Read Moroccan Standard Translation رُومَا 11 Bible Online

رُومَا 11 - Moroccan Standard Translation bible

رُومَا 11

¹الْفَصْلْ حْضَاشْ وْهَكَّا كَنْݣُولْ: وَاشْ اللَّهْ سْمَحْ فْالشَّعْبْ دْيَالُه؟ حَاشَا! حْتَّى أَنَا رَانِي إِسْرَائِيلِي مْنْ تْرِّيكْةْ إِبْرَاهِيمْ وْمْنْ قْبِيلْةْ بْنْيَامِينْ.

²رَاهْ اللَّهْ مَا سْمَحْشْ فْالشَّعْبْ دْيَالُه اللِّي عَرْفُه مْنْ قْبَلْ. وَاشْ مَا كَتْعَرْفُوشْ أَشْنُو كَيْݣُولْ كْتَابْ اللَّهْ عْلَى إِيلِيَّا، مْلِّي تْشَكَّى لْلَّهْ مْنْ شَعْبْ إِسْرَائِيلْ؟

³ݣَالْ: «آ رْبِّي، رَاهْ قْتْلُو الْأَنْبِيَا دْيَالْكْ، وْرَيّْبُو الْمْدَابْحْ دْيَالْكْ، وْبْقِيتْ غِيرْ أَنَا بُوحْدِي، وْبْغَاوْ يْقْتْلُونِي».

⁴وَلَكِنْ بَاشْ جَاوْبُه اللَّهْ؟ «رَانِي خَلِّيتْ لْرَاسِي سْبْعَالَافْ رَاجْلْ، اللِّي مَا سْجْدُوشْ لْلصَّنَمْ بَعْلْ».

⁵وْهَكَّا، حْتَّى فْهَادْ الْوَقْتْ رَاهْ بَاقْيِينْ شِي وْحْدِينْ خْتَارْهُمْ اللَّهْ بْالنِّعْمَة.

⁶وْإِلَا خْتَارْهُمْ اللَّهْ بْالنِّعْمَة، رَاهْ مَاشِي عْلَى حْسَابْ الْأَعْمَالْ، وْلَّا رَاهْ النِّعْمَة دْيَالْ اللَّهْ عَمّْرْهَا مَا غَتْكُونْ نِعْمَة.

⁷أَشْنُو كَيْعْنِي هَادْشِّي؟ رَاهْ دَاكْشِّي اللِّي شَعْبْ إِسْرَائِيلْ كَانُو كَيْقَلّْبُو عْلِيهْ مَا خْدَاوْهْشْ، وَلَكِنْ اللِّي خْتَارْهُمْ اللَّهْ خْدَاوْهْ. وْاللِّي بْقَاوْ مْنّْهُمْ قَسّْحُو قَلْبْهُمْ.

⁸كِيفْ مْكْتُوبْ فْكْتَابْ اللَّهْ: «خْلَّاهُمْ اللَّهْ بْلَا فْهَامَة، وْعْطَاهُمْ عِينِينْ بَاشْ مَا يْشُوفُوشْ، وْوْدْنِينْ بَاشْ مَا يْسَمْعُوشْ حْتَّى لْهَادْ النّْهَارْ».

⁹وْحْتَّى دَاوُدْ كَيْݣُولْ: «مْصَّابْ تْوَلِّي الْحَفْلَة دْيَالْهُمْ مْصِيدَة وْشْبْكَة وْحَفْرَة، وْعِقَابْ لِيهُمْ.

¹⁰مْصَّابْ يْضْلَامُو عِينِيهُمْ بَاشْ مَا يْشُوفُوشْ، وْيْوَلِّي الضّْهَرْ دْيَالْهُمْ دِيمَا مْحْنِي».

¹¹وْهْنَا كَنْسْوّْلْ: وَاشْ لِيهُودْ تْعَتّْرُو بَاشْ يْطِيحُو؟ حَاشَا! وَلَكِنْ الْغَلَطْ دْيَالْهُمْ جَابْ النّْجَا لْلشّْعُوبْ اللِّي مَاشِي يْهُودْ، بَاشْ لِيهُودْ يْغِيرُو مْنّْهُمْ.

¹²وْإِلَا كَانْ الْغَلَطْ دْيَالْهُمْ بَرَكَة كَتْغْنِي نَاسْ الدّْنْيَا، وْالْنُّقْصَانْ دْيَالْهُمْ بَرَكَة كَتْغْنِي الشّْعُوبْ اللِّي مَاشِي يْهُودْ، إِيوَا كِيفَاشْ مَا يْكُونُوشْ الْبَرَكَاتْ كْتَرْ، مْلِّي غَيْقَبْلُو لِيهُودْ النّْجَا؟

¹³وْدَابَا نْݣُولْ لِيكُمْ نْتُمَ آ الشّْعُوبْ اللِّي مَاشِي يْهُودْ: مَا حَدّْنِي رَسُولْ لْلشّْعُوبْ اللِّي مَاشِي يْهُودْ، رَانِي كَنْفْتَخْرْ بْالْخْدْمَة دْيَالِي.

¹⁴لَعَلَّ وَعَسَى يْغِيرُو مْنِّي اللِّي مْنْ لْحْمِي وْدْمِّي، بَاشْ نْكُونْ السَّبَبْ فْالنّْجَا دْيَالْ شِي وْحْدِينْ مْنّْهُمْ.

¹⁵حِيتْ إِلَا كَانْ اللَّهْ مْلِّي تْخَلَّى عْلَى لِيهُودْ تّْصَالْحْ مْعَ نَاسْ الدّْنْيَا، وَاشْ مَاشِي إِلَا قْبَلْهُمْ غَادِي تْكُونْ هَادِيكْ هِيَ الْحَيَاةْ مْنْ بَعْدْ الْمُوتْ؟

¹⁶وْإِلَا كَانْ الطَّرْفْ اللّْوّْلْ دْيَالْ الْعْجِينَة مْقَدّْسْ، رَاهْ الْعْجِينَة كُلّْهَا مْقَدّْسَة! وْإِلَا كَانْ الجّْدَرْ مْقَدّْسْ رَاهْ حْتَّى الْعْرُوشْ مْقَدّْسِينْ!

¹⁷وْإِلَا تّْقْطْعُو شِي عْرُوشْ مْنْ شَجْرَة دْ الزِّيتُونْ، وْنْتَ اللِّي رَاكْ عَرْشْ مْنْ شَجْرَة دْ الزِّيتُونْ نَابْتَة فْالْخْلَا تْلَقّْمْتِي فْبْلَاصْتْهُمْ، وْوْلِّيتِي مْشَارْكْ فْالجّْدْرْ دْيَالْ شَجْرَةْ الزِّيتُونْ وْالْمَا اللِّي فِيهَا،

¹⁸مَا تْفْتَخْرْشْ عْلَى الْعْرُوشْ اللِّي تّْقْطْعُو. وْكِيفَاشْ غَتْفْتَخْرْ وْنْتَ مَا هَازّْشْ الجّْدَرْ، وَلَكِنْ الجّْدَرْ هُوَ اللِّي هَازّْكْ؟

¹⁹وَلَكِنْ غَادِي تْݣُولْ: «تّْقْطْعُو الْعْرُوشْ بَاشْ أَنَا نْتْلَقّْمْ».

²⁰هَادْشِّي صْحِيحْ! حِيتْ هُمَ مَا آمْنُوشْ تّْقْطْعُو. وْنْتَ بْالْإِيمَانْ دْيَالْكْ تْبَتِّي، إِيوَا مَا تْفْتَخْرْشْ وَلَكِنْ رَدّْ بَالْكْ.

²¹حِيتْ إِلَا اللَّهْ مَا حَنّْشْ فْالْعْرُوشْ الْأَصْلِيِّينْ رَاهْ يْقْدَرْ مَا يْحَنّْشْ فِيكْ حْتَّى نْتَ.

²²إِيوَا شُوفْ مْزْيَانْ لُطْفْ اللَّهْ وْالْعِقَابْ دْيَالُه: الْعِقَابْ رَاهْ لْهَادُوكْ اللِّي دَنْبُو، أَمَّا اللُّطْفْ رَاهْ لِيكْ مَا حَدّْكْ تَابْتْ فْاللُّطْفْ، وْإِلَا مَا تْبَتِّيشْ غَيْقْطْعَكْ حْتَّى نْتَ.

²³وْحْتَّى هُمَ إِلَا مَا بْقَاوْشْ تَابْتِينْ فْالْكُفْرْ دْيَالْهُمْ رَاهُمْ غَيْتّْلَقّْمُو. حِيتْ اللَّهْ قَادْرْ يْلَقّْمْهُمْ مْنْ جْدِيدْ.

²⁴وْإِلَا كْنْتِ نْتَ فْالْأَصْلْ مْنْ الشَّجْرَة دْ الزِّيتُونْ اللِّي نَابْتَة فْالْخْلَا، وْقَطْعْكْ اللَّهْ وْلَقّْمْكْ فْشَجْرَةْ الزِّيتُونْ الْمْزْيَانَة، اللِّي عَكْسْ الطّْبِيعَة دْيَالْكْ، شْحَالْ سَاهْلْ بْزَّافْ عْلَى هَادُوكْ اللِّي فْالْأَصْلْ مْنْ الشَّجْرَة الْمْزْيَانَة، بَاشْ يْلَقّْمْهُمْ اللَّهْ فِيهَا؟

²⁵آ الْخُوتْ رَانِي مَا بْغِيتْشْ يْخْفَى عْلِيكُمْ هَادْ السِّرّْ، بَاشْ مَا تْحَسْبُوشْ رَاسْكُمْ حُكَمَا: رَاهْ شِي وْحْدِينْ مْنْ شَعْبْ إِسْرَائِيلْ قَسّْحُو قَلْبْهُمْ، وْغَيْبْقَى قَاسْحْ حْتَّى يْآمْنُو ݣَاعْ الشّْعُوبْ اللِّي مَاشِي يْهُودْ.

²⁶وْهَكَّا غَادِي يْنْجَا ݣَاعْ شَعْبْ إِسْرَائِيلْ كِيفْ مْكْتُوبْ فْكْتَابْ اللَّهْ: «غَيْخْرُجْ مْنْ صِهْيَوْنْ الْمُنَجِّي، وْغَيْحَيّْدْ الدّْنُوبْ مْنْ تْرِّيكْةْ يَعْقُوبْ.

²⁷وْهَادَا هُوَ الْعَهْدْ دْيَالِي مْعَاهُمْ مْلِّي غَنْمْحِي دْنُوبْهُمْ».

²⁸إِيوَا مْنْ جِهْةْ الْإِنْجِيلْ، رَاهْ لِيهُودْ عْدْيَانْ اللَّهْ وْهَادْشِّي لْمْصْلَحْتْكُمْ. وَلَكِنْ حِيتْ اللَّهْ خْتَارْهُمْ، رَاهْ كَيْبْغِيهُمْ عْلَى وْدّْ جْدُودْهُمْ.

²⁹حِيتْ اللَّهْ عَمّْرُه مَا كَيْتّْرَاجْعْ عْلَى دَاكْشِّي اللِّي كَيْعْطِي، وَلَا عْلَى اللِّي كَيْخْتَارْهُمْ.

³⁰وْرَاهْ كِمَا نْتُمَ اللِّي مَاشِي يْهُودْ مَا طْعْتُوشْ اللَّهْ مْنْ قْبَلْ، وَلَكِنْ هُوَ رْحَمْكُمْ دَابَا بْسْبَابْ لِيهُودْ اللِّي عْصَاوْهْ.

³¹هَكَّا حْتَّى هُمَ عْصَاوْ اللَّهْ دَابَا، بَاشْ يْرْحَمْهُمْ كِمَا رْحَمْكُمْ حْتَّى نْتُمَ.

³²حِيتْ اللَّهْ خْلَّا ݣَاعْ النَّاسْ فْالْمَعْصِيَّة بَاشْ يْرْحَمْهُمْ كَامْلِينْ.

³³شْحَالْ كْبِيرْ الْغِنَى وْالْحْكْمَة وْالْعِلْمْ دْيَالْ اللَّهْ! حْتَّى وَاحْدْ مَا يْقْدَرْ يْعْلَمْ عْلَى حْكَامُه وْيْفْهَمْ طْرْقَانُه!

³⁴«شْكُونْ اللِّي عْرَفْ الْأَفْكَارْ دْيَالْ الرَّبّْ؟ وْشْكُونْ اللِّي يْقْدَرْ يْنَصْحُه؟

³⁵وْشْكُونْ اللِّي عْطَاهْ شِي حَاجَة فْاللّْوّْلْ بَاشْ يْرَدّْهَا لِيهْ؟».

³⁶عْلَاحْقَّاشْ مْنُّه وْبِيهْ وْلِيهْ كُلّْشِي. لِيهْ الْعَزّْ عْلَى الدّْوَامْ. آمِينْ.