Read Moroccan Standard Translation رُومَا 2 Bible Online

رُومَا 2 - Moroccan Standard Translation bible

رُومَا 2

¹الْفَصْلْ التَّانِي عْلَى هَادْشِّي، رَاهْ مَا عَنْدْكْ حْتَّى عُدْرْ كِمَا بْغِيتِي تْكُونْ آ اللِّي كَتْحْكَمْ عْلَى نَاسْ خْرِينْ، حِيتْ مْلِّي كَتْحْكَمْ عْلَى غِيرْكْ وْنْتَ كَتْدِيرْ دَاكْشِّي اللِّي كَيْدِيرُه، رَاكْ كَتْحْكَمْ حْتَّى عْلَى رَاسْكْ.

²وْرَاهْ حْنَا كَنْعَرْفُو بْلِّي اللَّهْ كَيْحْكَمْ بْالْحَقّْ عْلَى النَّاسْ اللِّي كَيْدِيرُو بْحَالْ هَادْ الْأُمُورْ.

³وْنْتَ آ اللِّي كَتْحْكَمْ عْلَى اللِّي كَيْدِيرُو بْحَالْ هَادْ الْأُمُورْ وْكَتْدِيرْ بْحَالْهُمْ، وَاشْ كَتْضَنّْ بْلِّي غَتْفْلَتْ مْنْ الْعِقَابْ دْيَالْ اللَّهْ؟

⁴وْلَا يَاكْمَا كَتْحْتَقْرْ لُطْفْ اللَّهْ الْكْبِيرْ وْالصّْبَرْ وْالتَّحَمُّلْ دْيَالُه، وْنْتَ مَا عَارْفْشْ بْلِّي لُطْفْ اللَّهْ هُوَ اللِّي كَيْدِّيكْ لْلتُّوبَة؟

⁵وَلَكِنْ بْسْبَابْ قْسُوحِيَّةْ قَلْبَكْ وْالْعْنَادْ دْيَالْكْ، رَاكْ كَتْجْمَعْ لْرَاسْكْ غَضَبْ اللَّهْ لْلنّْهَارْ دْ الْغَضَبْ، اللِّي فِيهْ غَيْبَانْ بْلِّي اللَّهْ كَيْحْكَمْ بْالْعَدْلْ عْلَى النَّاسْ،

⁶وْغَيْجَازِي كُلّْ وَاحْدْ عْلَى حْسَابْ الْأَعْمَالْ دْيَالُه:

⁷إِمَّا بْالْحَيَاةْ الدَّايْمَة لْهَادُوكْ اللِّي بْالصّْبَرْ دْيَالْهُمْ كَيْدِيرُو أَعْمَالْ الْخِيرْ، وْكَيْقَلّْبُو عْلَى الْعَزّْ وْالْكَرَامَة وْالْحَيَاةْ اللِّي مَا كَتْفْنَاشْ،

⁸وَإِمَّا بْالْغَضَبْ وْالسَّخْطْ عْلَى هَادُوكْ اللِّي كَيْضَادُّو اللَّهْ، وْكَيْرَفْضُو الْحَقّْ، وْكَيْتْبْعُو الضُّلْمْ.

⁹غَيْكُونْ الْعْدَابْ وْالْمْحْنَة لْكُلّْ وَاحْدْ كَيْدِيرْ الشَّرّْ، لْلِيهُودْ فْاللّْوّْلْ وْحْتَّى لْلْيُونَانِيِّينْ،

¹⁰وْغَيْكُونْ الْعَزّْ وْالْكَرَامَة وْالْهْنَا لْكُلّْ وَاحْدْ كَيْدِيرْ الْخِيرْ، لْلِيهُودْ فْاللّْوّْلْ وْحْتَّى لْلْيُونَانِيِّينْ،

¹¹حِيتْ اللَّهْ مَا كَيْدِيرْشْ الْوْجْهِيَّاتْ.

¹²عْلَاحْقَّاشْ ݣَاعْ النَّاسْ اللِّي دَنْبُو وْمَا عَنْدْهُمْشْ الشّْرَعْ، رَاهُمْ غَيْتّْهَلْكُو بْلَا هَادْ الشّْرَعْ، وْݣَاعْ النَّاسْ اللِّي دَنْبُو وْعَنْدْهُمْ الشّْرَعْ رَاهْ بْهَادْ الشّْرَعْ غَيْتّْحْكَمْ عْلِيهُمْ.

¹³مَاشِي اللِّي كَيْسَمْعُو لْلشّْرَعْ هُمَ اللِّي مْتَّاقْيِينْ عَنْدْ اللَّهْ، وَلَكِنْ اللِّي كَيْدِيرُو بْالشّْرَعْ.

¹⁴حِيتْ الشّْعُوبْ اللِّي مَاشِي يْهُودْ وْمَا عَنْدْهُمْشْ الشّْرَعْ، مْلِّي كَيْدِيرُو بْالطّْبِيعَة دْيَالْهُمْ دَاكْشِّي اللِّي فْالشّْرَعْ، رَاهُمْ شْرَعْ لْرَاسْهُمْ وَاخَّا مَا عَنْدْهُمْشْ الشّْرَعْ،

¹⁵وْكَيْبَيّْنُو بْلِّي فْرَايْضْ الشّْرَعْ مْكْتُوبَة فْقْلُوبْهُمْ، وْهَادْشِّي كَيْشْهَدْ عْلِيهْ الضَّمِيرْ وْالْأَفْكَارْ دْيَالْهُمْ، اللِّي مَرَّة كَيْتَّهْمُوهُمْ وْمَرَّة كَيْدَافْعُو عْلِيهُمْ.

¹⁶وْݣَاعْ هَادْشِّي غَيْبَانْ فْالنّْهَارْ اللِّي غَيْحْكَمْ فِيهْ اللَّهْ عْلَى أَسْرَارْ النَّاسْ بْيَسُوعْ الْمَسِيحْ، عْلَى حْسَابْ الْإِنْجِيلْ اللِّي كَنْبَشّْرْ بِيهْ.

¹⁷وْنْتَ اللِّي كَتّْسَمِّي رَاسْكْ يْهُودِي وْكَتْعَوّْلْ عْلَى الشّْرَعْ، وْكَتْفْتَخْرْ بْالْعَلَاقَة دْيَالْكْ مْعَ اللَّهْ،

¹⁸وْكَتْعْرَفْ الْمُرَادْ دْيَالُه، وْكَتْمَيّْزْ الْأُمُورْ الْمْزْيَانَة بْدَاكْشِّي اللِّي تْعَلّْمْتِيهْ مْنْ الشّْرَعْ،

¹⁹وْكَتِّيقْ فْرَاسْكْ بْلِّي نْتَ كَتْݣَوّْدْ الْعَمْيِينْ، وْبْلِّي نْتَ نُورْ لْهَادُوكْ اللِّي فْالضّْلَامْ،

²⁰وْبْلِّي كَتْأَدّْبّْ اللِّي مَا كَيْفَهْمُوشْ وْكَتْعَلّْمْ النَّاسْ الصّْغَارْ، حِيتْ فْالشّْرَعْ عَنْدْكْ الْمَعْرِفَة وْالْحَقّْ مْكْمُولِينْ.

²¹إِيوَا نْتَ اللِّي كَتْعَلّْمْ غِيرْكْ، عْلَاشْ مَا كَتْعَلّْمْشْ رَاسْكْ؟ نْتَ اللِّي كَتْوَصِّي بَاشْ مَا تْكُونْشْ السّْرْقَة، وَاشْ مَا كَتْسْرَقْشْ؟

²²نْتَ اللِّي كَتْحَرّْمْ الْفْسَادْ وَاشْ مَا كَتْفْسَدْشْ؟ نْتَ اللِّي كَتْكْرَهْ الْأَصْنَامْ، وَاشْ مَا كَتْسْرَقْشْ دَاكْشِّي اللِّي فْالْبْلَايْصْ فِينْ هُمَ كَايْنِينْ؟

²³نْتَ اللِّي كَتْفْتَخْرْ بْالشّْرَعْ وَاشْ مَا كَتْشَوّْهْشْ بْالسُّمْعَة دْ اللَّهْ مْلِّي كَتْعْصَى الشّْرَعْ؟

²⁴حِيتْ بْسْبَابْكُمْ غَيْتّْݣَالْ كْلَامْ الْكُفْرْ فْحَقّْ إِسْمْ اللَّهْ فْوَسْطْ الشّْعُوبْ اللِّي مَاشِي يْهُودْ، كِمَا مْكْتُوبْ فْكْتَابْ اللَّهْ.

²⁵إِلَا كْنْتِ كَتْدِيرْ بْالشّْرَعْ، رَاهْ الْخْتَانَة دْيَالْكْ عَنْدْهَا قِيمَة، وْإِلَا مَا كْنْتِيشْ كَتْدِيرْ بْالشّْرَعْ رَاهْ خْتَانْتْكْ بْحَالْ إِلَا عَمّْرْهَا مَا كَانْتْ!

²⁶إِيوَا إِلَا كَانْ اللِّي مَا مْخَتّْنْشْ كَيْدِيرْ بْفْرَايْضْ الشّْرَعْ، وَاشْ اللَّهْ مَا كَيْعْتَبْرُوشْ بْحَالْ إِلَا تْخَتّْنْ؟

²⁷وْاللِّي مَا مْخَتّْنْشْ وَلَكِنْ كَيْدِيرْ بْالشّْرَعْ، غَيْحْكَمْ عْلِيكْ نْتَ اللِّي عَنْدْكْ الْكْتَابْ وْالْخْتَانَة، وْمَا كَتْدِيرْشْ بْالشّْرَعْ.

²⁸حِيتْ لِيهُودِي مَاشِي هُوَ لِيهُودِي بْالْمَضْهَرْ، وْالْخْتَانَة مَاشِي هِيَ الْخْتَانَة اللِّي كَتْبَانْ فْالدَّاتْ،

²⁹وَلَكِنْ لِيهُودِي هُوَ لِيهُودِي مْنْ لْدَاخْلْ، وْالْخْتَانَة هِيَ الْخْتَانَة دْيَالْ الْقَلْبْ بْالرُّوحْ الْقُدُسْ، مَاشِي بْالشّْرَعْ الْمْكْتُوبْ. هَادَا مَا كَيْمَدْحُوهْشْ النَّاسْ وَلَكِنْ اللَّهْ هُوَ اللِّي كَيْمَدْحُه.