Read Moroccan Standard Translation الْأَعْمَالْ 6 Bible Online

الْأَعْمَالْ 6 - Moroccan Standard Translation bible

الْأَعْمَالْ 6

¹الْفَصْلْ السَّادْسْ وْفْدِيكْ لِيَّامْ تّْزَادُو التّْلَامْدْ، وْبْدَاوْ الْمُومْنِينْ لِيهُودْ اللِّي كَانُو فْبْلَادْ الْيُونَانْ كَيْتّْشْكَّاوْ مْنْ الْمُومْنِينْ لِيهُودْ اللِّي مْنْ أُورْشَلِيمْ، حِيتْ الْهْجَّالَاتْ دْيَالْهُمْ مَا كَيْشَدُّوشْ حَقّْهُمْ دْ الْمَعُونَة دْيَالْ كُلَّ نْهَارْ.

²وْعَيْطُو الرُّسُلْ الطّْنَاشْ عْلَى جْمَاعْةْ التّْلَامْدْ وْݣَالُو لِيهُمْ: «مَاشِي مْعْقُولْ نْخَلِّيوْ حْنَا التّْبْشِيرْ بْكْلَامْ اللَّهْ بَاشْ نْفَرّْقُو الْمَاكْلَة.

³إِيوَا خْتَارُو آ الْخُوتْ سْبْعَة دْ الرّْجَالْ مْنّْكُمْ، السُّمْعَة دْيَالْهُمْ مْزْيَانَة، وْعَامْرِينْ بْالرُّوحْ الْقُدُسْ وْالْحْكْمَة، بَاشْ نْكَلّْفُوهُمْ بْهَادْ الْخْدْمَة.

⁴أَمَّا حْنَا، رَاهْ غَنْدَاوْمُو عْلَى الصّْلَاة وْنْخَبّْرُو بْكْلَامْ اللَّهْ».

⁵وْالجّْمَاعَة كُلّْهَا عْجَبْهَا هَادْ الْكْلَامْ، وْهُمَ يْخْتَارُو اسْتِفَانُوسْ، رَاجْلْ عَامْرْ بْالْإِيمَانْ وْالرُّوحْ الْقُدُسْ، وْفِيلُبُّسْ وْبُرُوخُورُسْ وْنِيكَانُورْ وْتِيمُونْ وْبَرْمِينَاسْ، وْنِيقُولَاوُسْ اللِّي مْنْ أَنْطَاكْيَة وْاللِّي وْلَّى يْهُودِي.

⁶وْجَابُوهُمْ قُدَّامْ الرُّسُلْ وْصْلَّاوْ وْحَطُّو عْلِيهُمْ يْدِّيهُمْ.

⁷وْكَانْ كْلَامْ اللَّهْ كَيْزِيدْ يْتّْعْرَفْ، وْالتّْلَامْدْ كَيْكَتْرُو بْزَّافْ فْأُورْشَلِيمْ، وْجْمَاعَة كْبِيرَة مْنْ رْجَالْ الدِّينْ دْيَالْ لِيهُودْ وْلَّاوْ مُومْنِينْ.

⁸وْكَانْ اسْتِفَانُوسْ عَامْرْ بْالنِّعْمَة وْالْقُوَّة، وْكَانْ كَيْدِيرْ أُمُورْ عْجِيبَة وْعَلَامَاتْ كْبِيرَة وَسْطْ الشَّعْبْ.

⁹وَلَكِنْ نَاضُو شِي وْحْدِينْ مْنْ دَارْ الصّْلَاة اللِّي سْمِيتْهَا دَارْ الصّْلَاة دْيَالْ الْمْتْحَرّْرِينْ، وْهُمَ يْهُودْ مْنْ الْقَيْرَوَانْ وْالْإِسْكَنْدَرِيَّة وْشِي وْحْدِينْ مْنْ كِيلِيكِيَّة وْآسْيَا، وْبْدَاوْ كَيْتّْجَادْلُو مْعَ اسْتِفَانُوسْ،

¹⁰وَلَكِنْ مَا قَدْرُوشْ يْرَدُّو عْلِيهْ بْسْبَابْ الْحْكْمَة وْكْلَامْ الرُّوحْ الْقُدُسْ اللِّي كَانْ كَيْتّْكَلّْمْ بِيهْ.

¹¹وْدِيكْ السَّاعَة حَرّْشُو شِي رْجَالْ بَاشْ يْݣُولُو: «رَاهْ سْمَعْنَا هَادْ الرَّاجْلْ كَيْتّْكَلّْمْ بْكْلَامْ الْكُفْرْ عْلَى مُوسَى وْعْلَى اللَّهْ!».

¹²وْهَيّْجُو الشَّعْبْ وْالشّْيُوخْ وْالْعُلَمَا دْ الشّْرَعْ ضْدُّه، وْنَاضُو وْشْدُّوهْ وْجَابُوهْ لْلْمَحْكَمَة.

¹³وْدَارُو عْلِيهْ شْهُودْ الزُّورْ اللِّي ݣَالُو: «هَادْ الرَّاجْلْ دِيمَا كَيْتّْكَلّْمْ ضْدّْ هَادْ بِيتْ اللَّهْ الْمْقَدّْسْ وْالشّْرَعْ.

¹⁴حِيتْ سْمَعْنَاهْ كَيْݣُولْ بْلِّي يَسُوعْ النَّاصِرِي غَيْرَيّْبْ هَادْ الْمُوضْعْ، وْغَيْبَدّْلْ الْعَادَاتْ اللِّي تّْعْطَاتْنَا مْنْ مُوسَى!».

¹⁵وْبْدَاوْ ݣَاعْ اللِّي حَاضْرِينْ فْالْمَحْكَمَة كَيْحَقّْقُو فْاسْتِيفَانُوسْ، وْهُمَ يْشُوفُو وْجْهُه بْحَالْ وْجَهْ شِي مَلَاكْ.