Read Moroccan Standard Translation كُورِنْتُوسْ اللّْوّْلَى 2 Bible Online

كُورِنْتُوسْ اللّْوّْلَى 2 - Moroccan Standard Translation bible

كُورِنْتُوسْ اللّْوّْلَى 2

¹الْفَصْلْ التَّانِي وْأَنَا مْلِّي جِيتْ لْعَنْدْكُمْ آ الْخُوتْ بَاشْ نْخَبّْرْكُمْ بْسِرّْ اللَّهْ، مَا جِيتْشْ وْأَنَا كَنْتّْكَلّْمْ مْعَاكُمْ بْالْحْكْمَة وْلَا بْكْلَامْ مَا مْفْهُومْشْ.

²حِيتْ قَرّْرْتْ بَاشْ مَا نْعْرَفْ حْتَّى شِي حَاجَة بِينَاتْكُمْ، مْنْ غِيرْ يَسُوعْ الْمَسِيحْ اللِّي تّْصْلَبْ.

³وْمْلِّي جِيتْ لْعَنْدْكُمْ كْنْتْ كَنْحَسّْ بْالضُّعْفْ، وْالْخُوفْ، وْالرّْعْدَة الْكْتِيرَة،

⁴وْكْلَامِي وْالتّْبْشِيرْ دْيَالِي مَا كَانْشْ بْالْحْكْمَة دْيَالْ بْنَادْمْ، وَلَكِنْ بْالْبُرْهَانْ دْيَالْ قُوَّةْ رُوحْ اللَّهْ،

⁵بَاشْ مَا يْكُونْشْ إِيمَانْكُمْ مْبْنِي عْلَى حْكْمَةْ بْنَادْمْ، وَلَكِنْ يْكُونْ مْبْنِي عْلَى قُوَّةْ اللَّهْ.

⁶وَاخَّا هَكَّاكْ، رَاهْ كَنْتّْكَلّْمُو بْالْحْكْمَة بِينْ الْمُومْنِينْ اللِّي نَاضْجِينْ، مَاشِي بْحْكْمَةْ هَادْ الدّْنْيَا وْلَا بْحْكْمَةْ الرُّؤَسَا دْيَالْهَا اللِّي مَا دَايْمِينْشْ.

⁷وَلَكِنْ كَنْتّْكَلّْمُو بْحْكْمَةْ اللَّهْ اللِّي فْالسِّرْ. هَادِيكْ الْحْكْمَة اللِّي كَانْتْ مْخَبّْيَة، وْاللِّي وَجّْدْهَا لِينَا اللَّهْ مْنْ قْبَلْ مَا تّْخْلَقْ الدّْنْيَا عْلَى وْدّْ الْعَزّْ دْيَالْنَا،

⁸وْاللِّي مَا عْرَفْهَا حْتَّى وَاحْدْ مْنْ الرُّؤَسَا دْيَالْ هَادْ الدّْنْيَا، حِيتْ كُونْ عَرْفُوهَا، كُونْ مَا صْلْبُوشْ رَبّْ الْعَزّْ.

⁹وَلَكِنْ كِيفْ مْكْتُوبْ فْكْتَابْ اللَّهْ: «اللِّي مَا شَافْتُه عِينْ، وْمَا سْمْعَاتُه وْدَنْ، وْمَا جَا عْلَى بَالْ حْتَّى شِي إِنْسَانْ، هُوَ اللِّي وَجّْدُه اللَّهْ لْهَادُوكْ اللِّي كَيْبْغِيوْهْ».

¹⁰وْبَيّْنُه لِينَا اللَّهْ بْرُوحُه، حِيتْ رُوحْ اللَّهْ كَيْفْحَصْ كُلّْشِي حْتَّى أَعْمَاقْ اللَّهْ.

¹¹وْشْكُونْ اللِّي كَيْعْرَفْ آشْ كَايْنْ فْأَفْكَارْ بْنَادْمْ مْنْ غِيرْ الرُّوحْ اللِّي فِيهْ؟ هَكَّاكْ حْتَّى أُمُورْ اللَّهْ مَا كَيْعْرَفْهَا حَدّْ مْنْ غِيرْ رُوحْ اللَّهْ.

¹²وْرَاهْ حْنَا مَا خْدِينَاشْ الرُّوحْ دْيَالْ الدّْنْيَا، وَلَكِنْ خْدِينَا الرُّوحْ اللِّي مْنْ عَنْدْ اللَّهْ، بَاشْ نْعَرْفُو الْأُمُورْ اللِّي وْهَبْهَا لِينَا اللَّهْ،

¹³وْبْهَادْ الْأُمُورْ كَنْتّْكَلّْمُو، مَاشِي بْكْلَامْ كَتْعَلّْمُه الْحْكْمَة دْ بْنَادْمْ، وَلَكِنْ بْكْلَامْ كَيْعَلّْمُه الرُّوحْ الْقُدُسْ، وْكَنْشَرْحُو الْأُمُورْ الرُّوحِيَّة لْلنَّاسْ اللِّي عَنْدْهُمْ هَادْ الرُّوحْ.

¹⁴وَلَكِنْ النَّاسْ دْيَالْ الدّْنْيَا مَا كَيْقَبْلُوشْ دَاكْشِّي اللِّي مْنْ رُوحْ اللَّهْ حِيتْ كَيْحَسْبُوهْ حْمَاقْ، وْمَا يْقَدْرُوشْ يْفَهْمُوهْ عْلَاحْقَّاشْ مَا يْقَدْرُوشْ يْحَكْمُو فِيهْ مْنْ غِيرْ بْالرُّوحْ.

¹⁵وَلَكِنْ بْنَادْمْ اللِّي فِيهْ الرُّوحْ الْقُدُسْ كَيْحْكَمْ فْكُلّْشِي، وْهُوَ مَا كَيْحْكَمْ فِيهْ حَدّْ.

¹⁶وْكْتَابْ اللَّهْ كَيْݣُولْ: «شْكُونْ اللِّي عْرَفْ أَفْكَارْ الرَّبّْ؟ وْشْكُونْ غَيْقْدَرْ يْنَصْحُه؟». أَمَّا حْنَا رَاهْ عَنْدْنَا أَفْكَارْ الْمَسِيحْ.