Read Moroccan Standard Translation الْأَعْمَالْ 5 Bible Online

الْأَعْمَالْ 5 - Moroccan Standard Translation bible

الْأَعْمَالْ 5

¹الْفَصْلْ الْخَامْسْ وْوَاحْدْ الرَّاجْلْ سْمِيتُه حَنَانْيَا، تَّافْقْ مْعَ مْرَاتُه سَفِيرَة وْبَاعْ شِي حَاجَة مْنْ الْمْلْكْ دْيَالُه،

²وْخْبَّا طَرْفْ مْنْ الْفْلُوسْ وْمْرَاتُه عَارْفَة، وْجَابْ الْبَاقِي وْحَطُّه عَنْدْ رْجْلِينْ الرُّسُلْ.

³وْهُوَ يْݣُولْ لِيهْ بُطْرُسْ: «عْلَاشْ آ حَنَانْيَا غَرّْكْ الشِّيطَانْ وْكْدَبْتِي عْلَى الرُّوحْ الْقُدُسْ وْخَبِّيتِي مْنْ تَمَنْ الْأَرْضْ؟

⁴وَاشْ مَاشِي كُونْ بْقَاتْ رَاهَا كَانْتْ غَتْبْقَى لِيكْ؟ وْمْلِّي تّْبَاعْتْ وَاشْ مَا كَانْتْشْ دْيَالْكْ؟ إِيوَا عْلَاشْ دْرْتِي هَادْشِّي فْقَلْبَكْ؟ رَاكْ مَا كْدَبْتِيشْ عْلَى النَّاسْ وَلَكِنْ عْلَى اللَّهْ».

⁵وْمْلِّي سْمَعْ حَنَانْيَا هَادْ الْكْلَامْ طَاحْ وْمَاتْ، وْݣَاعْ اللِّي سْمْعُو هَادْشِّي خَافُو بْزَّافْ.

⁶وْنَاضُو الشُّبَّانْ وْكَفّْنُوهْ وْهْزُّوهْ بْرَّا وْدْفْنُوهْ.

⁷وْمْنْ بَعْدْ تْلَاتَة دْ السّْوَايْعْ تْقْرِيبًا، دْخْلَاتْ مْرَاتُه وْمَا كَانْتْشْ عَارْفَة آشْ وْقَعْ.

⁸وْهُوَ يْسْوّْلْهَا بُطْرُسْ: «ݣُولِي لِيَّ، وَاشْ بْهَادْ التَّمَنْ بْعْتُو الْأَرْضْ؟» وْجَاوْبَاتُه: «إِيِّهْ، بْهَادْ التَّمَنْ!»

⁹وْݣَالْ لِيهَا بُطْرُسْ: «مَالْكُمْ تَّافْقْتُو بَاشْ تْجَرّْبُو رُوحْ الرَّبّْ؟ هَاهُمَ الرّْجَالْ اللِّي دْفْنُو رَاجْلْكْ وْصْلُو لْلْبَابْ، وْغَادِي يْهَزُّوكْ حْتَّى نْتِ عْلَى بْرَّا».

¹⁰وْهِيَ تْطِيحْ دِيكْ السَّاعَة قُدَّامْ رْجْلِيهْ وْمَاتْتْ. وْدَخْلُو الشُّبَّانْ وْلْقَاوْهَا مْيّْتَة، وْهْزُّوهَا لْبَرَّا وْدْفْنُوهَا حْدَا رَاجْلْهَا.

¹¹وْخَافُو النَّاسْ دْ الْكْنِيسَة بْزَّافْ هُمَ وْݣَاعْ هَادُوكْ اللِّي سْمْعُو بْهَادْشِّي اللِّي وْقَعْ.

¹²وْطْرَاوْ عْلَى يْدِّينْ الرُّسُلْ بْزَّافْ دْ الْعَلَامَاتْ وْالْأُمُورْ الْعْجِيبَة فْوَسْطْ الشَّعْبْ، وْكَانُو كَيْتّْجَمْعُو بْقَلْبْ وَاحْدْ فْالْقَاعَة دْيَالْ سُلَيْمَانْ.

¹³وْمَا كَانْ حْتَّى حَدّْ مْنْ النَّاسْ لْخْرِينْ كَيْزْعَمْ يْتّْجْمَعْ مْعَاهُمْ، وَلَكِنْ الشَّعْبْ كَانْ كَيْحْتَرْمْهُمْ بْزَّافْ.

¹⁴وْبْزَّافْ دْ النَّاسْ رْجَالْ وْعْيَالَاتْ كَانُو كَيْآمْنُو بْالرَّبّْ،

¹⁵وْوْلَّاوْ النَّاسْ كَيْهَزُّو الْمَرْضَى وْكَيْخَرّْجُوهُمْ لْلزّْنَاقِي وْكَيْحَطُّوهُمْ عْلَى الْفْرَاشَاتْ وْالْحْصَايْرْ، بَاشْ حْتَّى إِلَا دَازْ بُطْرُسْ يْقِيسْ وَاخَّا غِيرْ الضّْلّْ دْيَالُه شِي وَاحْدْ مْنّْهُمْ.

¹⁶وْحْتَّى النَّاسْ دْ الْمْدُونْ اللِّي فْجْوَايْهْ أُورْشَلِيمْ تّْجَمْعُو، وْجَابُو الْمَرْضَى وْالنَّاسْ اللِّي مْعَدّْبِينْ بْالجّْنُونْ وْكَانُو كُلّْهُمْ كَيْبْرَاوْ.

¹⁷وْنَاضْ رَئِيسْ رْجَالْ الدِّينْ وْݣَاعْ هَادُوكْ اللِّي مْعَاهْ مْنْ جْمَاعْةْ الصّْدُّوقِيِّينْ، وْكَانْتْ قْلُوبْهُمْ عَامْرَة بْالْغِيرَة،

¹⁸وْهُمَ يْشَدُّو الرُّسُلْ وْرْمَاوْهُمْ فْالْحَبْسْ.

¹⁹وَلَكِنْ فْاللِّيلْ حَلّْ مَلَاكْ الرَّبّْ بِيبَانْ الْحَبْسْ وْخَرّْجْهُمْ وْݣَالْ لِيهُمْ:

²⁰«سِيرُو وْقْفُو فْبِيتْ اللَّهْ، وْخَبّْرُو الشَّعْبْ بْݣَاعْ الْكْلَامْ دْيَالْ هَادْ الْحَيَاةْ الجّْدِيدَة».

²¹وْسْمْعُو لِيهْ، وْدَخْلُو لْبِيتْ اللَّهْ جْوَايْهْ الْفْجَرْ وْبْدَاوْ كَيْعَلّْمُو النَّاسْ. وْمْنْ بَعْدْ جَا رَئِيسْ رْجَالْ الدِّينْ هُوَ وْاللِّي مْعَاهْ، وْجْمْعُو النَّاسْ دْ الْمَحْكَمَة وْشْيُوخْ شَعْبْ إِسْرَائِيلْ، وْصِيفْطُو الْعَسْكَرْ بَاشْ يْجِيبُو الرُّسُلْ مْنْ الْحَبْسْ.

²²وَلَكِنْ مْلِّي وْصْلُو الْخْدَّامَا مَا لْقَاوْهُمْشْ فْالْحَبْسْ، وْهُمَ يْرْجْعُو وْخَبّْرُوهُمْ

²³وْݣَالُو: «لْقِينَا الْحَبْسْ مْسْدُودْ مْزْيَانْ وْالْعْسَّاسَا وَاقْفِينْ بْرَّا قُدَّامْ الْبِيبَانْ، وَلَكِنْ مْلِّي حْلِّينَا مَا لْقِينَا حْتَّى وَاحْدْ لْدَاخْلْ».

²⁴وْمْلِّي سْمَعْ رَئِيسْ الْحَرَسْ دْ بِيتْ اللَّهْ وْرَئِيسْ رْجَالْ الدِّينْ هَادْ الْكْلَامْ، حَارُو وْݣَالُو: «كِيفَاشْ طْرَا هَادْشِّي؟»

²⁵وْمْنْ بَعْدْ جَا وَاحْدْ الرَّاجْلْ وْعْلَمْهُمْ وْݣَالْ: «الرّْجَالْ اللِّي رْمِيتُوهُمْ فْالْحَبْسْ رَاهُمْ فْبِيتْ اللَّهْ وَاقْفِينْ كَيْعَلّْمُو الشَّعْبْ!».

²⁶دِيكْ السَّاعَة مْشَى الْقَايْدْ دْ الْخْدَّامَا وْالْعَسْكَرْ دْيَالُه وْجَابُو الرُّسُلْ بْالْخَاطْرْ، حِيتْ كَانُو خَايْفِينْ لَيْرْجَمْهُمْ الشَّعْبْ.

²⁷وْمْلِّي جَابُوهُمْ وَقّْفُوهُمْ فْالْمَحْكَمَة، وْهُوَ يْسْوّْلْهُمْ رَئِيسْ رْجَالْ الدِّينْ وْݣَالْ:

²⁸«وَاشْ مَا وْصِّينَاكُمْشْ بَاشْ مَا تْعَلّْمُوشْ بْهَادْ الْإِسْمْ، وْهَا نْتُمَ عَمّْرْتُو أُورْشَلِيمْ بْالتَّعْلِيمْ دْيَالْكُمْ، وْبَاغْيِينْ تْلُومُونَا عْلَى دْمّْ هَادْ الرَّاجْلْ».

²⁹وْهُوَ يْجَاوْبْهُمْ بُطْرُسْ وْالرُّسُلْ وْݣَالُو: «خَاصّْنَا نْطِيعُو اللَّهْ مَاشِي النَّاسْ.

³⁰إِلَاهْ جْدُودْنَا بْعَتْ مْنْ الْمُوتْ يَسُوعْ اللِّي نْتُمَ قْتَلْتُوهْ مْعَلّْقِينُه عْلَى خَشْبَة.

³¹هَادَا رَاهْ رْفْعُه اللَّهْ عْلَى لِيمْنْ دْيَالُه، وْدَارُه رَئِيسْ وْمُنَجِّي بَاشْ يْعْطِي لْشَعْبْ إِسْرَائِيلْ التُّوبَة وْمَغْفِرَةْ الدّْنُوبْ،

³²وْحْنَا كَنْشَهْدُو لِيهْ بْهَادْشِّي، وْكَيْشْهَدْ لِيهْ حْتَّى الرُّوحْ الْقُدُسْ اللِّي عْطَاهْ اللَّهْ لْهَادُوكْ اللِّي كَيْطِيعُوهْ».

³³وْمْلِّي سْمْعُوهُمْ النَّاسْ دْ الْمَحْكَمَة تْقَلّْقُو بْزَّافْ، وْقَرّْرُو بَاشْ يْقْتْلُوهُمْ.

³⁴وَلَكِنْ وَاحْدْ مْنْ الْفْرِّيسِيِّينْ سْمِيتُه غَمَالَائِيلْ، مُعَلِّمْ دْيَالْ الشّْرَعْ، وْالشَّعْبْ كُلُّه كَيْحْتَرْمُه، نَاضْ وَسْطْ الْمَحْكَمَة وْآمْرْهُمْ بَاشْ يْخَرّْجُو الرُّسُلْ شِي شْوِيَّة،

³⁵وْهُوَ يْݣُولْ لِيهُمْ: «آ وْلَادْ إِسْرَائِيلْ، رْدُّو الْبَالْ أَشْنُو نَاوْيِينْ تْدِيرُو لْهَادْ النَّاسْ.

³⁶حِيتْ قْبَلْ مْنْ هَادْ لِيَّامْ جَا تُودَاسْ وْݣَالْ عْلَى رَاسُه بْلِّي هُوَ شِي وَاحْدْ عْظِيمْ، وْتْبْعَاتُه جْمَاعَة فِيهَا تْقْرِيبًا رْبَعْمِيَةْ رَاجْلْ. وْهُوَ يْتّْقْتَلْ، وْݣَاعْ هَادُوكْ اللِّي تْبْعُوهْ تّْشَتّْتُو وْمَا بْقَاشْ لِيهُمْ لَاتَرْ.

³⁷وْمْنْ بَعْدْ مْنُّه جَا يَهُودَا اللِّي مْنْ الْجَلِيلْ، فْالْوَقْتْ دْيَالْ الْإِحْصَاءْ، وْجْرّْ مُورَاهْ جْمَاعَة كْبِيرَة دْ النَّاسْ. وْحْتَّى هُوَ مَاتْ وْݣَاعْ اللِّي تْبْعُوهْ تّْشَتّْتُو.

³⁸وْدَابَا رَانِي كَنْݣُولْ لِيكُمْ: بَعّْدُو عْلَى هَادْ الرّْجَالْ وْخَلِّيوْهُمْ عْلِيكُمْ فْالتِّيقَارْ، عْلَاحْقَّاشْ إِلَا كَانْ هَادْ الْكْلَامْ، وْلَا هَادْشِّي اللِّي كَيْدِيرُو، مْنْ عَنْدْ النَّاسْ، رَاهْ مَا غَيْدُومْشْ،

³⁹وَلَكِنْ إِلَا كَانْ مْنْ عَنْدْ اللَّهْ رَاهْ مَا تْقَدْرُوشْ تْحَيّْدُوهْ، وَإِلَّا رَاكُمْ غَتْوَلِّيوْ كَتْحَارْبُو اللَّهْ حْتَّى هُوَ». وْقْتَنْعُو بْكْلَامُه.

⁴⁰وْعَيْطُو عْلَى الرُّسُلْ وْضْرْبُوهُمْ، وْوْصَّاوْهُمْ بَاشْ مَا يْتّْكَلّْمُوشْ عْلَى إِسْمْ يَسُوعْ، وْمْنْ بَعْدْ طْلْقُوهُمْ.

⁴¹وَلَكِنْ الرُّسُلْ خَرْجُو فْرْحَانِينْ مْنْ الْمَحْكَمَة، حِيتْ اللَّهْ شَافْهُمْ مْسْتَاهْلِينْ يْتّْعَدّْبُو عْلَى قْبَلْ إِسْمْ يَسُوعْ.

⁴²وْبْقَاوْ كُلَّ نْهَارْ كَيْعَلّْمُو وْكَيْخَبّْرُو بْالْبْشَارَة دْيَالْ يَسُوعْ الْمَسِيحْ فْبِيتْ اللَّهْ وْمْنْ دَارْ لْدَارْ.