Read Moroccan Standard Translation كُورِنْتُوسْ التَّانِيَّة 1 Bible Online

كُورِنْتُوسْ التَّانِيَّة 1 - Moroccan Standard Translation bible

كُورِنْتُوسْ التَّانِيَّة 1

¹الْفَصْلْ اللّْوّْلْ مْنْ بُولُسْ رَسُولْ الْمَسِيحْ يَسُوعْ بْمُرَادْ اللَّهْ، وْمْنْ تِيمُوتَاوُسْ خُونَا فْالْإِيمَانْ، لْكْنِيسْةْ اللَّهْ اللِّي فْكُورِنْتُوسْ، وْلْݣَاعْ الْمُومْنِينْ الْمْقَدّْسِينْ اللِّي فْأَخَائِيَة كُلّْهَا،

²النِّعْمَة وْالْهْنَا مْنْ اللَّهْ بَّانَا وْالرَّبّْ يَسُوعْ الْمَسِيحْ لِيكُمْ.

³يْتْبَارْكْ اللَّهْ بُو رَبّْنَا يَسُوعْ الْمَسِيحْ، الْآبْ الرّْحِيمْ وْالْإِلَاهْ دْيَالْ التَّشْجِيعْ،

⁴حِيتْ هُوَ اللِّي كَيْشَجّْعْنَا فْكُلّْ مْحْنَة، بَاشْ نْقَدْرُو نْشَجّْعُو اللِّي كَيْدُوزُو فْأَيّْ مْحْنَة بْالتَّشْجِيعْ اللِّي خْدِينَاهْ مْنْ عَنْدُه.

⁵عْلَاحْقَّاشْ كِمَا كَنْقَاسِيوْ الْعْدَابْ عْلَى وْدّْ الْإِيمَانْ بْالْمَسِيحْ، هَكَّاكْ بْالْمَسِيحْ كَنْتّْشَجّْعُو بْزَّافْ.

⁶إِيوَا إِلَا كْنَّا فْالْمْحْنَة، رَاهْ هَادْشِّي لْلتَّشْجِيعْ وْالنّْجَا دْيَالْكُمْ، وْإِلَا تّْشَجّْعْنَا رَاهْ هَادْشِّي لْلتَّشْجِيعْ دْيَالْكُمْ، اللِّي كَيْدِيرْ فِيكُمْ الصّْبَرْ بَاشْ تْتْحَمّْلُو الْعْدَابْ اللِّي تْعَدّْبْنَاهْ حْتَّى حْنَا.

⁷وْرَاهْ رْجَانَا فِيكُمْ تَابْتْ، حِيتْ كَنْعَرْفُو بْلِّي كِمَا كَتْشَارْكُونَا فْالْعْدَابْ، كَتْشَارْكُونَا حْتَّى فْالتَّشْجِيعْ.

⁸وْبْغِينَاكُمْ آ الْخُوتْ تْعَرْفُو الْمْحَايْنْ اللِّي دَازْتْ عْلِينَا فْبْلَادْ آسْيَا، وْاللِّي كَانْتْ قَاسْحَة بْزَّافْ وْكْتَرْ مْنْ جَهْدْنَا، حْتَّى مَا بْقَاشْ عَنْدْنَا الرّْجَا بْلِّي غَنْعِيشُو.

⁹وْكْتَرْ مْنْ هَكَّا، حْسِّينَا بْلِّي مْحْكُومْ عْلِينَا بْالْمُوتْ، بَاشْ مَا نْتّْكْلُوشْ عْلَى رَاسْنَا، وَلَكِنْ عْلَى اللَّهْ اللِّي كَيْحْيِي الْمُوتَى.

¹⁰وْهُوَ اللِّي نْجَّانَا مْنْ هَادْ الْمُوتْ وْغَيْنَجِّينَا، وْفِيهْ عَنْدْنَا الرّْجَا بْلِّي غَيْعَاوْدْ يْنَجِّينَا مْنْ بَعْدْ.

¹¹إِيوَا عَاوْنُونَا حْتَّى نْتُمَ بْالصّْلَاة دْيَالْكُمْ، حِيتْ الْبَرَكَاتْ اللِّي تّْعْطَاوْنَا هُمَ جْوَابْ الصّْلَاة دْيَالْ بْزَّافْ دْ النَّاسْ، وْهَادْشِّي كَيْخَلِّي بْزَّافْ دْ النَّاسْ يْشَكْرُو اللَّهْ مْنْ جِهْتْنَا.

¹²حِيتْ الْإِفْتِخَارْ دْيَالْنَا هُوَ شْهَادْةْ الضَّمِيرْ دْيَالْنَا، بْلِّي كَنْتّْعَامْلُو مْعَ النَّاسْ كُلّْهُمْ، وْخُصُوصًا مْعَاكُمْ نْتُمَ، بْالنِّيَّة وْالْمْعْقُولْ مْنْ عَنْدْ اللَّهْ، وْهَادَا بْفْضَلْ النِّعْمَة دْيَالْ اللَّهْ مَاشِي بْالْحْكْمَة دْيَالْ بْنَادْمْ.

¹³وْحْنَا مَا كَنْكَتْبُو لِيكُمْ غِيرْ دَاكْشِّي اللِّي كَتْقْرَاوْهْ وْكَتْفَهْمُوهْ، وْكَنْتّْمَنَّى تْفَهْمُو كُلّْشِي

¹⁴كِمَا فْهَمْتُونَا شْوِيَّة مْنْ قْبَلْ، بَاشْ نْفْتَخْرُو بِيكُمْ فْيُومْ الْمْجِي دْيَالْ الرَّبّْ يَسُوعْ كِمَا كَتْفْتَخْرُو بِينَا.

¹⁵وْبْهَادْ التِّقَة قَرّْرْتْ نْزُورْكُمْ فْاللّْوّْلْ بَاشْ تْسْتَافْدُو جُوجْ دْ الْمَرَّاتْ.

¹⁶وْغَنْدُوزْ لْعَنْدْكُمْ مْلِّي نْكُونْ مْسَافْرْ لْبْلَادْ مَكِدُونِيَة، وْمْنْ بَعْدْ غَنْدُوزْ لْعَنْدْكُمْ مْلِّي نْكُونْ رَاجْعْ مْنّْهَا، بَاشْ تْعَاوْنُونِي فْالسّْفَرْ دْيَالِي لْبْلَادْ الْيَهُودِيَّة.

¹⁷وَاشْ تْسَرَّعْتْ مْلِّي خْدِيتْ هَادْ الْقَرَارْ؟ وْلَا وَاشْ قَرّْرْتْ هَادْ الْأُمُورْ كِمَا كَيْقَرّْرُو النَّاسْ دْيَالْ الدّْنْيَا، بَاشْ نْݣُولْ بْحَالْهُمْ: إِيِّهْ، إِيِّهْ وْلَّا، لَّا فْوَقْتْ وَاحْدْ؟

¹⁸وَلَكِنْ اللَّهْ أَمِينْ وْعَارْفْ بْلِّي الْكْلَامْ دْيَالْنَا لِيكُمْ مَا كَانْشْ «إِيِّهْ» وْ «لَّا»،

¹⁹حِيتْ يَسُوعْ الْمَسِيحْ وَلْدْ اللَّهْ اللِّي خَبّْرْنَاكُمْ بِيهْ، أَنَا وْسِلْوَانُسْ وْتِيمُوتَاوُسْ، مَا كَانْشْ «إِيِّهْ» وْ «لَّا»، وَلَكِنْ كَانْ دِيمَا «إِيِّهْ».

²⁰حِيتْ فْالْمَسِيحْ الْوُعُودْ دْيَالْ اللَّهْ كُلّْهَا «إِيِّهْ». وْهَادْشِّي عْلَاشْ كَنْعْطِيوْ بِيهْ الْعَزّْ لْلَّهْ مْلِّي كَنْݣُولُو: آمِينْ.

²¹وَلَكِنْ رَاهْ اللِّي كَيْخَلِّينَا وْكَيْخَلِّيكُمْ تَابْتِينْ فْالْإِيمَانْ بْالْمَسِيحْ، وْاللِّي خْتَارْنَا هُوَ اللَّهْ،

²²اللِّي رْشَمْنَا، وْعْطَانَا الرُّوحْ الْقُدُسْ عَرْبُونْ فْقْلُوبْنَا.

²³وْاللَّهْ رَاهْ شَاهْدْ عْلِيَّ بْلِّي حِيتْ حْنِّيتْ عْلِيكُمْ مَا جِيتْشْ لْكُورِنْتُوسْ،

²⁴مَاشِي حِيتْ عَنْدْنَا السُّلْطَة عْلَى الْإِيمَانْ دْيَالْكُمْ، وَلَكِنْ رَاهْ حْنَا كَنْخَدْمُو مْعَاكُمْ عْلَى وْدّْ الْفَرْحَة دْيَالْكُمْ، حِيتْ نْتُمَ تَابْتِينْ فْإِيمَانْكُمْ.