Read Moroccan Standard Translation الْأَعْمَالْ 4 Bible Online

الْأَعْمَالْ 4 - Moroccan Standard Translation bible

الْأَعْمَالْ 4

¹الْفَصْلْ الرَّابْعْ وْمْلِّي كَانْ بُطْرُسْ وْيُوحَنَّا كَيْتّْكَلّْمُو مْعَ النَّاسْ، جَاوْ لْعَنْدْهُمْ رْجَالْ الدِّينْ وْرَئِيسْ الْحَرَسْ دْ بِيتْ اللَّهْ وْالصّْدُّوقِيِّينْ،

²وْكَانُو مْقَلّْقِينْ بْزَّافْ عْلَاحْقَّاشْ كَانْ بُطْرُسْ وْيُوحَنَّا كَيْعَلّْمُو النَّاسْ، وْكَيْخَبّْرُو بْلِّي الْمُوتَى غَيْتّْبَعْتُو مْنْ الْمُوتْ كِمَا تّْبْعَتْ يَسُوعْ.

³وْهُمَ يْشَدُّوهُمْ وْدَخّْلُوهُمْ لْلْحَبْسْ حْتَّى لْلْغَدّْ لِيهْ، حِيتْ الشّْمْسْ بْدَاتْ كَتْغْرَبْ.

⁴وْبْزَّافْ دْ النَّاسْ اللِّي سْمْعُو هَادْ الْكْلَامْ آمْنُو، وْوْلَّاوْ الْمُومْنِينْ خَمْسَالَافْ وَاحْدْ تْقْرِيبًا.

⁵وْالْغَدّْ لِيهْ تّْجَمْعُو الرُّؤَسَا دْ لِيهُودْ وْالشّْيُوخْ وْالْعُلَمَا دْ الشّْرَعْ دْيَالْهُمْ فْأُورْشَلِيمْ،

⁶مْعَ حَنَّانْ رَئِيسْ رْجَالْ الدِّينْ وْقَيَافَا وْيُوحَنَّا وْإِسْكَنْدَرْ وْݣَاعْ اللِّي كَانُو مْنْ عَائِلْةْ الرُّؤَسَا دْ رْجَالْ الدِّينْ.

⁷وْجَابُو بُطْرُسْ وْيُوحَنَّا وْدَارُوهُمْ فْالْوَسْطْ وْبْدَاوْ كَيْسْوّْلُوهُمْ: «بْآشْ مْنْ قُوَّة وْبْآشْ مْنْ إِسْمْ دْرْتُو نْتُمَ هَادْشِّي؟».

⁸وْدِيكْ السَّاعَة، تْعَمّْرْ بُطْرُسْ بْالرُّوحْ الْقُدُسْ وْجَاوْبْهُمْ: «آ الرُّؤَسَا وْالشّْيُوخْ دْ الشَّعْبْ،

⁹إِلَا كْنَّا الْيُومْ كَنْتّْحَاسْبُو عْلَى خِيرْ دْرْنَاهْ فْرَاجْلْ زْحَّافْ وْكِيفَاشْ هَادْ الرَّاجْلْ تّْشَافَى،

¹⁰خَاصّْ تْعَرْفُو كُلّْكُمْ، وْيْعْرَفْ شَعْبْ إِسْرَائِيلْ كُلُّه بْلِّي بْإِسْمْ يَسُوعْ الْمَسِيحْ النَّاصِرِي اللِّي نْتُمَ صْلَبْتُوهْ وْاللِّي بَعْتُه اللَّهْ مْنْ بِينْ الْمُوتَى، وْقَفْ هَادْ الرَّاجْلْ قُدَّامْكُمْ صْحِيحْ.

¹¹هَادَا هُوَ الْحَجْرَة اللِّي مَا قْبْلْتُوهَاشْ نْتُمَ آ الْبْنَّايَا، وْاللِّي وْلَّاتْ هِيَ الْحَجْرَة دْ السَّاسْ.

¹²وْمَا كَايْنْشْ النّْجَا بْشِي حَدّْ مْنْ غِيرُه، حِيتْ مَا كَايْنْشْ شِي إِسْمْ آخُرْ تَحْتْ السّْمَا كُلّْهَا تّْعْطَى لْلنَّاسْ، اللِّي بِيهْ خَاصّْنَا نّْجَاوْ».

¹³وْمْلِّي شَافُو الشَّجَاعَة دْيَالْ بُطْرُسْ وْيُوحَنَّا، وْلْقَاوْهُمْ نَاسْ بْسَاطْ وْمَا قَارْيِينْشْ، تّْعَجّْبُو وْعَرْفُوهُمْ بْلِّي كَانُو مْعَ يَسُوعْ.

¹⁴وَلَكِنْ مْنْ بَعْدْمَا شَافُو الرَّاجْلْ اللِّي تّْشَافَى وَاقْفْ مْعَاهُمْ بْجُوجْ، مَا بْقَى لِيهُمْ مَا يْݣُولُو.

¹⁵وْآمْرُوهُمْ بَاشْ يْخَرْجُو مْنْ الْمَحْكَمَة، وْتّْشَاوْرُو بِينَاتْهُمْ،

¹⁶وْݣَالُو: «آشْ غَنْدِيرُو بْهَادْ الرّْجَالْ بْجُوجْ؟ حِيتْ بَايْنْ لْسُكَّانْ أُورْشَلِيمْ كُلّْهُمْ بْلِّي رَاهُمْ دَارُو عَلَامَة كْبِيرَة، وْحْنَا مَا نْقَدْرُوشْ نّْكْرُوهَا.

¹⁷وَلَكِنْ بَاشْ مَا تْزِيدْشْ تْدِيعْ هَادْ الْخْبَارْ وَسْطْ الشَّعْبْ، خَاصّْنَا نْهَدّْدُوهُمْ بَاشْ مَا يْبْقَاوْشْ يْتّْكَلّْمُو عْلَى إِسْمْ يَسُوعْ لْحْتَّى وَاحْدْ».

¹⁸وْهُمَ يْعَيْطُو عْلِيهُمْ وْوْصَّاوْهُمْ بَاشْ مَا يْتّْكَلّْمُوشْ وْمَا يْعَلّْمُوشْ عْلَى إِسْمْ يَسُوعْ.

¹⁹وَلَكِنْ بُطْرُسْ وْيُوحَنَّا رْدُّو عْلِيهُمْ وْݣَالُو: «حْكْمُو نْتُمَ بْالْحَقّْ قُدَّامْ اللَّهْ، وَاشْ نْسَمْعُو لِيكُمْ وْلَا نْسَمْعُو لْلَّهْ؟

²⁰حِيتْ مَا نْقَدْرُوشْ مَا نْتّْكَلّْمُوشْ عْلَى اللِّي شْفْنَا وْسْمَعْنَا».

²¹وْمْنْ بَعْدْمَا هَدّْدُوهُمْ مَرَّة خْرَى، طْلْقُوهُمْ، حِيتْ مَا لْقَاوْشْ كِيفَاشْ يْعَاقْبُوهُمْ، بْسْبَابْ الشَّعْبْ، عْلَاحْقَّاشْ ݣَاعْ النَّاسْ كَانُو كَيْعْطِيوْ الْعَزّْ لْلَّهْ عْلَى مَا جْرَا،

²²حِيتْ الرَّاجْلْ اللِّي تّْشَافَى بْهَادْ الْمُعْجِزَة كَانْ عَنْدُه كْتَرْ مْنْ رْبْعِينْ عَامْ.

²³وْمْلِّي تّْطْلَقْ بُطْرُسْ وْيُوحَنَّا، جَاوْ لْعَنْدْ صْحَابْهُمْ وْخَبّْرُوهُمْ بْݣَاعْ دَاكْشِّي اللِّي ݣَالُو لِيهُمْ الرُّؤَسَا دْ رْجَالْ الدِّينْ وْالشّْيُوخْ.

²⁴وْمْلِّي سْمْعُوهُمْ صْلَّاوْ لْلَّهْ بْقَلْبْ وَاحْدْ، وْݣَالُو: «آ سِيدِي رْبِّي، نْتَ هُوَ الْإِلَاهْ اللِّي خْلَقْ السّْمَا وْالْأَرْضْ وْالْبْحَرْ وْكُلّْ مَا فِيهُمْ،

²⁵وْبْالرُّوحْ الْقُدُسْ ݣْلْتِي عْلَى لْسَانْ جْدّْنَا دَاوُدْ، الْخْدَّامْ دْيَالْكْ: عْلَاشْ هَاجُو الشّْعُوبْ وْنْوَاوْ النَّاسْ الْبَاطْلْ؟

²⁶نَاضُو مُلُوكْ الْأَرْضْ، وْتّْجَمْعُو الرُّؤَسَا كُلّْهُمْ ضْدّْ الرَّبّْ وْضْدّْ الْمَسِيحْ دْيَالُه.

²⁷حِيتْ فْالْحَقِيقَة، تَّافْقْ هِيرُودُسْ وْبِيلَاطُسْ الْبُنْطِي مْعَ الشّْعُوبْ اللِّي مَا كَيْعَبْدُوشْ اللَّهْ وْقْبَايْلْ وْلَادْ إِسْرَائِيلْ ضْدّْ الْخْدَّامْ دْيَالْكْ الْقُدُّوسْ يَسُوعْ اللِّي خْتَارِيتِيهْ،

²⁸بَاشْ يْدِيرُو ݣَاعْ دَاكْشِّي اللِّي سْبَقْ وْبْغِيتِيهْ يْكُونْ بْالْقُوَّة وْالْمُرَادْ دْيَالْكْ.

²⁹وْدَابَا آ رْبِّي شُوفْ كِيفَاشْ كَيْهَدّْدُونَا، وْعْطِينَا حْنَا الْعْبِيدْ دْيَالْكْ بَاشْ نْتّْكَلّْمُو بْكْلَامْكْ بْلَا مَا نْخَافُو.

³⁰مْدّْ يْدّْكْ بَاشْ يْكُونْ الشِّفَا، وْبَاشْ يْجْرَاوْ مُعْجِزَاتْ وْأُمُورْ عْجِيبَة بْإِسْمْ الْخْدَّامْ دْيَالْكْ الْقُدُّوسْ يَسُوعْ».

³¹وْمْلِّي صْلَّاوْ، تّْزَعْزَعْ الْمُوضْعْ اللِّي كَانُو مْجْمُوعِينْ فِيهْ، وْتّْعَمّْرُو كُلّْهُمْ بْالرُّوحْ الْقُدُسْ، وْبْدَاوْ كَيْخَبّْرُو بْكْلَامْ اللَّهْ بْلَا مَا يْخَافُو.

³²وْكَانُو النَّاسْ اللِّي آمْنُو كَيْعِيشُو بْقَلْبْ وَاحْدْ وْنَفْسْ وَحْدَة، وْمَا كَانْ حْتَّى وَاحْدْ كَيْݣُولْ بْلِّي دَاكْشِّي اللِّي عَنْدُه مْلْكُه هُوَ، وَلَكِنْ كَانْتْ كُلّْ حَاجَة عَنْدْهُمْ مْشْرُوكَة بِينَاتْهُمْ.

³³وْبْقُوَّة كْبِيرَة كَانُو الرُّسُلْ كَيْشَهْدُو بْلِّي الرَّبّْ يَسُوعْ تّْبْعَتْ مْنْ الْمُوتْ، وْنِعْمَةْ اللَّهْ الْكْتِيرَة كَانْتْ عْلِيهُمْ كُلّْهُمْ،

³⁴حِيتْ حْتَّى وَاحْدْ فِيهُمْ مَا كَانْ مْخْصُوصْ، عْلَاحْقَّاشْ ݣَاعْ صْحَابْ الْأَرَاضِي وْلَا الدّْيُورْ كَانُو كَيْبِيعُو الْمْلْكْ دْيَالْهُمْ وْكَيْجِيبُو التَّمَنْ دْيَالُه،

³⁵وْكَيْحَطُّوهْ عَنْدْ رْجْلِينْ الرُّسُلْ، اللِّي كَانُو كَيْعْطِيوْ لْكُلّْ وَاحْدْ دَاكْشِّي اللِّي مْحْتَاجْ لِيهْ.

³⁶وْيُوسْفْ اللِّي سْمَّاوْهْ الرُّسُلْ بَرْنَابَا، اللِّي كَتْعْنِي وَلْدْ التَّشْجِيعْ، وْهُوَ مْنْ قْبِيلْةْ اللَّاوِيِّينْ وْأَصْلُه مْنْ قُبْرُصْ،

³⁷بَاعْ وَاحْدْ الْفْدَّانْ كَانْ عَنْدُه وْجَابْ التَّمَنْ دْيَالُه وْحَطُّه عَنْدْ رْجْلِينْ الرُّسُلْ.