Read Moroccan Standard Translation كُورِنْتُوسْ اللّْوّْلَى 9 Bible Online

كُورِنْتُوسْ اللّْوّْلَى 9 - Moroccan Standard Translation bible

كُورِنْتُوسْ اللّْوّْلَى 9

¹الْفَصْلْ التَّاسْعْ وَاشْ أَنَا مَاشِي حُرّْ؟ وَاشْ أَنَا مَاشِي رَسُولْ؟ وَاشْ مَا شْفْتْشْ يَسُوعْ رَبّْنَا؟ وَاشْ مَاشِي نْتُمَ الْغْلَّة دْ الْخْدْمَة دْيَالِي فْالرَّبّْ؟

²إِلَا مَا كَنْتْشْ رَسُولْ لْلنَّاسْ لْخْرِينْ رَانِي رَسُولْ لِيكُمْ نْتُمَ، حِيتْ نْتُمَ اللِّي كَتْبَيّْنُو بْلِّي أَنَا رَسُولْ فْالرَّبّْ.

³وْهَادِي هِيَ الْحُجَّة دْيَالِي لْهَادُوكْ اللِّي كَيْحَاسْبُونِي:

⁴وَاشْ مَا عَنْدْنَاشْ الْحَقّْ نَاكْلُو وْنْشَرْبُو؟

⁵وَاشْ مَا عَنْدْنَاشْ الْحَقّْ نْتّْزَوْجُو شِي أُخْتْ مُومْنَة بَاشْ تْمْشِي مْعَانَا فْالسّْفَرْ، كِيفْ كَيْدِيرُو الرُّسُلْ لْخْرِينْ وْخُوتْ رَبّْنَا يَسُوعْ وْصَفَا؟

⁶وْلَا غِيرْ أَنَا وْبَرْنَابَا اللِّي خَاصّْنَا نْكَسْبُو رْزَقْنَا مْنْ خْدْمَةْ يْدِّينَا؟

⁷فِينْ عَمّْرْ شِي وَاحْدْ دْخَلْ لْلْعَسْكَرْ عْلَى حْسَابُه؟ وْفِينْ عَمّْرْ شِي وَاحْدْ غْرَسْ الدَّالْيَة وْمَا كْلَاشْ مْنْ غَلّْتْهَا؟ وْلَا فِينْ عَمّْرْ شِي وَاحْدْ سْرَحْ شِي قْطْعَة وْمَا شْرَبْشْ مْنْ حْلِيبْهَا؟

⁸وَاشْ كَتْضَنُّو بْلِّي أَنَا كَنْتّْكَلّْمْ عْلَى هَادْ الْأُمُورْ بْالْمَنْطِقْ دْيَالِي؟ وَاشْ مَا كَيْݣُولْشْ الشّْرَعْ حْتَّى هُوَ هَادْ الْأُمُورْ؟

⁹رَاهْ مْكْتُوبْ فْشْرَعْ مُوسَى: «مَا تْدِيرْشْ الْكْمَامَة عْلَى فُمّْ التُّورْ وْهُوَ كَيْدْرَسْ». وَاشْ اللَّهْ كَيْهَمُّوهْ التِّيرَانْ؟

¹⁰وْلَا كَيْݣُولْ هَادْشِّي كُلُّه عْلَى وْدّْنَا؟ إِيِّهْ، رَاهْ تّْكْتَبْ عْلَى وْدّْنَا. عْلَاحْقَّاشْ خَاصّْ اللِّي كَيْحْرَتْ وْاللِّي كَيْدْرَسْ يْكُونْ عَنْدْهُمْ الرّْجَا بْلِّي كُلّْ وَاحْدْ غَيَاخُدْ حَقُّه.

¹¹إِيوَا إِلَا كْنَّا حْنَا زْرَعْنَا فِيكُمْ الْأُمُورْ الرُّوحِيَّة، وَاشْ بْزَّافْ عْلِينَا إِلَا حْصَدْنَا مْنّْكُمْ الْأُمُورْ الْمَادِيَّة؟

¹²وْإِلَا كَانُو شِي وْحْدِينْ خْرِينْ عَنْدْهُمْ الْحَقّْ فِيكُمْ، وَاشْ مَاشِي حْنَا أَوْلَى مْنّْهُمْ؟ وَلَكِنْ حْنَا مَا طْلَبْنَاشْ هَادْ الْحَقّْ، وْصْبَرْنَا عْلَى كُلّْشِي بَاشْ مَا نْكُونُوشْ عَتْرَة لْإِنْجِيلْ الْمَسِيحْ.

¹³وَاشْ مَا كَتْعَرْفُوشْ بْلِّي هَادُوكْ اللِّي كَانُو كَيْخَدْمُو فْبِيتْ اللَّهْ، كَانُو كَيَاكْلُو مْنْ دَاكْشِّي اللِّي كَيْتّْقَدّْمْ فْبِيتْ اللَّهْ، وْهَادُوكْ اللِّي كَانُو كَيْخَدْمُو فْالْمَدْبَحْ كَانُو كَيَاخْدُو حَقّْهُمْ مْنْ دَاكْشِّي اللِّي كَيْتّْقَدّْمْ فْالْمَدْبَحْ.

¹⁴إِيوَا رَاهْ هَكَّا آمْرْ الرَّبّْ بَاشْ حْتَّى اللِّي كَيْخَبّْرُو بْالْإِنْجِيلْ يْعِيشُو مْنْ الْإِنْجِيلْ.

¹⁵وَلَكِنْ أَنَا عَمّْرِي مَا سْتَافْدْتْ مْنْ هَادْ الْأُمُورْ، وْمَا كَنْكْتَبْشْ هَادْشِّي بَاشْ نْطْلَبْ شِي حَاجَة، حِيتْ خْيَرْ لِيَّ نْمُوتْ وَلَا يْحْرَمْنِي شِي حَدّْ مْنْ هَادْ الْإِفْتِخَارْ.

¹⁶إِلَا كَنْخَبّْرْ بْالْإِنْجِيلْ رَاهْ مَا عَنْدِي عْلَاشْ نْفْتَخْرْ، حِيتْ هَادْشِّي وَاجْبْ وْمْفْرُوضْ عْلِيَّ، وْيَا وِيلِي إِلَا مَا كَنْخَبّْرْشْ بْالْإِنْجِيلْ!

¹⁷حِيتْ كُونْ كْنْتْ كَنْدِيرْ هَادْ الْخْدْمَة بْخَاطْرِي، غَيْخَصّْنِي نْتّْخَلّْصْ، وَلَكِنْ إِلَا مَا كَنْدِيرْهَاشْ بْخَاطْرِي، رَاهْ هِيَ مْسْؤُولِيَة أَمّْنِّي عْلِيهَا الرَّبّْ،

¹⁸وْأَشْنُو هِيَ الْأُجْرَة دْيَالِي؟ هِيَ نْخَبّْرْ بْالْإِنْجِيلْ بْلَا خْلَاصْ، وْبْلَا مَا نْطْلَبْ الْحَقّْ دْيَالِي اللِّي عْطَاهْ لِيَّ الْإِنْجِيلْ فْخْدَمْتِي.

¹⁹أَنَا حُرّْ وْمَا عَبْدْ لْحَدّْ، وَلَكِنْ وْلِّيتْ عَبْدْ لْكُلّْ وَاحْدْ بَاشْ نْرْبَحْ بْزَّافْ دْ النَّاسْ.

²⁰وْوْلِّيتْ عَنْدْ لِيهُودْ بْحَالْ شِي يْهُودِي بَاشْ نْرْبَحْهُمْ، وْوْلِّيتْ عَنْدْ النَّاسْ اللِّي تَحْتْ الشّْرَعْ بْحَالْ إِلَا أَنَا تَحْتْ الشّْرَعْ وَاخَّا أَنَا مَاشِي تَحْتْ الشّْرَعْ بَاشْ نْرْبَحْهُمْ،

²¹وْعَنْدْ اللِّي مَا عَنْدْهُمْ شْرَعْ بْحَالْ إِلَا مَا عَنْدِي شْرَعْ بَاشْ نْرْبَحْهُمْ، وَاخَّا عَنْدِي الشّْرَعْ دْيَالِي مْنْ اللَّهْ وْأَنَا تَحْتْ شْرَعْ الْمَسِيحْ،

²²وْوْلِّيتْ عَنْدْ الضّْعَافْ فْالْإِيمَانْ بْحَالْ إِلَا ضْعِيفْ بَاشْ نْرْبَحْهُمْ، وْوْلِّيتْ لْݣَاعْ النَّاسْ كُلّْ حَاجَة بَاشْ نْجِّي شِي وْحْدِينْ مْنّْهُمْ كِمَا كَانْ الْحَالْ.

²³وْهَادْشِّي كُلُّه رَاهْ كَنْدِيرُه عْلَى وْدّْ الْإِنْجِيلْ بَاشْ نْكُونْ مْشَارْكْ فْالْبَرَكَاتْ دْيَالُه.

²⁴وَاشْ مَا كَتْعَرْفُوشْ بْلِّي اللِّي كَيْتّْسَابْقُو فْالجّْرِي كُلّْهُمْ كَيْجْرِيوْ، وَلَكِنْ وَاحْدْ مْنّْهُمْ هُوَ اللِّي كَيْرْبَحْ الْجَائِزَة؟ إِيوَا جْرِيوْ حْتَّى نْتُمَ بَاشْ تْرَبْحُو!

²⁵وْرَاهْ ݣَاعْ اللِّي كَيْتّْسَابْقُو، كَيْتّْدَرّْبُو مْزْيَانْ بَاشْ يْرَبْحُو الْمِيدَالِيَّاتْ اللِّي كَيْفْنَاوْ وَلَكِنْ مِيدَالِيَّاتْنَا حْنَا مَا كَيْفْنَاوْشْ.

²⁶وْهَكَّا، رَانِي مَا كَنْجْرِيشْ بْلَا مَا نْعْرَفْ فِينْ غَادِي، وْمَا كَنْضْرَبْشْ قُدَّامِي بْحَالْ هَادَاكْ اللِّي كَيْضْرَبْ فْالْهْوَا،

²⁷وْكَنْقْهَرْ الدَّاتْ دْيَالِي وْكَنْغْلَبْ عْلِيهَا بَاشْ مَا نْخْسَرْشْ رَاسِي بَعْدْمَا خَبّْرْتْ النَّاسْ لْخْرِينْ بْالْإِنْجِيلْ.