Read Moroccan Standard Translation رُومَا 6 Bible Online

رُومَا 6 - Moroccan Standard Translation bible

رُومَا 6

¹الْفَصْلْ السَّادْسْ إِيوَا أَشْنُو غَنْݣُولُو؟ وَاشْ خَاصّْنَا نْبْقَاوْ عَايْشِينْ فْالدّْنُوبْ بَاشْ تْكْتَرْ نِعْمَةْ اللَّهْ؟

²حَاشَا! رَاهْ حْنَا مْتْنَا عْلَى الدّْنُوبْ، إِيوَا كِيفَاشْ غَنْبْقَاوْ عَايْشِينْ فِيهُمْ؟

³وَاشْ مَا كَتْعَرْفُوشْ بْلِّي تْعَمّْدْنَا بَاشْ نْكُونُو مْتَّاحْدِينْ مْعَ يَسُوعْ الْمَسِيحْ فْالْمُوتْ دْيَالُه؟

⁴وْبْالْمَعْمُودِيَّة تّْدْفَنَّا مْعَاهْ وْشَارْكْنَاهْ فْالْمُوتْ دْيَالُه، بَاشْ كِمَا تّْبْعَتْ الْمَسِيحْ مْنْ الْمُوتْ بْالْعَزّْ دْيَالْ الْآبْ، هَكَّا نْحْيَاوْ حْتَّى حْنَا حَيَاةْ جْدِيدَة.

⁵حِيتْ إِلَا كْنَّا مْتَّاحْدِينْ مْعَاهْ فْالْمُوتْ اللِّي كَتْشْبَهْ لْلْمُوتْ دْيَالُه، رَاهْ هَكَّا غَنْوَلِّيوْ مْتَّاحْدِينْ مْعَاهْ حْتَّى فْالْبَعْتْ دْيَالُه.

⁶وْحْنَا كَنْعَرْفُو بْلِّي الطّْبِيعَة الْقْدِيمَة اللِّي فِينَا تّْصَلْبَاتْ مْعَ الْمَسِيحْ، بَاشْ تّْحَيّْدْ سُلْطَةْ الدّْنُوبْ اللِّي فْالدَّاتْ دْيَالْنَا وْمَا نْبْقَاوْشْ عْبِيدْ لِيهَا.

⁷حِيتْ اللِّي مَاتْ رَاهْ تْحَرّْرْ مْنْ الدّْنُوبْ.

⁸وْإِلَا مْتْنَا مْعَ الْمَسِيحْ رَاهْ كَنْآمْنُو بْلِّي غَنْحْيَاوْ مْعَاهْ.

⁹وْحْنَا عَارْفِينْ بْلِّي الْمَسِيحْ تّْبْعَتْ مْنْ بِينْ الْمُوتَى وْمَا غَادِيشْ يْمُوتْ مَرَّة خْرَى، وْمَا غَتْكُونْشْ عَنْدْ الْمُوتْ قُوَّة عْلِيهْ مْنْ بَعْدْ.

¹⁰حِيتْ مْلِّي مَاتْ، مَاتْ مَرَّة وَحْدَة عْلَى وْدّْ الدّْنُوبْ، وَلَكِنْ دَابَا هُوَ حَيّْ، وْالْحَيَاةْ اللِّي كَيْعِيشْهَا، كَيْعِيشْهَا لْلَّهْ.

¹¹وْهَكَّا حْتَّى نْتُمَ، حْسْبُو رَاسْكُمْ مْيّْتِينْ مْنْ جِهْةْ الدّْنُوبْ، وَلَكِنْ حَيِّينْ لْلَّهْ فْالْمَسِيحْ يَسُوعْ.

¹²وْمَا تْخَلِّيوْشْ الدّْنُوبْ يْتّْحَكّْمُو فْالدَّاتْ دْيَالْكُمْ الْفَانْيَة وْتّْبْعُوهَا فْالشَّهَوَاتْ دْيَالْهَا.

¹³وْمَا تْقَدّْمُوشْ الدَّاتْ دْيَالْكُمْ لْلدّْنُوبْ بَاشْ تْدِيرْ الْإِتْمْ، وَلَكِنْ قَدّْمُو الدَّاتْ دْيَالْكُمْ لْلَّهْ بَاشْ تْدِيرْ اللِّي كَيْرْضِيهْ، حِيتْ رَاكُمْ حَيِّينْ وْتّْبْعَتُّو مْنْ بِينْ الْمُوتَى.

¹⁴وْهَكَّا مَا غَيْتّْحْكّْمُوشْ فِيكُمْ الدّْنُوبْ، حِيتْ نْتُمَ مَاشِي تَحْتْ حْكَامْ الشّْرَعْ، وَلَكِنْ تَحْتْ حْكَامْ النِّعْمَة دْ اللَّهْ.

¹⁵إِيوَا أَشْنُو؟ وَاشْ نْدَنْبُو عْلَاحْقَّاشْ حْنَا تَحْتْ حْكَامْ النِّعْمَة دْ اللَّهْ وْمَاشِي تَحْتْ حْكَامْ الشّْرَعْ؟ حَاشَا!

¹⁶وَاشْ مَا كَتْعَرْفُوشْ بْلِّي إِلَا عْطِيتُو رَاسْكُمْ عْبِيدْ لْشِي وَاحْدْ بَاشْ تْطِيعُوهْ، غَتْكُونُو عْبِيدْ لْهَادَاكْ اللِّي كَتْطِيعُوهْ: يَا إِمَّا عْبِيدْ لْلدّْنُوبْ اللِّي كَيْدِّيوْ لْلْمُوتْ، وْلَا لْلطَّاعَة اللِّي كَتْدِّي لْلتَّقْوَى؟

¹⁷وَلَكِنْ كَنْشَكْرُو اللَّهْ حِيتْ وَاخَّا كْنْتُو عْبِيدْ لْلدّْنُوبْ، قْبَلْتُو مْنْ قَلْبْكُمْ الشّْكَلْ دْيَالْ التَّعْلِيمْ اللِّي خْدِيتُوهْ.

¹⁸وْرَاكُمْ تْحَرّْرْتُو مْنْ الدّْنُوبْ وْوْلِّيتُو عْبِيدْ لْلتَّقْوَى.

¹⁹وْدَابَا غَنْتّْكَلّْمْ مْعَاكُمْ بْكْلَامْ عَادِي، عْلَاحْقَّاشْ رَاكُمْ ضْعَافْ. حِيتْ كِيفْ قَدّْمْتُو مْنْ قْبَلْ الدَّاتْ دْيَالْكُمْ بَاشْ تْكُونُو عْبِيدْ لْلْنَّجَاسَة وْلْلْإِتْمْ اللِّي كَيْدِّي لْلْإِتْمْ، قَدّْمُو دَابَا الدَّاتْ دْيَالْكُمْ بَاشْ تْكُونُو عْبِيدْ دْيَالْ التَّقْوَى وْالْقَدَاسَة.

²⁰حِيتْ مْلِّي كْنْتُو عْبِيدْ لْلدّْنُوبْ مَا كْنْتُوشْ مْلْزُومِينْ بَاشْ تْدِيرُو الْعَمَلْ دْيَالْ التَّقْوَى.

²¹إِيوَا آشْ مْنْ غْلَّة جْنِيتُوهَا فْدَاكْ الْوَقْتْ مْنْ الْأُمُورْ اللِّي كَتْحْشْمُو بِيهَا دَابَا؟ حِيتْ الْعَاقِبَة دْيَالْ هَادْ الْأُمُورْ هِيَ الْمُوتْ.

²²أَمَّا دَابَا رَاكُمْ تْحَرّْرْتُو مْنْ الدّْنُوبْ وْوْلِّيتُو عْبِيدْ لْلَّهْ، وْالْغْلَّة اللِّي فِيكُمْ كَتْدِّي لْلْقَدَاسَة، وْالنَّتِيجَة دْيَالْهَا هِيَ الْحَيَاةْ الدَّايْمَة.

²³حِيتْ الْأُجْرَة دْيَالْ الدّْنُوبْ هِيَ الْمُوتْ، وَلَكِنْ الْعَطِيَّة دْيَالْ اللَّهْ هِيَ الْحَيَاةْ الدَّايْمَة فْالْمَسِيحْ يَسُوعْ رَبّْنَا.