Read Moroccan Standard Translation رُومَا 7 Bible Online

رُومَا 7 - Moroccan Standard Translation bible

رُومَا 7

¹الْفَصْلْ السَّابْعْ وَاشْ مَا كَتْعَرْفُوشْ آ الْخُوتْ، وْرَانِي كَنْتّْكَلّْمْ مْعَ النَّاسْ اللِّي كَيْعَرْفُو الشّْرَعْ، بْلِّي الشّْرَعْ كَيْتّْحَكّْمْ فْبْنَادْمْ مَا حَدُّه فْالْحَيَاةْ؟

²حِيتْ الْمْرَاة الْمْزَوّْجَة كَيْجْمَعْهَا الشّْرَعْ بْرَاجْلْهَا مَا حَدُّه فْالْحَيَاةْ، وَلَكِنْ إِلَا مَاتْ رَاهَا كَتّْحَرّْرْ مْنْ الشّْرَعْ اللِّي كَيْجْمَعْهَا بْرَاجْلْهَا.

³وْمَا دَامْ رَاجْلْهَا بَاقِي فْالْحَيَاةْ رَاهَا كَتْفْسَدْ إِلَا تّْزَوّْجَاتْ بْرَاجْلْ آخُرْ، وَلَكِنْ إِلَا مَاتْ رَاجْلْهَا رَاهَا كَتّْحَرّْرْ مْنْ الشّْرَعْ وْمَا كَتْفْسَدْشْ إِلَا تّْزَوّْجَاتْ بْرَاجْلْ آخُرْ.

⁴وْهَكَّا حْتَّى نْتُمَ آ خُوتِي، رَاكُمْ مْتُّو مْنْ جِهْةْ الشّْرَعْ بْالدَّاتْ دْيَالْ الْمَسِيحْ بَاشْ تْوَلِّيوْ لْوَاحْدْ آخُرْ، لْهَادَاكْ اللِّي تّْبْعَتْ مْنْ بِينْ الْمُوتَى بَاشْ نْعْطِيوْ غْلَّة لْلَّهْ.

⁵حِيتْ مْلِّي كْنَّا كَنْعِيشُو عْلَى حْسَابْ الدَّاتْ، كَانُو الشَّهَوَاتْ دْيَالْ الدّْنُوبْ اللِّي كَيْتّْسَبّْبْ فِيهُمْ الشّْرَعْ، كَيْخَدْمُو فْالدَّاتْ دْيَالْنَا بَاشْ نْدِيرُو الْأَعْمَالْ اللِّي كَتْعْطِي غْلَّة كَتْدِّي لْلْمُوتْ.

⁶وَلَكِنْ دَابَا رَاهْ تْحَرّْرْنَا مْنْ الشّْرَعْ، حِيتْ مْتْنَا مْنْ جِهْةْ الْحْوَايْجْ اللِّي كَيْحَبْسُونَا بْحَالْ الْمْسْجُونِينْ، بَاشْ نْخَدْمُو لْلَّهْ بْشْكَلْ جْدِيدْ تَحْتْ حْكَامْ رُوحْ اللَّهْ، وْمَاشِي تَحْتْ حْكَامْ الشّْرَعْ الْمْكْتُوبْ.

⁷إِيوَا أَشْنُو غَنْݣُولُو؟ وَاشْ الشّْرَعْ دْنُوبْ؟ حَاشَا! وَلَكِنْ أَنَا مَا عْرَفْتْ الدَّنْبْ غِيرْ بْالشّْرَعْ، حِيتْ مَا كَنْتْشْ غَنْعْرَفْ الشَّهْوَة كُونْ مَا ݣَالْشْ الشّْرَعْ: «مَا تّْشْهَّاشْ».

⁸وَلَكِنْ الدَّنْبْ لْقَا الْوْجْبَة فْهَادْ الْوْصِيَّة بَاشْ يْتّْسَبّْبْ لِيَّ فْݣَاعْ الشّْكَالْ دْيَالْ الشَّهْوَة، حِيتْ بْلَا شْرَعْ الدَّنْبْ مْيّْتْ.

⁹وْكْنْتْ مْنْ قْبَلْ كَنْعِيشْ بْلَا شْرَعْ، وَلَكِنْ مْلِّي جَاتْ الْوْصِيَّة حْيَا الدَّنْبْ

¹⁰وْأَنَا مْتّْ، وْهَكَّا الْوْصِيَّة اللِّي كَانْ خَاصّْهَا تْدِّينِي لْلْحَيَاةْ هِيَ اللِّي دَّاتْنِي لْلْمُوتْ.

¹¹حِيتْ الدَّنْبْ مْلِّي لْقَا الْوْجْبَة بْسْبَابْ الْوْصِيَّة، خْدْعْنِي وْبِيهَا قْتَلْنِي.

¹²وْهَكَّا رَاهْ الشّْرَعْ مْقَدّْسْ، وْالْوْصِيَّة مْقَدّْسَة وْعَادْلَة وْمْزْيَانَة.

¹³إِيوَا وَاشْ الْحَاجَة الْمْزْيَانَة كَتّْسَبّْبْ لِيَّ فْالْمُوتْ؟ حَاشَا! رَاهْ الدَّنْبْ بَاشْ يْبَانْ دَنْبْ، تْسَبّْبْ لِيَّ فْالْمُوتْ بْالْحْوَايْجْ اللِّي مْزْيَانِينْ. وْهَكَّا، بْالْوْصِيَّة بَانْ الشَّرّْ دْيَالْ الدَّنْبْ بْلَا قْيَاسْ.

¹⁴حِيتْ حْنَا كَنْعَرْفُو بْلِّي الشّْرَعْ هُوَ مْنْ اللَّهْ، وَلَكِنْ أَنَا غِيرْ بْنَادْمْ ضْعِيفْ وْمْبْيُوعْ لْلدَّنْبْ.

¹⁵مَا كَنْعْرَفْشْ أَشْنُو كَنْدِيرْ، حِيتْ دَاكْشِّي اللِّي كَنْبْغِيهْ مَا كَنْدِيرُوشْ، وَلَكِنْ دَاكْشِّي اللِّي كَنْكَرْهُه هُوَ اللِّي كَنْدِيرُه.

¹⁶وْإِلَا كْنْتْ كَنْدِيرْ دَاكْشِّي اللِّي مَا كَنْبْغِيهْشْ، رَانِي كَنْتَّافْقْ مْعَ الشّْرَعْ بْلِّي هُوَ مْزْيَانْ.

¹⁷إِيوَا دَابَا مَاشِي أَنَا اللِّي كَنْدِيرْ دَاكْشِّي اللِّي مَا كَنْبْغِيهْشْ، وَلَكِنْ الدَّنْبْ اللِّي فِيَّ.

¹⁸حِيتْ كَنْعْرَفْ بْلِّي مَا كَايْنَة فِيَّ حْتَّى حَاجَة مْزْيَانَة، كَنْقْصَدْ فْالدَّاتْ دْيَالِي، عْلَاحْقَّاشْ عَنْدِي الرّْغْبَة بَاشْ نْدِيرْ الْخِيرْ وَلَكِنْ مَا كَنْقْدَرْشْ نْدِيرُه.

¹⁹حِيتْ الْخِيرْ اللِّي كَنْبْغِيهْ مَا كَنْدِيرُوشْ، وْالشَّرّْ اللِّي مَا كَنْبْغِيهْشْ هُوَ اللِّي كَنْدِيرُه.

²⁰وْإِلَا كْنْتْ كَنْدِيرْ دَاكْشِّي اللِّي مَا كَنْبْغِيهْشْ، رَاهْ مَاشِي أَنَا اللِّي كَنْدِيرُه، وَلَكِنْ الدَّنْبْ اللِّي سَاكْنْ فِيَّ.

²¹وْهَكَّا لْقِيتْ مْلِّي كَنْبْغِي نْدِيرْ الْخِيرْ، كَنْلْقَا بْلِّي غِيرْ الشَّرّْ هُوَ اللِّي فِيَّ.

²²وْفْلْدَاخْلْ دْيَالِي كَنْفْرَحْ بْالشّْرَعْ دْيَالْ اللَّهْ،

²³وَلَكِنْ كَنْلْقَا شْرَعْ آخُرْ فْالدَّاتْ دْيَالِي كَيْتّْحَارْبْ مْعَ الشّْرَعْ اللِّي فْالْعْقَلْ دْيَالِي، وْكَيْخَلِّينِي مْسْجُونْ فْالشّْرَعْ دْيَالْ الدَّنْبْ اللِّي فْالدَّاتْ دْيَالِي.

²⁴يَا وِيلِي أَنَا بْنَادْمْ الْمْتْعُوسْ! شْكُونْ اللِّي غَيْعْتَقْنِي مْنْ هَادْ الدَّاتْ دْيَالْ الْمُوتْ؟

²⁵وَلَكِنْ كَنْشْكَرْ اللَّهْ بْرَبّْنَا يَسُوعْ الْمَسِيحْ! وْهَكَّا بْالْعْقَلْ دْيَالِي كَنْطِيعْ الشّْرَعْ دْيَالْ اللَّهْ، وَلَكِنْ بْدَاتِي كَنْطِيعْ الشّْرَعْ دْيَالْ الدَّنْبْ.