Read Moroccan Standard Translation كُورِنْتُوسْ التَّانِيَّة 6 Bible Online

كُورِنْتُوسْ التَّانِيَّة 6 - Moroccan Standard Translation bible

كُورِنْتُوسْ التَّانِيَّة 6

¹الْفَصْلْ السَّادْسْ وْحِيتْ حْنَا كَنْخَدْمُو مْعَ اللَّهْ، رَاهْ كَنْطْلْبُو مْنّْكُمْ بَاشْ مَا تْقَبْلُوشْ النِّعْمَة دْيَالُه بْلَا فَايْدَة.

²حِيتْ اللَّهْ كَيْݣُولْ: «فْالْوَقْتْ دْ الْقُبُولْ سْمَعْتْكْ، وْفْيُومْ النّْجَا عَاوْنْتْكْ». هَا هُوَ دَابَا الْوَقْتْ دْ الْقُبُولْ، وْهَا هُوَ دَابَا يُومْ النّْجَا.

³رَاهْ مَا بْغِينَاشْ نْكُونُو عَتْرَة لْحْتَّى وَاحْدْ فْشِي حَاجَة، بَاشْ الْخْدْمَة دْيَالْنَا مَا تّْلَامْشْ.

⁴وَلَكِنْ فْݣَاعْ الضُّرُوفْ كَنْقَدّْمُو رَاسْنَا بْحَالْ خُدَّامْ اللَّهْ: بْالصّْبَرْ الْكْبِيرْ فْالْمْحَايْنْ، وْالْعْدَابْ وْالْمَشَقَّاتْ،

⁵وْفْالضَّرْبْ، وْالْحْبَاسَاتْ، وْالْفُوضَى، وْتَمَارَة، وْالسّْهِيرْ، وْالصّْيَامْ.

⁶وْبْالنّْقَاوَة، وْالْمَعْرِفَة، وْالصّْبَرْ، وْاللّْطَافَة، وْالرُّوحْ الْقُدُسْ، وْالْمْحَبَّة اللِّي مَا فِيهَا نِفَاقْ،

⁷وْبْكْلَامْ الْحَقّْ، وْبْالْقُوَّة دْ اللَّهْ، بْالسّْلَاحْ دْيَالْ التَّقْوَى فْالْهُجُومْ وْالدِّفَاعْ،

⁸سْوَا كَبّْرُو بِينَا وْلَا حْتَقْرُونَا، ݣَالُو فِينَا الْكْلَامْ الْخَايْبْ وْلَا الْمْزْيَانْ. حْسْبُونَا كْدَّابِينْ وَاخَّا حْنَا صَادْقِينْ،

⁹بْحَالْ إِلَا مَا مْعْرُوفِينْشْ وَلَكِنْ حْنَا مْعْرُوفِينْ، وْبْحَالْ إِلَا مْيّْتِينْ وَلَكِنْ حْنَا حَيِّينْ. وْبْحَالْ إِلَا مْعَدّْبِينْ وَلَكِنْ مَا مْقْتُولِينْشْ.

¹⁰وْحْسْبُونَا بْحَالْ إِلَا حَازْنِينْ وَلَكِنْ حْنَا دِيمَا فْرْحَانِينْ، وْبْحَالْ إِلَا فُقَرَا وَلَكِنْ حْنَا كَنْغْنِيوْ بْزَّافْ دْ النَّاسْ. وْحْسْبُونَا بْحَالْ إِلَا مَا عَنْدْنَا وَالُو وَلَكِنْ حْنَا عَنْدْنَا كُلّْشِي.

¹¹رَاهْ تْكَلّْمْنَا مْعَاكُمْ بْصَرَاحَة آ سُكَّانْ كُورِنْتُوسْ الْعْزَازْ، وْقَلْبْنَا رَاهْ كْبِيرْ.

¹²حْنَا مَا سْدِّينَاشْ قَلْبْنَا مْنْ جِهْتْكُمْ، وَلَكِنْ نْتُمَ اللِّي سْدِّيتُو قَلْبْكُمْ مْنْ جِهْتْنَا.

¹³وْهَادْشِّي عْلَاشْ كَنْݣُولْ لِيكُمْ بْحَالْ إِلَا كْنْتُو وْلَادِي، حْلُّو لِينَا حْتَّى نْتُمَ قَلْبْكُمْ.

¹⁴حْتَّى حَاجَة مَا خَاصّْ تْرْبَطْكُمْ بْالنَّاسْ اللِّي مَاشِي مُومْنِينْ، حِيتْ آشْ مْنْ عَلَاقَة بِينْ التَّقْوَى وْالْإِتْمْ؟ وْآشْ مْنْ شْرْكَة بِينْ النُّورْ وْالضّْلَامْ؟

¹⁵وْآشْ مْنْ تِّفَاقْ بِينْ الْمَسِيحْ وْبَلِيعَالْ؟ وْآشْ مْنْ حَاجَة كَتْجْمَعْ بِينْ الْمُومْنْ وْاللِّي مَاشِي مُومْنْ؟

¹⁶وْآشْ مْنْ حَاجَة كَتْجْمَعْ بِينْ بِيتْ اللَّهْ وْالْأَصْنَامْ؟ حِيتْ حْنَا بِيتْ اللَّهْ الْحَيّْ، وْكِمَا ݣَالْ اللَّهْ فْكْلَامُه: «غَنْسْكُنْ فْوَسْطْ مْنّْهُمْ، وْغَنْمْشِي مْعَاهُمْ. وْغَنْكُونْ الْإِلَاهْ دْيَالْهُمْ وْهُمَ غَيْكُونُو الشَّعْبْ دْيَالِي.

¹⁷عْلَى دَاكْشِّي خَرْجُو مْنْ وَسْطْهُمْ وْبَعّْدُو عْلِيهُمْ، كَيْݣُولْ الرَّبّْ، وْمَا تْمَسُّو حْتَّى حَاجَة مْنْجُوسَة، وْأَنَا غَادِي نْقْبَلْكُمْ.

¹⁸وْغَنْكُونْ لِيكُمْ بُو، وْنْتُمَ غَتْكُونُو وْلَادِي وْبْنَاتِي، كَيْݣُولْ الرَّبّْ الْقَادْرْ عْلَى كُلّْشِي».