Read Moroccan Standard Translation كُورِنْتُوسْ اللّْوّْلَى 14 Bible Online

كُورِنْتُوسْ اللّْوّْلَى 14 - Moroccan Standard Translation bible

كُورِنْتُوسْ اللّْوّْلَى 14

¹الْفَصْلْ رْبَعْطَاشْ قَلّْبُو عْلَى الْمْحَبَّة وْبْغِيوْ بْزَّافْ الْمَوَاهِبْ الرُّوحِيَّة، وْبْالْخُصُوصْ مَوْهِبَةْ النُّبُوَّة.

²حِيتْ اللِّي كَيْتّْكَلّْمْ بْشِي لُغَة مَا مْفْهُومَاشْ، مَا كَيْتّْكَلّْمْشْ مْعَ النَّاسْ وَلَكِنْ مْعَ اللَّهْ. عْلَاحْقَّاشْ حْتَّى وَاحْدْ مَا كَيْفَهْمُه وَلَكِنْ بْالرُّوحْ كَيْتّْكَلّْمْ بْالْأَسْرَارْ.

³أَمَّا اللِّي كَيْتّْنَبّْأْ، رَاهْ كَيْتّْكَلّْمْ مْعَ النَّاسْ بَاشْ يْبْنِيهُمْ وْيْشَجّْعْهُمْ وْيْقَوِّيهُمْ.

⁴اللِّي كَيْتّْكَلّْمْ بْشِي لُغَة مَا مْفْهُومَاشْ كَيْبْنِي رَاسُه، أَمَّا اللِّي كَيْتّْنَبّْأْ رَاهْ كَيْبْنِي الْكْنِيسَة.

⁵رَانِي بْغِيتْكُمْ كُلّْكُمْ تْتْكَلّْمُو بْلُغَاتْ مَا مْفْهُومِينْشْ، وَلَكِنْ كَنْفَضّْلْ تْتّْنَبّْأُو. حِيتْ اللِّي كَيْتّْنَبّْأْ حْسَنْ مْنْ اللِّي كَيْتّْكَلّْمْ بْلُغَاتْ، مْنْ غِيرْ إِلَا تْرْجَمْ بَاشْ تْتْقَوَّى الْكْنِيسَة.

⁶إِيوَا دَابَا إِلَا جِيتْ لْعَنْدْكُمْ آ الْخُوتْ، وْتّْكَلّْمْتْ بْلُغَة مَا مْفْهُومَاشْ، بَاشْ غَادِي نّْفَعْكُمْ؟ رَاهْ مَا غَنّْفَعْكُمْ بْوَالُو مْنْ غِيرْ إِلَا تّْكَلّْمْتْ مْعَاكُمْ بْالْوَحْيْ وْلَا بْالْمَعْرِفَة وْلَا بْالنُّبُوَة وْلَا بْالتَّعْلِيمْ.

⁷رَاهْ حْتَّى الْآلَاتْ الْمُوسِيقِيَّة اللِّي مَا فِيهُمْ حَيَاةْ، بْحَالْ اللِّيرَة وْلَا الْݣِيتَارْ، إِلَا مَا كَانْتْشْ النَّغْمَة دْيَالْهُمْ وَاضْحَة، كِيفَاشْ غَتْفَرّْقْ بِينْ النَّغْمَة دْيَالْ اللِّيرَة وْدْيَالْ الْݣِيتَارْ؟

⁸وْإِلَا مَا كَانْشْ صُوتْ الْبُوقْ وَاضْحْ، شْكُونْ غَيْوَجّْدْ رَاسُه لْلْحَرْبْ؟

⁹هَكَّا حْتَّى نْتُمَ إِلَا مَا كْنْتُوشْ كَتّْكَلّْمُو بْكْلَامْ مْفْهُومْ، كِيفَاشْ غَيْتّْعْرَفْ آشْ كَتْݣُولُو؟ غَتْكُونُو بْحَالْ اللِّي كَيْتّْكَلّْمُو فْالْهْوَا.

¹⁰رَاهْ بْلَا شْكّْ كَايْنِينْ بْزَّافْ دْيَالْ اللُّغَاتْ فْالدّْنْيَا، وْكُلّْ وَحْدَة فِيهُمْ عَنْدْهَا مْعْنَى،

¹¹إِيوَا إِلَا مَا كَنْتْشْ كَنْعْرَفْ اللُّغَة اللِّي كَيْتّْكَلّْمْ بِيهَا شِي وَاحْدْ، رَاهْ غَنْكُونْ بْرَّانِي بْالنّْسْبَة لِيهْ وْهُوَ غَيْكُونْ بْرَّانِي بْالنّْسْبَة لِيَّ.

¹²وْهَكَّا حْتَّى نْتُمَ، حِيتْ مْتّْحَمّْسِينْ تْكُونْ عَنْدْكُمْ الْمَوَاهِبْ الرُّوحِيَّة، قَلّْبُو عْلَى اللِّي كَتْبْنِي الْكْنِيسَة كْتَرْ.

¹³وْعْلَى هَادْشِّي اللِّي كَيْتّْكَلّْمْ بْشِي لُغَة مَا مْعْرُوفَاشْ، خَاصُّه يْصَلِّي بَاشْ يْعْطِيهْ اللَّهْ التَّرْجَمَة دْيَالْ دَاكْشِّي اللِّي كَيْݣُولْ.

¹⁴حِيتْ إِلَا صْلِّيتْ بْشِي لُغَة مَا مْعْرُوفَاشْ، رَاهْ رُوحِي كَتْصَلِّي وَلَكِنْ عَقْلِي مَا كَيْسْتَافْدْ وَالُو.

¹⁵إِيوَا أَشْنُو الْمَعْمُولْ؟ غَنْصَلِّي بْالرُّوحْ، وْغَنْصَلِّي بْالْعْقَلْ حْتَّى هُوَ، غَنْغَنِّي بْالرُّوحْ، وْغَنْغَنِّي بْالْعْقَلْ حْتَّى هُوَ.

¹⁶حِيتْ إِلَا شْكَرْتِي بْالرُّوحْ، كِيفَاشْ هَادَاكْ اللِّي يَالَّاهْ جَا جْدِيدْ غَيْݣُولْ «آمِينْ» عْلَى الشُّكْرْ دْيَالْكْ وْهُوَ مَا عَارْفْشْ آشْ كَتْݣُولْ؟

¹⁷بْلَا شْكّْ نْتَ شْكَرْتِي مْزْيَانْ، وَلَكِنْ وَاحْدْ آخُرْ مَا سْتَافْدْ وَالُو.

¹⁸كَنْشْكَرْ اللَّهْ حِيتْ كَنْتّْكَلّْمْ بْلُغَاتْ كْتَرْ مْنْ كُلّْ وَاحْدْ فِيكُمْ،

¹⁹وَلَكِنْ فْالْكْنِيسَة كَنْبْغِي نْݣُولْ خَمْسَة دْ الْكْلْمَاتْ بْعَقْلِي بَاشْ نْعَلّْمْ بِيهُمْ حْتَّى لْخْرِينْ، فْعُوضْ مَا نْݣُولْ عَشْرَلَافْ كْلْمَة بْلُغَة مَا مْفْهُومَاشْ.

²⁰آ الْخُوتْ، مَا تْكُونُوشْ دْرَارِي صْغَارْ فْالتّْفْكِيرْ دْيَالْكُمْ، وَلَكِنْ كُونُو دْرَارِي صْغَارْ فْالشَّرّْ وْكُونُو نَاضْجِينْ فْالْفْهَامَة.

²¹رَاهْ مْكْتُوبْ فْكْتَابْ الشّْرَعْ: «بْلُغَاتْ خْرِينْ وْبْشْفَايْفْ خْرِينْ غَنْتّْكَلّْمْ مْعَ هَادْ الشَّعْبْ، وْوَاخَّا هَكَّاكْ مَا غَادِيشْ يْسَمْعُو لِيَّ، كَيْݣُولْ الرَّبّْ».

²²وْهَكَّا رَاهْ اللُّغَاتْ عَلَامَة مَاشِي لْلْمُومْنِينْ وَلَكِنْ لْهَادُوكْ اللِّي مَا كَيْآمْنُوشْ. أَمَّا النُّبُوَّة رَاهَا مَاشِي لْهَادُوكْ اللِّي مَا كَيْآمْنُوشْ، وَلَكِنْ لْلْمُومْنِينْ.

²³إِلَا تّْجَمْعَاتْ الْكْنِيسَة كُلّْهَا وْكَانْ كُلّْشِي كَيْتّْكَلّْمْ بْلُغَاتْ، وْدَخْلُو شِي وْحْدِينْ مَا قَارْيِينْشْ، وْلَا مَاشِي مُومْنِينْ، وَاشْ مَا غَادِيشْ يْݣُولُو رَاكُمْ كَتْخَرّْفُو؟

²⁴وَلَكِنْ إِلَا كَانْ كُلّْشِي كَيْتّْنَبّْأْ، وْدْخَلْ شِي حَدّْ مَاشِي مُومْنْ وْلَا مَا قَارِيشْ، رَاهْ كُلّْشِي غَيْلُومُه وْكُلّْشِي غَيْحْكَمْ عْلِيهْ،

²⁵وْغَيْبَانُو أَسْرَارْ قَلْبُه وْغَيْرْكَعْ وْيْسْجَدْ لْلَّهْ وْيْعْتَرْفْ بْلِّي بْالصَّحْ اللَّهْ فِيكُمْ.

²⁶إِيوَا أَشْنُو خَاصّْ يْتْدَارْ آ الْخُوتْ؟ مْلِّي تّْجَمْعُو، وْكُلّْ وَاحْدْ مْنّْكُمْ عَنْدُه مَزْمُورْ، عَنْدُه تَعْلِيمْ، عَنْدُه وَحْيْ، عَنْدُه لُغَة، عَنْدُه تَرْجَمَة، خَاصّْ كُلّْ هَادْشِّي يْكُونْ بَاشْ تْبْنِيوْ بْعْضِيَّاتْكُمْ.

²⁷إِلَا كَانْ شِي حَدّْ كَيْتّْكَلّْمْ بْشِي لُغَة، خَاصّْ يْتّْكَلّْمُو جُوجْ وْلَا تْلَاتَة بْالتَّرْتِيبْ، وْوَاحْدْ يْكُونْ كَيْتَرْجَمْ.

²⁸وَلَكِنْ إِلَا مَا كَايْنْشْ شِي مُتَرْجِمْ، خَاصّْ اللِّي كَيْتّْكَلّْمْ بْشِي لُغَة يْسْكُتْ فْالْكْنِيسَة وْيْتّْكَلّْمْ مْعَ نْفْسُه وْمْعَ اللَّهْ.

²⁹وْاللِّي عَنْدْهُمْ النُّبُوَّة، خَاصّْ يْتّْكَلّْمُو جُوجْ وْلَا تْلَاتَة، وْلْخْرِينْ يْمَيّْزُو كْلَامْهُمْ.

³⁰وَلَكِنْ إِلَا وْحَى اللَّهْ لْشِي وَاحْدْ مْنْ اللِّي ݣَالْسِينْ، خَاصّْ اللّْوّْلْ يْسْكُتْ،

³¹حِيتْ تْقَدْرُو كُلّْكُمْ تْتّْنَبّْأُو وَاحْدْ بْوَاحْدْ، بَاشْ كُلّْشِي يْتّْعَلّْمْ وْكُلّْشِي يْتّْشَجّْعْ.

³²وْأَرْوَاحْ الْأَنْبِيَا رَاهَا كَتْطِيعْ الْأَنْبِيَا،

³³حِيتْ اللَّهْ مَاشِي إِلَاهْ دْ الْفُوضَى وَلَكِنْ إِلَاهْ دْ الْهْنَا. وْكِمَا كَايْنْ فْݣَاعْ الْكْنَايْسْ دْيَالْ الْمْقَدّْسِينْ،

³⁴خَاصّْ الْعْيَالَاتْ يْسَكْتُو فْالْكْنَايْسْ، حِيتْ مَا مْسْمُوحْشْ لِيهُمْ يْتّْكَلّْمُو، وَلَكِنْ خَاصّْهُمْ يْطِيعُو كِيفْ كَيْوَصِّي الشّْرَعْ.

³⁵وْإِلَا بْغَاوْ يْتّْعَلّْمُو شِي حَاجَة، خَاصّْهُمْ يْسْوّْلُو رْجَالْهُمْ فْالدَّارْ، حِيتْ عِيبْ تْهْضَرْ الْمْرَاة فْالْكْنِيسَة.

³⁶وَاشْ مْنْ عَنْدْكُمْ خْرَجْ كْلَامْ اللَّهْ؟ وْلَا غِيرْ لِيكُمْ بُوحْدْكُمْ وْصَلْ؟

³⁷إِلَا كَانْ شِي وَاحْدْ كَيْحْسَبْ رَاسُه نْبِي وْلَا عَنْدُه شِي مَوْهِبَة رُوحِيَّة، رَاهْ خَاصُّه يْعْرَفْ مْزْيَانْ بْلِّي هَادْشِّي اللِّي كْتَبْتْ لِيكُمْ هُوَ أَمْرْ مْنْ الرَّبّْ،

³⁸وَلَكِنْ إِلَا شِي وَاحْدْ مَا كَيْعْتَرْفْشْ بْهَادْشِّي، رَاهْ حْتَّى هُوَ مَا كَيْتّْعْتَرْفْشْ بِيهْ.

³⁹عْلَى هَادْشِّي آ الْخُوتْ، طْلْبُو النُّبُوَّة وْمَا تْمَنْعُوشْ اللِّي بْغَا يْتّْكَلّْمْ بْلُغَاتْ.

⁴⁰وَلَكِنْ خَاصّْ كُلّْشِي يْكُونْ بْالْإِحْتِرَامْ وْبْالنِّضَامْ.