Read Moroccan Standard Translation رُومَا 5 Bible Online

رُومَا 5 - Moroccan Standard Translation bible

رُومَا 5

¹الْفَصْلْ الْخَامْسْ وْهَاكْدَا حِيتْ حْسَبْنَا اللَّهْ مْتَّاقْيِينْ بْالْإِيمَانْ، رَاهْ عَنْدْنَا الْهْنَا مْعَ اللَّهْ بْرَبّْنَا يَسُوعْ الْمَسِيحْ.

²اللِّي بِيهْ وْلَّى عَنْدْنَا الْحَقّْ نْدَخْلُو بْالْإِيمَانْ لْهَادْ النِّعْمَة اللِّي فِيهَا كَنْعِيشُو، وْكَنْفْتَخْرُو بْالرّْجَا اللِّي عَنْدْنَا بَاشْ نْشَارْكُو فْالْعَزّْ دْيَالْ اللَّهْ.

³وْمَاشِي غِيرْ هَادْشِّي، وَلَكِنْ كَنْفْتَخْرُو حْتَّى فْوَسْطْ الْمْحَايْنْ، حِيتْ كَنْعَرْفُو بْلِّي الْمْحْنَة كَتْعَلّْمْ الصّْبَرْ،

⁴وْالصّْبَرْ كَيْغَلّْبْنَا عْلَى الْمْحْنَة، وْمْلِّي كَنْتْغَلّْبُو عْلِيهَا كَيْوَلِّي عَنْدْنَا الرّْجَا.

⁵وْهَادْ الرّْجَا مَا كَيْخَيّْبْشْ، عْلَاحْقَّاشْ الْمْحَبَّة دْ اللَّهْ فَاضْتْ فْقْلُوبْنَا بْالرُّوحْ الْقُدُسْ اللِّي تّْعْطَى لِينَا.

⁶حِيتْ مْلِّي مَا كَانْتْشْ عَنْدْنَا الْقُوَّة، فْهَادَاكْ الْوَقْتْ مَاتْ الْمَسِيحْ عْلَى وْدّْ الْمُدْنِبِينْ.

⁷رَاهْ صْعِيبْ يْمُوتْ شِي وَاحْدْ عْلَى وْدّْ إِنْسَانْ مْتَّاقِي اللَّهْ، مُمْكِنْ يْتّْشَجّْعْ شِي وَاحْدْ بَاشْ يْمُوتْ عْلَى وْدّْ إِنْسَانْ مْزْيَانْ.

⁸وَلَكِنْ اللَّهْ بَيّْنْ الْمْحَبَّة دْيَالُه لِينَا، حِيتْ مْلِّي كْنَّا مَازَالْ مُدْنِبِينْ، مَاتْ الْمَسِيحْ عْلَى وْدّْنَا.

⁹وْمَا دَامْ اللَّهْ حْسَبْنَا مْتَّاقْيِينْ بْدْمّْ الْمَسِيحْ، هَكَّا بِيهْ غَنّْجَاوْ مْنْ الْغَضَبْ دْيَالْ اللَّهْ.

¹⁰حِيتْ إِلَا كْنَّا وْحْنَا عْدْيَانْ اللَّهْ تْصَالْحْنَا مْعَاهْ بْالْمُوتْ دْيَالْ وَلْدُه، إِيوَا شْحَالْ كْتَرْ دَابَا وْحْنَا مْصَالْحِينْ مْعَاهْ غَادِي نّْجَاوْ بْالْحَيَاةْ دْيَالْ وَلْدُه.

¹¹وْمَاشِي غِيرْ هَادْشِّي، وَلَكِنْ رَاهْ حْنَا كَنْفْتَخْرُو حْتَّى بْاللَّهْ، بْفْضَلْ رَبّْنَا يَسُوعْ الْمَسِيحْ اللِّي بِيهْ تّْصَالْحْنَا دَابَا مْعَ اللَّهْ.

¹²وْكِمَا دَخْلُو الدّْنُوبْ لْلدّْنْيَا بْسْبَابْ رَاجْلْ وَاحْدْ وْالدّْنُوبْ جَابُو الْمُوتْ، هَكَّا حْتَّى الْمُوتْ دَازْتْ لْݣَاعْ النَّاسْ حِيتْ كُلّْهُمْ دَنْبُو.

¹³وْرَاهْ الدّْنُوبْ كَانُو فْالدّْنْيَا قْبَلْ مَا يْكُونْ شْرَعْ مُوسَى، وَلَكِنْ مَا كَانُوشْ كَيْتّْحَسْبُو مْلِّي مَا كَانْشْ الشّْرَعْ.

¹⁴أَمَّا الْمُوتْ رَاهَا كَانْتْ كَتْحْكَمْ عْلَى النَّاسْ مْنْ يَّامَاتْ آدَمْ حْتَّى لِيَّامَاتْ مُوسَى، وْكَانْتْ كَتْحْكَمْ حْتَّى عْلَى هَادُوكْ اللِّي مَا دَنْبُوشْ بْحَالْ الدَّنْبْ دْيَالْ آدَمْ، اللِّي كَيْرْمَزْ لْهَادَاكْ اللِّي غَيْجِي مْنْ بَعْدْ مْنُّه.

¹⁵وَلَكِنْ رَاهْ الدَّنْبْ مَاشِي بْحَالْ الْعَطِيَّة دْ اللَّهْ. حِيتْ إِلَا كَانُو بْزَّافْ دْ النَّاسْ كَيْمُوتُو بْسْبَابْ الدَّنْبْ دْيَالْ إِنْسَانْ وَاحْدْ، رَاهْ نِعْمَةْ اللَّهْ كْتِيرَة وْبْإِنْسَانْ وَاحْدْ اللِّي هُوَ يَسُوعْ الْمَسِيحْ تّْعْطَاتْ النِّعْمَة دْ اللَّهْ لْبْزَّافْ دْ النَّاسْ.

¹⁶وْالنَّتِيجَة دْيَالْ الْعَطِيَّة دْ اللَّهْ مَاشِي بْحَالْ النَّتِيجَة دْيَالْ الدَّنْبْ دْ رَاجْلْ وَاحْدْ، حِيتْ بْالدَّنْبْ دْيَالْ رَاجْلْ وَاحْدْ تّْحْكَمْ عْلَى ݣَاعْ النَّاسْ. وَلَكِنْ الْعَطِيَّة دْيَالْ اللَّهْ رْدَّاتْ النَّاسْ لْطَاعْةْ اللَّهْ وَاخَّا دَارُو بْزَّافْ دْيَالْ الدّْنُوبْ.

¹⁷حِيتْ بْالدَّنْبْ دْيَالْ رَاجْلْ وَاحْدْ، حْكْمَاتْ الْمُوتْ عْلَى ݣَاعْ النَّاسْ بْسْبَابْ هَادْ الْوَاحْدْ، وَلَكِنْ اللِّي غَيَاخْدُو النِّعْمَة دْيَالْ اللَّهْ الْكْتِيرَة، وْالْعَطِيَّة دْيَالْ التَّقْوَى، غَيْمَلْكُو فْالْحَيَاةْ بْسْبَابْ وَاحْدْ اللِّي هُوَ يَسُوعْ الْمَسِيحْ.

¹⁸وْهَكَّا، كِمَا بْدَنْبْ وَاحْدْ تّْحْكَمْ عْلَى ݣَاعْ النَّاسْ، رَاهْ بْالتَّقْوَى دْيَالْ وَاحْدْ ݣَاعْ النَّاسْ وْلَّاوْ بَارْيِينْ وْعَنْدْهُمْ الْحَيَاةْ.

¹⁹حِيتْ كِمَا وْلَّاوْ بْزَّافْ دْ النَّاسْ مُدْنِبِينْ بْالْمَعْصِيَّة دْيَالْ رَاجْلْ وَاحْدْ، هَكَّا حْتَّى بْالطَّاعَة دْيَالْ رَاجْلْ وَاحْدْ غَيْوَلِّيوْ بْزَّافْ دْ النَّاسْ مْتَّاقْيِينْ عَنْدْ اللَّهْ.

²⁰وْالشّْرَعْ جَا بَاشْ يْبَيّْنْ كْتْرَةْ الدّْنُوبْ، وَلَكِنْ فِينْ مَا كْتْرُو الدّْنُوبْ كَتْزِيدْ تْكْتَرْ النِّعْمَة دْ اللَّهْ.

²¹وْكِمَا الدّْنُوبْ تّْحَكّْمُو وْتّْسَبّْبُو فْالْمُوتْ، هَكَّا النِّعْمَة دْ اللَّهْ كَتّْحَكّْمْ عْلَى أَسَاسْ التَّقْوَى وْكَتْعْطِي الْحَيَاةْ الدَّايْمَة بْرَبّْنَا يَسُوعْ الْمَسِيحْ.