Read Moroccan Standard Translation رُومَا 16 Bible Online

رُومَا 16 - Moroccan Standard Translation bible

رُومَا 16

¹الْفَصْلْ سْطَّاشْ كَنْوَصِّيكُمْ عْلَى خْتْنَا فِيبِي، اللِّي كَتْخْدَمْ لْلْكْنِيسَة اللِّي فْكَنْخَرِيَا.

²رَحّْبُو بِيهَا فْالرَّبّْ كِمَا كَيْلِيقْ بْالْمُومْنِينْ، وْعَاوْنُوهَا بْݣَاعْ دَاكْشِّي اللِّي كَتْحْتَاجُه مْنّْكُمْ، حِيتْ رَاهَا عَاوْنَاتْ شْحَالْ مْنْ وَاحْدْ وْعَاوْنَاتْنِي حْتَّى أَنَا.

³سَلّْمُو عْلَى بِرِيسْكِلَّا وْأَكِيلَا، اللِّي كَيْعَاوْنُونِي فْالْخْدْمَة دْيَالْ الْمَسِيحْ يَسُوعْ.

⁴وْاللِّي خَاطْرُو بْحْيَاتْهُمْ عْلَى وْدِّي، وْمَاشِي غِيرْ أَنَا بُوحْدِي اللِّي كَنْشْكَرْهُمْ وَلَكِنْ حْتَّى ݣَاعْ الْكْنَايْسْ دْيَالْ الْمُومْنِينْ اللِّي مَاشِي يْهُودْ.

⁵وْسَلّْمُو عْلَى النَّاسْ دْ الْكْنِيسَة اللِّي كَيْتّْجَمْعُو فْالدَّارْ دْيَالْ هَادْ الْخُوتْ. سَلّْمُو عْلَى صَاحْبِي الْعْزِيزْ أَبَيْنِتُوسْ، اللِّي هُوَ الْمُومْنْ اللّْوّْلْ بْالْمَسِيحْ فْآسْيَا.

⁶سَلّْمُو عْلَى مَرْيَمْ اللِّي ضْرْبَاتْ تَمَارَة عْلَى وْدّْكُمْ.

⁷سَلّْمُو عْلَى أَنْدَرُونِكُوسْ وْيُونِيَاسْ اللِّي مْنْ عَائِلْتِي، وْاللِّي كَانُو مْسْجُونِينْ مْعَايَ، وْمْعْرُوفِينْ بِينْ الرُّسُلْ، وْآمْنُو بْالْمَسِيحْ قْبَلْ مْنِّي.

⁸سَلّْمُو عْلَى أَمْبِلِيَاسْ صَاحْبِي الْعْزِيزْ فْالرَّبّْ.

⁹سَلّْمُو عْلَى أُورْبَانُوسْ اللِّي كَيْعَاوْنَّا فْخْدْمَةْ الْمَسِيحْ، وْعْلَى إِسْتَاخِيسْ صَاحْبِي الْعْزِيزْ.

¹⁰سَلّْمُو عْلَى أَبَلِّسْ اللِّي بَيّْنْ بْلِّي هُوَ تَابْتْ فْالْمَسِيحْ. سَلّْمُو عْلَى عَائِلْةْ أَرِسْتُوبُولُوسْ.

¹¹سَلّْمُو عْلَى هِيرُودِيُونْ اللِّي مْنْ عَائِلْتِي. سَلّْمُو عْلَى عَائِلْةْ نَرْكِيسُّوسْ اللِّي كَيْآمْنُو بْالرَّبّْ.

¹²سَلّْمُو عْلَى تْرِيفَيْنَا وْتْرِيفُوسَا اللِّي كَيْضْرْبُو تَمَارَة فْخْدَمْتْهُمْ لْلرَّبّْ. سَلّْمُو عْلَى بَرْسِيسْ خْتْنَا الْعْزِيزَة اللِّي ضْرْبَاتْ تَمَارَة بْزَّافْ فْخْدَمْتْهَا لْلرَّبّْ.

¹³سَلّْمُو عْلَى رُوفُسْ اللِّي خْتَارُه الرَّبّْ، وْسَلّْمُو عْلَى مُّه اللِّي هِيَ بْحَالْ مِّي.

¹⁴سَلّْمُو عْلَى أَسِينْكِرِيتُسْ، وْفِلِيغُونْ، وْهَرْمَاسْ، وْبَتْرُوبَاسْ، وْهَرْمِيسْ، وْعْلَى الْخُوتْ اللِّي مْعَاهُمْ.

¹⁵سَلّْمُو عْلَى فِيلُولُوغُسْ، وْجُولِيَا، وْنِيرِيُوسْ وْخْتُه، وْأُولُمْبَاسْ، وْعْلَى ݣَاعْ الْخُوتْ الْمُومْنِينْ اللِّي مْعَاهُمْ.

¹⁶سَلّْمُو عْلَى بْعْضِيَّاتْكُمْ بْبُوسَة مْقَدّْسَة. وْرَاهْ ݣَاعْ الْخُوتْ اللِّي فْالْكْنَايْسْ دْ الْمَسِيحْ كَيْسَلّْمُو عْلِيكُمْ.

¹⁷كَنْطْلَبْ مْنّْكُمْ آ الْخُوتْ، بَاشْ تْرَدُّو الْبَالْ وْتْبَعّْدُو مْنْ هَادُوكْ اللِّي كَيْتّْسَبّْبُو فْالتَّفْرِقَة وْفْالْحْوَايْجْ اللِّي كَتّْسَبّْبْ فْالدّْنُوبْ، وْكَيْضَادُّو التَّعْلِيمْ اللِّي تْعَلّْمْتُوهْ.

¹⁸حِيتْ بْحَالْ هَادْ النَّاسْ مَا كَيْخَدْمُوشْ لْرَبّْنَا يَسُوعْ الْمَسِيحْ، وَلَكِنْ كَيْخَدْمُو غِيرْ عْلَى كَرْشْهُمْ. وْبْالْكْلَامْ الْمْزْيَانْ وْالْهَضْرَة الْحْلُوَّة كَيْخَدْعُو قْلُوبْ الدّْرَاوْشْ.

¹⁹رَاهْ كُلّْ وَاحْدْ كَيْعْرَفْ بْلِّي نْتُمَ كَتْطِيعُو الرَّبّْ، وْعْلَى وْدّْ هَادْشِّي كَنْفْرَحْ بِيكُمْ. وَلَكِنْ بْغِيتْكُمْ تْكُونُو حُكَمَا فْالْأُمُورْ اللِّي هِيَ خِيرْ، وْتْرَدُّو بَالْكُمْ مْنْ الشَّرّْ.

²⁰وْاللَّهْ اللِّي كَيْعْطِي الْهْنَا، غَيْسْحَقْ الشِّيطَانْ تَحْتْ رْجْلِيكُمْ دْغْيَا. وْالنِّعْمَة دْيَالْ رَبّْنَا يَسُوعْ الْمَسِيحْ تْكُونْ مْعَاكُمْ!

²¹كَيْسَلّْمْ عْلِيكُمْ تِيمُوتَاوُسْ اللِّي كَيْعَاوْنِّي فْخْدْمَةْ الرَّبّْ، وْكَيْسَلّْمْ عْلِيكُمْ لُوكِيُوسْ، وْيَاسُونْ، وْسُوسِيبَاتْرُسْ اللِّي هُمَ مْنْ عَائِلْتِي.

²²وْأَنَا تَرْتِيُوسْ اللِّي كْتَبْتْ هَادْ الرِّسَالَة، كَنْسَلّْمْ عْلِيكُمْ فْالرَّبّْ.

²³وْكَيْسَلّْمْ عْلِيكُمْ غَايُوسْ اللِّي ضَايْفْنِي وْكَيْضَايْفْ الْمُومْنِينْ فْدَارُه، وْكَيْسَلّْمْ عْلِيكُمْ أَرَاسْتُسْ لَمِينْ دْيَالْ الصّْنْدُوقْ دْ الْمْدِينَة، وْكَيْسَلّْمْ عْلِيكُمْ خُونَا كَوَارْتُسْ. [

²⁴وْالنِّعْمَة دْيَالْ رَبّْنَا يَسُوعْ الْمَسِيحْ تْكُونْ مْعَاكُمْ كُلّْكُمْ. آمِينْ.][١]

²⁵الْعَزّْ لْهَادَاكْ اللِّي قَادْرْ يْقَوِّيكُمْ بْالْإِنْجِيلْ اللِّي كَنْبَشّْرْ بِيهْ وْاللِّي كَيْتّْكَلّْمْ عْلَى يَسُوعْ الْمَسِيحْ، بَاشْ يْبَانْ السِّرّْ اللِّي كَانْ مْخْفِي مْنْ الْبْدُو دْ الزّْمَانْ.

²⁶وَلَكِنْ دَابَا هَادْ السِّرّْ بَانْ، وْݣَاعْ الشّْعُوبْ قَادْرِينْ يْعَرْفُوهْ مْنْ كْتُبْ الْأَنْبِيَا، عْلَى حْسَابْ الْأَمْرْ دْيَالْ اللَّهْ اللِّي كَايْنْ عْلَى الدّْوَامْ بَاشْ يْآمْنُو بِيهْ وْيْطِيعُوهْ.

²⁷لْلَّهْ بُوحْدُه الْحْكْمَة بْيَسُوعْ الْمَسِيحْ، لِيهْ الْعَزّْ عْلَى الدّْوَامْ، آمِينْ.