Read Moroccan Standard Translation كُورِنْتُوسْ التَّانِيَّة 4 Bible Online

كُورِنْتُوسْ التَّانِيَّة 4 - Moroccan Standard Translation bible

كُورِنْتُوسْ التَّانِيَّة 4

¹الْفَصْلْ الرَّابْعْ عْلَى هَادْشِّي، حِيتْ اللَّهْ بْالرَّحْمَة دْيَالُه كَلّْفْنَا بْهَادْ الْخْدْمَة، مَا كَنْفَشْلُوشْ.

²وَلَكِنْ بَعّْدْنَا عْلَى ݣَاعْ الْأُمُورْ اللِّي كَتْدَارْ بْالتّْخَبْيَة وْكَتْجِيبْ الْعَارْ، وْمَا كَنْتّْصَرّْفُوشْ بْالْخْدِيعَة، وَلَا كَنْحَرّْفُو كْلَامْ اللَّهْ، وَلَكِنْ كَنْبَيّْنُو الْحَقّْ، وْهَكَّا كَنْخَلِّيوْ النَّاسْ يْشَكْرُونَا فْقْلُوبْهُمْ قُدَّامْ اللَّهْ.

³إِيوَا إِلَا كَانْ الْإِنْجِيلْ دْيَالْنَا مْخَبِّي، رَاهْ هُوَ مْخَبِّي عْلَى هَادُوكْ اللِّي فْالْهْلَاكْ،

⁴هَادُوكْ اللِّي مَا كَيْآمْنُوشْ حِيتْ إِبْلِيسْ إِلَاهْ هَادْ الدّْنْيَا عْمَى عْقُولْهُمْ، بَاشْ مَا يْضَوِّيشْ لِيهُمْ النُّورْ دْيَالْ الْإِنْجِيلْ اللِّي كَيْبَيّْنْ الْعَزّْ دْيَالْ الْمَسِيحْ، اللِّي هُوَ الصُّورَة دْيَالْ اللَّهْ.

⁵وْحْنَا مَا كَنْخَبّْرُوشْ بْنْفُوسْنَا، وَلَكِنْ بْالْمَسِيحْ يَسُوعْ بْلِّي هُوَ الرَّبّْ، وْحْنَا عْبِيدْ دْيَالْكُمْ عْلَى وْدّْ يَسُوعْ.

⁶عْلَاحْقَّاشْ اللَّهْ اللِّي ݣَالْ: «النُّورْ يْضَوِّي مْنْ الضّْلَامْ»، هُوَ اللِّي نَوّْرْ فْقْلُوبْنَا بَاشْ نْعَرْفُو الْعَزّْ دْيَالْ اللَّهْ الْمْضَوِّي فْوْجَهْ يَسُوعْ الْمَسِيحْ.

⁷وَلَكِنْ رَاهْ عَنْدْنَا هَادْ الْكَنْزْ فْمَاعُونْ دْ الْفْخَّارْ، بَاشْ يْبَانْ بْلِّي الْقُوَّة الْكْبِيرَة هِيَ مْنْ اللَّهْ مَاشِي مْنَّا.

⁸الْمْحَايْنْ كَيْجِيوْنَا مْنْ كُلّْ جِهَة، وَلَكِنْ مَا كَنْتّْقَهْرُوشْ. كَنْحِيرُو، وَلَكِنْ مَا كَنْقَنْطُوشْ.

⁹كَيْتّْعَدَّاوْ عْلِينَا، وَلَكِنْ اللَّهْ مَا كَيْنْسَانَاشْ. كَيْطِيّْحُونَا لْلْأَرْضْ وَلَكِنْ مَا كَنْفْنَاوْشْ.

¹⁰دِيمَا هَازِّينْ الْمُوتْ دْيَالْ يَسُوعْ فْالدَّاتْ دْيَالْنَا، بَاشْ تْبَانْ فِيهَا الْحَيَاةْ دْيَالْ يَسُوعْ حْتَّى هِيَ.

¹¹حِيتْ مَا حْدّْنَا حَيِّينْ، رَاهْ دِيمَا كَنْتْعَرّْضُو لْلْمُوتْ عْلَى وْدّْ يَسُوعْ، بَاشْ حْتَّى حَيَاةْ يَسُوعْ تْبَانْ فْالدَّاتْ دْيَالْنَا الْفَانْيَة.

¹²وْهَكَّا، رَاهْ الْمُوتْ كَتْخْدَمْ فِينَا، وَلَكِنْ الْحَيَاةْ كَتْخْدَمْ فِيكُمْ.

¹³وْحِيتْ عَنْدْنَا نَفْسْ الرُّوحْ دْ الْإِيمَانْ، عْلَى حْسَابْ دَاكْشِّي اللِّي جَا فْكْتَابْ اللَّهْ: «تّْكَلّْمْتْ حِيتْ آمْنْتْ»، رَاهْ حْتَّى حْنَا كَنْتّْكَلّْمُو حِيتْ كَنْآمْنُو،

¹⁴وْرَاهْ حْنَا عَارْفِينْ بْلِّي هَادَاكْ اللِّي بْعَتْ الرَّبّْ يَسُوعْ مْنْ الْمُوتْ، غَيْبْعَتْنَا حْتَّى حْنَا مْنْ الْمُوتْ مْعَ يَسُوعْ، وْغَيْجِيبْنَا مْعَاكُمْ عَنْدُه.

¹⁵حِيتْ ݣَاعْ هَادْشِّي رَاهْ هُوَ عْلَى وْدّْكُمْ، بَاشْ كُلّْمَا وْصْلَاتْ النِّعْمَة لْنَاسْ كْتَارْ، كَيْتّْزَادْ الشُّكْرْ اللِّي كَيْعْطِي الْعَزّْ لْلَّهْ.

¹⁶هَادْشِّي عْلَاشْ مَا كَنْفَشْلُوشْ، حِيتْ وَاخَّا دَاتْنَا غَادْيَة وْكَتْفْنَى، رُوحْنَا رَاهَا كَتّْجَدّْدْ نْهَارْ عْلَى نْهَارْ.

¹⁷حِيتْ الْمْحْنَة اللِّي كَنْدُوزُو فِيهَا خْفِيفَة، وْرَاهَا كَتْوَجّْدْ لِينَا وَاحْدْ الْعَزّْ دَايْمْ وْمَا عَنْدُه حَدّْ.

¹⁸وْحْنَا مَا كَنْشُوفُوشْ فْالْأُمُورْ اللِّي كَتّْشَافْ، وَلَكِنْ فْالْأُمُورْ اللِّي مَا كَتّْشَافْشْ. حِيتْ اللِّي كَتّْشَافْ مَا دَايْمَاشْ، أَمَّا اللِّي مَا كَتّْشَافْشْ رَاهَا دَايْمَة.