Read Moroccan Standard Translation رُومَا 15 Bible Online

رُومَا 15 - Moroccan Standard Translation bible

رُومَا 15

¹الْفَصْلْ خْمْسْطَاشْ خَاصّْنَا حْنَا الْقْوِيِّينْ فْالْإِيمَانْ نْتّْحَمّْلُو الضُّعْفْ دْيَالْ النَّاسْ اللِّي ضْعَافْ فْالْإِيمَانْ، وْمَا نْقَلّْبُوشْ عْلَى شْنُو كَيْرْضِينَا.

²وْخَاصّْ كُلّْ وَاحْدْ مْنَّا يْرْضِي غِيرُه فْالْحَاجَة اللِّي مْزْيَانَة، بَاشْ يْتّْقُوَّى.

³حِيتْ الْمَسِيحْ مَا قَلّْبْشْ يْرْضِي رَاسُه، وَلَكِنْ كِيفْ مْكْتُوبْ فْكْتَابْ اللَّهْ: «رَاهْ الْمْعْيَارْ دْيَالْ هَادُوكْ اللِّي عَايْرُوكْ، نْزَلْ عْلِيَّ».

⁴وْݣَاعْ دَاكْشِّي اللِّي تّْكْتَبْ فْكْتَابْ اللَّهْ مْنْ قْبَلْ، رَاهْ تّْكْتَبْ بَاشْ يْعَلّْمْنَا كِيفَاشْ يْكُونْ عَنْدْنَا الرّْجَا بْالصّْبَرْ وْالتَّشْجِيعْ اللِّي فْكْتَابْ اللَّهْ.

⁵وْكَنْطْلَبْ اللَّهْ اللِّي كَيْعْطِي الصّْبَرْ وْالتَّشْجِيعْ، تْكُونُو مْتَّافْقِينْ مْعَ بْعْضِيَّاتْكُمْ، كِيفْ كَيْبْغِي الْمَسِيحْ يَسُوعْ.

⁶بَاشْ تْعْطِيوْ الْعَزّْ لْلَّهْ بُو رَبّْنَا يَسُوعْ الْمَسِيحْ بْقَلْبْ وَاحْدْ وْلْسَانْ وَاحْدْ.

⁷قْبْلُو بْعْضِيَّاتْكُمْ كِمَا قْبَلْكُمْ الْمَسِيحْ، بَاشْ يْتّْعْطَى الْعَزّْ لْلَّهْ.

⁸وْرَاهْ كَنْݣُولْ لِيكُمْ، بْلِّي الْمَسِيحْ وْلَّى كَيْخْدَمْ لِيهُودْ بَاشْ يْبَيّْنْ بْلِّي اللَّهْ صَادْقْ فْكْلَامُه، وْبَاشْ يُوفِي بْدَاكْشِّي اللِّي وَاعْدْ بِيهْ اللَّهْ الجّْدُودْ،

⁹وْبَاشْ الشّْعُوبْ اللِّي مَاشِي يْهُودْ يْعْطِيوْ الْعَزّْ لْلَّهْ عْلَى الرَّحْمَة دْيَالُه، كِيفْ مْكْتُوبْ فْكْتَابْ اللَّهْ: «عْلَى وْدّْ هَادْشِّي غَنْحَمْدْكْ وَسْطْ الشّْعُوبْ، وْغَنْغَنِّي لْلْإِسْمْ دْيَالْكْ».

¹⁰وْكَيْݣُولْ كْتَابْ اللَّهْ عَاوْتَانِي: «آ الشّْعُوبْ فْرْحُو مْعَ الشَّعْبْ دْيَالُه».

¹¹وْكَيْݣُولْ مَرَّة خْرَى: «سَبّْحُو الرَّبّْ آ ݣَاعْ الشّْعُوبْ، وْعْطِيوْهْ الْعَزّْ آ ݣَاعْ النَّاسْ».

¹²وْحْتَّى النّْبِي إِشْعِيَا كَيْݣُولْ: «رَاهْ غَيْجِي وَاحْدْ مْنْ تْرِّيكْةْ يَسَّى، هُوَ اللِّي غَيْوْقَفْ بَاشْ يْحْكَمْ عْلَى الشّْعُوبْ، وْفِيهْ غَيْدِيرُو رْجَاهُمْ».

¹³كَنْطْلَبْ اللَّهْ اللِّي كَيْعْطِي الرّْجَا، يْعَمّْرْكُمْ بْالْفَرْحَة وْالْهْنَا بْإِيمَانْكُمْ بِيهْ، بَاشْ الرّْجَا دْيَالْكُمْ يْزِيدْ يْكْتَرْ بْقُوَّةْ الرُّوحْ الْقُدُسْ.

¹⁴آ الْخُوتْ، أَنَا بْرَاسِي مْتْيِقّْنْ مْنْ جِهْتْكُمْ بْلِّي رَاكُمْ عَامْرِينْ بْالْخِيرْ، وْعَنْدْكُمْ الْعِلْمْ كُلُّه، وْقَادْرِينْ تْنَصْحُو بْعْضِيَّاتْكُمْ.

¹⁵وَلَكِنْ كْتَبْتْ لِيكُمْ بْكُلّْ شَجَاعَة عْلَى شِي حْوَايْجْ بَاشْ نْفَكّْرْكُمْ بِيهُمْ عْلَى وْدّْ النِّعْمَة اللِّي عْطَانِي اللَّهْ.

¹⁶بَاشْ نْكُونْ كَنْخْدَمْ يَسُوعْ الْمَسِيحْ عْلَى وْدّْ الشّْعُوبْ اللِّي مَاشِي يْهُودْ، وْكَنْدِيرْ خْدْمَةْ رَاجْلْ الدِّينْ وْأَنَا كَنْخَبّْرْ بْإِنْجِيلْ اللَّهْ، بَاشْ هَادْ الشّْعُوبْ يْكُونُو تَقْدِمَة مْقْبُولَة عَنْدْ اللَّهْ وْمْقَدّْسَة بْالرُّوحْ الْقُدُسْ.

¹⁷وْفْالْمَسِيحْ يَسُوعْ عَنْدِي الْحَقّْ نْفْتَخْرْ مْنْ جِهْةْ الْخْدْمَة دْيَالِي لْلَّهْ.

¹⁸وْمَا نْقْدَرْشْ نْتّْكَلّْمْ عْلَى شِي حَاجَة مْنْ غِيرْ الْأُمُورْ اللِّي دَارْهَا الْمَسِيحْ عْلَى يْدِّيَّ، بَاشْ الشّْعُوبْ اللِّي مَاشِي يْهُودْ يْطِيعُو اللَّهْ، وْالْمَسِيحْ دَارْ هَادْشِّي بْالْقُولْ وْالْفِعْلْ،

¹⁹وْبْالْقُوَّة دْيَالْ الْعَلَامَاتْ وْالْعْجَايْبْ وْبْالْقُوَّة دْيَالْ رُوحْ اللَّهْ. وْرَانِي كَمّْلْتْ التّْبْشِيرْ بْإِنْجِيلْ الْمَسِيحْ، مْنْ أُورْشَلِيمْ وْالجّْوَايْهْ دْيَالْهَا حْتَّى لْبْلَادْ إِلِّيرِيكُونْ.

²⁰وْكَانْ الْمُرَادْ دْيَالِي نْبَشّْرْ بْالْإِنْجِيلْ غِيرْ فْالْبْلَايْصْ اللِّي مَا سْمْعُوشْ فِيهُمْ النَّاسْ عْلَى الْمَسِيحْ، بَاشْ مَا نْبْنِيشْ عْلَى السَّاسْ اللِّي دَارُوهْ وْحْدِينْ خْرِينْ.

²¹وْهَكَّا دْرْتْ كِيفْ كَيْݣُولْ كْتَابْ اللَّهْ: «هَادُوكْ اللِّي مَا وْصْلَاتْهُمْشْ الْخْبَارْ عْلِيهْ، غَيْشُوفُو، وْاللِّي مَا سْمْعُوشْ عْلِيهْ، غَيْفَهْمُو».

²²وْهَادْشِّي عْلَاشْ بْزَّافْ دْيَالْ الْمَرَّاتْ مَا قْدَرْتْشْ نْجِي لْعَنْدْكُمْ.

²³وَلَكِنْ دَابَا حِيتْ مَا بْقَاتْشْ عَنْدِي شِي خْدْمَة نْدِيرْهَا لْلرَّبّْ فْهَادْ الْمَنَاطِقْ، وْبَاغِي نْجِي لْعَنْدْكُمْ هَادِي شْحَالْ مْنْ عَامْ،

²⁴كَنْتّْمَنَّى نْدُوزْ نْشُوفْكُمْ فْطْرِيقِي، مْلِّي نْكُونْ غَادِي لْإِسْبَانِيَا، وْتْعَاوْنُونِي بَاشْ نْمْشِي لْتْمَّ بَعْدْمَا نْدَوّْزْ مْعَاكُمْ وَقْتْ زْوِينْ وَاخَّا يْكُونْ قْصِيرْ.

²⁵وَلَكِنْ دَابَا رَانِي غَادِي لْأُورْشَلِيمْ بَاشْ نْعَاوْنْ الْخُوتْ الْمُومْنِينْ.

²⁶حِيتْ الْمُومْنِينْ دْيَالْ بْلَادْ مَكِدُونِيَة وْأَخَائِيَة فْرْحَانِينْ يْعَاوْنُو الْمُومْنِينْ الْفُقَرَا اللِّي فْأُورْشَلِيمْ بْدَاكْشِّي اللِّي عَنْدْهُمْ.

²⁷وْكَانُو فْرْحَانِينْ يْعَاوْنُوهُمْ، وْفْالْحَقِيقَة هَادْشِّي رَاهْ وَاجْبْ عْلِيهُمْ، حِيتْ إِلَا كَانُو الشّْعُوبْ اللِّي مَاشِي يْهُودْ خْدَاوْ الْبَرَكَاتْ الرُّوحِيَّة مْنْ عَنْدْ الْمُومْنِينْ دْيَالْ أُورْشَلِيمْ، رَاهْ حْتَّى هُمَ خَاصّْهُمْ يْعَاوْنُوهُمْ فْالْبَرَكَاتْ الْمَادِيَّة.

²⁸وْمْلِّي نْكَمّْلْ هَادْ الْخْدْمَة وْنْوَصّْلْ لِيهُمْ هَادْشِّي بَاشْ عَاوْنُوهُمْ الْخُوتْ، غَنْدُوزْ عَنْدْكُمْ وْأَنَا فْطْرِيقِي لْإِسْبَانِيَا.

²⁹وْرَانِي كَنْعْرَفْ بْلِّي إِلَا جِيتْ لْعَنْدْكُمْ، غَنْجِي عَامْرْ بْالْبَرَكَاتْ دْيَالْ الْمَسِيحْ.

³⁰وْكَنْطْلَبْ مْنّْكُمْ آ الْخُوتْ، بْإِسْمْ رَبّْنَا يَسُوعْ الْمَسِيحْ، وْبْالْمْحَبَّة دْيَالْ الرُّوحْ الْقُدُسْ، تْكَافْحُو مْعَايَ بْالصّْلَاة لْلَّهْ عْلَى وْدِّي.

³¹بَاشْ نْنْجَا مْنْ يْدّْ النَّاسْ اللِّي مَا كَيْآمْنُوشْ بْالْمَسِيحْ فْبْلَادْ الْيَهُودِيَّة، وْبَاشْ تْكُونْ الْخْدْمَة دْيَالِي فْأُورْشَلِيمْ مْقْبُولَة عَنْدْ الْخُوتْ الْمُومْنِينْ.

³²وْهَكَّا غَنْجِي لْعَنْدْكُمْ بْالْفَرْحَة إِلَا بْغَا اللَّهْ وْنْرْتَاحْ مْعَاكُمْ شْوِيَّة.

³³وْكَنْطْلَبْ اللَّهْ اللِّي كَيْعْطِي الْهْنَا بَاشْ يْكُونْ مْعَاكُمْ كَامْلِينْ! آمِينْ.