Read Moroccan Standard Translation رِسَالَةْ غَلَاطِيَّة 4 Bible Online

رِسَالَةْ غَلَاطِيَّة 4 - Moroccan Standard Translation bible

رِسَالَةْ غَلَاطِيَّة 4

¹الْفَصْلْ الرَّابْعْ كَنْعْنِي بْهَادْ الْكْلَامْ، بْلِّي إِلَا كَانْ الْوَلْدْ اللِّي غَيَاخُدْ الْوَرْتْ بَاقِي صْغِيرْ، رَاهْ هُوَ مَاشِي حْسَنْ مْنْ الْعَبْدْ وَاخَّا يْكُونْ هُوَ مُولْ الْوَرْتْ كُلُّه،

²حِيتْ رَاهْ تَحْتْ حْكَامْ النَّاسْ اللِّي مْسْؤُولِينْ عْلِيهْ وْاللِّي مْكَلّْفِينْ بِيهْ حْتَّى يْجِي الْوَقْتْ اللِّي وْصَّى بِيهْ بَّاهْ.

³وْحْتَّى حْنَا بْحَالْ هَكَّا، مْلِّي كْنَّا دْرَارِي صْغَارْ، كْنَّا عْبِيدْ لْلْقُوَّاتْ دْيَالْ الشَّرّْ.

⁴وَلَكِنْ مْلِّي وْصَلْ الْوَقْتْ الْمُنَاسِبْ، صِيفْطْ اللَّهْ الْوَلْدْ دْيَالُه اللِّي تّْوْلَدْ مْنْ مْرَاة، وْتّْوْلَدْ تَحْتْ الشّْرَعْ،

⁵بَاشْ يْنَجِّي النَّاسْ اللِّي كَيْعِيشُو تَحْتْ الشّْرَعْ وْنْوَلِّيوْ وْلَادْ اللَّهْ.

⁶وْعْلَاحْقَّاشْ نْتُمَ وْلَادْ اللَّهْ، صِيفْطْ اللَّهْ الرُّوحْ دْ الْوَلْدْ دْيَالُه لْقْلُوبْكُمْ، كَيْغَوّْتْ وْكَيْݣُولْ: «آ بَّا! آ الْآبْ!».

⁷عْلِيهَا رَاكْ مَا بْقِيتِيشْ عَبْدْ وَلَكِنْ وْلِّيتِي وَلْدْ اللَّهْ، وْإِلَا نْتَ وَلْدُه، رَاهْ اللَّهْ غَيْعْطِيكْ الْحَقّْ فْالْوَرْتْ دْيَالُه.

⁸مْنْ قْبَلْ، كْنْتُو مَا كَتْعَرْفُوشْ اللَّهْ وْكْنْتُو عْبِيدْ لْلْأَصْنَامْ اللِّي مَا هُمَاشْ إِلَاهَاتْ.

⁹وَلَكِنْ دَابَا مْلِّي وْلِّيتُو كَتْعَرْفُو اللَّهْ، وْفْالْحَقِيقَة رَاهْ هُوَ اللِّي عْرَفْكُمْ، كِيفَاشْ تْقَدْرُو تْرْجْعُو عَاوْتَانِي لْلْحْوَايْجْ اللِّي ضْعَافْ وْبْلَا قِيمَة، وْبْغِيتُو تْكُونُو عْبِيدْ لِيهُمْ كِيفْ كْنْتُو مْنْ قْبَلْ؟

¹⁰نْتُمَ كَيْهَمُّوكُمْ شِي يَّامَاتْ وْشِي شْهُورْ وْشِي وْقَاتْ وْشِي سْنِينْ وْكَتْحْتَافْلُو بِيهُمْ!

¹¹رَانِي خَايْفْ عْلِيكُمْ لَنْكُونْ ضْرَبْتْ تَمَارَة عْلَى وْدّْكُمْ بْلَا فَايْدَة!

¹²آ الْخُوتْ، كَنْطْلَبْ مْنّْكُمْ تْوَلِّيوْ بْحَالِي عْلَاحْقَّاشْ حْتَّى أَنَا وْلِّيتْ بْحَالْكُمْ، وْحْتَّى وَاحْدْ مْنّْكُمْ مَا ضْلَمْنِي.

¹³وْرَاكُمْ كَتْعَرْفُو بْلِّي بْسْبَابْ الْمَرْضْ دْيَالِي خَبّْرْتْكُمْ بْالْإِنْجِيلْ فْاللّْوّْلْ،

¹⁴وْوَاخَّا قَاسِيتُو بْسْبَابْ الْمَرْضْ دْيَالِي، مَا حْتَقْرْتُونِيشْ وْمَا كْرَهْتُونِيشْ، وَلَكِنْ قْبَلْتُو عْلِيَّ بْحَالْ إِلَا أَنَا مَلَاكْ دْيَالْ اللَّهْ، وْبْحَالْ إِلَا أَنَا هُوَ الْمَسِيحْ يَسُوعْ.

¹⁵إِيوَا فِينْ هِيَ هَادْ الْفَرْحَة دْيَالْكُمْ؟ رَانِي كَنْشْهَدْ لِيكُمْ بْلِّي كُونْ كْنْتُو قَادْرِينْ تْݣَلْعُو عِينِيكُمْ، كُونْ ݣْلَعْتُوهُمْ وْعْطِيتُوهُمْ لِيَّ.

¹⁶وَاشْ دَابَا وْلِّيتْ عْدُو دْيَالْكُمْ حِيتْ كَنْݣُولْ لِيكُمْ الْحَقّْ؟

¹⁷رَاهْ هَادْ النَّاسْ اللِّي كَيْدِّيوْهَا فِيكُمْ مَاشِي مْعْقُولِينْ، وَلَكِنْ كَيْبْغِيوْ يْبَعّْدُوكُمْ عْلِيَّ بَاشْ تْدِّيوْهَا فِيهُمْ.

¹⁸رَاهْ مْزْيَانْ إِلَا كَانُو كَيْدِّيوْهَا فِيكُمْ فْكُلّْ وَقْتْ وْمَاشِي غِيرْ فْالْوَقْتْ فَاشْ كَنْكُونْ مْعَاكُمْ.

¹⁹آ وْلِيدَاتِي، رَانِي كَنْتْعَدّْبْ عْلَى وْدّْكُمْ مْنْ جْدِيدْ كِيفْ كَتْوَجّْعْ الْمْرَاة اللِّي كَتْوْلَدْ، حْتَّى تْوَلِّيوْ بْحَالْ الْمَسِيحْ،

²⁰تْمَنِّيتْ نْكُونْ مْعَاكُمْ دَابَا وْنْهْضَرْ مْعَاكُمْ بْشْكَلْ آخُرْ، عْلَاحْقَّاشْ رَانِي حَايْرْ مْنْ جِهْتْكُمْ.

²¹ݣُولُو لِيَّ، نْتُمَ اللِّي بْغِيتُو تْكُونُو تَحْتْ الشّْرَعْ، وَاشْ مَا كَتْسَمْعُوشْ أَشْنُو كَيْݣُولْ الشّْرَعْ؟

²²رَاهْ مْكْتُوبْ فْالشّْرَعْ: إِبْرَاهِيمْ كَانُو عَنْدُه جُوجْ وْلَادْ، وَاحْدْ مْعَ الْخْدَّامَة دْيَالُه وْلَاخُرْ مْعَ مْرَاتُه الْحُرَّة.

²³وَلْدْ الْخْدَّامَة تّْوْلَدْ عْلَى حْسَابْ الدَّاتْ، أَمَّا وَلْدْ الْحُرَّة رَاهْ تّْوْلَدْ عْلَى حْسَابْ الْوَعْدْ دْيَالْ اللَّهْ.

²⁴وْهَادْشِّي كُلُّه عَنْدُه مْعْنَى، الْعْيَالَاتْ بْجُوجْ كَيْعْنِيوْ جُوجْ دْ الْعُهُودْ، الْعَهْدْ اللّْوّْلْ كَيْجِي مْنْ جْبَلْ سِينَاءْ، هَادْ الْعَهْدْ كَيْعْطِي وْلَادْ كَيْوَلِّيوْ عْبِيدْ، وْهَادْ الْعَهْدْ رَاهْ هُوَ هَاجَرْ،

²⁵حِيتْ جْبَلْ سِينَاءْ كَايْنْ فْبْلَادْ الْعْرَبْ، وْهَاجَرْ كَتْرْمَزْ لْأُورْشَلِيمْ دْيَالْ دَابَا، حِيتْ أُورْشَلِيمْ هِيَ وْوْلَادْهَا عْبِيدْ.

²⁶أَمَّا الْعَهْدْ التَّانِي، رَاهْ كَيْرْمَزْ لْأُورْشَلِيمْ اللِّي فْالسّْمَا اللِّي هِيَ حُرَّة. وْاللِّي هِيَ مّْنَا،

²⁷حِيتْ كْتَابْ اللَّهْ كَيْݣُولْ: «فْرْحِي آ الْعَاݣْرَة اللِّي مَا كَتْوْلَدْشْ. غَوّْتِي بْالْفَرْحَة آ اللِّي مَا عْرَفْتِيشْ الْوْجَعْ دْ الْوْلَادَة! حِيتْ الْمْرَاة اللِّي سْمَحْ فِيهَا رَاجْلْهَا غَيْكُونُو عَنْدْهَا وْلَادْ كْتَرْ مْنْ الْمْرَاة اللِّي مْعَ رَاجْلْهَا».

²⁸وْنْتُمَ آ الْخُوتْ، رَاكُمْ وْلَادْ الْوَعْدْ بْحَالْ إِسْحَاقْ.

²⁹وَلَكِنْ مْنْ قْبَلْ كَانْ الْوَلْدْ اللِّي تّْوْلَدْ عْلَى حْسَابْ الدَّاتْ كَيْتّْعَدَّى عْلَى الْوَلْدْ اللِّي تّْوْلَدْ عْلَى حْسَابْ الرُّوحْ، وْهَادْشِّي رَاهْ كَيْجْرَا حْتَّى فْهَادْ الْوَقْتْ.

³⁰وَلَكِنْ آشْ كَيْݣُولْ كْتَابْ اللَّهْ؟ «جْرِّي عْلَى الْخْدَّامَة وْوَلْدْهَا، حِيتْ وَلْدْ الْخْدَّامَة عَمّْرُه مَا غَيْوْرَتْ مْعَ وَلْدْ الْحُرَّة».

³¹وْعْلِيهَا آ الْخُوتْ، رَاهْ حْنَا وْلَادْ الْحُرَّة وْمَاشِي وْلَادْ الْخْدَّامَة.