Read Moroccan Standard Translation كُورِنْتُوسْ اللّْوّْلَى 3 Bible Online

كُورِنْتُوسْ اللّْوّْلَى 3 - Moroccan Standard Translation bible

كُورِنْتُوسْ اللّْوّْلَى 3

¹الْفَصْلْ التَّالْتْ وْرَانِي آ خُوتِي، مَا قْدَرْتْشْ نْتّْكَلّْمْ مْعَاكُمْ بْحَالْ النَّاسْ الرُّوحِيِّينْ، وَلَكِنْ بْحَالْ النَّاسْ دْيَالْ الدّْنْيَا، بْحَالْ الْوْلَادْ الصّْغَارْ فْالْمَسِيحْ.

²رَاهْ عْطِيتْكُمْ تْشَرْبُو الْحْلِيبْ مَاشِي الْمَاكْلَة دْ الْكْبَارْ، حِيتْ كْنْتُو مَازَالْ مَا قَادْرِينْشْ عْلِيهَا، وْحْتَّى دَابَا رَاكُمْ مَازَالْ مَا قَادْرِينْشْ.

³عْلَاحْقَّاشْ رَاكُمْ بَاقْيِينْ مْنْ النَّاسْ دْيَالْ الدّْنْيَا، وْبَاقِي بِينَاتْكُمْ الْحْسَدْ وْالْخْصَامْ. وَاشْ مَاشِي نْتُمَ بْحَالْ النَّاسْ دْيَالْ الدّْنْيَا وْكَتْدِيرُو بْحَالْهُمْ؟

⁴عْلَى مْلِّي كَيْݣُولْ شِي وَاحْدْ مْنّْكُمْ: «أَنَا دْيَالْ بُولُسْ»، وْلَاخُرْ «أَنَا دْيَالْ أَبُلُّوسْ». وَاشْ مَاشِي نْتُمَ بْحَالْ النَّاسْ دْيَالْ الدّْنْيَا؟

⁵شْكُونْ هُوَ بُولُسْ؟ وْشْكُونْ هُوَ أَبُلُّوسْ؟ رَاهُمْ غِيرْ خُدَّامْ وْبْسْبَابْهُمْ آمْنْتُو عْلَى قْدَرْ مَا عْطَى الرَّبّْ لْكُلّْ وَاحْدْ فِيهُمْ.

⁶أَنَا غْرَسْتْ وْأَبُلُّوسْ سْقَى، وَلَكِنْ اللَّهْ هُوَ اللِّي كَبّْرْ الْغَرْسْ.

⁷وْهَكَّا، رَاهْ مَا كَيْهَمّْ لَا اللِّي كَيْغْرَسْ وَلَا اللِّي كَيْسْقِي، وَلَكِنْ اللِّي مُهِمّْ هُوَ اللَّهْ اللِّي كَيْكَبّْرْ الْغَرْسْ.

⁸اللِّي كَيْغْرَسْ وْاللِّي كَيْسْقِي بْحَالْ بْحَالْ، وَلَكِنْ كُلّْ وَاحْدْ فِيهُمْ غَيَاخُدْ الْأَجْرْ دْيَالُه عْلَى حْسَابْ تَمَارَة دْيَالُه.

⁹حِيتْ حْنَا كَنْخَدْمُو مْعَ بْعْضِيَّاتْنَا خْدْمَةْ اللَّهْ، وْنْتُمَ الْفْدَّانْ دْيَالْ اللَّهْ وْالْبْنِي دْيَالُه.

¹⁰وْبْفْضَلْ النِّعْمَة اللِّي عْطَانِي اللَّهْ، حَطِّيتْ السَّاسْ بْحَالْ شِي مْعَلّْمْ دْ الْبْنَّايَا، وْوَاحْدْ آخُرْ كَيْبْنِي عْلِيهْ. وَلَكِنْ وَاجْبْ عْلَى كُلّْ وَاحْدْ يْرَدّْ الْبَالْ كِيفَاشْ يْبْنِي عْلِيهْ،

¹¹حْتَّى وَاحْدْ مَا يْقْدَرْ يْحَطّْ سَاسْ آخْرْ مْنْ غِيرْ السَّاسْ اللِّي تّْحَطّْ، اللِّي هُوَ يَسُوعْ الْمَسِيحْ.

¹²وَلَكِنْ إِلَا شِي حَدّْ بْنَى عْلَى هَادْ السَّاسْ بْالدّْهَبْ، وْلَا بْالْفْضَّة، وْلَا بْالْحْجَرْ الْغَالِي، وْلَا بْالْخْشَبْ، وْلَا بْالرّْبِيعْ الْيَابْسْ، وْلَا بْالتّْبَنْ،

¹³رَاهْ خْدَمْتُه غَتْبَانْ حِيتْ يُومْ الْحِسَابْ غَادِي يْبَيّْنْهَا، عْلَاحْقَّاشْ الْعَافْيَة غَتْبَيّْنْهَا وْغَتْبَيّْنْ الْقِيمَة دْ الْخْدْمَة دْيَالْ كُلّْ وَاحْدْ.

¹⁴إِلَا بْقَاتْ الْخْدْمَة اللِّي بْنَاهَا شِي حَدّْ عْلَى السَّاسْ، رَاهْ غَيَاخُدْ الْأَجْرْ دْيَالُه،

¹⁵وْإِلَا تّْحْرْقَاتْ الْخْدْمَة دْيَالْ شِي وَاحْدْ، رَاهْ غَيْخْسَرْ الْأَجْرْ دْيَالُه، أَمَّا هُوَ رَاهْ غَيْنْجَا وَلَكِنْ بْحَالْ إِلَا دَازْ مْنْ الْعَافْيَة.

¹⁶وَاشْ مَا كَتْعَرْفُوشْ بْلِّي نْتُمَ بِيتْ اللَّهْ، وْبْلِّي رُوحْ اللَّهْ كَيْسْكُنْ فِيكُمْ؟

¹⁷إِلَا شِي وَاحْدْ كَيْخَرّْبْ بِيتْ اللَّهْ، رَاهْ اللَّهْ غَادِي يْهَلْكُه، حِيتْ بِيتْ اللَّهْ مْقَدّْسْ، اللِّي هُوَ نْتُمَ.

¹⁸حْتَّى وَاحْدْ مْنّْكُمْ مَا يْخْدَعْ رَاسُه. وْإِلَا كَانْ شِي وَاحْدْ فِيكُمْ كَيْضَنّْ بْلِّي عَنْدُه الْحْكْمَة دْيَالْ هَادْ الدّْنْيَا، رَاهْ خَاصُّه يْوَلِّي حْمَقْ بَاشْ يْوَلِّي حْكِيمْ،

¹⁹حِيتْ الْحْكْمَة دْيَالْ هَادْ الدّْنْيَا حْمَاقْ بْالنّْسْبَة لْلَّهْ، عْلَاحْقَّاشْ مْكْتُوبْ فْكْتَابْ اللَّهْ: «غَيْحَصّْلْ الْحُكَمَا بْالْخْدِيعَة دْيَالْهُمْ».

²⁰وْكَيْݣُولْ عَاوْتَانِي: «الرَّبّْ كَيْعْرَفْ بْلِّي أَفْكَارْ الْحُكَمَا بَاطْلَة».

²¹عْلَى هَادْشِّي حْتَّى وَاحْدْ مَا خَاصُّه يْفْتَخْرْ بْبْنَادْمْ، حِيتْ كُلّْشِي دْيَالْكُمْ،

²²سْوَا بُولُسْ وْلَا أَبُلُّوسْ وْلَا صَفَا وْلَا الدّْنْيَا وْلَا الْحَيَاةْ وْلَا الْمُوتْ وْلَا الْحَاضْرْ وْلَا الْمُسْتَقْبَلْ: رَاهْ كُلّْشِي دْيَالْكُمْ،

²³وْنْتُمَ رَاكُمْ دْيَالْ الْمَسِيحْ، وْالْمَسِيحْ دْيَالْ اللَّهْ.