Read Moroccan Standard Translation رُومَا 13 Bible Online

رُومَا 13 - Moroccan Standard Translation bible

رُومَا 13

¹الْفَصْلْ تْلْطَاشْ خَاصّْ كُلّْ وَاحْدْ يْطِيعْ صْحَابْ السُّلْطَة، حِيتْ مَا كَايْنَاشْ شِي سُلْطَة مْنْ غِيرْ اللِّي مْنْ عَنْدْ اللَّهْ. وْصْحَابْ السُّلْطَة اللِّي كَايْنِينْ دَابَا، رَاهْ اللَّهْ هُوَ اللِّي خْتَارْهُمْ.

²عْلَى هَادْشِّي رَاهْ اللِّي كَيْضَادّْ السُّلْطَة، كَيْضَادّْ الْأَوَامِرْ دْيَالْ اللَّهْ، وْهَادُوكْ اللِّي كَيْضَادُّو غَيْتّْعَاقْبُو.

³حِيتْ اللِّي كَيْدِيرْ الْخِيرْ مَا كَيْخَافْشْ مْنْ الْحُكَّامْ، وَلَكِنْ اللِّي كَيْدِيرْ الشَّرّْ هُوَ اللِّي كَيْخَافْ مْنّْهُمْ. وَاشْ بْغِيتِي مَا تْخَافْشْ مْنْ صْحَابْ السُّلْطَة؟ إِيوَا دِيرْ الْخِيرْ بَاشْ يْمْدْحُوكْ.

⁴حِيتْ كَيْدِيرُو الْخْدْمَة دْيَالْ اللَّهْ اللِّي فِيهَا مْصْلَحْتْكْ. وَلَكِنْ إِلَا كَتْدِيرْ الشَّرّْ رَاهْ خَاصّْكْ تْخَافْ، حِيتْ صْحَابْ السُّلْطَة مَا كَيْعَاقْبُوشْ بْلَا سَبَبْ. وْهَكَّا رَاهُمْ كَيْدِيرُو الْخْدْمَة دْيَالْ اللَّهْ وْكَيْبَيّْنُو الْغَضَبْ دْيَالْهُمْ عْلَى اللِّي كَيْدِيرْ أَعْمَالْ الشَّرّْ.

⁵عْلَى هَادْشِّي خَاصّْنَا نْطِيعُو، مَاشِي غِيرْ عْلَى وْدّْ الْغَضَبْ دْيَالْ اللَّهْ، وَلَكِنْ حْتَّى عْلَى وْدّْ الضَّمِيرْ.

⁶وْرَاهْ هَادْشِّي عْلَاشْ كَتْخَلّْصُو حْتَّى الضَّرِيبَة، حِيتْ مَّالِينْ الضَّرِيبَة كَيْخَدْمُو لْلَّهْ مْلِّي كَيْدِيرُو خْدَمْتْهُمْ مْزْيَانْ.

⁷إِيوَا عْطِيوْ لْكُلّْ وَاحْدْ حَقُّه: خَلّْصُو ݣَاعْ الضَّرَائِبْ لْمَّالِينْ الضَّرِيبَة، طِيعُو اللِّي كَيْسْتَاهْلُو الطَّاعَة، وْحْتَرْمُو اللِّي كَيْسْتَاهْلُو الْإِحْتِرَامْ.

⁸مَا يْكُونْ عْلِيكُمْ حْتَّى دِينْ مْنْ شِي حَدّْ، مْنْ غِيرْ مْحَبّْتْكُمْ لْبَعْضِيَّاتْكُمْ، حِيتْ اللِّي كَيْبْغِي غِيرُه، رَاهْ دَارْ بْالشّْرَعْ كُلُّه.

⁹عْلَاحْقَّاشْ الْوْصِيَّاتْ: «مَا تْفْسَدْشْ، مَا تْقْتَلْشْ، مَا تْسْرَقْشْ، وْمَا تّْشْهَّاشْ»، وْالْوْصِيَّاتْ لْخْرَى، رَاهُمْ كَيْتّْجَمْعُو فْهَادْ الْكْلَامْ: «خَاصّْكْ تْبْغِي اللِّي قْرِيبْ لِيكْ كِيفْ كَتْبْغِي رَاسْكْ».

¹⁰الْمْحَبَّة مَا كَتْدِيرْشْ الشَّرّْ لْلنَّاسْ، وْهَكَّا كَتْكَمّْلْ الْمْحَبَّة الشّْرَعْ كُلُّه.

¹¹وْفُوقْ هَادْشِّي رَاكُمْ كَتْعَرْفُو الْوَقْتْ اللِّي حْنَا فِيهْ، بْلِّي جَاتْ السَّاعَة اللِّي فِيهَا خَاصّْكُمْ تْفِيقُو مْنْ النّْعَاسْ، حِيتْ النّْجَا دْيَالْنَا وْلَّى دَابَا قْرَبْ مْنْ كِيفْ كَانْ فْالنّْهَارْ اللِّي آمْنَّا فِيهْ.

¹²رَاهْ اللِّيلْ قَرّْبْ يْسَالِي، وْالنّْهَارْ قَرّْبْ يْطْلَعْ. إِيوَا خَاصّْنَا نْحَيّْدُو الْأَعْمَالْ دْيَالْ الضّْلَامْ، وْنْلَبْسُو السّْلَاحْ دْيَالْ النُّورْ.

¹³وْخَاصّْنَا نْعِيشُو بْاحْتِرَامْ كِمَا فْالنّْهَارْ: بْلَا تْعَرْبِيطَة وَلَا سْكْرَة، وَلَا ݣَاعْ نْوَاعْ الْفْسَادْ، وَلَا خْصُومَة وَلَا حْسَدْ.

¹⁴وَلَكِنْ كُونُو بْحَالْ الرَّبّْ يَسُوعْ الْمَسِيحْ، وْمَا تّْشَغْلُوشْ بْالدَّاتْ دْيَالْكُمْ بَاشْ تْرْضِيوْ الشَّهْوَة دْيَالْهَا.