Read Moroccan Standard Translation كُورِنْتُوسْ اللّْوّْلَى 1 Bible Online

كُورِنْتُوسْ اللّْوّْلَى 1 - Moroccan Standard Translation bible

كُورِنْتُوسْ اللّْوّْلَى 1

¹الْفَصْلْ اللّْوّْلْ مْنْ بُولُسْ رَسُولْ الْمَسِيحْ يَسُوعْ بْمُرَادْ اللَّهْ، وْمْنْ سُوسْتَانِيسْ خُونَا فْالْإِيمَانْ،

²لْكْنِيسْةْ اللَّهْ اللِّي فْكُورِنْتُوسْ، لْهَادُوكْ اللِّي قَدّْسْهُمْ اللَّهْ فْالْمَسِيحْ يَسُوعْ وْخْتَارْهُمْ مْنْ كُلّْ مُوضْعْ بَاشْ يْكُونُو مْقَدّْسِينْ مْعَ ݣَاعْ هَادُوكْ اللِّي كَيْعَبْدُو إِسْمْ رَبّْنَا يَسُوعْ الْمَسِيحْ، اللِّي هُوَ دْيَالْهُمْ وْدْيَالْنَا.

³النِّعْمَة وْالْهْنَا مْنْ اللَّهْ بَّانَا وْمْنْ الرَّبّْ يَسُوعْ الْمَسِيحْ لِيكُمْ.

⁴كَنْشْكَرْ اللَّهْ مْنْ جِهْتْكُمْ فْكُلّْ وَقْتْ عْلَى النِّعْمَة دْيَالُه اللِّي عْطَاكُمْ بْالْمَسِيحْ يَسُوعْ،

⁵اللِّي بِيهْ وْلِّيتُو أَغْنِيَا فْكُلّْشِي، فْالْكْلَامْ كُلُّه وْفْالْمَعْرِفَة كُلّْهَا،

⁶عْلَاحْقَّاشْ تْبْتَاتْ فِيكُمْ الشّْهَادَة اللِّي تّْعْطَاتْ عْلَى الْمَسِيحْ.

⁷وْهَكَّا رَاهْ مَا نَاقْصَاكُمْ حْتَّى شِي مَوْهِبَة رُوحِيَّة وْنْتُمَ كَتّْسْنَّاوْ الْمْجِي دْيَالْ رَبّْنَا يَسُوعْ الْمَسِيحْ،

⁸اللِّي غَادِي يْخَلِّيكُمْ تَابْتِينْ حْتَّى لْلّْخْرْ بَاشْ تْكُونُو بْلَا عِيبْ نْهَارْ الْمْجِي دْيَالُه.

⁹وْاللَّهْ أَمِينْ اللِّي عَيّْطْ لِيكُمْ بَاشْ تْكُونُو فْالشّْرْكَة مْعَ وَلْدُه يَسُوعْ الْمَسِيحْ رَبّْنَا.

¹⁰وْرَانِي آ خُوتِي كَنْطْلَبْ مْنّْكُمْ فْإِسْمْ رَبّْنَا يَسُوعْ الْمَسِيحْ، بَاشْ تْكُونُو كُلّْكُمْ مْتَّافْقِينْ عْلَى كْلْمَة وَحْدَة. وْمَا تْخَلِّيوْشْ الْمَشَاكِيلْ يْفَرّْقُوكُمْ، وَلَكِنْ كُونُو مْتَّاحْدِينْ فْفِكْرْ وَاحْدْ وْفْرَيّْ وَاحْدْ.

¹¹حِيتْ جَاتْنِي خْبَارْكُمْ آ خُوتِي مْنْ النَّاسْ دْيَالْ خُلُوِي، بْلِّي كَايْنِينْ شِي مَشَاكِيلْ بِينَاتْكُمْ.

¹²وْكَنْݣُولْ هَادْشِّي عْلَاحْقَّاشْ وَاحْدْ مْنّْكُمْ كَيْݣُولْ: «أَنَا دْيَالْ بُولُسْ»، وْلَاخُرْ «أَنَا دْيَالْ أَبُلُّوسْ»، وْلَاخُرْ «أَنَا دْيَالْ صَفَا»، وْلَاخُرْ «أَنَا دْيَالْ الْمَسِيحْ».

¹³وَاشْ الْمَسِيحْ تّْقْسَمْ؟ وَاشْ بُولُسْ اللِّي تّْصْلَبْ عْلَى وْدّْكُمْ؟ وْلَا بْإِسْمْ بُولُسْ تّْعَمّْدْتُو؟

¹⁴كَنْشْكَرْ اللَّهْ حِيتْ مَا عَمّْدْتْ حْتَّى وَاحْدْ مْنّْكُمْ مْنْ غِيرْ كِرِيسْبُسْ وْغَايُوسْ،

¹⁵بَاشْ حْتَّى وَاحْدْ مْنّْكُمْ مَا يْقْدَرْ يْݣُولْ بْلِّي رَاكُمْ تّْعَمّْدْتُو بْسْمِيتِي.

¹⁶إِيِّهْ، عَمّْدْتْ حْتَّى عَائِلْةْ اسْتِفَانُوسْ. وْمْنْ غِيرْهُمْ مَا كَنْضَنّْشْ وَاشْ عَمّْدْتْ شِي وَاحْدْ آخُرْ.

¹⁷حِيتْ الْمَسِيحْ مَا صِيفْطْنِيشْ بَاشْ نْعَمّْدْ، وَلَكِنْ بَاشْ نْخَبّْرْ بْالْإِنْجِيلْ، بْلَا مَا نْعْتَمْدْ عْلَى كْلَامْ الْحْكْمَة دْيَالْ بْنَادْمْ بَاشْ مَا يْكُونْشْ الصّْلِيبْ دْ الْمَسِيحْ بْلَا فَايْدَة.

¹⁸حِيتْ الْبْشَارَة بْالْمُوتْ دْ الْمَسِيحْ عَنْدْ النَّاسْ اللِّي مَاشِي مُومْنِينْ حْمَاقْ، وَلَكِنْ عَنْدْنَا حْنَا اللِّي نْجِينَا رَاهْ هِيَ قُوَّةْ اللَّهْ.

¹⁹حِيتْ مْكْتُوبْ فْكْتَابْ اللَّهْ: «غَادِي نْمْحِي الْحْكْمَة دْ الْحُكَمَا وْمَا نْقْبَلْشْ الْفْهَامَة دْ الْفُهَمَا».

²⁰فِينْ هُوَ الْحْكِيمْ؟ وْفِينْ هُوَ الْعَالِمْ؟ وْفِينْ هُوَ الْفَيْلَسُوفْ دْيَالْ هَادْ الزّْمَانْ؟ وَاشْ مَا رَدّْشْ اللَّهْ الْحْكْمَة دْيَالْ هَادْ الدّْنْيَا حْمَاقْ؟

²¹حِيتْ نَاسْ الدّْنْيَا بْالْحْكْمَة دْيَالْهُمْ مَا قَدْرُوشْ يْعَرْفُو الْحْكْمَة دْ اللَّهْ، وْهَكَّا بْغَا اللَّهْ يْنَجِّي اللِّي كَيْآمْنُو بِيهْ بْالْبْشَارَة اللِّي كَيْحَسْبُوهَا النَّاسْ حْمَاقْ.

²²عْلَى هَادْشِّي رَاهْ لِيهُودْ كَيْطْلْبُو عَلَامَاتْ، وْالْيُونَانِيِّينْ كَيْقَلّْبُو عْلَى الْحْكْمَة،

²³وَلَكِنْ حْنَا كَنْخَبّْرُو بْالْمَسِيحْ اللِّي تّْصْلَبْ، اللِّي هُوَ مُشْكِلَة لْلِيهُودْ وْحْمَاقْ لْلشّْعُوبْ اللِّي مَاشِي يْهُودْ.

²⁴أَمَّا بْالنّْسْبَة لْلِّي خْتَارْهُمْ اللَّهْ، سْوَا كَانُو يْهُودْ وْلَا يُونَانِيِّينْ، رَاهْ الْمَسِيحْ هُوَ قُوَّةْ اللَّهْ وْالْحْكْمَة دْيَالُه.

²⁵عْلَاحْقَّاشْ الْحْمَاقْ دْيَالْ اللَّهْ رَاهْ حْكْمَة كْتَرْ مْنْ حْكْمَةْ النَّاسْ، وْالضُّعْفْ دْيَالُه رَاهْ قْوَى مْنْ قُوَّةْ النَّاسْ.

²⁶وْتّْفَكّْرُو آ الْخُوتْ، نْتُمَ اللِّي عَيّْطْ لِيكُمْ اللَّهْ، بْلِّي مَا فِيكُمْشْ بْزَّافْ دْيَالْ الْحُكَمَا عْلَى حْسَابْ الْحْكْمَة دْ بْنَادْمْ، وَلَا فِيكُمْ بْزَّافْ دْ الْقْوِيِّينْ وَلَا دْيَالْ الشّْرْفَة.

²⁷وَلَكِنْ اللَّهْ خْتَارْ اللِّي كَيْعْتَبْرُوهُمْ نَاسْ الدّْنْيَا حْمَّاقْ بَاشْ يْحَشّْمْ الْحُكَمَا، وْخْتَارْ اللِّي كَيْعْتَبْرُوهُمْ نَاسْ الدّْنْيَا ضُعَفَا بَاشْ يْحَشّْمْ الْقْوِيِّينْ.

²⁸وْخْتَارْ اللَّهْ الضُّعَفَا وْالْمْحْݣُورِينْ وْاللِّي مَا عَنْدْهُمْ قِيمَة فْالدّْنْيَا، بَاشْ يْمْحِي اللِّي كَيْعْتَبْرُوهُمْ النَّاسْ عَنْدْهُمْ الْقِيمَة،

²⁹وْهَكَّا حْتَّى وَاحْدْ مَا يْقْدَرْ يْفْتَخْرْ قُدَّامْ اللَّهْ.

³⁰وَلَكِنْ نْتُمَ بْفْضَلْ اللَّهْ وْلِّيتُو فْالْمَسِيحْ يَسُوعْ اللِّي وْلَّى لِينَا هُوَ الْحْكْمَة مْنْ اللَّهْ وْالتَّقْوَى وْالْقَدَاسَة وْالْفِدَاءْ.

³¹وْكِيفْ جَا فْكْتَابْ اللَّهْ: «اللِّي بْغَا يْفْتَخْرْ، يْفْتَخْرْ بْالرَّبّْ».