Read Moroccan Standard Translation رُومَا 10 Bible Online

رُومَا 10 - Moroccan Standard Translation bible

رُومَا 10

¹الْفَصْلْ الْعَاشْرْ آ الْخُوتْ، رَانِي كَنْتّْرَجَّا مْنْ كُلّْ قَلْبِي وْكَنْطْلَبْ اللَّهْ عْلَى وْدّْ النّْجَا دْيَالْ شَعْبْ إِسْرَائِيلْ.

²وْأَنَا كَنْشْهَدْ لِيهُمْ بْلِّي عَنْدْهُمْ الْغِيرَة عْلَى اللَّهْ، وَلَكِنْ مَاشِي عْلَى حْسَابْ الْمَعْرِفَة الصّْحِيحَة.

³حِيتْ مْلِّي مَا عَرْفُوشْ التَّقْوَى دْيَالْ اللَّهْ، وْقَلّْبُو عْلَى كِيفَاشْ يْوَلِّيوْ مْتَّاقْيِينْ قُدَّامُه، مَا خَضْعُوشْ لْلتَّقْوَى دْيَالُه.

⁴حِيتْ الْمَسِيحْ كَمّْلْ الْغَرَضْ دْيَالْ الشّْرَعْ، بَاشْ ݣَاعْ النَّاسْ اللِّي كَيْآمْنُو بِيهْ يْوَلِّيوْ مْتَّاقْيِينْ اللَّهْ.

⁵حِيتْ مُوسَى كْتَبْ عْلَى التَّقْوَى اللِّي جَاتْ مْنْ الشّْرَعْ، وْݣَالْ: «اللِّي كَيْدِيرْ بْفْرَايْضْ الشّْرَعْ غَيْحْيَا بِيهُمْ».

⁶وَلَكِنْ التَّقْوَى اللِّي كَتْجِي مْنْ الْإِيمَانْ، كَيْݣُولْ عْلِيهَا كْتَابْ اللَّهْ: «مَا تْݣُولْشْ فْقَلْبَكْ: شْكُونْ اللِّي غَيْطْلَعْ لْلسّْمَا؟» يَعْنِي بَاشْ يْنَزّْلْ الْمَسِيحْ،

⁷وْلَا: «شْكُونْ اللِّي غَيْنْزَلْ لْلْهَاوِيَة؟» يَعْنِي بَاشْ يْبْعَتْ الْمَسِيحْ مْنْ بِينْ الْمُوتَى.

⁸إِيوَا أَشْنُو كَيْݣُولْ كْتَابْ اللَّهْ؟ «رَاهْ كْلَامْ اللَّهْ قْرِيبْ لِيكْ، فْفُمّْكْ وْفْقَلْبْكْ» يَعْنِي كْلَامْ الْإِيمَانْ اللِّي كَنْخَبّْرُو بِيهْ.

⁹عْلَاحْقَّاشْ إِلَا عْتَرْفْتِي بْفُمّْكْ بْلِّي يَسُوعْ هُوَ الرَّبّْ، وْآمْنْتِي مْنْ قَلْبَكْ بْلِّي اللَّهْ بَعْتُه مْنْ بِينْ الْمُوتَى، رَاكْ غَتْنْجَا.

¹⁰حِيتْ الْإِيمَانْ مْنْ الْقَلْبْ كَيْدِّي لْلتَّقْوَى، وْالْاعْتِرَافْ بْالْفُمّْ كَيْدِّي لْلنّْجَا.

¹¹عْلَاحْقَّاشْ كْتَابْ اللَّهْ كَيْݣُولْ: «اللِّي كَيْآمْنْ بِيهْ مَا غَيْخِيبْشْ»

¹²رَاهْ مَا كَايْنْشْ الْفَرْقْ بِينْ لِيهُودْ وْالْيُونَانِيِّينْ، حِيتْ كُلّْهُمْ عَنْدْهُمْ رَبّْ وَاحْدْ، كَيْفِيضْ بْالْخِيرْ دْيَالُه عْلَى كُلّْ مْنْ كَيْطْلْبُه.

¹³وْرَاهْ كْتَابْ اللَّهْ كَيْݣُولْ: «اللِّي كَيْطْلَبْ بْإِسْمْ الرَّبّْ غَيْنْجَا».

¹⁴وَلَكِنْ كِيفَاشْ غَيْطْلْبُوهْ وْهُمَ مَا آمْنُوشْ بِيهْ؟ وْكِيفَاشْ غَيْآمْنُو بِيهْ وْهُمَ مَا سْمْعُوشْ بِيهْ؟ وْكِيفَاشْ غَيْسَمْعُو بِيهْ بْلَا مَا يْبَشّْرْهُمْ حْتَّى وَاحْدْ؟

¹⁵وْكِيفَاشْ غَيْبَشّْرُو إِلَا مَا صِيفْطْهُمْ حَدّْ؟ كِيفْ مْكْتُوبْ فْكْتَابْ اللَّهْ: «شْحَالْ زْوِينَة قْدَامْ هَادُوكْ اللِّي كَيْخَبّْرُو بْالْبْشَارَة».

¹⁶وَلَكِنْ مَاشِي ݣَاعْ النَّاسْ قْبْلُو الْإِنْجِيلْ، حِيتْ إِشْعِيَا كَيْݣُولْ: «آ رْبِّي، شْكُونْ اللِّي تْيّْقْ الْخْبَارْ اللِّي كَنْخَبّْرُو بِيهَا؟».

¹⁷الْإِيمَانْ كَيْجِي مْنْ دَاكْشِّي اللِّي كَيْتّْسْمَعْ، وْدَاكْشِّي اللِّي كَيْتّْسْمَعْ كَيْجِي مْنْ الْكْلَامْ دْيَالْ الْمَسِيحْ.

¹⁸وَلَكِنْ أَنَا كَنْݣُولْ: وَاشْ شَعْبْ إِسْرَائِيلْ مَا سْمْعُوشْ؟ مْعْلُومْ رَاهُمْ سْمْعُو، «رَاهْ تّْسْمَعْ الصُّوتْ دْيَالْهُمْ فْݣَاعْ الْأَرْضْ، وْكْلَامْهُمْ وْصَلْ لْݣَاعْ الدّْنْيَا».

¹⁹وَلَكِنْ كَنْݣُولْ: وَاشْ شَعْبْ إِسْرَائِيلْ مَا فَهْمُوشْ؟ رَاهْ مُوسَى ݣَالْ مْنْ قْبَلْ: «غَنْخَلِّيكُمْ تْغِيرُو مْنْ هَادُوكْ اللِّي مَا هُمَاشْ شَعْبْ، وْغَنْقَلّْقْكُمْ بْوَاحْدْ الشَّعْبْ مَا كَيْفْهَمْشْ».

²⁰أَمَّا إِشْعِيَا رَاهْ تّْكَلّْمْ بْلَا خُوفْ وْݣَالْ: «لْقَاوْنِي هَادُوكْ اللِّي مَا كَيْقَلّْبُوشْ عْلِيَّ، وْوْلِّيتْ بَايْنْ لْهَادُوكْ اللِّي مَا كَيْسْوّْلُوشْ عْلِيَّ».

²¹وَلَكِنْ مْنْ جِهْةْ شَعْبْ إِسْرَائِيلْ، ݣَالْ: «مْدِّيتْ يْدِّيَّ النّْهَارْ كُلُّه لْوَاحْدْ الشَّعْبْ اللِّي مَا كَيْطِيعْنِيشْ وْكَيْضَادّْنِي».