Read Moroccan Standard Translation رُومَا 8 Bible Online

رُومَا 8 - Moroccan Standard Translation bible

رُومَا 8

¹الْفَصْلْ التَّامْنْ وْدَابَا مَا بْقَى حْتَّى شِي حُكْمْ عْلَى هَادُوكْ اللِّي فْالْمَسِيحْ يَسُوعْ.

²حِيتْ الشّْرَعْ دْيَالْ الرُّوحْ اللِّي كَيْعْطِي الْحَيَاةْ فْالْمَسِيحْ يَسُوعْ، رَاهْ حَرّْرْنِي مْنْ شْرَعْ الدَّنْبْ وْالْمُوتْ.

³وْدَاكْشِّي اللِّي مَا قْدَرْشْ شْرَعْ مُوسَى يْدِيرُه بْسْبَابْ الدَّاتْ دْيَالْنَا الضّْعِيفَة، دَارُه اللَّهْ مْلِّي صِيفْطْ وَلْدُه فْدَاتْ كَتْشْبَهْ لْلدَّاتْ دْيَالْنَا اللِّي عَامْرَة بْالدّْنُوبْ، وْعْلَى وْدّْ الدّْنُوبْ، وْحْكَمْ اللَّهْ عْلَى الدّْنُوبْ فْالدَّاتْ دْيَالْ بْنَادْمْ.

⁴بَاشْ يْكْمَلْ الْحُكْمْ دْيَالْ الشّْرَعْ فِينَا، حْنَا اللِّي كَنْعِيشُو مَاشِي عْلَى حْسَابْ الدَّاتْ، وَلَكِنْ عْلَى حْسَابْ رُوحْ اللَّهْ.

⁵حِيتْ هَادُوكْ اللِّي كَيْعِيشُو عْلَى حْسَابْ الدَّاتْ، كَيْدِّيوْهَا فْالْأُمُورْ دْيَالْ الدَّاتْ، وَلَكِنْ هَادُوكْ اللِّي كَيْعِيشُو عْلَى حْسَابْ رُوحْ اللَّهْ، كَيْدِّيوْهَا فْالْأُمُورْ الرُّوحِيَّة.

⁶وْرَاهْ اللِّي كَيْدِّيهَا فْالْأُمُورْ دْيَالْ الدَّاتْ كَيْمُوتْ، أَمَّا اللِّي كَيْدِّيهَا فْالْأُمُورْ الرُّوحِيَّة كَتْكُونْ عَنْدُه الْحَيَاةْ وْالْهْنَا،

⁷عْلَاحْقَّاشْ اللِّي كَيْدِّيهَا فْالدَّاتْ رَاهْ ضْدّْ اللَّهْ، وْمَا كَيْخْضَعْشْ لْلشّْرَعْ دْيَالْ اللَّهْ، وَلَا كَيْقْدَرْ يْدِيرْ بِيهْ.

⁸وْالنَّاسْ اللِّي كَيْعِيشُو عْلَى حْسَابْ الدَّاتْ مَا كَيْقَدْرُوشْ يْرْضِيوْ اللَّهْ.

⁹أَمَّا نْتُمَ، رَاكُمْ مَا كَتْعِيشُوشْ عْلَى حْسَابْ الدَّاتْ، وَلَكِنْ عْلَى حْسَابْ الرُّوحْ إِلَا كَانْ رُوحْ اللَّهْ سَاكْنْ فِيكُمْ. وَلَكِنْ إِلَا كَانْ شِي وَاحْدْ مَا فِيهْشْ رُوحْ الْمَسِيحْ، رَاهْ هُوَ مَاشِي دْيَالْ الْمَسِيحْ.

¹⁰وْإِلَا كَانْ الْمَسِيحْ فِيكُمْ، رَاهْ الدَّاتْ مْيّْتَة بْسْبَابْ الدَّنْبْ وَلَكِنْ الرُّوحْ حَيَّة بْسْبَابْ التَّقْوَى.

¹¹وْإِلَا كَانْ رُوحْ اللَّهْ اللِّي بْعَتْ يَسُوعْ مْنْ بِينْ الْمُوتَى سَاكْنْ فِيكُمْ، رَاهْ هَادَاكْ اللِّي بْعَتْ يَسُوعْ الْمَسِيحْ مْنْ بِينْ الْمُوتَى غَيْحْيِي حْتَّى الدَّاتْ دْيَالْكُمْ الْمْيّْتَة بْالرُّوحْ دْيَالُه اللِّي سَاكْنْ فِيكُمْ.

¹²وْهَكَّا آ الْخُوتْ، مَا خَاصّْنَاشْ نْكُونُو مْلْزُومِينْ بْالدَّاتْ دْيَالْنَا، بَاشْ نْعِيشُو عْلَى حْسَابْ الشَّهَوَاتْ دْيَالْهَا.

¹³حِيتْ إِلَا كَتْعِيشُو عْلَى حْسَابْ الدَّاتْ رَاكُمْ غَتْمُوتُو، وَلَكِنْ إِلَا كْنْتُو بْرُوحْ اللَّهْ كَتْقْتْلُو أَعْمَالْ الدَّاتْ رَاكُمْ غَتْحْيَاوْ.

¹⁴وْݣَاعْ هَادُوكْ اللِّي كَيْتْبْعُو رُوحْ اللَّهْ، رَاهُمْ وْلَادْ اللَّهْ.

¹⁵حِيتْ رَاكُمْ مَا خْدِيتُوشْ الرُّوحْ اللِّي غَيْرَدّْكُمْ عْبِيدْ وْيْرْجّْعْكُمْ عَاوْتَانِي لْلْخُوفْ، وَلَكِنْ خْدِيتُو الرُّوحْ اللِّي بِيهْ وْلِّيتُو وْلَادْ اللَّهْ، وْاللِّي بِيهْ كَنْغَوّْتُو: «آ بَّا، آ الْآبْ».

¹⁶وْهَادْ الرُّوحْ نِيتْ كَيْشْهَدْ لْلرُّوحْ دْيَالْنَا بْلِّي حْنَا وْلَادْ اللَّهْ.

¹⁷وْحِيتْ حْنَا وْلَادْ اللَّهْ رَاهْ حْنَا وَرَتَة، يَعْنِي وَرَتَة فْدَاكْشِّي اللِّي وْعَدْ بِيهْ اللَّهْ، وْغَنْشَارْكُو الْوَرْتْ مْعَ الْمَسِيحْ. وْإِلَا كْنَّا كَنْشَارْكُو مْعَاهْ الْعْدَابْ دْيَالُه، رَاهْ غَنْشَارْكُو مْعَاهْ حْتَّى الْعَزّْ دْيَالُه.

¹⁸وْأَنَا مْتْيِقّْنْ بْلِّي الْعْدَابْ دْيَالْنَا فْهَادْ الزّْمَانْ مَا كَيْسْوَى حْتَّى حَاجَة قُدَّامْ الْعَزّْ اللِّي غَيْبَيّْنُه اللَّهْ لِينَا.

¹⁹حِيتْ ݣَاعْ الْمْخْلُوقَاتْ كَيْتّْسْنَّاوْ غِيرْ إِيمْتَى يْبَيّْنْ اللَّهْ وْلَادُه.

²⁰حِيتْ الْمْخْلُوقَاتْ كَيْطِيعُو الْبَاطْلْ مَاشِي بْخَاطْرْهُمْ، وَلَكِنْ بْالْحُكْمْ دْيَالْ اللَّهْ. وْوَاخَّا هَكَّاكْ عَنْدْهُمْ الرّْجَا،

²¹بْلِّي حْتَّى هُمَ غَيْتْحَرّْرُو مْنْ الْعُبُودِيَّة دْ الْحْوَايْجْ اللِّي كَتْسَبّْبْ لِيهُمْ الْهْلَاكْ، بَاشْ يْشَارْكُو فْالْحُرِّيَّة وْالْعَزّْ دْيَالْ وْلَادْ اللَّهْ.

²²وْرَاهْ حْنَا كَنْعَرْفُو بْلِّي ݣَاعْ الْمْخْلُوقَاتْ كَيْنِينُو وْكَيْتّْوَجّْعُو حْتَّى لْدَابَا.

²³وْمَاشِي غِيرْ هَادْ الْمْخْلُوقَاتْ بُوحْدْهُمْ، وَلَكِنْ حْتَّى حْنَا اللِّي عَنْدْنَا الْغْلَّة اللّْوّْلَى دْيَالْ رُوحْ اللَّهْ، حْنَا بْرَاسْنَا كَنِّينُو فْالنَّفْسْ دْيَالْنَا، وْكَنْتّْسَنَّاوْ مْنْ اللَّهْ بَاشْ نْوَلِّيوْ وْلَادُه بْالْفِدَاءْ دْيَالُه لْلدَّاتْ دْيَالْنَا.

²⁴حِيتْ بْالرّْجَا نْجَّانَا، وَلَكِنْ الرّْجَا اللِّي كَيْتّْشَافْ مَا كَيْتّْسَمَّاشْ رْجَا، إِيوَا كِيفَاشْ كَيْتّْرَجَّا بْنَادْمْ دَاكْشِّي اللِّي كَيْشُوفْ؟

²⁵وَلَكِنْ إِلَا كْنَّا كَنْتّْرَجَّاوْ دَاكْشِّي اللِّي مَا كَنْشُوفُوهْشْ، رَاهْ كَنْتّْسَنَّاوْهْ بْالصّْبَرْ.

²⁶وْالرُّوحْ الْقُدُسْ حْتَّى هُوَ كَيْعَاوْنْ الضُّعْفْ دْيَالْنَا، حِيتْ حْنَا مَا كَنْعَرْفُوشْ كِيفَاشْ خَاصّْنَا نْصَلِّيوْ، وَلَكِنْ الرُّوحْ الْقُدُسْ بْرَاسُه كَيْشْفَعْ لِينَا عَنْدْ اللَّهْ بْكْلَامْ مَا كَيْتّْوْصَفْشْ.

²⁷وْاللَّهْ اللِّي كَيْفْحَصْ الْقْلُوبْ، كَيْعْرَفْ الْقَصْدْ دْيَالْ الرُّوحْ الْقُدُسْ، عْلَاحْقَّاشْ كَيْشْفَعْ لْلْمْقَدّْسِينْ عْلَى حْسَابْ مُرَادْ اللَّهْ.

²⁸وْحْنَا كَنْعَرْفُو بْلِّي اللَّهْ كَيْخَلِّي ݣَاعْ الْأُمُورْ تْخْدَمْ لْلْخِيرْ لْهَادُوكْ اللِّي كَيْبْغِيوْهْ، اللِّي خْتَارْهُمْ عْلَى حْسَابْ الْقَصْدْ دْيَالُه.

²⁹عْلَاحْقَّاشْ اللِّي عْرَفْهُمْ اللَّهْ مْنْ اللّْوّْلْ خْتَارْهُمْ مْنْ اللّْوّْلْ بَاشْ يْكُونُو عْلَى صُورْةْ الْوَلْدْ دْيَالُه، بَاشْ يْكُونْ هُوَ الْبْكَرْ بِينْ بْزَّافْ دْ الْخُوتْ.

³⁰وْهَادُو اللِّي خْتَارْهُمْ اللَّهْ مْنْ اللّْوّْلْ رَاهْ حْتَّى هُمَ عَيّْطْ عْلِيهُمْ، وْاللِّي عَيّْطْ عْلِيهُمْ حْتَّى هُمَ رَدّْهُمْ مْتَّاقْيِينْ، وْاللِّي رَدّْهُمْ مْتَّاقْيِينْ، حْتَّى هُمَ عْطَاهُمْ الْعَزّْ دْيَالُه.

³¹إِيوَا أَشْنُو غَنْݣُولُو مْنْ بَعْدْ هَادْشِّي كُلُّه؟ إِلَا كَانْ اللَّهْ مْعَانَا شْكُونْ اللِّي غَيْكُونْ ضْدّْنَا؟

³²اللَّهْ اللِّي مَا عَزّْشْ فِينَا الْوَلْدْ دْيَالُه، وَلَكِنْ وْهْبُه عْلَى وْدّْنَا كَامْلِينْ، كِيفَاشْ مَا يْعْطِينَاشْ مْعَاهْ كُلّْشِي؟

³³شْكُونْ اللِّي يْقْدَرْ يْتَّهْمْ هَادُوكْ اللِّي خْتَارْهُمْ اللَّهْ؟ رَاهْ اللَّهْ هُوَ اللِّي رَدّْهُمْ مْتَّاقْيِينْ.

³⁴شْكُونْ اللِّي يْقْدَرْ يْحْكَمْ عْلِيهُمْ؟ رَاهْ الْمَسِيحْ يَسُوعْ هُوَ اللِّي مَاتْ، وْكْتَرْ مْنْ هَادْشِّي تّْبْعَتْ مْنْ بِينْ الْمُوتَى، وْهُوَ اللِّي عْلَى لِيمْنْ دْيَالْ اللَّهْ كَيْشْفَعْ لِينَا.

³⁵شْكُونْ اللِّي يْقْدَرْ يْفْرَقْنَا عْلَى الْمْحَبَّة دْيَالْ الْمَسِيحْ؟ وَاشْ الْمْحْنَة، وْلَا الضِّيقْ، وْلَا التَّعَدُّو، وْلَا الجُّوعْ، وْلَا الْعْرَا، وْلَا الْخَطَرْ، وْلَا السِّيفْ؟

³⁶كِمَا مْكْتُوبْ فْكْتَابْ اللَّهْ: «عْلَى وْدّْكْ حْنَا كَنْتْعَرّْضُو لْلْمُوتْ النّْهَارْ كُلُّه، وْكَنْتّْحَسْبُو بْحَالْ الْغْنَمْ اللِّي غَادْيِينْ بِيهَا لْلدّْبِيحَة».

³⁷وَلَكِنْ فْهَادْ الْأُمُورْ كُلّْهَا عَنْدْنَا النّْصَرْ كَامْلْ بْهَادَاكْ اللِّي بْغَانَا.

³⁸وْأَنَا مْتْيِقّْنْ بْلِّي لَا الْمُوتْ وَلَا الْحَيَاةْ، وَلَا الْمَلَايْكَة وَلَا الرُّؤَسَا، وَلَا الْأُمُورْ دْيَالْ هَادْ الْوَقْتْ وَلَا دْيَالْ الْمُسْتَقْبَلْ، وَلَا الْقُوَّاتْ دْيَالْ السّْمَا،

³⁹وَلَا الْعْلُو وَلَا الْغُرْقْ، وَلَا حْتَّى شِي مْخْلُوقَاتْ خْرِينْ، يْقَدْرُو يْفَرّْقُونَا عْلَى الْمْحَبَّة دْيَالْ اللَّهْ اللِّي بَانْتْ فْالْمَسِيحْ يَسُوعْ رَبّْنَا.