Read Moroccan Standard Translation كُورِنْتُوسْ التَّانِيَّة 13 Bible Online

كُورِنْتُوسْ التَّانِيَّة 13 - Moroccan Standard Translation bible

كُورِنْتُوسْ التَّانِيَّة 13

¹الْفَصْلْ تْلْطَاشْ هَادِي هِيَ الْمَرَّة التَّالْتَة اللِّي غَادِي نْجِي فِيهَا لْعَنْدْكُمْ. وْكِمَا كَيْݣُولْ كْتَابْ اللَّهْ: «الْحْكَامْ فْشِي قَضِيَّة كَيْكُونْ بْجُوجْ دْ الشّْهُودْ وْلَا تْلَاتَة».

²وْرَاهْ فْالْمَرَّة اللِّي فَاتْتْ نْبَّهْتْ اللِّي دَارُو الدّْنُوبْ مْنْ قْبَلْ. وْدَابَا وْأَنَا غَايْبْ، كَنْݣُولْ نَفْسْ الْكْلَامْ لْݣَاعْ النَّاسْ لْخْرِينْ، رَاهْ مَا غَنْحَنّْ حْتَّى فْشِي وَاحْدْ مْلِّي غَنْجِي عَنْدْكُمْ عَاوْتَانِي.

³نْتُمَ كَتْقَلّْبُو عْلَى شِي حُجَّة بْلِّي الْمَسِيحْ كَيْتّْكَلّْمْ عْلَى لْسَانِي. رَاهْ الْمَسِيحْ مَاشِي ضْعِيفْ مْلِّي كَيْتّْعَامْلْ مْعَاكُمْ، وَلَكِنْ رَاهْ كَيْبَيّْنْ قُوّْتُه فِيكُمْ.

⁴حِيتْ وَاخَّا تّْصْلَبْ وْهُوَ ضْعِيفْ، رَاهْ هُوَ دَابَا حَيّْ بْقُوَّةْ اللَّهْ. وْحْتَّى حْنَا رَاهْ ضْعَافْ حِيتْ مْتَّاحْدِينْ مْعَاهْ، وَلَكِنْ غَنْحْيَاوْ مْعَاهْ بْقُوَّةْ اللَّهْ عْلَى وْدّْكُمْ.

⁵جَرّْبُو رَاسْكُمْ وْشُوفُو وَاشْ نْتُمَ تَابْتِينْ فْالْإِيمَانْ. مْتَحْنُو رَاسْكُمْ، وْلَا مَا عَارْفِينْشْ بْلِّي يَسُوعْ الْمَسِيحْ فِيكُمْ؟ مْنْ غِيرْ إِلَا فْشَلْتُو.

⁶وَلَكِنْ كَنْتّْمَنَّى تْعَرْفُو بْلِّي حْنَا مَا فْشَلْنَاشْ.

⁷وْكَنْطْلْبُو مْنْ اللَّهْ بَاشْ مَا تْدِيرُوشْ الشَّرّْ، مَاشِي بَاشْ نْبَانُو حْنَا نَاجْحِينْ، وَلَكِنْ بَاشْ تْدِيرُو الْحَاجَة الْمْزْيَانَة وَاخَّا نْبَانُو حْنَا فَاشْلِينْ.

⁸حِيتْ مَا نْقَدْرُوشْ نْدِيرُو شِي حَاجَة ضْدّْ الْحَقّْ، وَلَكِنْ كَنْخَدْمُو لْلْحَقّْ.

⁹وْكَنْفَرْحُو مْلِّي كَنْكُونُو حْنَا ضْعَافْ وْنْتُمَ قْوِيِّينْ، وْكَنْطْلْبُو اللَّهْ بَاشْ تْكُونُو كَامْلِينْ.

¹⁰هَادْشِّي عْلَاشْ كَنْكْتَبْ لِيكُمْ هَادْ الْأُمُورْ وْأَنَا غَايْبْ، بَاشْ مَا نْكُونْشْ قَاسْحْ مْعَاكُمْ وْأَنَا حَاضْرْ، عْلَى حْسَابْ السُّلْطَة اللِّي عْطَاهَا لِيَّ الرَّبّْ بَاشْ نْبْنِيكُمْ مَاشِي بَاشْ نْرَيّْبْكُمْ.

¹¹وْفْاللّْخْرْ آ الْخُوتْ، فْرْحُو وْكُونُو مْكْمُولِينْ، شَجّْعُو بْعْضِيَّاتْكُمْ وْكُونُو عْلَى رَأْيْ وَاحْدْ، وْعِيشُو فْالْهْنَا، وْإِلَاهْ الْمْحَبَّة وْالْهْنَا يْكُونْ مْعَاكُمْ.

¹²سَلّْمُو عْلَى بْعْضِيَّاتْكُمْ بْبُوسَة مْقَدّْسَة، وْرَاهْ ݣَاعْ الْخُوتْ الْمْقَدّْسِينْ كَيْسَلّْمُو عْلِيكُمْ.

¹³النِّعْمَة دْيَالْ الرَّبّْ يَسُوعْ الْمَسِيحْ، وْالْمْحَبَّة دْيَالْ اللَّهْ وْالشّْرْكَة دْيَالْ الرُّوحْ الْقُدُسْ يْكُونُو مْعَاكُمْ كُلّْكُمْ.