Read Moroccan Standard Translation كُورِنْتُوسْ اللّْوّْلَى 8 Bible Online

كُورِنْتُوسْ اللّْوّْلَى 8 - Moroccan Standard Translation bible

كُورِنْتُوسْ اللّْوّْلَى 8

¹الْفَصْلْ التَّامْنْ أَمَّا مْنْ جِهْةْ الدّْبَايْحْ اللِّي كَيْتّْقَدّْمُو لْلْأَصْنَامْ، رَاهْ كُلّْنَا كَنْعَرْفُو عْلَى هَادْ الْأُمُورْ، وْالْمَعْرِفَة كَتْخَلِّي الْوَاحْدْ يْتّْنْفَخْ بْالْكِبْرْ، وَلَكِنْ الْمْحَبَّة رَاهَا كَتْبْنِي.

²وْإِلَا كَانْ شِي وَاحْدْ كَيْضَنّْ بْلِّي كَيْعْرَفْ شِي حَاجَة، رَاهْ هُوَ مَا كَيْعْرَفْ وَالُو كِيفْ خَاصُّه يْعْرَفْ.

³وَلَكِنْ اللِّي كَيْبْغِي اللَّهْ رَاهْ اللَّهْ كَيْعَرْفُه.

⁴وْمْنْ جِهْةْ مَاكْلَةْ الدّْبَايْحْ اللِّي كَيْتّْقَدّْمُو لْلْأَصْنَامْ، رَاهْ حْنَا كَنْعَرْفُو بْلِّي الصَّنَمْ مَا كَايْنْشْ فْهَادْ الدّْنْيَا، وْمَا كَايْنْشْ شِي إِلَاهْ مْنْ غِيرْ إِلَاهْ وَاحْدْ.

⁵حِيتْ وَاخَّا يْكُونُو فْالسّْمَا وْفْالْأَرْضْ بْزَّافْ دْ الْحْوَايْجْ اللِّي كَيْتّْسْمَّاوْ إِلَاهَاتْ، كِمَا كَايْنِينْ بْزَّافْ دْ الْإِلَاهَاتْ وْبْزَّافْ دْ الْأَرْبَابْ،

⁶رَاهْ عَنْدْنَا إِلَاهْ وَاحْدْ هُوَ الْآبْ، اللِّي مْنُّه تّْخْلَقْ كُلّْشِي وْلِيهْ كَنْحْيَاوْ، وْعَنْدْنَا رَبّْ وَاحْدْ هُوَ يَسُوعْ الْمَسِيحْ، اللِّي بِيهْ تّْخْلَقْ كُلّْشِي وْبِيهْ كَنْحْيَاوْ.

⁷هَادْ الْحَقِيقَة مَاشِي ݣَاعْ النَّاسْ كَيْعَرْفُوهَا، شِي وْحْدِينْ مَازَالْ مُّولْفِينْ الْأَصْنَامْ وْكَيَاكْلُو مْنْ الدّْبَايْحْ بْحَالْ إِلَا رَاهَا مْقَدّْمَة لْلْأَصْنَامْ، وْحِيتْ الضَّمِيرْ دْيَالْهُمْ ضْعِيفْ، كَيْوَلِّي مْنْجُوسْ.

⁸وَلَكِنْ رَاهْ مَاشِي الْمَاكْلَة هِيَ اللِّي كَتْقَرّْبْنَا لْلَّهْ، حِيتْ إِلَا كْلِينَا مَا غَنْزِيدُوشْ وْإِلَا مَا كْلِينَاشْ مَا غَنْقْصُوشْ.

⁹رْدُّو الْبَالْ بَاشْ مَا تْكُونْشْ هَادْ الْحُرِّيَّة دْيَالْكُمْ عَتْرَة لْلنَّاسْ الضّْعَافْ.

¹⁰حِيتْ إِلَا شَافْكْ شِي وَاحْدْ آ اللِّي فَاهْمْ فْهَادْ الْأُمُورْ، فْدَارْ الْعِبَادَة دْيَالْ الصَّنَمْ، وَاشْ مَا غَيْتّْشَجّْعْشْ هُوَ اللِّي الضَّمِيرْ دْيَالُه ضْعِيفْ، وْغَيْݣْلَسْ يَاكُلْ مْنْ الدّْبِيحَة اللِّي كَتّْقَدّْمْ لْلْأَصْنَامْ؟

¹¹وْغَتْكُونْ الْمَعْرِفَة دْيَالْكْ هِيَ السَّبَبْ فْهْلَاكْ هَادْ بْنَادْمْ الضّْعِيفْ، اللِّي هُوَ خُوكْ وْالْمَسِيحْ مَاتْ عْلَى وْدُّه.

¹²وْهَكَّا رَاهْ مْلِّي كَتْدَنْبُو فْحَقّْ خُوتْكُمْ الْمُومْنِينْ، وْكَتْجَرْحُو الضَّمِيرْ دْيَالْهُمْ الضّْعِيفْ، رَاكُمْ كَتْدَنْبُو فْحَقّْ الْمَسِيحْ.

¹³وْهَادَا عْلَاشْ إِلَا كَانْ شِي نُوعْ دْ الْمَاكْلَة هُوَ اللِّي غَيْطِيّْحْ خُويَا فْالدَّنْبْ، رَاهْ عَمّْرْنِي مَا غَنَاكُلْ اللّْحَمْ بَاشْ مَا نْخَلِّيشْ خُويَا يْطِيحْ فْالدَّنْبْ.