْ وَسْطْ خُوتْكُمْ. لِيهْ خَاصّْكُمْ تْسَمْعُو فْكُلّْ مَا غَيْݣُولْ لِيكُمْ،

²³وْكُلّْ وَاحْدْ مَا غَيْسْمَعْشْ لْهَادْ النّْبِي غَادِي يْتّْعْزَلْ مْنْ وَسْطْ الشَّعْبْ وْيْتّْهْلَكْ.

²⁴وْݣَاعْ الْأَنْبِيَا، مْنْ صَمُوئِيلْ حْتَّى لْهَادُوكْ اللِّي جَاوْ مْنْ وْرَاهْ، تّْكَلّْمُو وْتّْنَبّْأُو بْهَادْ لِيَّامْ.

²⁵وْنْتُمَ رَاكُمْ وْلَادْ الْأَنْبِيَا، وْوْلَادْ الْعَهْدْ اللِّي عَاهْدْ بِيهْ اللَّهْ جْدُودْكُمْ مْلِّي ݣَالْ لْإِبْرَاهِيمْ: بْالتّْرِّيكَة دْيَالْكْ غَيْتّْبَارْكُو قْبَايْلْ الْأَرْضْ كُلّْهُمْ.

²⁶رَاهْ لِيكُمْ نْتُمَ فْاللّْوّْلْ لَمّْنْ صِيفْطْ اللَّهْ الْخْدَّامْ دْيَالُه يَسُوعْ بَاشْ يْبَارْكْكُمْ وْيْبَعّْدْ كُلّْ وَاحْدْ مْنّْكُمْ عْلَى الشَّرّْ دْيَالُه».