Read Moroccan Standard Translation كُورِنْتُوسْ اللّْوّْلَى 6 Bible Online

كُورِنْتُوسْ اللّْوّْلَى 6 - Moroccan Standard Translation bible

كُورِنْتُوسْ اللّْوّْلَى 6

¹الْفَصْلْ السَّادْسْ وَاشْ يْقْدَرْ شِي وَاحْدْ مْنّْكُمْ يْدْعِي وَاحْدْ آخْرْ عَنْدْ الْحُكَّامْ اللِّي مَاشِي مُومْنِينْ، فْعُوضْ مَا يْمْشِي عَنْدْ الْمُومْنِينْ؟

²وَاشْ مَا كَتْعَرْفُوشْ بْلِّي الْمُومْنِينْ غَيْحَكْمُو عْلَى هَادْ الدّْنْيَا؟ وْإِلَا كْنْتُو نْتُمَ اللِّي غَتْحَكْمُو عْلَى الدّْنْيَا، وَاشْ مَا تْقَدْرُوشْ تْحَكْمُو فْالدّْعَاوِي الصّْغَارْ؟

³وَاشْ مَا كَتْعَرْفُوشْ بْلِّي حْنَا اللِّي غَادِي نْحَكْمُو عْلَى الْمَلَايْكَة؟ وْعْسَّاكْ الْأُمُورْ دْيَالْ هَادْ الدّْنْيَا.

⁴إِيوَا إِلَا كَانْتْ عَنْدْكُمْ شِي دْعَاوِي فْالْأُمُورْ دْيَالْ هَادْ الدّْنْيَا، وَاشْ غَتْقَدّْمُوهَا لْلْقُضَاةْ اللِّي مَا عَنْدْهُمْ قِيمَة عَنْدْ الْكْنِيسَة؟

⁵كَنْݣُولْ لِيكُمْ هَادْشِّي بَاشْ نْحَشّْمْكُمْ! وَاشْ مَا كَايْنْ فِيكُمْ حْتَّى شِي وَاحْدْ حْكِيمْ اللِّي يْقْدَرْ يْحْكَمْ بِينْ خُوتُه؟

⁶وَاشْ الْخُو كَيْحَاكْمْ خُوهْ عَنْدْ الْحُكَّامْ اللِّي مَاشِي مُومْنِينْ؟

⁷رَاهْ الْعِيبْ دْيَالْكُمْ كْبِيرْ، حِيتْ عَنْدْكُمْ شِي دْعَاوِي مْعَ بْعْضِيَّاتْكُمْ، عْلَاشْ مَا كَتْصَبْرُوشْ لْلضُّلْمْ؟ عْلَاشْ مَا كَتْقَبْلُوشْ يْتّْخَادْ لِيكُمْ حَقّْكُمْ؟

⁸وَلَكِنْ نْتُمَ كَتْضَلْمُو وْكَتَاخْدُو حَقّْ لْخْرِينْ، وْبْالْخُصُوصْ خُوتْكُمْ الْمُومْنِينْ!

⁹وَاشْ مَا كَتْعَرْفُوشْ بْلِّي الضَّالْمِينْ مَا غَيْوَرْتُوشْ مَمْلَكَةْ اللَّهْ؟ إِيوَا مَا تْغَلّْطُوشْ رَاسْكُمْ، رَاهْ لَا اللِّي كَيْزْنِيوْ، وَلَا اللِّي كَيْعَبْدُو الْأَصْنَامْ، وَلَا اللِّي كَيْفَسْدُو، وَلَا الْعْيَالَاتْ اللِّي كَيْفَسْدُو مْعَ بْعْضِيَّاتْهُمْ، وَلَا الرّْجَالْ اللِّي كَيْفَسْدُو مْعَ بْعْضِيَّاتْهُمْ،

¹⁰وَلَا الشّْفَارَا، وَلَا الطّْمَّاعَا، وَلَا السّْكَايْرِيَة، وَلَا اللِّي كَيْسَبُّو، وَلَا الْخْطَّافَا، حْتَّى وَاحْدْ فِيهُمْ مَا غَيْوْرَتْ مَمْلَكَةْ اللَّهْ.

¹¹وْبْحَالْ هَكَّا كَانُو شِي وْحْدِينْ مْنّْكُمْ. وَلَكِنْ رَاكُمْ تّْغْسَلْتُو وْتّْقَدّْسْتُو، وْوْلِّيتُو مْقْبُولِينْ عَنْدْ اللَّهْ بْإِسْمْ الرَّبّْ يَسُوعْ الْمَسِيحْ وْبْالرُّوحْ دْيَالْ إِلَاهْنَا.

¹²«كُلّْشِي حْلَالْ لِيَّ»، وَلَكِنْ مَاشِي كُلّْشِي كَيْنْفَعْ. «كُلّْشِي حْلَالْ لِيَّ»، وَلَكِنْ مَا غَنْخَلِّي حْتَّى حَاجَة تْتْحَكّْمْ فِيَّ.

¹³الْمَاكْلَة لْلْكَرْشْ وْالْكَرْشْ لْلْمَاكْلَة، وْاللَّهْ غَيْهْلَكْ هَادِي وْهَادِيكْ بْجُوجْ. وَلَكِنْ الدَّاتْ مَاشِي دْيَالْ الْفْسَادْ، رَاهَا لْلرَّبّْ وْالرَّبّْ لْلدَّاتْ.

¹⁴وْاللَّهْ اللِّي بْعَتْ الرَّبّْ يَسُوعْ مْنْ الْمُوتْ غَيْبْعَتْنَا حْتَّى حْنَا بْالْقُوَّة دْيَالُه.

¹⁵وَاشْ مَا كَتْعَرْفُوشْ بْلِّي الدَّاتْ دْيَالْكُمْ هِيَ طَرْفْ فْالدَّاتْ دْ الْمَسِيحْ؟ وَاشْ نْقْدَرْ نَاخُدْ الطّْرَافْ دْيَالْ الدَّاتْ دْ الْمَسِيحْ وْنْرَدّْهُمْ طْرَافْ فْالدَّاتْ دْيَالْ شِي وْحْدَة فَاسْدَة؟ حَاشَا!

¹⁶وَاشْ مَا كَتْعَرْفُوشْ بْلِّي اللِّي عَاشْرْ شِي وْحْدَة فَاسْدَة غَيْوَلِّي هُوَ وْيَّاهَا دَاتْ وَحْدَة؟ حِيتْ كْتَابْ اللَّهْ كَيْݣُولْ: «غَيْوَلِّيوْ بْجُوجْ، دَاتْ وَحْدَة».

¹⁷أَمَّا اللِّي كَيْتَّاحْدْ مْعَ الرَّبّْ رَاهْ كَيْوَلِّي هُوَ وْيَّاهْ رُوحْ وَاحْدْ.

¹⁸بَعّْدُو عْلَى الْفْسَادْ. كُلّْ دَنْبْ كَيْدِيرُه بْنَادْمْ رَاهْ مَا مْحْسُوبْشْ عْلَى دَاتُه، وَلَكِنْ اللِّي كَيْفْسَدْ رَاهْ كَيْدْنَبْ فْحَقّْ دَاتُه.

¹⁹وَاشْ مَا كَتْعَرْفُوشْ بْلِّي الدَّاتْ دْيَالْكُمْ هِيَ السُّكْنَى دْيَالْ الرُّوحْ الْقُدُسْ اللِّي فِيكُمْ، وْاللِّي عْطَاهْ لِيكُمْ اللَّهْ. وْنْتُمَ رَاهْ مَاشِي دْيَالْ رْيُوسْكُمْ،

²⁰حِيتْ تّْشْرِيتُو بْالتَّمَنْ. إِيوَا عْطِيوْ الْعَزّْ لْلَّهْ بْالدَّاتْ دْيَالْكُمْ.