Read Moroccan Standard Translation كُورِنْتُوسْ التَّانِيَّة 8 Bible Online

كُورِنْتُوسْ التَّانِيَّة 8 - Moroccan Standard Translation bible

كُورِنْتُوسْ التَّانِيَّة 8

¹الْفَصْلْ التَّامْنْ بْغِينَاكُمْ آ الْخُوتْ تْعَرْفُو النِّعْمَة دْيَالْ اللَّهْ اللِّي تّْعْطَاتْ لْكْنَايْسْ مَكِدُونِيَة،

²رَاهْ فْالْمْحْنَة الْكْبِيرَة اللِّي دَازُو فِيهَا، فَاضْتْ الْفَرْحَة دْيَالْهُمْ وْكَانُو سْخِيِّينْ وَاخَّا مْحْتَاجِينْ بْزَّافْ.

³وْأَنَا كَنْشْهَدْ بْلِّي مَا عْطَاوْشْ غِيرْ عْلَى قْدّْ جَهْدْهُمْ وْصَافِي، وَلَكِنْ كْتَرْ مْنْ جَهْدْهُمْ، وْهَادْشِّي رَاهْ دَارُوهْ بْخَاطْرْهُمْ.

⁴وْطْلْبُونَا بْزَّافْ بَاشْ نْقَبْلُو التَّبَرُّعَاتْ دْيَالْهُمْ وْبَاشْ يْشَارْكُونَا فْالْخْدْمَة لْلْمْقَدّْسِينْ.

⁵وْدَارُو كْتَرْ مْنْ دَاكْشِّي اللِّي كْنَّا كَنْتّْرَجَّاوْهْ، حِيتْ فْاللّْوّْلْ عْطَاوْ حْيَاتْهُمْ لْلرَّبّْ، وْعْطَاوْهَا لِينَا بْحَسَبْ مُرَادْ اللَّهْ.

⁶وْهَادْشِّي عْلَاشْ طْلَبْنَا مْنْ تِيطُسْ بَاشْ يْكَمّْلْ عَنْدْكُمْ حْتَّى هَادْ الْخْدْمَة كِمَا بْدَا مْنْ قْبَلْ.

⁷وَلَكِنْ كِيفْ كَتْزِيدُو فْكُلّْشِي: فْالْإِيمَانْ، وْالْكْلَامْ، وْالْمَعْرِفَة، وْالْغِيرَة، وْالْمْحَبَّة دْيَالْكُمْ لِينَا، مْصَّابْ تْزِيدُو حْتَّى فْهَادْ الْخْدْمَة.

⁸وْرَانِي مَا كَنْآمْرْكُمْشْ بْهَادْ الْكْلَامْ، وَلَكِنْ كَنْتّْكَلّْمْ مْعَاكُمْ عْلَى لْخْرِينْ اللِّي مْتّْحَمّْسِينْ، بَاشْ نْجَرّْبْ الْمْحَبَّة دْيَالْكُمْ،

⁹حِيتْ رَاكُمْ كَتْعَرْفُو النِّعْمَة دْيَالْ رَبّْنَا يَسُوعْ الْمَسِيحْ، عْلَاحْقَّاشْ عْلَى وْدّْكُمْ وْلَّى فَقِيرْ وْهُوَ غَنِي، بَاشْ تْوَلِّيوْ نْتُمَ أَغْنِيَا بْالْفَقْرْ دْيَالُه.

¹⁰وْرَاهْ هَادَا هُوَ الرَّأْيْ دْيَالِي فْهَادْ الْأُمُورْ، حِيتْ هَادْشِّي فْمْصْلَحْتْكُمْ، نْتُمَ اللِّي مْنْ الْعَامْ اللِّي فَاتْ مَاشِي غِيرْ بْدِيتُو كَتْدِيرُو، وَلَكِنْ بْغِيتُو تْدِيرُو.

¹¹إِيوَا حْتَّى دَابَا كَمّْلُو الْخْدْمَة، وْهَكَّا غَتْكُونْ الْخْدْمَة دْيَالْكُمْ قْدّْ الرّْغْبَة اللِّي عَنْدْكُمْ.

¹²حِيتْ إِلَا كَايْنَة الرّْغْبَة، رَاهْ اللَّهْ كَيْقْبَلْ الْحَاجَة عْلَى حْسَابْ أَشْنُو كَايْنْ عَنْدْ الْوَاحْدْ، مَاشِي عْلَى حْسَابْ دَاكْشِّي اللِّي مَا عَنْدُوشْ.

¹³مَا كَنْعْنِيشْ بْلِّي خَاصّْكُمْ تْوَلِّيوْ مْحْتَاجِينْ بَاشْ يْكُونْ غِيرْكُمْ مْرْتَاحْ، وَلَكِنْ كُونُو بْحَالْ بْحَالْ.

¹⁴وْفْهَادْ الْوَقْتْ، عْطِيوْ دَاكْشِّي اللِّي زَايْدْ عْلِيكُمْ لْلِّي مْحْتَاجْ، بَاشْ حْتَّى هُوَ مْنْ بَعْدْ يْعْطِيكُمْ دَاكْشِّي اللِّي زَايْدْ عْلِيهْ، وْهَكَّا غَتْوَلِّيوْ بْحَالْ بْحَالْ.

¹⁵كِمَا كَيْݣُولْ كْتَابْ اللَّهْ: «اللِّي جْمَعْ كْتِيرْ مَا شَاطْ عْلِيهْ وَالُو، وْاللِّي جْمَعْ قْلِيلْ مَا خَاصُّه وَالُو».

¹⁶وْكَنْشْكَرْ اللَّهْ اللِّي دَارْ هَادْ الْغِيرَة فْقَلْبْ تِيطُسْ عْلَى وْدّْكُمْ،

¹⁷عْلَاحْقَّاشْ مْلِّي طْلَبْنَا مْنُّه يْجِي لْعَنْدْكُمْ، وَافْقْ، وْكْتَرْ مْنْ هَادْشِّي مْشَى لْعَنْدْكُمْ مْنْ رَاسُه وْهُوَ مْتْشَجّْعْ.

¹⁸وْصِيفْطْنَا مْعَاهْ الْخُو اللِّي كَيْشَكْرُوهْ ݣَاعْ الْكْنَايْسْ عْلَى الْخْدْمَة دْيَالُه لْلْإِنْجِيلْ.

¹⁹وْمَاشِي غِيرْ هَادْشِّي، وَلَكِنْ خْتَارُوهْ الْكْنَايْسْ يْكُونْ مْعَانَا فْالسّْفَرْ، بَاشْ نْدِيرُو هَادْ الْخْدْمَة السّْخِيَة وْيْتّْعْطَى الْعَزّْ لْلرَّبّْ، وْبَاشْ يْكُونْ شَاهْدْ بْلِّي كَنْدِيرُو الْخْدْمَة دْيَالْنَا بْالْحَقّْ.

²⁰وْرَاهْ حْنَا رَادِّينْ الْبَالْ بَاشْ مَا يْلُومْنَا حَدّْ عْلَى كِيفَاشْ كَنْسَيّْرُو هَادْ الْفْلُوسْ الْكْتِيرَة.

²¹حِيتْ بْغِينَا نْدِيرُو الْأُمُورْ الْمْزْيَانَة، مَاشِي غِيرْ قُدَّامْ الرَّبّْ بُوحْدُه، وَلَكِنْ حْتَّى قُدَّامْ النَّاسْ.

²²وْصِيفْطْنَا مْعَاهُمْ خُونَا اللِّي جَرّْبْنَاهْ بْزَّافْ دْ الْمَرَّاتْ فْأُمُورْ كْتِيرَة وْلْقِينَاهْ مْتْشَجّْعْ، وْدَابَا رَاهْ هُوَ مْتْشَجّْعْ كْتَرْ حِيتْ عَنْدُه تِقَة كْبِيرَة فِيكُمْ.

²³أَمَّا بْالنّْسْبَة لْتِيطُسْ، رَاهْ هُوَ اللِّي كَيْعَاوْنِّي وْكَيْشَارْكْنِي فْالْخْدْمَة عْلَى وْدّْكُمْ. وْالْخُوتْ بْجُوجْ رَاهُمْ مْرْسُولِينْ مْنْ الْكْنَايْسْ وْبِيهُمْ كَيْتّْعْطَى الْعَزّْ لْلْمَسِيحْ.

²⁴إِيوَا بَيّْنُو لِيهُمْ الْمْحَبَّة دْيَالْكُمْ مْزْيَانْ بَاشْ يْشُوفُوهَا الْكْنَايْسْ، وْيْعَرْفُو بْلِّي حْنَا عْلَى حَقّْ مْلِّي فْتَخْرْنَا بِيكُمْ.