Read Moroccan Standard Translation رِسَالَةْ غَلَاطِيَّة 5 Bible Online

رِسَالَةْ غَلَاطِيَّة 5 - Moroccan Standard Translation bible

رِسَالَةْ غَلَاطِيَّة 5

¹الْفَصْلْ الْخَامْسْ رَاهْ الْمَسِيحْ حَرّْرْنَا بَاشْ نْكُونُو فْالْحَقِيقَة مْحَرّْرِينْ، إِيوَا تْبْتُو فْالْحُرِّيَّة دْيَالْكُمْ وْمَا تْرْجْعُوشْ عَاوْتَانِي تْعِيشُو تَحْتْ التّْقُلْ دْ الْعُبُودِيَّة.

²أَنَا بُولُسْ كَنْݣُولْ لِيكُمْ: إِلَا تّْخَتّْنْتُو، رَاهْ الْمَسِيحْ مَا غَيْنْفَعْكُمْ بْوَالُو.

³وْكَنْأَكّْدْ لِيكُمْ مَرَّة خْرَى بْلِّي اللِّي تْخَتّْنْ، وَاجْبْ عْلِيهْ يْدِيرْ بْفْرَايْضْ الشّْرَعْ كُلّْهُمْ.

⁴نْتُمَ اللِّي كَتْقَلّْبُو بَاشْ تْوَلِّيوْ بَارْيِينْ بْشْرَعْ مُوسَى، رَاكُمْ قْطَعْتُو الْعَلَاقَة مْعَ الْمَسِيحْ وْتّْحْرَمْتُو مْنْ النِّعْمَة دْيَالْ اللَّهْ.

⁵وَلَكِنْ حْنَا كَنْدِيرُو رْجَانَا فْاللَّهْ، اللِّي غَيْرَدّْنَا مْتَّاقْيِينْ قُدَّامُه بْالْقُدْرَة دْ الرُّوحْ الْقُدُسْ اللِّي كَيْخْدَمْ فِينَا بْالْإِيمَانْ.

⁶حِيتْ فْالْمَسِيحْ يَسُوعْ مَا كَيْهَمّْشْ نْكُونُو مْخَتّْنِينْ وْلَا بْلَا خْتَانَة، وَلَكِنْ اللِّي كَيْهَمّْ هُوَ الْإِيمَانْ اللِّي كَيْخْدَمْ بْالْمْحَبَّة.

⁷رَاهْ كْنْتُو مْنْ قْبَلْ غَادْيِينْ مْزْيَانْ فْإِيمَانْكُمْ، إِيوَا شْكُونْ اللِّي مْنَعْكُمْ بَاشْ مَا تْطِيعُوشْ كْلَامْ الْحَقّْ؟

⁸هَادْشِّي اللِّي تّْغَرِّيتُو بِيهْ رَاهْ مَاشِي مْنْ اللَّهْ اللِّي عَيّْطْ لِيكُمْ تْجِيوْ لْعَنْدُه.

⁹كِيفْ كَيْݣُولْ الْمْتَالْ: «رَاهْ شْوِيَّة دْ الْخْمِيرَة كَتْخَمّْرْ الْعْجِينَة كُلّْهَا».

¹⁰وْرَانِي كَنْتِيقْ فِيكُمْ فْالرَّبّْ بْلِّي مَا غَادِيشْ يْكُونْ عَنْدْكُمْ شِي رَأْيْ آخُرْ، وْكِمَا كَانْ هَادَاكْ اللِّي كَيْشَوّْشْ عْلِيكُمْ فْإِيمَانْكُمْ، رَاهْ غَيَاخُدْ الْعِقَابْ دْيَالُه.

¹¹إِيوَا كُونْ آ الْخُوتْ كْنْتْ بَاقِي كَنْخَبّْرْ بْلِّي الْخْتَانَة وَاجْبَة عْلَى كُلّْ وَاحْدْ، عْلَاشْ بَاقْيِينْ النَّاسْ كَيْتّْعَدَّاوْ عْلِيَّ حْتَّى لْدَابَا؟ حِيتْ الْمُشْكِلْ دْيَالْ الصّْلِيبْ غَيْكُونْ تّْحَيّْدْ.

¹²ݣُولُو لْهَادُوكْ اللِّي كَيْشَوّْشُو عْلِيكُمْ فْإِيمَانْكُمْ مَاشِي غِيرْ يْتّْخَتّْنُو، وَلَكِنْ يْقَطّْعُو دَاتْهُمْ!

¹³آ الْخُوتْ رَاهْ اللَّهْ عَيّْطْ عْلِيكُمْ بَاشْ تْكُونُو مْتْحَرّْرِينْ، إِيوَا مَا تْسْتَغْلُّوشْ الْحُرِّيَّة غِيرْ بَاشْ تْرْضِيوْ الدَّاتْ، وَلَكِنْ خَدْمُو بْعْضِيَّاتْكُمْ بْالْمْحَبَّة.

¹⁴حِيتْ الشّْرَعْ كُلُّه مْجْمُوعْ فْوْصِيَّة وَحْدَة: «خَاصّْكْ تْبْغِي اللِّي قْرِيبْ لِيكْ كِيفْ كَتْبْغِي رَاسْكْ».

¹⁵وَلَكِنْ إِلَا كْنْتُو كَتْعَضُّو وْكَتْفَرْسُو بْعْضِيَّاتْكُمْ، رْدُّو بَالْكُمْ لَتْفْنِيوْ بْعْضِيَّاتْكُمْ.

¹⁶وْعْلِيهَا كَنْݣُولْ لِيكُمْ: عِيشُو بْحَسَبْ الرُّوحْ الْقُدُسْ، وْهَكَّا مَا غَادِيشْ تّْبْعُو الشَّهَوَاتْ دْيَالْ الدَّاتْ.

¹⁷حِيتْ الدَّاتْ كَتّْشْهَّى ضْدّْ الرُّوحْ الْقُدُسْ وْالرُّوحْ الْقُدُسْ كَيْتّْشْهَّى ضْدّْ الدَّاتْ، وْاللِّي تّْشْهَّاهْ الرُّوحْ الْقُدُسْ مَا كَتّْشْهَّاهْشْ الدَّاتْ، وْكُلّْ وَاحْدْ فِيهُمْ كَيْضَادّْ لَاخُرْ، وْهَكَّا مَا تْقَدْرُوشْ تْدِيرُو اللِّي بْغِيتُو.

¹⁸وَلَكِنْ إِلَا كْنْتُو كَتْعِيشُو بْحَسَبْ الرُّوحْ الْقُدُسْ، رَاكُمْ مَاشِي تَحْتْ الشّْرَعْ دْيَالْ مُوسَى.

¹⁹وْأَعْمَالْ الدَّاتْ رَاهَا بَايْنَة: هِيَ الْفْسَادْ، الْأُمُورْ الْمْنْجُوسَة، الزِّنَا،

²⁰الْعِبَادَة دْ الْأَصْنَامْ، السّْحُورْ، الْخْصَامْ، الْعْدَاوَة، الْغِيرَة، السَّخْطْ، الْأَنَانِيَة، التَّفْرِقَة، التَّعَصُّبْ،

²¹الْحْسَدْ، السّْكْرَة، التّْعَرْبِيطَة، وْݣَاعْ الْحْوَايْجْ اللِّي بْحَالْ هَادْشِّي، وْرَانِي كَنْعْلَمْكُمْ كِيفْ عْلَمْتْكُمْ مْنْ قْبَلْ وْكَنْݣُولْ لِيكُمْ: اللِّي كَيْدِيرُو هَادْ الْأُمُورْ رَاهُمْ مَا غَيْوَرْتُوشْ مَمْلَكَةْ اللَّهْ.

²²وَلَكِنْ الْغْلَّة دْيَالْ الرُّوحْ الْقُدُسْ هِيَ: الْمْحَبَّة، الْفَرْحَة، الْهْنَا، الصّْبَرْ، اللّْطَافَة، أَعْمَالْ الْخِيرْ، الْإِيمَانْ،

²³الضّْرَافَة، الرّْزَانَة. وْحْتَّى شْرَعْ مَا كَيْضَادّْ هَادْ الْأُمُورْ.

²⁴وْهَادُوكْ اللِّي هُمَ دْيَالْ الْمَسِيحْ يَسُوعْ رَاهُمْ صْلْبُو الدَّاتْ دْيَالْهُمْ مْعَ الرّْغْبَة وْالشَّهْوَة.

²⁵وْإِلَا كْنَّا كَنْعِيشُو بْحَسَبْ الرُّوحْ الْقُدُسْ، خَاصّْنَا نْطِيعُو هَادْ الرُّوحْ،

²⁶وْمَا خَاصّْنَاشْ نْكُونُو مْتْكَبّْرِينْ وْلَا نْكَرْهُو بْعْضِيَّاتْنَا، وْلَا نْحَسْدُو بْعْضِيَّاتْنَا.