Read Moroccan Standard Translation كُورِنْتُوسْ اللّْوّْلَى 11 Bible Online

كُورِنْتُوسْ اللّْوّْلَى 11 - Moroccan Standard Translation bible

كُورِنْتُوسْ اللّْوّْلَى 11

¹الْفَصْلْ حْضَاشْ دِيرُو بْحَالِي، كِيفْ كَنْدِيرْ حْتَّى أَنَا بْحَالْ الْمَسِيحْ.

²رَانِي كَنْشْكَرْكُمْ آ الْخُوتْ حِيتْ كَتّْفَكّْرُونِي فْكُلّْ الْوَقْتْ، وْكَتْحَافْضُو عْلَى الْعَادَاتْ كِيفْ وْصّْلْتْهَا لِيكُمْ.

³وَلَكِنْ بْغِيتْكُمْ تْعَرْفُو بْلِّي الرَّاسْ دْيَالْ كُلّْ رَاجْلْ هُوَ الْمَسِيحْ، وْالرَّاسْ دْيَالْ الْمْرَاة هُوَ الرَّاجْلْ، وْالرَّاسْ دْيَالْ الْمَسِيحْ هُوَ اللَّهْ.

⁴كُلّْ رَاجْلْ كَيْصَلِّي وْلَا كَيْتّْنَبّْأْ وْرَاسُه مْغَطِّي، كَيْجِيبْ الْعَارْ لْرَاسُه،

⁵وْكُلّْ مْرَاة كَتْصَلِّي وْلَا كَتّْنَبّْأْ وْرَاسْهَا عْرْيَانْ، كَتْجِيبْ الْعَارْ لْرَاسْهَا، حِيتْ رَاهَا بْحَالْ إِلَا مْحَسّْنَة رَاسْهَا.

⁶حِيتْ إِلَا كَانْتْ الْمْرَاة مَا كَتْغَطِّيشْ رَاسْهَا، رَاهْ وَاجْبْ عْلِيهَا تْقَطّْعْ شْعَرْهَا. وْحِيتْ حْشُومَة تْقَطّْعْ الْمْرَاة شْعَرْهَا وْلَا تْحَسّْنُه، رَاهْ وَاجْبْ عْلِيهَا تْغَطِّيهْ.

⁷وْالرَّاجْلْ مَا خَاصُّوشْ يْغَطِّي رَاسُه، حِيتْ هُوَ صُورْةْ اللَّهْ وْالْعَزّْ دْيَالُه، وَلَكِنْ الْمْرَاة رَاهْ هِيَ الْعَزّْ دْيَالْ الرَّاجْلْ.

⁸حِيتْ مَاشِي الرَّاجْلْ هُوَ اللِّي جَا مْنْ الْمْرَاة، وَلَكِنْ الْمْرَاة هِيَ اللِّي جَاتْ مْنْ الرَّاجْلْ،

⁹وْمَاشِي الرَّاجْلْ هُوَ اللِّي تّْخْلَقْ عْلَى وْدّْ الْمْرَاة، وَلَكِنْ الْمْرَاة هِيَ اللِّي تّْخَلْقَاتْ عْلَى وْدّْ الرَّاجْلْ.

¹⁰هَادْشِّي عْلَاشْ خَاصّْ الْمْرَاة تْكُونْ عَنْدْهَا السُّلْطَة عْلَى رَاسْهَا عْلَى وْدّْ الْمَلَايْكَة.

¹¹وْهَكَّا فْالرَّبّْ، رَاهْ الرَّاجْلْ مَا يْقْدَرْشْ يْبْقَى بْلَا مْرَاة، وْالْمْرَاة مَا تْقْدَرْشْ تْبْقَى بْلَا رَاجْلْ.

¹²حِيتْ كِمَا جَاتْ الْمْرَاة مْنْ الرَّاجْلْ، حْتَّى الرَّاجْلْ تّْوْلَدْ مْنْ الْمْرَاة، وَلَكِنْ رَاهْ ݣَاعْ الْأُمُورْ مْنْ اللَّهْ.

¹³إِيوَا نْتُمَ بْرَاسْكُمْ حْكْمُو: وَاشْ يْصْلَاحْ لْلْمْرَاة تْصَلِّي لْلَّهْ وْرَاسْهَا عْرْيَانْ؟

¹⁴رَاهْ الطَّبِيعَة بْرَاسْهَا كَتْعَلّْمْكُمْ بْلِّي عِيبْ عْلَى الرَّاجْلْ يْخَلِّي شَعْرُه طْوِيلْ،

¹⁵وَلَكِنْ إِلَا طْلْقَاتْ الْمْرَاة شْعَرْهَا رَاهْ هُوَ الْعَزّْ دْيَالْهَا! حِيتْ الشّْعَرْ تّْعْطَى لِيهَا فْبْلَاصْةْ الْغْطَا.

¹⁶وْإِلَا كَانْ شِي وَاحْدْ بَاغِي يْعَارْضْ، رَاهْ هَادْشِّي مَاشِي مْنْ عَادْتْنَا وَلَا مْنْ عَادْةْ كْنَايْسْ اللَّهْ.

¹⁷وْأَنَا مْلِّي كَنْوَصِّيكُمْ بْهَادْشِّي رَانِي مَاشِي كَنْشْكَرْكُمْ، عْلَاحْقَّاشْ الْإِجْتِمَاعَاتْ دْيَالْكُمْ كَيْضَرُّو كْتَرْ مَا كَيْنَفْعُو.

¹⁸حِيتْ فْاللّْوّْلْ، سْمَعْتْ بْلِّي مَا كَتْكُونُوشْ مْتَّافْقِينْ مْلِّي كَتّْجَمْعُو فْالْكْنِيسَة، وْكَنْتِيّْقْ شِي حَاجَة مْنْ هَادْشِّي،

¹⁹عْلَاحْقَّاشْ لَابْدّْ مَا يْكُونُو بِينَاتْكُمْ شِي جْمَاعَاتْ، بَاشْ حْتَّى هَادُوكْ اللِّي تَابْتِينْ بِينَاتْكُمْ يْبَانُو.

²⁰وْمْلِّي كَتّْجَمْعُو مْعَ بْعْضِيَّاتْكُمْ، رَاهْ مَا كَتّْجَمْعُوشْ بَاشْ تَاكْلُو الْعْشَا دْيَالْ الرَّبّْ،

²¹حِيتْ مْلِّي كَتَاكْلُو، كُلّْ وَاحْدْ كَيْسْبَقْ وْكَيَاخْدْ عْشَاهْ، وْكَيْبْقَاوْ شِي وْحْدِينْ بْالجُّوعْ، وْوْحْدِينْ خْرِينْ كَيْشَرْبُو حْتَّى كَيْسَكْرُو.

²²وَاشْ مَا عَنْدْكُمْ دْيُورْ فِينْ تَاكْلُو وْتْشَرْبُو؟ وْلَّا رَاكُمْ كَتْحْتَقْرُو كْنِيسْةْ اللَّهْ وْكَتْحَشّْمُو النَّاسْ اللِّي مَا عَنْدْهُمْشْ؟ آشْ غَنْݣُولْ لِيكُمْ؟ وَاشْ غَادِي نْشْكَرْكُمْ عْلَى هَادْشِّي؟ لَّا! فْهَادِي مَا غَادِيشْ نْشْكَرْكُمْ!

²³حِيتْ دَاكْشِّي اللِّي خْدِيتْ مْنْ الرَّبّْ عْطِيتُو لِيكُمْ تَانِي، بْاللِّي الرَّبّْ يَسُوعْ فْاللِّيلَة اللِّي سَلّْمُوهْ فِيهَا، خْدَا الْخُبْزْ

²⁴وْشْكَرْ اللَّهْ وْقَطّْعُه وْݣَالْ: «هَادَا هُوَ الدَّاتْ دْيَالِي، اللِّي غَنْعْطِيهَا عْلَى قْبَلْكُمْ. دِيرُو هَادْشِّي بَاشْ تّْفَكّْرُونِي».

²⁵وْهَكَّا دَارْ بْالْكَاسْ حْتَّى هُوَ مْنْ بَعْدْ الْعْشَا وْݣَالْ: «هَادْ الْكَاسْ رَاهْ هُوَ الْعَهْدْ الجّْدِيدْ بْالدّْمْ دْيَالِي، دِيرُو هَادْشِّي وَقْتْمَا شْرَبْتُو بَاشْ تّْفَكّْرُونِي».

²⁶حِيتْ كُلّْمَا كْلِيتُو هَادْ الْخُبْزْ، وْشْرَبْتُو هَادْ الْكَاسْ، رَاكُمْ كَتْخَبّْرُو بْمُوتْ الرَّبّْ حْتَّى يْعَاوْدْ يْجِي.

²⁷وْعْلَى هَادْشِّي كُلّْ مْنْ كْلَا هَادْ الْخُبْزْ، وْلَا شْرَبْ هَادْ الْكَاسْ دْيَالْ الرَّبّْ بْلَا مَا يْسْتَحْقّْ، رَاهْ غَيْدْنَبْ فْحَقّْ الدَّاتْ دْيَالْ الرَّبّْ وْالدّْمْ دْيَالُه.

²⁸وَلَكِنْ خَاصّْ كُلّْ وَاحْدْ يْرَاجْعْ رَاسُه، عَادْ يَاكُلْ مْنْ الْخُبْزْ وْيْشْرَبْ مْنْ الْكَاسْ،

²⁹حِيتْ اللِّي كَيَاكُلْ وْكَيْشْرَبْ بْلَا مَا يْفْهَمْ الدَّاتْ دْيَالْ الرَّبّْ، رَاهْ كَيَاكُلْ وْكَيْشْرَبْ الْحُكْمْ عْلَى رَاسُه.

³⁰وْهَادْشِّي عْلَاشْ فِيكُمْ بْزَّافْ اللِّي ضْعَافْ وْمْرَاضْ وْبْزَّافْ اللِّي مَاتُو.

³¹وْرَاهْ كُونْ حْكَمْنَا عْلَى رَاسْنَا، كُونْ مَا تّْحْكَمْشْ عْلِينَا.

³²وَلَكِنْ الرَّبّْ حْكَمْ عْلِينَا بَاشْ يْأَدّْبْنَا وْمَا يْعَاقْبْنَاشْ مْعَ النَّاسْ دْيَالْ الدّْنْيَا.

³³عْلَى هَادْشِّي آ خُوتِي، مْلِّي تّْجَمْعُو عْلَى الْعْشَا دْيَالْ الرَّبّْ، تّْسْنَّاوْ بْعْضِيَّاتْكُمْ.

³⁴وْإِلَا كَانْ شِي وَاحْدْ جِيعَانْ، خَاصُّه يَاكُلْ فْدَارُه بَاشْ مَا يْتّْحْكَمْشْ عْلِيكُمْ وْنْتُمَ مْجْمُوعِينْ، وْالْأُمُورْ لْخْرَى غَادِي نْݣُولْ لِيكُمْ أَشْنُو تْدِيرُو فِيهَا مْلِّي نْجِي.