Read Moroccan Standard Translation رُومَا 14 Bible Online

رُومَا 14 - Moroccan Standard Translation bible

رُومَا 14

¹الْفَصْلْ رْبَعْطَاشْ قْبْلُو اللِّي ضْعِيفْ فْالْإِيمَانْ، بْلَا مَا تْحَكْمُو عْلَى الْأَفْكَارْ دْيَالُه.

²رَاهْ كَايْنْ اللِّي كَيْعْتَقْدْ بْلِّي يْقْدَرْ يَاكُلْ كُلّْشِي، وْكَايْنْ اللِّي ضْعِيفْ مَا كَيَاكُلْ غِيرْ الْخُضْرَة.

³هَادَاكْ اللِّي كَيَاكُلْ كُلّْشِي مَا خَاصُّوشْ يْحْتَقْرْ اللِّي مَا كَيَاكُلْشْ كُلّْشِي، وْهَادَاكْ اللِّي مَا كَيَاكُلْشْ كُلّْشِي مَا خَاصُّوشْ يْحْكَمْ عْلَى اللِّي كَيَاكُلْ كُلّْشِي، حِيتْ اللَّهْ قْبْلُه.

⁴شْكُونْ نْتَ بَاشْ تْحْكَمْ عْلَى الْعَبْدْ دْيَالْ غِيرْكْ؟ سْوَا تْبَتْ وْلَا فْشَلْ، رَاهْ هَادَا شْغُلْ سِيدُه. وَلَكِنْ غَادِي يْتْبَتْ، حِيتْ اللَّهْ قَادْرْ يْتَبّْتُه.

⁵وْرَاهْ كَايْنْ اللِّي كَيْعْتَبْرْ شِي يَّامَاتْ مُهِمِّينْ كْتَرْ مْنْ لْخْرِينْ، وْكَايْنْ اللِّي كَيْعْتَبْرْ ݣَاعْ لِيَّامَاتْ بْحَالْ بْحَالْ. كُلّْ وَاحْدْ خَاصُّه يْكُونْ مْقْتَنْعْ بْالرَّأْيْ دْيَالُه.

⁶هَادَاكْ اللِّي كَيْعْطِي الْأَهَمِّيَة لْشِي نْهَارْ، كَيْدِيرْ دَاكْشِّي عْلَى وْدّْ الرَّبّْ. وْهَادَاكْ اللِّي كَيَاكُلْ كُلّْشِي كَيْدِيرْ دَاكْشِّي عْلَى وْدّْ الرَّبّْ، حِيتْ كَيْشْكَرْ اللَّهْ. وْهَادَاكْ اللِّي مَا كَيَاكُلْشْ كُلّْشِي كَيْدِيرْ دَاكْشِّي عْلَى وْدّْ الرَّبّْ، وْحْتَّى هُوَ كَيْشْكَرْ اللَّهْ.

⁷حِيتْ حْتَّى وَاحْدْ مْنَّا مَا كَيْعِيشْ لْرَاسُه، وْحْتَّى وَاحْدْ مَا كَيْمُوتْ لْرَاسُه.

⁸عْلَاحْقَّاشْ إِلَا عْشْنَا رَاهْ كَنْعِيشُو لْلرَّبّْ، وْإِلَا مْتْنَا رَاهْ كَنْمُوتُو لْلرَّبّْ. وْسْوَا عْشْنَا وْلَا مْتْنَا رَاهْ حْنَا دْيَالْ الرَّبّْ.

⁹وْعْلَى هَادْ الْأُمُورْ مَاتْ الْمَسِيحْ وْتّْبْعَتْ حَيّْ، بَاشْ يْكُونْ هُوَ الرَّبّْ دْيَالْ الْمْيّْتِينْ وْالْحَيِّينْ.

¹⁰وَلَكِنْ نْتَ عْلَاشْ كَتْحْكَمْ عْلَى خُوكْ؟ وْنْتَ عْلَاشْ كَتْحْتَقْرْ خُوكْ؟ رَاهْ كُلّْنَا غَنْوَقْفُو قُدَّامْ عَرْشْ اللَّهْ بَاشْ نْتّْحَاسْبُو.

¹¹حِيتْ مْكْتُوبْ فْكْتَابْ اللَّهْ: «أَنَا حَيّْ كَيْݣُولْ الرَّبّْ، رَاهْ كُلّْ رْكْبَة غَتّْحْنَى لِيَّ، وْكُلّْ لْسَانْ غَيْعْتَرْفْ بْلِّي أَنَا اللَّهْ».

¹²وْهَكَّا كُلّْ وَاحْدْ مْنَّا غَادِي يْتّْحَاسْبْ عْلَى رَاسُه قُدَّامْ اللَّهْ.

¹³إِيوَا رَاهْ مَا خَاصّْنَاشْ نْبْقَاوْ نْحَكْمُو عْلَى بْعْضِيَّاتْنَا، وَلَكِنْ حْكْمُو بْهَادْشِّي: مَا يْكُونْشْ شِي وَاحْدْ عَتْرَة لْخُوهْ وْلَا يْتّْسَبّْبْ لِيهْ فْالدّْنُوبْ.

¹⁴وْأَنَا كَنْعْرَفْ، وْمْتْيِقّْنْ مْنْ الرَّبّْ يَسُوعْ، بْلِّي مَا كَايْنَة حْتَّى شِي حَاجَة مْنْجُوسَة بْنَفْسْهَا. وَلَكِنْ كَتْكُونْ مْنْجُوسَة عَنْدْ هَادَاكْ اللِّي كَيْضَنّْ بْلِّي رَاهَا مْنْجُوسَة.

¹⁵إِلَا كَانْ خُوكْ كَيْتّْقَلّْقْ بْسْبَابْ شِي مَاكْلَة كَتَاكُلْهَا، رَاكْ مَا كَتّْصَرّْفْشْ بْالْمْحَبَّة. وْرَاهْ مَا خَاصّْشْ بْالْمَاكْلَة دْيَالْكْ تّْسَبّْبْ فْالْهْلَاكْ لْهَادَاكْ اللِّي مَاتْ الْمَسِيحْ عْلَى وْدُّه.

¹⁶إِيوَا مَا تْخَلِّيوْشْ النَّاسْ يْݣُولُو كْلَامْ خَايْبْ عْلَى الْأُمُورْ اللِّي كَتْشُوفُوهَا مْزْيَانَة لِيكُمْ.

¹⁷حِيتْ مَمْلَكَةْ اللَّهْ مَاشِي هِيَ الْمَاكْلَة وْالشّْرَابْ، وَلَكِنْ رَاهْ هِيَ التَّقْوَى وْالْهْنَا وْالْفَرْحَة بْالرُّوحْ الْقُدُسْ.

¹⁸اللِّي كَيْخْدَمْ لْلْمَسِيحْ بْحَالْ هَكَّا رَاهْ مْرْضِي عَنْدْ اللَّهْ، وْمْقْبُولْ عَنْدْ النَّاسْ.

¹⁹إِيوَا خَاصّْنَا نْقَلّْبُو عْلَى الْأُمُورْ اللِّي فِيهَا الْهْنَا، وْالْأُمُورْ اللِّي كَتْقَوِّينَا فْالْإِيمَانْ.

²⁰مَا تْرَيَّبْشْ الْخْدْمَة دْيَالْ اللَّهْ بْسْبَابْ الْمَاكْلَة، رَاهْ الْمَاكْلَة كُلّْهَا حْلَالْ، وَلَكِنْ مَا مْزْيَانْشْ يَاكُلْ الْوَاحْدْ شِي حَاجَة اللِّي غَتْكُونْ عَتْرَة لْشِي حَدّْ.

²¹وْحْسَنْ مَا تَاكُلْشْ اللّْحَمْ وْمَا تْشْرَبْشْ الْخْمَرْ، وْلَا شِي حَاجَة اللِّي غَادِي تْطِيّْحْ خُوكْ فْالدّْنُوبْ.

²²وْالْاعْتِقَادْ دْيَالْكْ خَلِّيهْ بِينْكْ وْبِينْ اللَّهْ. وْسْعْدَاتْ اللِّي مَا كَيْلُومْشْ رَاسُه فْالْأُمُورْ اللِّي كَيْشُوفْهَا مْزْيَانَة.

²³وَلَكِنْ اللِّي عَنْدُه الشّْكْ، رَاهْ مْلِّي كَيَاكُلْ كَيْنْزَلْ عْلِيهْ الْحُكْمْ دْيَالْ اللَّهْ، عْلَاحْقَّاشْ مَا كَيْدِيرْشْ دَاكْشِّي مْنْ الْإِيمَانْ دْيَالُه، وْكُلّْ عَمَلْ مَا كَيْجِيشْ مْنْ الْإِيمَانْ رَاهْ هُوَ دْنُوبْ.