Read Moroccan Standard Translation كُورِنْتُوسْ التَّانِيَّة 3 Bible Online

كُورِنْتُوسْ التَّانِيَّة 3 - Moroccan Standard Translation bible

كُورِنْتُوسْ التَّانِيَّة 3

¹الْفَصْلْ التَّالْتْ وَاشْ بْدِينَا كَنْشَكْرُو رَاسْنَا عَاوْتَانِي؟ وْلَا وَاشْ كَنْحْتَاجُو بْحَالْ شِي وْحْدِينْ لْرَسَائِلْ دْيَالْ التَّوْصِيَّة لِيكُمْ وْلَا مْنّْكُمْ؟

²رَاهْ نْتُمَ هُمَ الرِّسَالَة دْيَالْنَا، مْكْتُوبَة فْقْلُوبْنَا، مْعْرُوفَة وْكَيْقْرَاوْهَا ݣَاعْ النَّاسْ.

³وْبَايْنْ بْلِّي نْتُمَ الرِّسَالَة دْ الْمَسِيحْ، اللِّي أَمّْنَّا عْلِيهَا. وْرَاهَا مَا مْكْتُوبَاشْ بْالْمْدَادْ، وَلَكِنْ بْرُوحْ اللَّهْ الْحَيّْ، وْمَاشِي عْلَى لُوحَاتْ دْ الْحْجَرْ، وَلَكِنْ عْلَى لُوحَاتْ الْقْلُوبْ دْ الْبَشَرْ.

⁴وْهَادِي هِيَ التِّقَة اللِّي عَنْدْنَا فْاللَّهْ بْالْمَسِيحْ.

⁵مَاشِي حِيتْ حْنَا قَادْرِينْ وْكَنْحْسْبُو رَاسْنَا كَنْدِيرُو شِي حَاجَة، وَلَكِنْ الْقُدْرَة دْيَالْنَا مْنْ عَنْدْ اللَّهْ،

⁶اللِّي خْلَّانَا قَادْرِينْ نْدِيرُو الْخْدْمَة دْيَالْ الْعَهْدْ الجّْدِيدْ، مَاشِي دْيَالْ الْحَرْفْ وَلَكِنْ دْيَالْ الرُّوحْ الْقُدُسْ. حِيتْ الْحَرْفْ كَيْقْتَلْ، أَمَّا الرُّوحْ الْقُدُسْ رَاهْ كَيْحْيِي.

⁷إِيوَا إِلَا كَانْتْ الْخْدْمَة دْ الْمُوتْ اللِّي مْنْقُوشَة بْالْحْرُوفْ عْلَى الْحْجَرْ جَاتْ مْغَطّْيَة بْالْعَزّْ، لْدَرَجْةْ مَا قْدَرْشْ شَعْبْ إِسْرَائِيلْ يْشُوفْ فْوْجَهْ مُوسَى بْسْبَابْ الْعَزّْ اللِّي كَانْ عْلَى وْجْهُه،

⁸كِيفَاشْ مَا تْكُونْشْ الْخْدْمَة دْ الرُّوحْ الْقُدُسْ عَنْدْهَا عَزّْ كْتَرْ؟

⁹حِيتْ إِلَا كَانْتْ الْخْدْمَة دْيَالْ الْحُكْمْ بْالْعِقَابْ عَزّْ، إِيوَا كِيفَاشْ مَا يْكُونْشْ عَزّْ كْتَرْ فْالْخْدْمَة اللِّي كَتْرَدّْ النَّاسْ مْتَّاقْيِينْ قُدَّامْ اللَّهْ.

¹⁰وْهَكَّا، رَاهْ الْحَاجَة اللِّي كَانْ عَنْدْهَا الْعَزّْ مْنْ قْبَلْ، مَا بْقَاشْ عَنْدْهَا الْعَزّْ دَابَا، حِيتْ الْعَهْدْ الجّْدِيدْ عَنْدُه عَزّْ كْتَرْ.

¹¹عْلَاحْقَّاشْ إِلَا كَانْ اللِّي مَا دَايْمْشْ عَنْدُه الْعَزّْ، رَاهْ اللِّي دَايْمْ عَنْدُه عَزّْ كْتَرْ!

¹²وْحِيتْ عَنْدْنَا بْحَالْ هَادْ الرّْجَا، كَنْخَدْمُو بْتِقَة كْبِيرَة،

¹³مَاشِي بْحَالْ مُوسَى اللِّي كَانْ كَيْحَطّْ غْطَا عْلَى وْجْهُه، بَاشْ مَا يْقَدْرُوشْ وْلَادْ إِسْرَائِيلْ يْشُوفُو اللّْخْرْ دْيَالْ الْعَزّْ اللِّي مَا دَايْمْشْ.

¹⁴وَلَكِنْ رَاهْ عْقُولْهُمْ تّْسَدُّو، حِيتْ حْتَّى لْهَادْ النّْهَارْ مَازَالْ مَا تّْحَيّْدْ دَاكْ الْغْطَا مْلِّي كَيْقْرَاوْ الْعَهْدْ الْقْدِيمْ، عْلَاحْقَّاشْ كَيْتّْحَيّْدْ بْالْمَسِيحْ.

¹⁵وْحْتَّى لْلْيُومْ، مَازَالْ كَايْنْ الْغْطَا عْلَى قَلْبْهُمْ مْلِّي كَيْقْرَاوْ فْالْكْتُبْ دْيَالْ مُوسَى.

¹⁶وَلَكِنْ مْلِّي كَيْرْجَعْ شِي وَاحْدْ لْلرَّبّْ، كَيْتّْحَيّْدْ الْغْطَا.

¹⁷الرَّبّْ هُوَ الرُّوحْ، وْفِينْ كَيْكُونْ رُوحْ الرَّبّْ كَتْكُونْ الْحُرِّيَّة.

¹⁸وْحْنَا كُلّْنَا، مْلِّي كَنْشُوفُو الْعَزّْ دْيَالْ الرَّبّْ بْحَالْ فْشِي مْرَايَة بْوْجَهْ مَا مْغَطِّيشْ، كَنْوَلِّيوْ بْحَالْ دِيكْ الصُّورَة نِيتْ، وْكَنْزِيدُو مْنْ عَزّْ لْعَزّْ، بْفْضَلْ الرَّبّْ اللِّي هُوَ الرُّوحْ.