Read Moroccan Standard Translation رِسَالَةْ غَلَاطِيَّة 2 Bible Online

رِسَالَةْ غَلَاطِيَّة 2 - Moroccan Standard Translation bible

رِسَالَةْ غَلَاطِيَّة 2

¹الْفَصْلْ التَّانِي وْمْنْ بَعْدْ رْبَعْطَاشْرْ عَامْ، طْلَعْتْ عَاوْتَانِي لْأُورْشَلِيمْ مْعَ بَرْنَابَا، وْدِّيتْ مْعَايَ تِيطُسْ حْتَّى هُوَ.

²طْلَعْتْ لْأُورْشَلِيمْ عْلَى وْدّْ الرُّؤْيَا اللِّي شْفْتْ، وْتْلَاقِيتْ مْعَ شِي وْحْدِينْ كَيْحَسْبُو رْيُوسْهُمْ مْسْؤُولِينْ، وْتّْكَلّْمْتْ لِيهُمْ عْلَى الْإِنْجِيلْ اللِّي كَنْخَبّْرْ بِيهْ الشّْعُوبْ اللِّي مَاشِي يْهُودْ، بَاشْ مَا تْكُونْشْ الْخْدْمَة اللِّي دْرْتْهَا وْاللِّي كَنْدِيرْهَا دَابَا بْلَا فَايْدَة.

³وْتِيطُسْ اللِّي كَانْ مْعَايَ وْاللِّي هُوَ يُونَانِي، حْتَّى وَاحْدْ مَا بَزّْزْ عْلِيهْ بَاشْ يْتّْخَتّْنْ،

⁴وَاخَّا دَخْلُو وَسْطْنَا شِي خُوتْ كْدَّابِينْ بْلَا مَا يْعَرْفْهُمْ حَدّْ بَاشْ يْتْجَسّْسُو عْلَى الْحُرِّيَّة اللِّي عَنْدْنَا فْالْمَسِيحْ يَسُوعْ وْيْرَدُّونَا عْبِيدْ.

⁵وْعَمّْرْنَا مَا طَعْنَاهُمْ وَلَوْ غِيرْ مَرَّة وْحْدَة، بَاشْ كْلَامْ الْحَقّْ دْيَالْ الْإِنْجِيلْ يْبْقَى عَنْدْكُمْ.

⁶وَلَكِنْ هَادُوكْ اللِّي كَيْحَسْبُو رْيُوسْهُمْ مْسْؤُولِينْ، -مَا كَيْهَمّْنِيشْ شْكُونْ هُمَ، حِيتْ اللَّهْ مَا كَيْدِيرْشْ الْوْجْهِيَّاتْ- رَاهُمْ مَا فْرْضُو عْلِيَّ نْدِيرْ حْتَّى حَاجَة،

⁷وْبْالْعَكْسْ، شَافُو بْلِّي اللَّهْ أَمّْنِّي عْلَى الْإِنْجِيلْ بَاشْ نْخَبّْرْ بِيهْ فْوَسْطْ الشّْعُوبْ اللِّي مَا مْخَتّْنِينْشْ، كِمَا أَمّْنْ عْلِيهْ بُطْرُسْ بَاشْ يْخَبّْرْ بِيهْ فْوَسْطْ الشّْعُوبْ اللِّي مْخَتّْنِينْ،

⁸حِيتْ اللَّهْ اللِّي دَارْ بُطْرُسْ يْخَبّْرْ بِينْ الشّْعُوبْ اللِّي مْخَتّْنِينْ، هُوَ اللِّي دَارْنِي أَنَا نْخَبّْرْ بِينْ الشّْعُوبْ اللِّي مَاشِي يْهُودْ،

⁹وْمْلِّي عْرَفْ يَعْقُوبْ وْصَفَا وْيُوحَنَّا، اللِّي كَانُو كَيْعْتَبْرُوهُمْ النَّاسْ الرّْكَايْزْ دْ الْكْنِيسَة، بْلِّي اللَّهْ نْعَمْ عْلِيَّ بْهَادْ الْخْدْمَة، سَلّْمُو عْلِيَّ وْعْلَى بَرْنَابَا بْيْدّْهُمْ لِيمْنَى، وْهَادِي عَلَامَة دْ الْاتِّفَاقْ دْيَالْهُمْ مْعَانَا، بَاشْ حْنَا نْخَبّْرُو بْالْإِنْجِيلْ بِينْ الشّْعُوبْ اللِّي مَاشِي يْهُودْ، وْهُمَ يْخَبّْرُو بِينْ الشّْعُوبْ اللِّي مْخَتّْنِينْ.

¹⁰وْطْلْبُو مْنَّا حَاجَة وَحْدَة، هِيَ نْتّْفَكّْرُو الْفُقَرَا، وْدِيمَا كَانْ عْلَى قَلْبِي نْدِيرْ هَادْ الْخْدْمَة.

¹¹وَلَكِنْ مْلِّي جَا صَفَا مْنْ أَنْطَاكْيَة، وَاجْهْتُه قُدَّامْ النَّاسْ كَامْلِينْ عْلَاحْقَّاشْ مَا كَانْشْ عْلَى حَقّْ.

¹²حِيتْ قْبَلْ مَا يْجِيوْ شِي رْجَالْ مْنْ عَنْدْ يَعْقُوبْ، كَانْ صَفَا كَيَاكُلْ مْعَ الْمُومْنِينْ اللِّي مَاشِي يْهُودْ، وَلَكِنْ مْلِّي جَاوْ هَادْ الرّْجَالْ رْجَعْ لْلُّورْ وْعْزَلْ رَاسُه، حِيتْ خَافْ مْنْ الْخُوتْ اللِّي كَيْطَالْبُو بْالْخْتَانَة.

¹³وْحْتَّى الْخُوتْ لْخْرِينْ اللِّي مْنْ لِيهُودْ دَارُو بْحَالُه، وْبَرْنَابَا بْرَاسُه تّْغَرّْ بْالنِّفَاقْ دْيَالْهُمْ.

¹⁴وْمْلِّي شْفْتْهُمْ مَا غَادْيِينْشْ فْالطّْرِيقْ الصّْحِيحَة عْلَى حْسَابْ الْحَقّْ دْيَالْ الْإِنْجِيلْ، ݣْلْتْ لْصَفَا قُدَّامْ كُلّْشِي: «إِلَا نْتَ يْهُودِي وْكَتْعِيشْ بْحَالْ الشّْعُوبْ اللِّي مَاشِي يْهُودْ، وْمَاشِي بْحَالْ لِيهُودْ، كِيفَاشْ بْغِيتِي تْرَدّْ الشّْعُوبْ اللِّي مَاشِي يْهُودْ يْعِيشُو بْحَالْ لِيهُودْ؟».

¹⁵رَاهْ أَصْلْنَا يْهُودْ، وْمَاشِي مُدْنِبِينْ مْنْ الشّْعُوبْ اللِّي مَاشِي يْهُودْ.

¹⁶وَاخَّا هَكَّاكْ كَنْعَرْفُو بْلِّي بْنَادْمْ كَيْوَلِّي بَارِي، مَاشِي بْأَعْمَالْ الشّْرَعْ وَلَكِنْ بْالْإِيمَانْ بْيَسُوعْ الْمَسِيحْ، وْحْتَّى حْنَا آمْنَّا بْالْمَسِيحْ يَسُوعْ بَاشْ نْوَلِّيوْ مْتَّاقْيِينْ اللَّهْ بْسْبَابْ الْإِيمَانْ دْيَالْنَا بْالْمَسِيحْ، وْمَاشِي بْأَعْمَالْ الشّْرَعْ، حِيتْ مَا يْمْكَنْ لْحْتَّى وَاحْدْ يْوَلِّي بَارِي بْأَعْمَالْ الشّْرَعْ.

¹⁷وْإِلَا حَاوْلْنَا نْوَلِّيوْ بَارْيِينْ بْالْمَسِيحْ، كَنْلْقَاوْ رْيُوسْنَا مُدْنِبِينْ. إِيوَا وَاشْ هَادْشِّي كَيْعْنِي بْلِّي الْمَسِيحْ كَيْشَجّْعْ عْلَى الدّْنُوبْ؟ حَاشَا!

¹⁸رَاهْ إِلَا رْجَعْتْ بَاشْ نْبْنِي مْنْ جْدِيدْ دَاكْشِّي اللِّي رَيّْبْتُه، غَنْتْبَتْ عْلَى رَاسِي بْلِّي دْنَبْتْ،

¹⁹حِيتْ بْسْبَابْ الشّْرَعْ مْتّْ مْنْ جِهْةْ الشّْرَعْ بَاشْ نْعِيشْ لْلَّهْ. مْعَ الْمَسِيحْ تّْصْلَبْتْ.[١]

²⁰مَاشِي أَنَا اللِّي كَنْعِيشْ دَابَا، وَلَكِنْ الْمَسِيحْ هُوَ اللِّي كَيْعِيشْ فِيَّ. وْالْحَيَاةْ اللِّي كَنْعِيشْهَا دَابَا فْالدَّاتْ، كَنْعِيشْهَا فْالْإِيمَانْ بْوَلْدْ اللَّهْ اللِّي كَيْبْغِينِي وْعْطَى حْيَاتُه عْلَى وْدِّي.

²¹رَانِي مَا بْغِيتْشْ نْرَدّْ النِّعْمَة دْ اللَّهْ بَاطْلَة، حِيتْ إِلَا كْنَّا مْتَّاقْيِينْ اللَّهْ بْأَعْمَالْ الشّْرَعْ، رَاهْ مُوتْ الْمَسِيحْ مَا عَنْدْهَا فَايْدَة.