Read Moroccan Standard Translation كُورِنْتُوسْ اللّْوّْلَى 15 Bible Online

كُورِنْتُوسْ اللّْوّْلَى 15 - Moroccan Standard Translation bible

كُورِنْتُوسْ اللّْوّْلَى 15

¹الْفَصْلْ خْمْسْطَاشْ وْرَانِي كَنْفَكّْرْكُمْ آ الْخُوتْ بْالْإِنْجِيلْ اللِّي خَبّْرْتْكُمْ بِيهْ وْقْبَلْتُوهْ وْمَازَالْ تَابْتِينْ فِيهْ،

²وْبِيهْ غَتْنْجَاوْ إِلَا بْقِيتُو تَابْتِينْ فْالْكْلَامْ اللِّي خَبّْرْتْكُمْ بِيهْ، مْنْ غِيرْ إِلَا كْنْتُو آمْنْتُو بْلَا فَايْدَة.

³رَانِي وَصّْلْتْ لِيكُمْ فْاللّْوّْلْ دَاكْشِّي اللِّي قْبَلْتُه حْتَّى أَنَا، بْلِّي الْمَسِيحْ مَاتْ عْلَى وْدّْ دْنُوبْنَا كِيفْ مْكْتُوبْ فْكْتَابْ اللَّهْ،

⁴وْتّْدْفَنْ، وْفْالنّْهَارْ التَّالْتْ تّْبْعَتْ مْنْ الْمُوتْ كِيفْ مْكْتُوبْ فْكْتَابْ اللَّهْ.

⁵وْبَانْ لْصَفَا وْمْنْ بَعْدْ لْلتّْلَامْدْ بْطْنَاشْ،

⁶وْمْنْ بَعْدْ بَانْ لْكْتَرْ مْنْ خَمْسْمِيَّةْ خُو فْمَرَّة وَحْدَة، بْزَّافْ مْنّْهُمْ بَاقْيِينْ حَيِّينْ وَلَكِنْ شِي وْحْدِينْ مْنّْهُمْ مَاتُو.

⁷وْمْنْ بَعْدْ بَانْ لْيَعْقُوبْ، وْمْنْ بَعْدْ لْلرُّسُلْ كُلّْهُمْ.

⁸وْفْاللّْخْرْ مْنْ بَعْدْ كُلّْشِي، بَانْ لِيَّ حْتَّى أَنَا، بْحَالْ إِلَا تّْوْلَدْتْ قْبَلْ مْنْ الْوَقْتْ.

⁹حِيتْ شَانِي صْغَرْ مْنْ شَانْ الرُّسُلْ وْمَا نْسْتَاهْلْشْ نْتّْسَمَّى رَسُولْ، عْلَاحْقَّاشْ كْنْتْ كَنْتّْعَدَّى عْلَى كْنِيسْةْ اللَّهْ.

¹⁰وَلَكِنْ بْالنِّعْمَة دْ اللَّهْ وْلِّيتْ فْهَادْشِّي اللِّي أَنَا فِيهْ دَابَا، وْالنِّعْمَة دْيَالُه اللِّي تّْعْطَاتْ لِيَّ مَا كَانْتْشْ بَاطْلْ، عْلَاحْقَّاشْ ضْرَبْتْ تَمَارَة كْتَرْ مْنّْهُمْ كَامْلِينْ. مَاشِي أَنَا اللِّي دْرْتْ هَادْشِّي، وَلَكِنْ نِعْمَةْ اللَّهْ هِيَ اللِّي كَتْخْدَمْ فِيَّ.

¹¹وْسْوَا أَنَا وْلَا هُمَ، رَاهْ هَكَّا كَنْخَبّْرُو بْالْبْشَارَة وْهَكَّا آمْنْتُو.

¹²وْإِلَا كَانْ الْمَسِيحْ اللِّي كَنْخَبّْرُو بِيهْ تّْبْعَتْ مْنْ الْمُوتْ، كِيفَاشْ شِي وْحْدِينْ مْنّْكُمْ كَيْݣُولُو: مَا كَايْنْشْ الْبَعْتْ مْنْ الْمُوتْ؟

¹³وْإِلَا الْبَعْتْ مْنْ الْمُوتْ مَا كَايْنْشْ، رَاهْ حْتَّى الْمَسِيحْ مَا تّْبْعَتْشْ مْنْ الْمُوتْ.

¹⁴وْإِلَا مَا كَانْشْ الْمَسِيحْ تّْبْعَتْ مْنْ الْمُوتْ، رَاهْ حْتَّى التّْبْشِيرْ دْيَالْنَا بَاطْلْ، وْحْتَّى إِيمَانْكُمْ بَاطْلْ.

¹⁵وْحْتَّى حْنَا غَنْكُونُو شْهُودْ دْ الزُّورْ عْلَى اللَّهْ، عْلَاحْقَّاشْ شْهَدْنَا عْلَى اللَّهْ بْلِّي بْعَتْ الْمَسِيحْ مْنْ الْمُوتْ اللِّي هُوَ مَا بْعْتُوشْ، إِلَا مَا كَانُوشْ الْمُوتَى كَيْتّْبَعْتُو مْنْ الْمُوتْ،

¹⁶حِيتْ إِلَا مَا كَانُوشْ الْمُوتَى كَيْتّْبَعْتُو مْنْ الْمُوتْ، رَاهْ حْتَّى الْمَسِيحْ مَا غَيْكُونْشْ تّْبْعَتْ مْنْ الْمُوتْ.

¹⁷وْإِلَا مَا تّْبْعَتْشْ الْمَسِيحْ، رَاهْ إِيمَانْكُمْ بَاطْلْ، وْرَاكُمْ بَاقْيِينْ فْدْنُوبْكُمْ.

¹⁸وْعْلَى هَادْ الْحْسَابْ حْتَّى هَادُوكْ اللِّي مَاتُو وْهُمَ مُومْنِينْ بْالْمَسِيحْ تّْهَلْكُو!

¹⁹وْكُونْ كَانْ عَنْدْنَا الرّْجَا فْالْمَسِيحْ غِيرْ فْهَادْ الْحَيَاةْ، كُونْ رَاهْ حْنَا مْتْعُوسِينْ كْتَرْ مْنْ ݣَاعْ النَّاسْ.

²⁰وَلَكِنْ فْالْحَقِيقَة، الْمَسِيحْ تّْبْعَتْ مْنْ بِينْ الْمُوتَى، وْهُوَ الْبْكَرْ بِينْ هَادُوكْ اللِّي مَاتُو.

²¹وْحِيتْ بْسْبَابْ إِنْسَانْ جَاتْ الْمُوتْ، هَكَّا حْتَّى الْبَعْتْ مْنْ الْمُوتْ جَا بْسْبَابْ إِنْسَانْ.

²²عْلَاحْقَّاشْ كِمَا غَيْمُوتْ كُلّْشِي فْآدَمْ، هَكَّا غَيْحْيَا كُلّْشِي فْالْمَسِيحْ،

²³وَلَكِنْ كُلّْ وَاحْدْ فْالْمَرْتَبَة دْيَالُه: الْمَسِيحْ هُوَ اللّْوّْلْ، وْمْنْ بَعْدْ الْمُومْنِينْ بِيهْ مْلِّي غَيْرْجَعْ.

²⁴وْمْنْ بَعْدْ هَادْشِّي غَيْجِي يُومْ الْآخِرَة، مْلِّي غَيْرَدّْ الْمَسِيحْ الْمُلْكْ لْلَّهْ الْآبْ، بَعْدْمَا يْغْلَبْ ݣَاعْ الرُّؤَسَا، وْݣَاعْ السُّلُطَاتْ، وْݣَاعْ الْقُوَّاتْ.

²⁵حِيتْ خَاصّْ الْمَسِيحْ يْمْلَكْ حْتَّى يْدِيرْ اللَّهْ عْدْيَانُه كُلّْهُمْ تَحْتْ رْجْلِيهْ.

²⁶وْالْعْدُو اللّْخْرَانِي اللِّي غَيْتّْغْلَبْ هُوَ الْمُوتْ.

²⁷حِيتْ كْتَابْ اللَّهْ كَيْݣُولْ: «اللَّهْ مْلَّكْ كُلّْشِي تَحْتْ رْجْلِيهْ». وْمْلِّي كَيْݣُولْ: «مْلَّكْ كُلّْشِي»، رَاهْ كَيْبَانْ بْلِّي كْلْمَةْ "كُلّْشِي" مَا دَاخَلْشْ فِيهَا اللَّهْ اللِّي مْلَّكْ الْمَسِيحْ عْلَى كُلّْشِي.

²⁸وَلَكِنْ مْلِّي غَيْكُونْ كُلّْشِي تَحْتْ رْجْلِيهْ، دِيكْ السَّاعَة الْوَلْدْ بْرَاسُه غَيْكُونْ خَاضْعْ لْلَّهْ اللِّي مَلّْكُه عْلَى كُلّْشِي، بَاشْ يْكُونْ اللَّهْ هُوَ اللِّي غَيْمْلَكْ عْلَى كُلّْشِي.

²⁹وْإِلَا كَانُو الْمُوتَى مَا كَيْتّْبَعْتُوشْ مْنْ الْمُوتْ، آشْ مْنْ فَايْدَة عَنْدْ هَادُوكْ اللِّي كَيْتّْعَمّْدُو عْلَى وْدّْ الْمُوتَى؟ وْعْلَاشْ كَيْتّْعَمّْدُو عْلَى وْدّْهُمْ؟

³⁰وْعْلَاشْ كَنْخَاطْرُو حْنَا بْحْيَاتْنَا كُلّْ سَاعَة؟

³¹رَاهْ كُلَّ نْهَارْ كَنْشُوفْ الْمُوتْ، وْأَنَا كَنْݣُولْ هَادْشِّي آ الْخُوتْ، حِيتْ كَنْفْتَخْرْ بِيكُمْ فْالْمَسِيحْ يَسُوعْ رَبّْنَا.

³²وْإِلَا أَنَا غِيرْ بْنَادْمْ وْتّْحَارْبْتْ مْعَ الْوْحُوشْ اللِّي فْأَفَسُسْ، آشْ مْنْ فَايْدَة عَنْدِي؟ وْإِلَا الْمُوتَى مَا كَيْتّْبَعْتُوشْ، خَلِّيوْنَا نَاكْلُو وْنْشَرْبُو حِيتْ غْدَّا غَنْمُوتُو.

³³مَا تْغَلْطُوشْ: «الْعْشْرَة الْفَاسْدَة كَتْفْسَدْ التَّرْبِيَّة الْمْزْيَانَة».

³⁴رْجْعُو لْلرّْزَانَة دْيَالْكُمْ وْمَا تْدَنْبُوشْ، حِيتْ كَايْنِينْ شِي وْحْدِينْ مَا كَيْعَرْفُوشْ اللَّهْ. كَنْݣُولْ لِيكُمْ هَادْشِّي بَاشْ نْحَشّْمْكُمْ.

³⁵وَلَكِنْ غَيْسْوّْلْ شِي حَدّْ: «كِيفَاشْ غَيْتّْبَعْتُو الْمُوتَى؟ وْبْآشْ مْنْ دَاتْ غَيْرْجْعُو؟».

³⁶آ الْحْمَقْ! رَاهْ الزّْرِّيعَة اللِّي كَتْزْرَعْهَا مَا غَتْحْيَاشْ إِلَا مَا مَاتْتْشْ.

³⁷وْرَاهْ دَاكْشِّي اللِّي كَتْزَرْعُه مَاشِي هُوَ النّْبْتَة اللِّي غَتْطْلَعْ مْنْ بَعْدْ، وَلَكِنْ هُوَ الزّْرِّيعَة اللِّي تْقْدَرْ تْكُونْ دْيَالْ الْݣْمْحْ وْلَا شِي زْرِّيعَة خْرَى،

³⁸وْاللَّهْ غَيْعْطِيهَا الدَّاتْ اللِّي بْغَا هُوَ، وْكُلّْ زْرِّيعَة غَيْعْطِيهَا دَاتْ خَاصَّة بِيهَا.

³⁹رَاهْ حْتَّى دَاتْ مَا كَتْشْبَهْ لْدَاتْ خْرَى، الدَّاتْ دْيَالْ بْنَادْمْ بُوحْدْهَا، وْالدَّاتْ دْيَالْ الْبْهَايْمْ بُوحْدْهَا، وْالدَّاتْ دْيَالْ الطّْيُورْ بُوحْدْهَا، وْالدَّاتْ دْيَالْ الْحُوتْ بُوحْدْهَا.

⁴⁰وْكَايْنَة الدَّاتْ دْيَالْ السّْمَا وْالدَّاتْ دْيَالْ الْأَرْضْ، وَلَكِنْ الزِّينْ دْيَالْ السّْمَا بُوحْدُه، وْالزِّينْ دْيَالْ الْأَرْضْ بُوحْدُه.

⁴¹الزِّينْ دْيَالْ الشّْمْسْ بُوحْدُه، وْالزِّينْ دْيَالْ الْقَمَرْ بُوحْدُه، وْالزِّينْ دْيَالْ النّْجُومْ بُوحْدُه، وْكُلّْ نْجْمَة زِينْهَا مْخْتَلْفْ عْلَى لْخْرَى.

⁴²وْهَكَّا حْتَّى فْالْبَعْتْ دْيَالْ الْمُوتَى: الدَّاتْ كَتّْزْرَعْ مْيّْتَة، وْمْنْ بَعْدْ كَتّْبْعَتْ حَيَّة.

⁴³كَتّْزْرَعْ بْلَا قِيمَة وْكَتّْبْعَتْ فْالْعَزّْ. كَتّْزْرَعْ ضْعِيفَة وْكَتّْبْعَتْ قْوِيَّة.

⁴⁴كَتّْزْرَعْ دَاتْ طَبِيعِيَّة وْكَتّْبْعَتْ دَاتْ رُوحِيَّة، وْكِمَا كَايْنَة دَاتْ طَبِيعِيَّة رَاهْ كَايْنَة دَاتْ رُوحِيَّة.

⁴⁵وْهَكَّا كَيْݣُولْ حْتَّى كْتَابْ اللَّهْ: «وْلَّى آدَمْ، بْنَادْمْ اللّْوّْلْ، دَاتْ حَيَّة». وْآدَمْ اللّْخْرْ رُوحْ كَيْعْطِي الْحَيَاةْ.

⁴⁶فْاللّْوّْلْ مَا كَانْشْ بْنَادْمْ الرُّوحِي، وَلَكِنْ كَانْ بْنَادْمْ الْأَرْضِي وْمْنْ بَعْدْ جَا الرُّوحِي.

⁴⁷بْنَادْمْ اللّْوّْلْ تّْصْنَعْ مْنْ تْرَابْ الْأَرْضْ، وْبْنَادْمْ التَّانِي جَا مْنْ السّْمَا.

⁴⁸كِمَا بْنَادْمْ اللِّي تّْصْنَعْ مْنْ التّْرَابْ هَكَّا حْتَّى اللِّي هُمَ مْنْ التّْرَابْ، وْكِمَا بْنَادْمْ اللِّي جَا مْنْ السّْمَا هَكَّا حْتَّى اللِّي هُمَ مْنْ السّْمَا.

⁴⁹وْكِمَا كْنَّا عْلَى صُورْةْ بْنَادْمْ اللِّي تّْصْنَعْ مْنْ التّْرَابْ، هَكَّا غَنْكُونُو حْتَّى عْلَى صُورْةْ بْنَادْمْ اللِّي جَا مْنْ السّْمَا.

⁵⁰رَانِي نْݣُولْ آ الْخُوتْ بْلِّي الدَّاتْ اللِّي مْنْ اللّْحَمْ وْالدّْمْ مَا يْمْكَنْشْ تْوَرْتْ مَمْلَكَةْ اللَّهْ، وْاللِّي غَيْفْنَى مَا يْمْكَنْشْ يْوْرَتْ اللِّي مَا غَيْفْنَاشْ.

⁵¹هَا هُوَ وَاحْدْ السِّرّْ غَنْݣُولُه لِيكُمْ: رَاهْ مَا غَنْمُوتُوشْ كُلّْنَا، وَلَكِنْ كُلّْنَا غَنْتّْبَدّْلُو،

⁵²وْدْغْيَا فْرَمْشَةْ عِينْ، مْلِّي غَيْتّْسْمَعْ الْبُوقْ اللّْخْرْ، حِيتْ غَيْتّْنْفَخْ فْالْبُوقْ، غَيْتّْبَعْتُو الْمُوتَى حَيِّينْ وْحْنَا غَنْتّْبَدّْلُو.

⁵³حِيتْ لَابْدّْ تْلْبَسْ الدَّاتْ الْفَانْيَة الدَّاتْ اللِّي مَا غَتْفْنَاشْ، وْتْلْبَسْ الدَّاتْ الْمْيّْتَة الدَّاتْ اللِّي مَا غَتْمُوتْشْ.

⁵⁴وْمْلِّي غَتْلْبَسْ الدَّاتْ الْفَانْيَة الدَّاتْ اللِّي مَا غَتْفْنَاشْ، وْتْلْبَسْ الدَّاتْ الْمْيّْتَة الدَّاتْ اللِّي مَا غَتْمُوتْشْ، دِيكْ السَّاعَة غَيْكْمَلْ الْكْلَامْ اللِّي جَا فْكْتَابْ اللَّهْ: «تّْهَلْكَاتْ الْمُوتْ وْكْمَلْ النّْصَرْ».

⁵⁵فِينْ هِيَ شُوكْتْكْ آ الْمُوتْ؟ وْفِينْ هُوَ النّْصَرْ دْيَالْكْ؟

⁵⁶رَاهْ شُوكْةْ الْمُوتْ هِيَ الدّْنُوبْ، وْالْقُوَّة دْ الدّْنُوبْ هِيَ الشّْرَعْ.

⁵⁷وَلَكِنْ كَنْشَكْرُو اللَّهْ اللِّي عْطَانَا النّْصَرْ بْرَبّْنَا يَسُوعْ الْمَسِيحْ.

⁵⁸إِيوَا آ خُوتِي الْعْزَازْ، كُونُو تَابْتِينْ وْمَا تّْزَعْزْعُوشْ، كَتّْرُو فْخْدْمَةْ الرَّبّْ فْكُلّْ وَقْتْ، وْرَاكُمْ كَتْعَرْفُو بْلِّي تَمَارَة دْيَالْكُمْ مَاشِي بَاطْلَة فْالرَّبّْ.