Read Moroccan Standard Translation كُورِنْتُوسْ اللّْوّْلَى 4 Bible Online

كُورِنْتُوسْ اللّْوّْلَى 4 - Moroccan Standard Translation bible

كُورِنْتُوسْ اللّْوّْلَى 4

¹الْفَصْلْ الرَّابْعْ وْهَكَّا، رَاهْ خَاصّْ النَّاسْ يْحَسْبُونَا خْدَّامِينْ لْلْمَسِيحْ وْمْكَلّْفِينْ بْأَسْرَارْ اللَّهْ.

²وْمْطْلُوبْ مْنْ الْمْكَلّْفِينْ يْكُونُو أُمَنَا.

³أَمَّا أَنَا مَا كَيْهَمّْنِيشْ إِلَا حْكَمْتُو عْلِيَّ نْتُمَ، وْلَا شِي مَحْكَمَة دْيَالْ الدّْنْيَا، وْرَاهْ أَنَا مَا كَنْحْكَمْشْ عْلَى رَاسِي،

⁴حِيتْ الضَّمِيرْ دْيَالِي مَا كَيْلُومْنِي حْتَّى فْشِي حَاجَة، وْهَادْشِّي مَا كَيْعْنِيشْ بْلِّي أَنَا بَارِي، وَلَكِنْ الرَّبّْ هُوَ اللِّي كَيْحْكَمْ عْلِيَّ.

⁵إِيوَا مَا تْحَكْمُوشْ عْلَى شِي حَدّْ قْبَلْ الْوَقْتْ، حْتَّى يْجِي الرَّبّْ اللِّي غَيْبَيّْنْ الْأُمُورْ الْمْخَبّْيَة فْالضّْلَامْ وْيْبَيّْنْ نِيّْةْ الْقْلُوبْ. دِيكْ السَّاعَة كُلّْ وَاحْدْ غَيَاخُدْ حَقُّه دْيَالْ الشُّكْرْ مْنْ اللَّهْ.

⁶وْرَاهْ آ الْخُوتْ سْبَقْتْ وْوَضّْحْتْ لِيكُمْ هَادْ الْأُمُورْ، وْكْنْتْ مْتَالْ أَنَا وْأَبُلُّوسْ عْلَى وْدّْكُمْ، بَاشْ تْتْعَلّْمُو مْنَّا وْمَا تْفَكّْرُوشْ فْكْتَرْ مْنْ دَاكْشِّي اللِّي مْكْتُوبْ، وْحْتَّى وَاحْدْ مَا يْتْكَبّْرْ عْلَى لَاخُرْ.

⁷حِيتْ شْكُونْ اللِّي مَيّْزْكْ نْتَ عْلَى لْخْرِينْ؟ وْأَشْنُو اللِّي مَا تّْعْطَاشْ لِيكْ مْنْ دَاكْشِّي اللِّي عَنْدْكْ؟ إِيوَا إِلَا تّْعْطَى لِيكْ، عْلَاشْ كَتّْكَبّْرْ بْحَالْ إِلَا مَا تّْعْطَى لِيكْ وَالُو؟

⁸وْدَابَا رَاكُمْ شْبَعْتُو وْدْرْتُو لَبَاسْ! وْوْلِّيتُو مُلُوكْ بْلَا بِينَا! مْصَّابْ كُونْ كْنْتُو بْالصَّحْ مُلُوكْ بَاشْ نْشَارْكُو مْعَاكُمْ حْتَّى حْنَا فْالْمُلْكْ!

⁹وْأَنَا كَنْشُوفْ بْلِّي حْنَا الرُّسُلْ دَارْنَا اللَّهْ فْاللّْخْرْ، بْحَالْ إِلَا مْحْكُومْ عْلِينَا بْالْمُوتْ. حِيتْ وْلِّينَا فْرَاجَة لْلدّْنْيَا وْلْلْمَلَايْكَة وْلْلنَّاسْ.

¹⁰حْنَا حْمَّاقْ عْلَى وْدّْ الْمَسِيحْ أَمَّا نْتُمَ حُكَمَا فْالْمَسِيحْ، حْنَا ضْعَافْ أَمَّا نْتُمَ قْوِيِّينْ، نْتُمَ عَنْدْكُمْ الْقِيمَة أَمَّا حْنَا مْحْݣُورِينْ!

¹¹وْحْتَّى لْدَابَا، رَاهْ حْنَا بَاقْيِينْ كَنْتّْمَحّْنُو بْالجُّوعْ، وْالْعْطَشْ، وْالْعْرَا، وْالضَّرْبْ، وْمَا عَنْدْنَا سُكْنَى،

¹²وْكَنْضَرْبُو تَمَارَة فْالْخْدْمَة بْيْدِّينَا، كَيْسَبُّونَا وْحْنَا كَنْبَارْكُوهُمْ، كَيْتّْعَدَّاوْ عْلِينَا وْحْنَا صَابْرِينْ،

¹³كَيْݣُولُو فِينَا كْلَامْ الْعِيبْ وْحْنَا كَنْجَاوْبُوهُمْ بْاللّْطَافَة، وْوْلِّينَا وْمَازَالْ حْتَّى لْدَابَا بْحَالْ الزّْبَلْ دْ الدّْنْيَا وْالْوْسَخْ دْيَالْ كُلّْشِي.

¹⁴مَا كَنْكْتَبْشْ لِيكُمْ هَادْشِّي بَاشْ نْحَشّْمْكُمْ، وَلَكِنْ بَاشْ نّْبّْهْكُمْ بْحَالْ وْلَادِي الْعْزَازْ.

¹⁵وْوَاخَّا يْكُونْ عَنْدْكُمْ عَشْرَلَافْ وَاحْدْ كَيْتّْكَلّْفُو بْالتَّعْلِيمْ دْيَالْكُمْ بْالْمَسِيحْ، رَاهْ مَا عَنْدْكُومْشْ بَّاوَاتْ كْتَارْ حِيتْ أَنَا اللِّي وَلْدْتْكُمْ فْالْمَسِيحْ يَسُوعْ بْالْإِنْجِيلْ.

¹⁶إِيوَا رَانِي كَنْطْلَبْ مْنّْكُمْ بَاشْ تْكُونُو بْحَالِي.

¹⁷وْعْلَى هَادْشِّي صِيفْطْتْ لِيكُمْ تِيمُوتَاوُسْ وْلْدِي الْحْبِيبْ الْأَمِينْ فْالرَّبّْ، بَاشْ يْفَكّْرْكُمْ بْالْحَيَاةْ دْيَالِي فْالْمَسِيحْ يَسُوعْ كِيفْ كَنْعَلّْمْهَا فْكُلّْ مُوضْعْ وْفْݣَاعْ الْكْنَايْسْ.

¹⁸وْرَاهْ شِي وْحْدِينْ مْنّْكُمْ ضْنُّو بْلِّي مَا غَادِيشْ نْجِي لْعَنْدْكُمْ وْتّْنَفْخُو بْالْكِبْرْ دْيَالْهُمْ،

¹⁹وَلَكِنْ غَنْجِي لْعَنْدْكُمْ فْقْرِيبْ إِلَا بْغَا الرَّبّْ، مَاشِي بَاشْ نْعْرَفْ آشْ كَيْݣُولُو هَادُوكْ الْمْتْكَبّْرِينْ، وَلَكِنْ بَاشْ نْعْرَفْ عْلَاشْ قَادْرِينْ.

²⁰حِيتْ مَمْلَكَةْ اللَّهْ مَاشِي غِيرْ بْالْهَضْرَة، وَلَكِنْ بْالْقُوَّة دْ الْأَعْمَالْ.

²¹آشْ كَتْفَضّْلُو؟ نْجِي لْعَنْدْكُمْ بْالْعْصَا، وْلَا بْالْمْحَبَّة وْرُوحْ الضّْرَافَة؟