Read Moroccan Standard Translation الْأَعْمَالْ 9 Bible Online

الْأَعْمَالْ 9 - Moroccan Standard Translation bible

الْأَعْمَالْ 9

¹الْفَصْلْ التَّاسْعْ وْكَانْ شَاوُلْ بَاقِي مْغَدّْدْ عْلَى التّْلَامْدْ دْيَالْ الرَّبّْ وْكَيْهَدّْدْ بَاشْ يْقْتَلْهُمْ. وْمْشَى لْعَنْدْ رَئِيسْ رْجَالْ الدِّينْ

²وْطْلَبْ مْنُّه يْعْطِيهْ رَسَائِلْ يْدِّيهُمْ لْدْيُورْ الصّْلَاة فْدِمَشْقْ، بَاشْ يَاخُدْ الْإِدْنْ وْيْشَدّْ الرّْجَالْ وْالْعْيَالَاتْ اللِّي غَيْلْقَاهُمْ تَابْعِينْ هَادْ الطّْرِيقْ، وْيْجِيبْهُمْ مْكَتّْفِينْ لْأُورْشَلِيمْ.

³وْمْلِّي كَانْ غَادِي فْالطّْرِيقْ وْقَرّْبْ لْدِمَشْقْ، لْمَعْ حْدَاهْ عْلَى غَفْلَة ضَوّْ مْنْ السّْمَا،

⁴وْهُوَ يْطِيحْ لْلْأَرْضْ، وْسْمَعْ صُوتْ كَيْݣُولْ لِيهْ: «شَاوُلْ، شَاوُلْ، عْلَاشْ كَتّْعَدَّى عْلِيَّ؟».

⁵وْجَاوْبْ شَاوُلْ: «شْكُونْ نْتَ آ سِيدِي؟». وْهُوَ يْݣُولْ لِيهْ: «أَنَا يَسُوعْ اللِّي نْتَ كَتّْعَدَّى عْلِيهْ،

⁶نُوضْ وْدْخُلْ لْلْمْدِينَة، وْتْمَّ غَادِي تْعْرَفْ أَشْنُو خَاصّْكْ تْدِيرْ».

⁷وْالرّْجَالْ اللِّي كَانُو مْسَافْرِينْ مْعَ شَاوُلْ بْقَاوْ وَاقْفِينْ مَا كَيْتّْكَلّْمُوشْ، كَيْسَمْعُو الصُّوتْ وَلَكِنْ مَا كَيْشُوفُو حْتَّى وَاحْدْ.

⁸وْهُوَ يْنُوضْ شَاوُلْ مْنْ الْأَرْضْ وْعِينِيهْ مْحْلُولِينْ وْمَا كَيْشُوفْ وَالُو. وْشْدُّوهْ صْحَابُه مْنْ يْدُّه وْدَخّْلُوهْ لْدِمَشْقْ.

⁹وْبْقَى تْلْتْ يَّامْ وْهُوَ مَا كَيْشُوفْشْ، وْمَا كْلَا مَا شْرَبْ.

¹⁰وْكَانْ فْدِمَشْقْ وَاحْدْ التّْلْمِيدْ سْمِيتُه حَنَانْيَا. وْتّْكَلّْمْ الرَّبّْ مْعَاهْ فْرُؤْيَا وْݣَالْ لِيهْ: «آ حَنَانْيَا!» وْجَاوْبُه حَنَانْيَا: «هَانِي آ رْبِّي!».

¹¹وْهُوَ يْݣُولْ لِيهْ الرَّبّْ: «نُوضْ سِيرْ لْلزَّنْقَة الْمْعْرُوفَة بْسْمِيّْةْ الزَّنْقَة الْمْقَادَّة، وْسْوّْلْ فْدَارْ يَهُودَا عْلَى وَاحْدْ الرَّاجْلْ مْنْ طَرْسُوسْ سْمِيتُه شَاوُلْ. حِيتْ رَاهْ كَيْصَلِّي،

¹²وْشَافْ فْرُؤْيَا وَاحْدْ الرَّاجْلْ سْمِيتُه حَنَانْيَا دْخَلْ وْحَطّْ يْدِّيهْ عْلِيهْ بَاشْ يْوَلِّي كَيْشُوفْ».

¹³وْݣَالْ حَنَانْيَا لْلرَّبّْ: «يَا رَبّْ، سْمَعْتْ مْنْ بْزَّافْ دْ النَّاسْ شْحَالْ تْكَرْفْصْ هَادْ الرَّاجْلْ عْلَى الْمُومْنِينْ دْيَالْكْ فْأُورْشَلِيمْ.

¹⁴وْدَابَا رَاهْ جَا لّْهْنَا، وْتّْعْطَاتُه السُّلْطَة مْنْ الرُّؤَسَا دْ رْجَالْ الدِّينْ بَاشْ يْشَدّْ فْالْحَبْسْ ݣَاعْ اللِّي كَيْآمْنُو بْالْإِسْمْ دْيَالْكْ».

¹⁵وَلَكِنْ الرَّبّْ ݣَالْ لِيهْ: «سِيرْ، حِيتْ أَنَا خْتَارِيتْ هَادْ الرَّاجْلْ رَسُولْ يْخَبّْرْ بْالْإِسْمْ دْيَالِي الشّْعُوبْ اللِّي مَا كَيْعَبْدُوشْ اللَّهْ، وْالْمُلُوكْ وْوْلَادْ إِسْرَائِيلْ.

¹⁶وْغَادِي نْوَرِّيهْ شْحَالْ خَاصُّه يْتّْعَدّْبْ عْلَى وْدّْ الْإِسْمْ دْيَالِي».

¹⁷وْمْشَى حَنَانْيَا وْدْخَلْ لْلدَّارْ، وْحَطّْ يْدِّيهْ عْلَى شَاوُلْ وْݣَالْ لِيهْ: «آ خُويَا شَاوُلْ، رَاهْ صِيفْطْنِي لْعَنْدْكْ الرَّبّْ يَسُوعْ اللِّي بَانْ لِيكْ فْالطّْرِيقْ اللِّي جِيتِي مْنّْهَا، بَاشْ يْرْجَعْ لِيكْ الشُّوفْ دْيَالْكْ وْتّْعَمّْرْ بْالرُّوحْ الْقُدُسْ».

¹⁸وْدِيكْ السَّاعَة طَاحْتْ مْنْ عِينِينْ شَاوُلْ شِي حَاجَة بْحَالْ الْقْشُورْ، وْرْجَعْ لِيهْ الشُّوفْ، وْنَاضْ وْتّْعَمّْدْ.

¹⁹وْمْلِّي كْلَا، رْجْعَاتْ فِيهْ الرُّوحْ. وْمْنْ بَعْدْ ݣْلَسْ شَاوُلْ شِي يَّامَاتْ مْعَ التّْلَامْدْ اللِّي فْدِمَشْقْ،

²⁰وْدْغْيَا بْدَا كَيْخَبّْرْ النَّاسْ فْدْيُورْ الصّْلَاة بْلِّي يَسُوعْ الْمَسِيحْ هُوَ وَلْدْ اللَّهْ.

²¹وْݣَاعْ اللِّي سْمْعُوهْ كَانُو كَيْتّْعَجّْبُو وْكَيْݣُولُو: «وَاشْ مَاشِي هَادَا هُوَ الرَّاجْلْ اللِّي كَانْ فْأُورْشَلِيمْ كَيْهْلَكْ كُلّْ وَاحْدْ كَيْتّْكَلّْمْ بْهَادْ الْإِسْمْ؟ وَاشْ مَا جَاشْ لْدِمَشْقْ غِيرْ بَاشْ يْشَدّْهُمْ وْيْرْجَعْ بِيهُمْ مْكَتّْفِينْ لْلرُّؤَسَا دْ رْجَالْ الدِّينْ؟».

²²وَلَكِنْ شَاوُلْ كَانْ كَيْزِيدْ يْتّْقُوَّى، وْحَيّْرْ عْقُولْ لِيهُودْ اللِّي سَاكْنِينْ فْدِمَشْقْ، وْبَيّْنْ بْلِّي يَسُوعْ هُوَ الْمَسِيحْ.

²³وْمْنْ بَعْدْ يَّامَاتْ كْتَارْ، تَّافْقُو لِيهُودْ بَاشْ يْقْتْلُوهْ،

²⁴وْهِيَ تْوْصَلْ هَادْ الْخْبَارْ لْشَاوُلْ. وْكَانُو كَيْحْضِيوْ الْبِيبَانْ دْيَالْ الْمْدِينَة لِيلْ وْنْهَارْ بَاشْ يْقْتْلُوهْ.

²⁵وَلَكِنْ التّْلَامْدْ دَّاوْهْ بْاللِّيلْ وْدْلَّاوْهْ فْسْلَّة مْنْ فُوقْ السُّورْ.

²⁶وْمْلِّي وْصَلْ شَاوُلْ لْأُورْشَلِيمْ حَاوْلْ بَاشْ يْكُونْ مْعَ التّْلَامْدْ. وَلَكِنْ كَانُو كُلّْهُمْ خَايْفِينْ مْنُّه، وْمَا تِيّْقُوشْ بْلِّي وْلَّى تْلْمِيدْ دْ الْمَسِيحْ.

²⁷وْهُوَ يْتْكَلّْفْ بَرْنَابَا وْجَابُه لْعَنْدْ الرُّسُلْ، وْعَاوْدْ لِيهُمْ كِيفَاشْ بَانْ الرَّبّْ لْشَاوُلْ فْالطّْرِيقْ وْتّْكَلّْمْ مْعَاهْ، وْكِيفَاشْ خَبّْرْ شَاوُلْ النَّاسْ بْإِسْمْ يَسُوعْ فْدِمَشْقْ بْلَا مَا يْخَافْ.

²⁸وْمْنْ دَاكْ الْوَقْتْ بْدَا شَاوُلْ كَيْعِيشْ مْعَ التّْلَامْدْ وْكَيْدْخَلْ وْيْخْرُجْ لْأُورْشَلِيمْ بْحُرِّيَّة، وْكَيْتّْكَلّْمْ مْعَ النَّاسْ بْإِسْمْ الرَّبّْ بْلَا خُوفْ.

²⁹وْكَانْ كَيْتّْكَلّْمْ وْكَيْتّْنَاقْشْ مْعَ لِيهُودْ اللِّي كَيْتّْكَلّْمُو بْالْيُونَانِيَّة، وْبْدَاوْ كَيْقَلّْبُو كِيفَاشْ يْدِيرُو بَاشْ يْقْتْلُوهْ.

³⁰وَلَكِنْ مْلِّي عَرْفُو الْخُوتْ الْمُومْنِينْ هَادْشِّي، دَّاوْهْ لْقَيْصَرِيَّة وْمْنْ تْمَّ صِيفْطُوهْ لْطَرْسُوسْ.

³¹وْفْدَاكْ الْوَقْتْ كَانُو الْكْنَايْسْ كُلّْهُمْ فْالْيَهُودِيَّة وْالْجَلِيلْ وْالسَّامِرَة كَيْعِيشُو فْالْهْنَا، وْكَيْكَبْرُو وْكَيْمْشِيوْ فْطَاعَةْ الرَّبّْ، وْكَيْتّْزَادُو بْالْعْوِينْ دْيَالْ الرُّوحْ الْقُدُسْ.

³²وْمْلِّي كَانْ بُطْرُسْ كَيْسَافْرْ مْنْ بْلَاصَة لْبْلَاصَة، دَازْ لْعَنْدْ الْخُوتْ الْمُومْنِينْ اللِّي سَاكْنِينْ فْلُدَّة،

³³وْلْقَا فِيهَا وَاحْدْ الرَّاجْلْ مْشْلُولْ سْمِيتُه إِينِيَاسْ، تْمَنْ سْنِينْ وْهُوَ طَايْحْ فْالْفْرَاشْ،

³⁴وْݣَالْ لِيهْ بُطْرُسْ: «آ إِينِيَاسْ! يَسُوعْ الْمَسِيحْ شَافَاكْ، نُوضْ وْجْمَعْ فْرَاشْكْ بْيْدِّيكْ!». وْهُوَ يْنُوضْ دِيكْ السَّاعَة.

³⁵وْشَافُوهْ ݣَاعْ النَّاسْ اللِّي سَاكْنِينْ فْلُدَّة وْسَارُونْ، وْآمْنُو بْالرَّبّْ.

³⁶وْكَانْتْ فْيَافَا وَاحْدْ الْمُومْنَة سْمِيتْهَا طَابِيتَا، اللِّي كَتْعْنِي بْالْيُونَانِيَّة دُورْكَاسْ، وْكَانْتْ كَتْدِيرْ الْخِيرْ بْزَّافْ وْكَتْعَاوْنْ الْمْحْتَاجِينْ.

³⁷وْفْدَاكْ الْوَقْتْ مَرْضَاتْ وْمَاتْتْ. وْغَسّْلُوهَا وْحَطُّوهَا فْالْبِيتْ الْفُوقَانِي.

³⁸وْحِيتْ يَافَا قْرِيبَة لْلُدَّة، سْمْعُو التّْلَامْدْ اللِّي فْيَافَا بْلِّي بُطْرُسْ فْلُدَّة، وْهُمَ يْصِيفْطُو لِيهْ جُوجْ دْ الرّْجَالْ بَاشْ يْطْلْبُو مْنُّه يْجِي لْعَنْدْهُمْ دْغْيَا.

³⁹وْنَاضْ بُطْرُسْ دِيكْ السَّاعَة وْمْشَا مْعَاهُمْ لْيَافَا. وْمْلِّي وْصَلْ، طَلّْعُوهْ لْلْبِيتْ الْفُوقَانِي، وْجَاوْ لْحْدَاهْ الْهْجَّالَاتْ كُلّْهُمْ كَيْبْكِيوْ وْكَيْوْرِّيوْهْ الْحْوَايْجْ وْالْقْمَايْصْ اللِّي خَيّْطَاتْ دُورْكَاسْ مْلِّي كَانْتْ مْعَاهُمْ فْالْحَيَاةْ.

⁴⁰وْخَرّْجْ بُطْرُسْ النَّاسْ كُلّْهُمْ عْلَى بْرَّا، وْهُوَ يْسْجَدْ وْصْلَّى. وْمْنْ بَعْدْ ضَارْ جِهْةْ الدَّاتْ الْمْيّْتَة وْݣَالْ: «طَابِيتَا، نُوضِي!». وْفْدِيكْ السَّاعَة حْلَّاتْ عِينِيهَا. وْمْلِّي شَافْتْ بُطْرُسْ ݣْلْسَاتْ.

⁴¹وْمْدّْ لِيهَا يْدُّه وْنَوّْضْهَا، وْعَيّْطْ عْلَى الْمُومْنِينْ وْالْهْجَّالَاتْ وْقَدّْمْهَا لِيهُمْ حَيَّة.

⁴²وْدَاعْتْ الْخْبَارْ فْيَافَا كُلّْهَا، وْآمْنُو بْالرَّبّْ بْزَّافْ دْ النَّاسْ.

⁴³وْݣْلَسْ بُطْرُسْ مُدَّة طْوِيلَة فْيَافَا عَنْدْ وَاحْدْ الرَّاجْلْ دْبَّاغْ سْمِيتُه سِمْعَانْ.