Read Moroccan Standard Translation رِسَالَةْ غَلَاطِيَّة 1 Bible Online

رِسَالَةْ غَلَاطِيَّة 1 - Moroccan Standard Translation bible

رِسَالَةْ غَلَاطِيَّة 1

¹الْفَصْلْ اللّْوّْلْ مْنْ بُولُسْ، اللِّي هُوَ رَسُولْ مَاشِي بْالسُّلْطَة دْيَالْ النَّاسْ وْلَا مْنْ جِهْةْ شِي وَاحْدْ، وَلَكِنْ بْالسُّلْطَة دْيَالْ يَسُوعْ الْمَسِيحْ وْاللَّهْ الْآبْ اللِّي بْعَتْ يَسُوعْ مْنْ بِينْ الْمُوتَى،

²وْمْنْ ݣَاعْ الْخُوتْ الْمُومْنِينْ اللِّي مْعَايَ، لْلْكْنَايْسْ اللِّي فْبْلَادْ غَلَاطِيَّة.

³النِّعْمَة وْالْهْنَا مْنْ اللَّهْ بَّانَا وْالرَّبّْ يَسُوعْ الْمَسِيحْ لِيكُمْ،

⁴اللِّي عْطَى حْيَاتُه بَاشْ يْنَجِّينَا مْنْ الدّْنُوبْ دْيَالْنَا، وْيْخَرّْجْنَا مْنْ هَادْ الدّْنْيَا دْيَالْ الشَّرّْ عْلَى حْسَابْ مُرَادْ اللَّهْ اللِّي هُوَ بَّانَا،

⁵لِيهْ الْعَزّْ دِيمَا وْعْلَى الدّْوَامْ. آمِينْ.

⁶رَانِي كَنْتّْعَجّْبْ حِيتْ دْغْيَا سْمَحْتُو فْاللَّهْ اللِّي عَيّْطْ لِيكُمْ بْالنِّعْمَة دْ الْمَسِيحْ، وْقْبَلْتُو إِنْجِيلْ آخُرْ.

⁷وْفْالْحَقِيقَة رَاهْ مَا كَايْنْشْ شِي إِنْجِيلْ آخُرْ، وَلَكِنْ كَايْنِينْ شِي نَاسْ كَيْتَلّْفُوكُمْ وْبْغَاوْ يْبَدّْلُو إِنْجِيلْ الْمَسِيحْ.

⁸وَلَكِنْ إِلَا خَبّْرْكُمْ شِي وَاحْدْ، وَاخَّا نْكُونُو حْنَا وْلَا شِي مَلَاكْ مْنْ السّْمَا، بْإِنْجِيلْ آخُرْ مْنْ غِيرْ هَادَاكْ اللِّي خَبّْرْنَاكُمْ بِيهْ، رَاهْ غَيْكُونْ مْلْعُونْ.

⁹وْكِيفْ ݣْلْنَا مْنْ قْبَلْ، كَنْݣُولْ دَابَا عَاوْتَانِي: إِلَا خَبّْرْكُمْ شِي وَاحْدْ بْإِنْجِيلْ آخُرْ مْنْ غِيرْ هَادَاكْ اللِّي قْبَلْتُوهْ، رَاهْ غَيْكُونْ مْلْعُونْ.

¹⁰إِيوَا دَابَا، وَاشْ كَنْحَاوْلْ نْرْضِي النَّاسْ وْلَا اللَّهْ؟ وَاشْ كَنْطْلَبْ نْرْضِي النَّاسْ؟ إِلَا كْنْتْ بَاقِي كَنْرْضِي النَّاسْ، رَانِي مَاشِي خْدَّامْ دْيَالْ الْمَسِيحْ.

¹¹وْبْغِيتْكُمْ تْعَرْفُو آ الْخُوتْ بْلِّي الْإِنْجِيلْ اللِّي خَبّْرْتْكُمْ بِيهْ مَا جَاشْ مْنْ عَنْدْ النَّاسْ،

¹²وْلَا وْصَلْنِي مْنْ شِي حَدّْ وْلَا تْعَلّْمْتُه، وَلَكِنْ يَسُوعْ الْمَسِيحْ هُوَ اللِّي بَيّْنُه لِيَّ.

¹³وْرَاكُمْ سْمَعْتُو عْلَى التَّعَامُلْ دْيَالِي مْنْ قْبَلْ مْلِّي كْنْتْ كَنْتْبَعْ الدِّينْ دْيَالْ لِيهُودْ، رَاهْ كْنْتْ كَنْتّْعَدَّى بْلَا قْيَاسْ عْلَى كْنِيسْةْ اللَّهْ وْكَنْشَتّْتْهَا،

¹⁴وْكْنْتْ فْالدِّينْ دْيَالْ لِيهُودْ حْسَنْ مْنْ بْزَّافْ دْ لِيهُودْ اللِّي قْدِّي فْالْعْمَرْ، وْكْنْتْ كَنْغِيرْ كْتَرْ مْنّْهُمْ عْلَى الْعَادَاتْ دْيَالْ جْدُودِي.

¹⁵وَلَكِنْ رَاهْ اللَّهْ خْتَارْنِي وْأَنَا فْكَرْشْ مِّي وْبْالنِّعْمَة دْيَالُه عَيّْطْ لِيَّ، وْمْلِّي بْغَا

¹⁶يْبَيّْنْ لِيَّ الْوَلْدْ دْيَالُه بَاشْ نْخَبّْرْ الشّْعُوبْ اللِّي مَاشِي يْهُودْ بْالْبْشَارَة، رَاهْ مَا طْلَبْتْ الشّْوَارْ مْنْ حْتَّى وَاحْدْ،

¹⁷وْمَا طْلَعْتْشْ لْأُورْشَلِيمْ عَنْدْ الرُّسُلْ اللِّي كَانُو قْبَلْ مْنِّي، وَلَكِنْ مْشِيتْ لْبْلَادْ الْعْرَبْ وْمْنْ بَعْدْ رْجَعْتْ لْدِمَشْقْ.

¹⁸وْمْنْ بَعْدْ تْلْتْ سْنِينْ، طْلَعْتْ لْأُورْشَلِيمْ بَاشْ نْتّْعَارْفْ مْعَ صَفَا، وْبْقِيتْ عَنْدُه خْمْسْطَاشْرْ يُومْ،

¹⁹وَلَكِنْ مَا شْفْتْ حْتَّى رَسُولْ آخُرْ مْنْ غِيرْ يَعْقُوبْ خُو الرَّبّْ.

²⁰وْهَادْ الْكْلَامْ اللِّي كَنْكَتْبُه لِيكُمْ كَنْݣُولُه قُدَّامْ اللَّهْ، وْمَا كَنْكْدَبْشْ.

²¹وْمْنْ بَعْدْ مْشِيتْ لْمَنْطَقَةْ سُورِيَا وْكِيلِيكِيَّة،

²²وَلَكِنْ وْجْهِي مَا كَانْشْ مْعْرُوفْ فْكْنَايْسْ الْمَسِيحْ اللِّي فْبْلَادْ الْيَهُودِيَّة،

²³وْكَانُو غِيرْ كَيْسَمْعُو: «رَاهْ الرَّاجْلْ اللِّي كَانْ كَيْتّْعَدَّى عْلِينَا وْلَّى دَابَا كَيْخَبّْرْ بْالْإِيمَانْ اللِّي كَانْ كَيْخَرّْبُه مْنْ قْبَلْ»

²⁴وْكَانُو كَيْعْطِيوْ الْعَزّْ لْلَّهْ بْسْبَابِي.