Read Moroccan Standard Translation كُورِنْتُوسْ التَّانِيَّة 10 Bible Online

كُورِنْتُوسْ التَّانِيَّة 10 - Moroccan Standard Translation bible

كُورِنْتُوسْ التَّانِيَّة 10

¹الْفَصْلْ الْعَاشْرْ كَنْطْلَبْ مْنّْكُمْ أَنَا بُولُسْ بْالضّْرَافَة وْاللّْطَافَة دْيَالْ الْمَسِيحْ، أَنَا اللِّي مْتْوَاضْعْ مْلِّي كَنْكُونْ مْعَاكُمْ، وْزَاعْمْ مْلِّي كَنْكُونْ بْعِيدْ عْلِيكُمْ،

²بَاشْ مَا تْخَلِّيوْنِيشْ نْتّْعَامْلْ مْعَاكُمْ بْالزّْعَامَة وْأَنَا عَنْدْكُمْ، حِيتْ كَنْشُوفْ بْلِّي خَاصّْنِي نْتّْعَامْلْ بِيهَا مْعَ شِي نَاسْ اللِّي كَيْحْسْبُونَا كَنْعِيشُو عْلَى حْسَابْ الدَّاتْ.

³حِيتْ وَاخَّا كَنْعِيشُو بْالدَّاتْ، رَاهْ مَاشِي بْالدَّاتْ كَنْتّْحَارْبُو،

⁴عْلَاحْقَّاشْ السّْلَاحْ اللِّي كَنْتّْحَارْبُو بِيهْ مَاشِي سْلَاحْ دْيَالْ الدَّاتْ، وَلَكِنْ عَنْدُه الْقُدْرَة مْنْ عَنْدْ اللَّهْ بَاشْ يْرَيّْبْ الْأَسْوَارْ وْبِيهْ كَنْرَيّْبُو الْأَفْكَارْ

⁵وْݣَاعْ التَّكَبُّرْ اللِّي كَيْوْقَفْ ضْدّْ مَعْرِفَةْ اللَّهْ، وْبِيهْ كَنْحَبْسُو ݣَاعْ الْأَفْكَارْ فْطَاعَةْ الْمَسِيحْ.

⁶وْرَاهْ حْنَا مُوجُودِينْ بَاشْ نْعَاقْبُو كُلّْ مَعْصِيَّة مْلِّي تْكْمَلْ الطَّاعَة دْيَالْكُمْ.

⁷إِيوَا شُوفُو الْأُمُورْ عْلَى حَقِيقْتْهَا، إِلَا كَانْ شِي وَاحْدْ تَايْقْ بْلِّي هُوَ دْيَالْ الْمَسِيحْ، خَاصُّه يْتّْفَكّْرْ بْلِّي حْتَّى حْنَا دْيَالْ الْمَسِيحْ كِمَا هُوَ دْيَالُه.

⁸حِيتْ وَاخَّا نْفْتَخْرْ كْتَرْ مْنْ اللَّازْمْ بْالسُّلْطَة دْيَالْنَا اللِّي عْطَاهَا لِينَا الرَّبّْ بَاشْ نْبْنِيوْكُمْ مَاشِي بَاشْ نْرَيّْبُوكُمْ، رَانِي مَا حْشْمَانْشْ.

⁹وْرَاهْ مَا بْغِيتْشْ نْبَانْ بْلِّي كَنْحَاوْلْ نْخْلَعْكُمْ بْالرَّسَائِلْ دْيَالِي.

¹⁰عْلَاحْقَّاشْ يْقْدَرْ شِي وَاحْدْ يْݣُولْ: «الرَّسَائِلْ قَاسْحِينْ وْقْوِيِّينْ، وَلَكِنْ مْلِّي كَيْكُونْ حَاضْرْ مْعَانَا بْالدَّاتْ كَيْكُونْ ضْعِيفْ وْكْلَامُه خَاوِي».

¹¹رَاهْ بْحَالْ هَادَا، خَاصُّه يْعْرَفْ بْلِّي الْكْلَامْ اللِّي كَنْكَتْبُوهْ فْالرَّسَائِلْ وْحْنَا غَايْبِينْ، غَنْدِيرُو بِيهْ وْحْنَا حَاضْرِينْ مْعَاكُمْ.

¹²حِيتْ مَا نْزَعْمُوشْ نْحَسْبُو رَاسْنَا مْنْ هَادُوكْ اللِّي كَيْشَكْرُو رَاسْهُمْ وْلَا نْشَبّْهُو رَاسْنَا بِيهُمْ، حِيتْ هَادُو اللِّي كَيْشَبّْهُو رَاسْهُمْ بْرَاسْهُمْ وْكَيْقَارْنُو رَاسْهُمْ بْرَاسْهُمْ، رَاهُمْ مَا كَيْفَهْمُوشْ.

¹³وْحْنَا، رَاهْ مَا كَنْفْتَخْرُوشْ بْلَا قْيَاسْ، وَلَكِنْ كَنْفْتَخْرُو عْلَى حْسَابْ الْقْيَاسْ دْيَالْ الْخْدْمَة اللِّي قَسّْمْ لِينَا اللَّهْ، وْعْلَى هَادْ الْقْيَاسْ كَنْدِيرُو هَادْشِّي بَاشْ نْوَصْلُو لِيكُمْ حْتَّى نْتُمَ.

¹⁴حِيتْ مَا كَنْفُوتُوشْ الْحُدُودْ دْيَالْنَا بْحَالْ إِلَا مَا وْصَلْنَاشْ لِيكُمْ. عْلَاحْقَّاشْ وْصَلْنَا لِيكُمْ بْإِنْجِيلْ الْمَسِيحْ.

¹⁵وْمَا كَنْفْتَخْرُوشْ بْلَا قْيَاسْ عْلَى حْسَابْ الْخْدْمَة دْ لْخْرِينْ، وَلَكِنْ كَنْتّْرَجَّاوْ يْكْبَرْ إِيمَانْكُمْ وْتْزِيدْ الْخْدْمَة دْيَالْنَا عْلَى حْسَابْ الْبْلَايْصْ اللِّي مْسْمُوحْ بِيهُمْ.

¹⁶بَاشْ نْخَبّْرُو بْالْإِنْجِيلْ فْالْبْلْدَانْ لْخْرِينْ مْنْ غِيرْ بْلَادْكُمْ، بْلَا مَا نْفْتَخْرُو بْالْخْدْمَة اللِّي دَارُوهَا لْخْرِينْ فْالْبْلَاصَة اللِّي خْدْمُو فِيهَا.

¹⁷وَلَكِنْ كْتَابْ اللَّهْ كَيْݣُولْ: «اللِّي كَيْفْتَخْرْ، يْفْتَخْرْ بْالرَّبّْ»،

¹⁸حِيتْ مَاشِي اللِّي كَيْشْكَرْ رَاسُه هُوَ اللِّي مْقْبُولْ، وَلَكِنْ هَادَاكْ اللِّي كَيْشَكْرُه الرَّبّْ.