Read Moroccan Standard Translation كُورِنْتُوسْ التَّانِيَّة 12 Bible Online

كُورِنْتُوسْ التَّانِيَّة 12 - Moroccan Standard Translation bible

كُورِنْتُوسْ التَّانِيَّة 12

¹الْفَصْلْ طْنَاشْ إِيوَا رَاهْ خَاصّْنِي نْفْتَخْرْ، وَاخَّا مَا غَيْنْفَعْنِيشْ. وَلَكِنْ غَنْكَلّْمْكُمْ دَابَا عْلَى الرُّؤْيَاتْ دْيَالْ الرَّبّْ وْالْأُمُورْ اللِّي بَيّْنْ لِيَّ.

²رَاهْ كَنْعْرَفْ وَاحْدْ الرَّاجْلْ مْآمْنْ بْالْمَسِيحْ، تّْخْطَفْ لْلسّْمَا التَّالْتَة هَادِي رْبَعْطَاشْرْ عَامْ، وَاشْ تّْخْطَفْ بْالدَّاتْ وْلَا بْلَا دَاتْ؟ مَا كَنْعْرَفْشْ، اللَّهْ هُوَ اللِّي كَيْعْرَفْ.

³إِيِّهْ، رَاهْ كَنْعْرَفْ بْلِّي هَادْ الرَّاجْلْ تّْخْطَفْ، وَلَكِنْ وَاشْ بْالدَّاتْ وْلَا بْلَا دَاتْ؟ مَا كَنْعْرَفْشْ، اللَّهْ هُوَ اللِّي كَيْعْرَفْ.

⁴تّْخْطَفْ لْلجّْنَّة، وْتْمَّ سْمَعْ شِي كْلَامْ مَا يْقْدَرْ حْتَّى شِي وَاحْدْ يْنْطَقْ بِيهْ، وْمَا مْسْمُوحْشْ لْبْنَادْمْ يْݣُولُه.

⁵أَنَا غَنْفْتَخْرْ مْنْ جِهْةْ هَادْ الرَّاجْلْ، وَلَكِنْ مْنْ جِهْتِي أَنَا رَاهْ غَنْفْتَخْرْ غِيرْ بْالضُّعْفْ دْيَالِي.

⁶حِيتْ كُونْ بْغِيتْ نْفْتَخْرْ مَا غَنْكُونْشْ حْمَقْ، عْلَاحْقَّاشْ كَنْݣُولْ الْحَقّْ. وَلَكِنْ مَا غَنْفْتَخْرْشْ بَاشْ حْتَّى وَاحْدْ مَا يَاخُدْ عْلِيَّ شِي فِكْرَة كْتَرْ مْنْ دَاكْشِّي اللِّي كَيْشُوفْنِي كَنْدِيرْ، وْلَا كَيْسْمَعْنِي كَنْݣُولْ.

⁷وْبَاشْ مَا نْزِيدْشْ نْتْكَبّْرْ بْكْتْرَةْ الْأُمُورْ الْعْجِيبَة اللِّي بَيّْنْهَا لِيَّ اللَّهْ، تّْعْطَاتْ لِيَّ شُوكَة فْدَاتِي، وْرَاهَا بْحَالْ شِي مْرْسُولْ مْنْ الشِّيطَانْ كَيْضْرَبْنِي بَاشْ مَا نْفْتَخْرْشْ.

⁸وْصْلِّيتْ لْلرَّبّْ تْلَاتَة دْ الْمَرَّاتْ بَاشْ يْحَيّْدْهَا مْنِّي،

⁹وْݣَالْ لِيَّ: «رَاهْ النِّعْمَة دْيَالِي تْكْفِيكْ، حِيتْ الْقُوَّة دْيَالِي كَتْبَانْ فْالضُّعْفْ دْيَالْكْ». عْلَى هَادْشِّي غَنْفْتَخْرْ بْالضُّعْفْ دْيَالِي وْأَنَا فْرْحَانْ، بَاشْ تْنْزَلْ عْلِيَّ الْقُوَّة دْ الْمَسِيحْ.

¹⁰وْعْلَى وْدّْ الْمَسِيحْ كَنْفْرَحْ بْالضُّعْفْ، وْالسّْبَّانْ، وْالضِّيقْ، وْالتَّعَدُّو، وْالْمْحَايْنْ، حِيتْ مْلِّي كَنْكُونْ ضْعِيفْ كَنْكُونْ قْوِي.

¹¹وْلِّيتْ بْحَالْ شِي حْمَقْ، وَلَكِنْ نْتُمَ اللِّي لَزّْمْتُو عْلِيَّ هَادْشِّي، وْكَانْ وَاجْبْ عْلِيكُمْ تْشَكْرُونِي! حِيتْ أَنَا مَاشِي قَلّْ مْنْ الرُّسُلْ الْكْبَارْ، وَاخَّا نْكُونْ مَا كَنْسْوَا وَالُو.

¹²وْرَانِي بَيّْنْتْ لِيكُمْ بْلِّي أَنَا رَسُولْ بْالْعَلَامَاتْ وْالْعْجَايْبْ وْالْمُعْجِزَاتْ اللِّي دْرْتْهُمْ بْالصّْبَرْ فْوَسْطْ مْنّْكُمْ.

¹³إِيوَا فَاشْ تْعَامْلْتْ مْعَاكُمْ بْقَلّْ مْنْ دَاكْشِّي اللِّي تْعَامْلْتْ بِيهْ مْعَ الْكْنَايْسْ لْخْرِينْ، مْنْ غِيرْ بْلِّي مَا تَقّْلْتْ عْلِيكُمْ حْتَّى بْحَاجَة؟ إِيوَا سْمْحُو لِيَّ عْلَى هَادْ الضُّلْمْ.

¹⁴هَانِي مُوجُودْ بَاشْ نْجِي لْعَنْدْكُمْ لْلْمَرَّة التَّالْتَة، وْرَاهْ مَا غَنْتَقّْلْشْ عْلِيكُمْ، حِيتْ مَا بْغِيتْشْ دَاكْشِّي اللِّي عَنْدْكُمْ، وَلَكِنْ بْغِيتْكُمْ نْتُمَ. وْرَاهْ مَاشِي الْوْلَادْ هُمَ اللِّي كَيْجَمْعُو لْوَالِدِيهُمْ، وَلَكِنْ الْوَالِدِينْ هُمَ اللِّي كَيْجَمْعُو لْوْلَادْهُمْ.

¹⁵وْأَنَا رَاهْ فْرْحَانْ بْزَّافْ نْعْطِي كُلّْ مَا عَنْدِي، وْغَنْعْطِي حْتَّى حْيَاتِي عْلَى وْدّْكُمْ. إِيوَا وَاشْ كَتْبْغِيوْنِي غِيرْ شْوِيَّة إِلَا كْنْتْ كَنْبْغِيكُمْ بْزَّافْ؟

¹⁶يْمْكَنْ كَتْݣُولُو بْلِّي مَا تَقّْلْتْشْ عْلِيكُمْ. وَلَكِنْ بْالتَّحْرَمِيَّاتْ ضْحَكْتْ عْلِيكُمْ وْسْتَغْلِّيتْكُمْ.

¹⁷وَاشْ سْتَغْلِّيتْكُمْ فْشِي حَاجَة عْلَى يْدّْ شِي وَاحْدْ مْنْ الرّْجَالْ اللِّي صِيفْطْتْهُمْ لِيكُمْ؟

¹⁸طْلَبْتْ مْنْ تِيطُسْ بَاشْ يْجِي لْعَنْدْكُمْ، وْصِيفْطْتْ مْعَاهْ الْخُو اللِّي مْعْرُوفْ عَنْدْكُمْ. وَاشْ سْتَغْلّْكُمْ تِيطُسْ؟ وَاشْ مَا تْعَامْلْتْشْ مْعَاكُمْ أَنَا وْيَّاهْ بْنِيَّة وَحْدَة وْتْبَعْنَا نَفْسْ الطّْرِيقْ؟

¹⁹يْمْكَنْ مْنْ شْحَالْ هَادِي وْنْتُمَ كَتْضَنُّو بْلِّي حْنَا كَنْدَافْعُو عْلَى رَاسْنَا قُدَّامْكُمْ. لَّا، رَاهْ حْنَا كَنْتّْكَلّْمُو قُدَّامْ اللَّهْ كِيفْ بْغَا الْمَسِيحْ، وْهَادْشِّي كُلُّه آ خُوتِي الْعْزَازْ بَاشْ تْكَبْرُو فْالْإِيمَانْ.

²⁰رَانِي خَايْفْ إِلَا جِيتْ لْعَنْدْكُمْ مَا نْلْقَاكُمْشْ كِيفْ بْغِيتْ، وْمَا تْلْقَاوْنِيشْ كِيفْ بْغِيتُو. وْخَايْفْ لَيْكُونْ بِينَاتْكُمْ الْخْصَامْ، وْالْحْسَدْ، وْالسَّخْطْ، وْالْأَنَانِيَّة، وْالْمْعْيَارْ، وْالْهَضْرَة فْالنَّاسْ، وْالتَّكَبُّرْ، وْالْفُوضَى.

²¹كَنْخَافْ إِلَا جِيتْ لْعَنْدْكُمْ مَرَّة خْرَى يْحَشّْمْنِي اللَّهْ قُدَّامْكُمْ، وْنْبْكِي عْلَى ݣَاعْ هَادُوكْ اللِّي دَنْبُو مْنْ قْبَلْ وْمَا تَابُوشْ عْلَى الْأَعْمَالْ الْمْنْجُوسَة وْالْفْسَادْ وْالْحْوَايْجْ الْخَايْبِينْ اللِّي دَارُو.