Read Moroccan Standard Translation رُومَا 12 Bible Online

رُومَا 12 - Moroccan Standard Translation bible

رُومَا 12

¹الْفَصْلْ طْنَاشْ عْلَى هَادْشِّي آ الْخُوتْ، كَنْطْلَبْ مْنّْكُمْ عْلَى وْدّْ الرَّحْمَة دْ اللَّهْ بَاشْ تْقَدّْمُو الدَّاتْ دْيَالْكُمْ دْبِيحَة حَيَّة وْمْقَدّْسَة كَتْرْضِي اللَّهْ، وْهَادِي هِيَ الْعِبَادَة الرُّوحِيَّة دْيَالْكُمْ.

²وْمَا تْدِيرُوشْ كِيفْ كَيْدِيرُو نَاسْ هَادْ الدّْنْيَا، وَلَكِنْ تْبَدّْلُو وْخَلِّيوْ الْأَفْكَارْ دْيَالْكُمْ تْتْجَدّْدْ، بَاشْ تْعَرْفُو مُرَادْ اللَّهْ الْمْزْيَانْ وْالْمْقْبُولْ وْالْكَامْلْ.

³وْبْفْضَلْ النِّعْمَة اللِّي عْطَانِي اللَّهْ كَنْوَصِّي كُلّْ وَاحْدْ فِيكُمْ، بَاشْ يْكُونْ رْزِينْ وْمَا يْعْطِيشْ قِيمَة لْرَاسُه كْتَرْ مْنْ اللَّازْمْ، عْلَى حْسَابْ الْقْيَاسْ دْيَالْ الْإِيمَانْ اللِّي عْطَاهْ اللَّهْ لْكُلّْ وَاحْدْ.

⁴وْرَاهْ كِمَا كَايْنْ فْدَاتْ وَحْدَة بْزَّافْ دْيَالْ الطّْرَافْ، وَلَكِنْ مَاشِي ݣَاعْ الطّْرَافْ كَيْدِيرُو نَفْسْ الْخْدْمَة،

⁵هَكَّا وَاخَّا حْنَا كْتَارْ، رَاهْ حْنَا دَاتْ وَحْدَة فْالْمَسِيحْ، وْكُلّْنَا طْرَافْ مْتَّاحْدِينْ مْعَ بْعْضِيَّاتْنَا، كُلّْ وَاحْدْ وْخْدَمْتُه.

⁶وْعَنْدْنَا مَوَاهِبْ مْخْتَلْفَة، كُلّْ وَاحْدْ عَنْدُه عْلَى حْسَابْ النِّعْمَة اللِّي عْطَاهْ اللَّهْ. اللِّي عَنْدُه الْمَوْهِبَة دْيَالْ النُّبُوَّة، خَاصُّه يْتّْنَبّْأْ عْلَى حْسَابْ الْإِيمَانْ دْيَالُه.

⁷وْاللِّي عَنْدُه الْمَوْهِبَة دْيَالْ خْدْمَةْ الرَّبّْ، خَاصُّه يْخْدَمْ. وْاللِّي عَنْدُه الْمَوْهِبَة دْيَالْ التَّعْلِيمْ خَاصُّه يْعَلّْمْ.

⁸وْاللِّي عَنْدُه الْمَوْهِبَة دْيَالْ التَّشْجِيعْ، خَاصُّه يْشَجّْعْ. وْاللِّي عَنْدُه الْمَوْهِبَة بَاشْ يْعْطِي خَاصُّه يْعْطِي بْالسّْخَا، وْاللِّي عَنْدُه الْمَوْهِبَة دْيَالْ الْقِيَادَة خَاصُّه يْدِيرْهَا بْكُلّْ جْهْدُه، وْاللِّي عَنْدُه الْمَوْهِبَة دْيَالْ الرَّحْمَة خَاصُّه يْرْحَمْ بْالْفَرْحَة.

⁹وْخَاصّْ تْكُونْ الْمْحَبَّة دْيَالْكُمْ بْلَا نِفَاقْ، كْرْهُو الشَّرّْ وْتْبْتُو فْالْخِيرْ.

¹⁰بْغِيوْ بْعْضِيَّاتْكُمْ مْنْ قَلْبْكُمْ بْحَالْ الْخُوتْ. وْحْتَرْمُو غِيرْكُمْ كْتَرْ مْنْ رَاسْكُمْ.

¹¹دِيرُو جَهْدْكُمْ وْمَا تْكُونُوشْ مْعْݣَازِينْ، تّْشَجّْعُو فْالرُّوحْ وْخْدْمُو لْلرَّبّْ.

¹²وْفْرْحُو بْسْبَابْ الرّْجَا اللِّي عَنْدْكُمْ، وْصْبْرُو فْالْمْحْنَة، وْصَلِّيوْ عْلَى الدّْوَامْ.

¹³عَاوْنُو الْمُومْنِينْ الْمْحْتَاجِينْ، وْدِيمَا ضَايْفُو الْبْرَّانِيِّينْ.

¹⁴بَارْكُو اللِّي كَيْتّْعَدَّاوْ عْلِيكُمْ، بَارْكُو وْمَا تْلَعْنُوشْ.

¹⁵فْرْحُو مْعَ اللِّي كَيْفَرْحُو، وْبْكِيوْ مْعَ اللِّي كَيْبْكِيوْ.

¹⁶كُونُو مْتَّافْقِينْ مْعَ بْعْضِيَّاتْكُمْ، وْمَا تْدِّيوْهَاشْ فْالْأُمُورْ دْيَالْ الدّْنْيَا وَلَكِنْ كُونُو مْتْوَاضْعِينْ، وْمَا تْحَسْبُوشْ رَاسْكُمْ حُكَمَا.

¹⁷مَا تْرَدُّوشْ الشَّرّْ بْالشَّرّْ. وْدِيرُو جَهْدْكُمْ بَاشْ تْدِيرُو الْخِيرْ قُدَّامْ ݣَاعْ النَّاسْ.

¹⁸وْإِلَا مُمْكِنْ، عِيشُو فْالْهْنَا مْعَ ݣَاعْ النَّاسْ عْلَى قْدّْ جَهْدْكُمْ.

¹⁹مَا تْنْتَقْمُوشْ لْرَاسْكُمْ آ حْبَابِي، وَلَكِنْ خَلِّيوْ اللَّهْ هُوَ اللِّي يْنْتَقْمْ، حِيتْ كْتَابْ اللَّهْ كَيْݣُولْ: «أَنَا الرَّبّْ اللِّي كَنّْتَقْمْ وْأَنَا اللِّي كَنْجَازِي كُلّْ وَاحْدْ».

²⁰وْكَيْݣُولْ عَاوْتَانِي: «إِلَا جَاعْ عْدُوكْ عْطِيهْ يَاكُلْ، وْإِلَا عْطَشْ عْطِيهْ يْشْرَبْ، حِيتْ إِلَا دْرْتِي هَادْشِّي رَاهْ بْحَالْ إِلَا كَتْجْمَعْ الجّْمَرْ دْ الْعَافْيَة عْلَى رَاسُه».

²¹مَا تْخَلِّيشْ الشَّرّْ يْغَلْبَكْ وَلَكِنْ غْلَبْ الشَّرّْ بْالْخِيرْ.