Read Moroccan Standard Translation كُورِنْتُوسْ اللّْوّْلَى 16 Bible Online

كُورِنْتُوسْ اللّْوّْلَى 16 - Moroccan Standard Translation bible

كُورِنْتُوسْ اللّْوّْلَى 16

¹الْفَصْلْ سْطَّاشْ أَمَّا مْنْ جِهْةْ الجّْمِيعْ دْيَالْ التَّبَرُّعَاتْ لْلْخُوتْ الْمْقَدّْسِينْ، دِيرُو حْتَّى نْتُمَ كِيفْ وْصِّيتْ الْكْنَايْسْ دْ غَلَاطِيَّة.

²فْالنّْهَارْ اللّْوّْلْ فْكُلّْ سِيمَانَة، كُلّْ وَاحْدْ مْنّْكُمْ خَاصُّه يْخَبِّي عَنْدُه دَاكْشِّي اللِّي وَفّْرْ مْنْ الرّْبَحْ دْيَالُه، بَاشْ مْلِّي نْجِي لْعَنْدْكُمْ مَا تْحْتَاجُوشْ عَادْ تْجَمْعُو التَّبَرُّعَاتْ.

³وْمْلِّي نْوْصَلْ، غَادِي نْصِيفْطْ هَادُوكْ اللِّي خْتَارِيتُوهُمْ، وْنْعْطِيهُمْ رَسَائِلْ بَاشْ يْدِّيوْ التَّبَرُّعَاتْ دْيَالْكُمْ لْأُورْشَلِيمْ.

⁴وْإِلَا كَانْ ضَرُورِي نْمْشِي حْتَّى أَنَا، رَاهْ غَيْمْشِيوْ مْعَايَ.

⁵وْغَادِي نْجِي لْعَنْدْكُمْ مْلِّي نْدُوزْ لْمَكِدُونِيَة حِيتْ أَنَا دَايْزْ لِيهَا.

⁶وْنْقْدَرْ نْبْقَى مْعَاكُمْ، وْلَا نْدَوّْزْ عَنْدْكُمْ الشّْتْوَا بَاشْ تْعَاوْنُونِي نْكَمّْلْ السّْفَرْ دْيَالِي.

⁷حِيتْ مَا بْغِيتْشْ نْشُوفْكُمْ دَابَا وْأَنَا دَايْزْ، وَلَكِنْ كَنْتّْمَنَّى نْبْقَى مْعَاكُمْ وَقْتْ طْوِيلْ إِلَا بْغَا الرَّبّْ.

⁸وْرَانِي غَنْبْقَى فْأَفَسُسْ حْتَّى لْيُومْ الْخَمْسِينْ،

⁹حِيتْ تّْحَلّْ لِيَّ بَابْ كْبِيرْ لْلْخْدْمَة، وْالنَّاسْ اللِّي كَيْضَادُّو كْتَارْ.

¹⁰وْإِلَا جَا تِيمُوتَاوُسْ، تّْهَلَّاوْ فِيهْ بَاشْ يْحَسّْ بْالْأَمَانْ مْعَاكُمْ، عْلَاحْقَّاشْ حْتَّى هُوَ كَيْخْدَمْ لْلرَّبّْ بْحَالِي.

¹¹مَا يْحْتَقْرُه حْتَّى وَاحْدْ، وَلَكِنْ عَاوْنُوهْ وْصِيفْطُوهْ عْلَى خِيرْ لْعَنْدِي، حِيتْ كَنْتّْسَنَّاهْ مْعَ الْخُوتْ.

¹²أَمَّا مْنْ جِهْةْ خُونَا أَبُلُّوسْ، رَانِي طْلَبْتُه بْزَّافْ بَاشْ يْجِي لْعَنْدْكُمْ مْعَ الْخُوتْ، وَلَكِنْ مَا بْغَاشْ يْجِي دَابَا، وْرَاهْ غَيْجِي مْلِّي تْكُونْ عَنْدُه شِي وْجْبَة.

¹³كُونُو عْلَى بَالْ وْتْبْتُو فْالْإِيمَانْ، كُونُو رْجَالْ وْكُونُو قْوِيِّينْ،

¹⁴دِيرُو كُلّْ حَاجَة بْالْمْحَبَّة.

¹⁵رَاكُمْ كَتْعَرْفُو بْلِّي عَائِلْةْ اسْتِفَانُوسْ هُمَ اللّْوّْلِينْ اللِّي آمْنُو بْالْمَسِيحْ فْأَخَائِيَة، وْعْطَاوْ حْيَاتْهُمْ بَاشْ يْخَدْمُو الْمُومْنِينْ. عْلِيهَا كَنْطْلَبْ مْنّْكُمْ آ الْخُوتْ،

¹⁶بَاشْ حْتَّى نْتُمَ تْطِيعُو اللِّي بْحَالْهُمْ، وْݣَاعْ اللِّي كَيْشَارْكُو مْعَاهُمْ فْالْخْدْمَة وْكَيْضْرَبُو مْعَاهُمْ تَمَارَة.

¹⁷رَانِي فْرَحْتْ بْالْمْجِي دْيَالْ اسْتِفَانُوسْ وْفُرْتُونَاتُوسْ وْأَخَائِيكُوسْ، عْلَاحْقَّاشْ هُمَ اللِّي نَابُو عْلِيكُمْ فْغْيَابْكُمْ،

¹⁸حِيتْ هْنَّاوْ خَاطْرِي وْخَاطْرْكُمْ، إِيوَا تّْهَلَّاوْ فْبْحَالْ هَادْ النَّاسْ.

¹⁹كَيْسَلّْمُو عْلِيكُمْ كْنَايْسْ آسْيَا، وْأَكِيلَا وْبِرِيسْكِلَّا كَيْسَلّْمُو عْلِيكُمْ بْزَّافْ فْالرَّبّْ مْعَ الْكْنِيسَة اللِّي كَتّْجْمَعْ فْدَارْهُمْ.

²⁰ݣَاعْ الْخُوتْ كَيْسَلّْمُو عْلِيكُمْ. سَلّْمُو عْلَى بْعْضِيَّاتْكُمْ بْبُوسَة مْقَدّْسَة.

²¹وْأَنَا بُولُسْ كَنْسَلّْمْ عْلِيكُمْ بْخَطّْ يْدِّي.

²²إِلَا كَانْ شِي وَاحْدْ مَا كَيْبْغِيشْ الرَّبّْ رَاهْ مْلْعُونْ! مَارَانْ أَتَا، آجِي يَا رَبّْنَا.

²³نِعْمَةْ الرَّبّْ يَسُوعْ تْكُونْ مْعَاكُمْ.

²⁴وْالْمْحَبَّة دْيَالِي لِيكُمْ كُلّْكُمْ فْالْمَسِيحْ يَسُوعْ.