Read Moroccan Standard Translation الْأَعْمَالْ 7 Bible Online

الْأَعْمَالْ 7 - Moroccan Standard Translation bible

الْأَعْمَالْ 7

¹الْفَصْلْ السَّابْعْ وْسْوّْلْ رَئِيسْ رْجَالْ الدِّينْ اسْتِفَانُوسْ وْݣَالْ لِيهْ: «وَاشْ هَادْشِّي اللِّي كَيْݣُولُو عْلِيكْ كَايْنْ بْالصَّحْ؟».

²وْهُوَ يْجَاوْبْ اسْتِفَانُوسْ: «سْمْعُو آ خُوتِي وْسْيَادِي: بَانْ إِلَاهْ الْعَزّْ لْبُونَا إِبْرَاهِيمْ مْلِّي كَانْ فْبْلَادْ مَا بِينْ النَّهْرَيْنْ، قْبَلْ مَا يْسْكُنْ فْحَارَانْ،

³وْݣَالْ لِيهْ: خْرُجْ مْنْ بْلَادْكْ وْمْنْ قْبِيلْتْكْ وْسِيرْ لْلْبْلَادْ اللِّي غَنْوَرِّيكْ.

⁴وْدِيكْ السَّاعَة خْرَجْ مْنْ بْلَادْ الْكَلْدَانِيِّينْ وْسْكَنْ فْحَارَانْ. وْمْنْ تْمَّ، مْنْ بَعْدْمَا مَاتْ بَّاهْ، جَابُه اللَّهْ لْهَادْ الْبْلَادْ اللِّي نْتُمَ سَاكْنِينْ فِيهَا دَابَا،

⁵وْمَا عْطَاهْ فِيهَا لَا وَرْتْ وَلَا حْتَّى شْبَرْ دْ الْأَرْضْ، وَلَكِنْ وَاعْدُه بَاشْ يْعْطِيهَا مْلْكْ لِيهْ وْلْتْرِّيكْتُه مْنْ بَعْدْ مْنُّه، وْكَانْ بَاقِي مَا عَنْدُه حْتَّى وَلْدْ.

⁶وْهَادْشِّي اللِّي ݣَالْ لِيهْ اللَّهْ: غَتْكُونْ تْرِّيكْتْكْ مْتْغَرّْبَة فْبْلَادْ غْرِيبَة، وْغَيْكُونُو عْبِيدْ وْغَيْتّْكَرْفْصُو عْلِيهُمْ رْبَعْمِيَةْ عَامْ.

⁷وَلَكِنْ كَيْݣُولْ اللَّهْ: أَنَا غَنْعَاقْبْ الْأُمَّة اللِّي غَيْكُونُو عَنْدْهَا عْبِيدْ. وْمْنْ بَعْدْ هَادْشِّي غَيْخَرْجُو وْغَيْعَبْدُونِي فْهَادْ الْمُوضْعْ.

⁸وْعْطَى اللَّهْ لْإِبْرَاهِيمْ عَهْدْ الْخْتَانَة، وْهَكَّا وْلَدْ إِبْرَاهِيمْ إِسْحَاقْ وْخَتّْنُه فْالْيُومْ التَّامْنْ. وْإِسْحَاقْ وْلَدْ يَعْقُوبْ، وْيَعْقُوبْ وْلَدْ جْدُودْنَا الطّْنَاشْ.

⁹وْجْدُودْنَا حْسْدُو يُوسْفْ وْبَاعُوهْ لْمِصْرْ، وَلَكِنْ اللَّهْ كَانْ مْعَاهْ،

¹⁰وْنْجَّاهْ مْنْ ݣَاعْ الْمْصَايْبْ، وْعْطَاهْ النِّعْمَة وْالْحْكْمَة قُدَّامْ فِرْعَوْنْ مَلِكْ مِصْرْ، وْدَارُه فِرْعَوْنْ مْسْؤُولْ عْلَى مِصْرْ وْعْلَى الْقْصَرْ دْيَالُه كُلُّه.

¹¹وْجَا الجُّوعْ فْمِصْرْ كُلّْهَا وْكَنْعَانْ، وْصْعَابْتْ الْمَعِيشَة بْزَّافْ، وْمَا لْقَاوْ جْدُودْنَا مَا يَاكْلُو.

¹²وْفْالْمَرَّة اللّْوّْلَى، مْلِّي سْمَعْ يَعْقُوبْ بْلِّي كَايْنْ الْݣْمْحْ فْمِصْرْ، صِيفْطْ جْدُودْنَا.

¹³وْفْالْمَرَّة التَّانْيَة، تّْعَارْفْ يُوسْفْ مْعَ خُوتُه، وْسْمَعْ فِرْعَوْنْ عْلَى عَائِلْةْ يُوسْفْ.

¹⁴وْصِيفْطْ يُوسْفْ عْلَى بَّاهْ يَعْقُوبْ بَاشْ يْجِي هُوَ وْالْعَائِلَة دْيَالُه كُلّْهَا، وْكَانُو خَمْسَة وْسْبْعِينْ وَاحْدْ.

¹⁵وْسَافْرْ يَعْقُوبْ لْمِصْرْ، وْبْقَى سَاكْنْ فِيهَا حْتَّى مَاتْ هُوَ وْجْدُودْنَا.

¹⁶وْدَّاوْهُمْ لْبْلَادْ شَكِيمْ وْدْفْنُوهُمْ فْالْقْبَرْ اللِّي شْرَاهْ إِبْرَاهِيمْ بْوَاحْدْ الْقْدَرْ دْ الْفْضَّة مْنْ وْلَادْ حَمُورْ فْشَكِيمْ.

¹⁷وْقْدّْمَا كَانْ كَيْقَرّْبْ وَقْتْ الْوَعْدْ اللِّي عْطَاهْ اللَّهْ لْإِبْرَاهِيمْ، كَانْ الشَّعْبْ كَيْكْتَرْ وْكَيْتّْزَادْ فْمِصْرْ،

¹⁸حْتَّى وْلَّى فْمِصْرْ مَلِكْ آخُرْ مَا كَانْشْ كَيْعْرَفْ يُوسْفْ،

¹⁹وْهُوَ يْغْدَرْ بْالشَّعْبْ دْيَالْنَا، وْدْلّْ جْدُودْنَا، حْتَّى وْلَّى كَيْبَزّْزْ عْلِيهُمْ يْسَمْحُو فْوْلَادْهُمْ بَاشْ مَا يْبْقَاوْشْ عَايْشِينْ.

²⁰وْفْدِيكْ لِيَّامْ تّْوْلَدْ مُوسَى، وْكَانْ زْوِينْ بْزَّافْ. وْتْرَبَّى تْلْتْ شْهُورْ فْدَارْ بَّاهْ.

²¹وْمْلِّي سْمْحُو فِيهْ وَالِدِيهْ، خْدَاتُه بَنْتْ فِرْعَوْنْ وْرْبَّاتُه بَاشْ يْكُونْ وَلْدْهَا.

²²وْتْرَبَّى مُوسَى وْتْعَلّْمْ الْحْكْمَة دْيَالْ الْمِصْرِيِّينْ كُلّْهَا، وْكَانْ قَادّْ بْفُمُّه وْدْرَاعُه.

²³وْمْلِّي كَمّْلْ رْبْعِينْ عَامْ، فَكّْرْ بَاشْ يْزُورْ خُوتُه وْلَادْ إِسْرَائِيلْ.

²⁴وْهُوَ يْشُوفْ وَاحْدْ الْمِصْرِي كَيْتّْعَدَّى عْلَى وَاحْدْ مْنّْهُمْ، وْحَامَى عْلَى الْمْضْلُومْ، وْخْدَا لِيهْ حَقُّه وْقْتَلْ الْمِصْرِي.

²⁵وْكَانْ كَيْضَنّْ بْلِّي خُوتُه كَيْفَهْمُو بْلِّي اللَّهْ غَيْنَجِّيهُمْ عْلَى يْدُّه. وَلَكِنْ هُمَ مَا كَانُوشْ فَاهْمِينْ.

²⁶وْالْغَدّْ لِيهْ شَافْ جُوجْ مْنّْهُمْ كَيْتّْضَارْبُو، وْطْلَبْ مْنّْهُمْ بَاشْ يْتّْصَالْحُو، وْݣَالْ لِيهُمْ: آ هَادْ الرّْجَالْ، رَاكُمْ خُوتْ! عْلَاشْ كَتْضَلْمُو بْعْضِيَّاتْكُمْ؟.

²⁷وَلَكِنْ هَادَاكْ اللِّي كَانْ ضَالْمْ دْفَعْ مُوسَى لْلجّْنْبْ وْرَدّْ عْلِيهْ: شْكُونْ اللِّي دَارْكْ رَئِيسْ وْقَاضِي عْلِينَا؟

²⁸وَاشْ بْغِيتِي تْقْتَلْنِي كِمَا قْتَلْتِي الْمِصْرِي الْبَارْحْ؟

²⁹وْبْسْبَابْ هَادْ الْكْلَامْ، هْرَبْ مُوسَى وْعَاشْ غْرِيبْ فْبْلَادْ مِدْيَانْ اللِّي وْلَدْ فِيهَا جُوجْ وْلَادْ.

³⁰وْمْلِّي دَازْتْ رْبْعِينْ عَامْ، بَانْ لِيهْ مَلَاكْ الرَّبّْ فْالصَّحْرَا دْيَالْ جْبَلْ سِينَاءْ فْعَافْيَة شَاعْلَة فْالسّْدْرَة.

³¹وْمْلِّي شَافْ مُوسَى هَادْشِّي، تّْعَجّْبْ مْنْ هَادْ الْمَنْضَرْ. وْمْلِّي قَرّْبْ بَاشْ يْشُوفْ، سْمَعْ صُوتْ الرَّبّْ كَيْݣُولْ:

³²أَنَا هُوَ إِلَاهْ جْدُودْكْ، إِلَاهْ إِبْرَاهِيمْ وْإِسْحَاقْ وْيَعْقُوبْ. وْبْدَا مُوسَى كُلُّه كَيْتّْرَعّْدْ وْمَا زْعَمْشْ يْشُوفْ.

³³وْهُوَ يْݣُولْ لِيهْ الرَّبّْ: حَيّْدْ الصّْبَّاطْ مْنْ رْجْلِيكْ، حِيتْ الْمُوضْعْ اللِّي نْتَ وَاقْفْ عْلِيهْ رَاهْ أَرْضْ مْقَدّْسَة.

³⁴رَانِي شْفْتْ تَمَارَة دْ الشَّعْبْ دْيَالِي فْمِصْرْ، وْسْمَعْتْهُمْ كَيْنِينُو، وْنْزَلْتْ بَاشْ نّْجِّيهُمْ. إِيوَا دَابَا آجِي بَاشْ نْصِيفْطْكْ لْمِصْرْ.

³⁵وْهَادْ مُوسَى اللِّي نْكْرُوهْ وْݣَالُو لِيهْ: شْكُونْ اللِّي دَارْكْ حَاكْمْ وْقَاضِي عْلِينَا؟ هُوَ اللِّي صِيفْطُه اللَّهْ رَئِيسْ وْمُنَجِّي عْلَى يْدّْ الْمَلَاكْ اللِّي بَانْ لِيهْ فْالسّْدْرَة.

³⁶وْرَاهْ هُوَ اللِّي خَرّْجْ شَعْبُه مْنْ بْلَادْ مِصْرْ بْالْأُمُورْ الْعْجِيبَة وْالْعَلَامَاتْ اللِّي دَارْ تْمَّ وْفْالْبْحَرْ الْأَحْمَرْ وْفْالصَّحْرَا مُدَّةْ رْبْعِينْ عَامْ،

³⁷وْهَادَا هُوَ مُوسَى اللِّي ݣَالْ لْوْلَادْ إِسْرَائِيلْ: اللَّهْ غَادِي يْبْعَتْ لِيكُمْ نْبِي بْحَالِي مْنْ وَسْطْ خُوتْكُمْ.

³⁸وْهَادَا هُوَ اللِّي كَانْ كَيْتّْوَسّْطْ بِينْ جْدُودْنَا وْالْمَلَاكْ اللِّي تّْكَلّْمْ مْعَاهْ فْجْبَلْ سِينَاءْ مْلِّي كَانْ شَعْبْ إِسْرَائِيلْ مْجْمُوعْ فْالصَّحْرَا. وْهُوَ اللِّي قْبَلْ الْكْلَامْ الْحَيّْ، بَاشْ يْعْطِيهْ لِينَا.

³⁹وَلَكِنْ جْدُودْنَا مَا بْغَاوْشْ يْكُونُو طَايْعِينْ لْمُوسَى، وْمَا قْبْلُوهْشْ، وْشْتَاقُو فْقَلْبْهُمْ يْرْجْعُو لْمِصْرْ.

⁴⁰وْݣَالُو لْهَارُونْ: صَايْبْ لِينَا إِلَاهَاتْ تْكُونْ قُدَّامْنَا فْالطّْرِيقْ، حِيتْ هَادْ مُوسَى اللِّي خَرّْجْنَا مْنْ بْلَادْ مِصْرْ مَا عْرَفْنَاشْ آشْ طْرَا لِيهْ!.

⁴¹وْهُمَ يْصَايْبُو فْدِيكْ لِيَّامْ وَاحْدْ الصَّنَمْ فْصُورْةْ عْجَلْ، وْقَدّْمُو لِيهْ الدّْبِيحَة، وْفْرْحُو بْدَاكْشِّي اللِّي دَارْتْ يْدِّيهُمْ.

⁴²وْسْمَحْ فِيهُمْ اللَّهْ، وْخْلَّاهُمْ يْعَبْدُو النّْجُومْ، كِمَا مْكْتُوبْ فْكْتَابْ الْأَنْبِيَا: آ وْلَادْ إِسْرَائِيلْ، وَاشْ جْبْتُو لِيَّ الدّْبَايْحْ وْالتَّقْدِمَاتْ لْمُدَّةْ رْبْعِينْ عَامْ فْالصَّحْرَا؟

⁴³رَاكُمْ هْزِّيتُو خِيمْةْ مُولُوكْ الصَّنَمْ وْنْجْمَةْ إِلَاهْكُمْ رَمْفَانْ، الْأَصْنَامْ اللِّي صْنَعْتُوهَا بَاشْ تْعَبْدُوهَا. عْلَى هَادْشِّي أَنَا غَادِي نّْفِيكُمْ وْرَا بْلَادْ بَابِلْ.

⁴⁴وْكَانْتْ خِيمْةْ الشّْهَادَة عَنْدْ جْدُودْنَا فْالصَّحْرَا، كِمَا وْصَّى اللَّهْ مُوسَى بَاشْ يْدِيرْهَا، عْلَى الشّْكَلْ اللِّي كَانْ وْرَّاهْ لِيهْ.

⁴⁵وْمْلِّي خْدَاوْهَا جْدُودْنَا، دَخْلُو بِيهَا مْعَ يَشُوعْ لْلْبْلَادْ اللِّي مْلْكُوهَا مْنْ الشّْعُوبْ اللِّي نْصَرْ اللَّهْ جْدُودْنَا عْلِيهُمْ، وْبْقَاتْ الْخِيمَة تْمَّ حْتَّى لْيَّامْ دَاوُدْ،

⁴⁶اللِّي رْضَى عْلِيهْ اللَّهْ، وْطْلَبْ بَاشْ يْلْقَى بْلَاصَة يْتّْعْبَدْ فِيهَا إِلَاهْ يَعْقُوبْ.

⁴⁷وْسُلَيْمَانْ هُوَ اللِّي بْنَى بِيتْ اللَّهْ.

⁴⁸وَلَكِنْ اللَّهْ الْعَالِي مَا كَيْسْكُنْشْ فْدْيُورْ بَانْيِينْهَا النَّاسْ، كِمَا ݣَالْ النّْبِي فْكْتَابْ اللَّهْ:

⁴⁹السّْمَا الْعَرْشْ دْيَالِي، وْالْأَرْضْ مُوضْعْ رْجْلِيَّ، آشْ مْنْ دَارْ غَادِي تْبْنِيوْ لِيَّ؟ وْلَا آشْ مْنْ مُوضْعْ نْرْتَاحْ فِيهْ؟

⁵⁰وَاشْ مَاشِي أَنَا اللِّي خْلَقْتْ ݣَاعْ هَادْشِّي؟».

⁵¹«آ هَادْ الشَّعْبْ اللِّي رَاسُه قَاسْحْ، آ صْحَابْ الْقْلُوبْ الْقَاسْحَة وْالْوْدْنِينْ الصَّمْكِينْ! نْتُمَ دِيمَا كَتْقَاوْمُو الرُّوحْ الْقُدُسْ، وْرَاهْ بْحَالْكُمْ بْحَالْ جْدُودْكُمْ.

⁵²شْكُونْ هَادَا فْالْأَنْبِيَا اللِّي فْلَتْ مْنْ التَّعَدُّو دْيَالْهُمْ؟ رَاهُمْ قْتْلُو الْأَنْبِيَا اللِّي تّْنَبّْأُو بْالْمْجِي دْيَالْ هَادَاكْ اللِّي بْلَا دَنْبْ، هَادَاكْ اللِّي دَابَا سَلّْمْتُوهْ وْقْتَلْتُوهْ.

⁵³رَاكُمْ خْدِيتُو شْرَعْ مُوسَى مْنْ يْدِّينْ الْمَلَايْكَة وْمَا دْرْتُوشْ بِيهْ».

⁵⁴وْمْلِّي سْمْعُو الْمْسْؤُولِينْ دْ الْمَحْكَمَة هَادْ الْكْلَامْ تْقَلّْقُو بْزَّافْ، وْتْغَدّْدُو عْلِيهْ.

⁵⁵وَلَكِنْ اسْتِفَانُوسْ وْهُوَ عَامْرْ بْالرُّوحْ الْقُدُسْ، هْزّْ عِينِيهْ لْلسّْمَا، وْشَافْ الْعَزّْ دْيَالْ اللَّهْ وْيَسُوعْ وَاقْفْ عْلَى لِيمْنْ دْ اللَّهْ.

⁵⁶وْݣَالْ: «هَانِي كَنْشُوفْ السَّمَاوَاتْ مْحْلُولَة وْوَلْدْ الْإِنْسَانْ وَاقْفْ عْلَى لِيمْنْ دْ اللَّهْ».

⁵⁷وْهُمَ يْغَوّْتُو بْصُوتْ عَالِي، وْسْدُّو وْدْنِيهُمْ، وْهْجْمُو عْلِيهْ كُلّْهُمْ مَرَّة وَحْدَة.

⁵⁸وْخَرّْجُوهْ عْلَى بْرَّا دْ الْمْدِينَة وْرْجْمُوهْ. وْحَيّْدُو الشّْهُودْ حْوَايْجْهُمْ الْفُوقَانِيِّينْ وْحَطُّوهُمْ حْدَا رْجْلِينْ شَابّْ سْمِيتُه شَاوُلْ.

⁵⁹وْكَانُو كَيْرَجْمُو اسْتِفَانُوسْ وْهُوَ كَيْطْلَبْ اللَّهْ وْكَيْݣُولْ: «آ رْبِّي يَسُوعْ، قْبَلْ رُوحِي!».

⁶⁰وْطَاحْ عْلَى رْكَابِيهْ وْݣَالْ بْصُوتْ عَالِي: «آ رْبِّي، مَا تْحْسَبْشْ عْلِيهُمْ هَادْ الدَّنْبْ!». وْمْلِّي ݣَالْ هَادْ الْكْلَامْ، مَاتْ.