Read Moroccan Standard Translation رِسَالَةْ غَلَاطِيَّة 6 Bible Online

رِسَالَةْ غَلَاطِيَّة 6 - Moroccan Standard Translation bible

رِسَالَةْ غَلَاطِيَّة 6

¹الْفَصْلْ السَّادْسْ آ الْخُوتْ، إِلَا دَارْ شِي وَاحْدْ شِي دَنْبْ، رَاهْ وَاجْبْ عْلِيكُمْ نْتُمَ اللِّي كَتْعِيشُو بْحَسَبْ الرُّوحْ الْقُدُسْ تْرَدُّوهْ لْلطّْرِيقْ بْرُوحْ الضّْرَافَة. وْكُلّْ وَاحْدْ مْنّْكُمْ خَاصُّه يْرَدّْ الْبَالْ بَاشْ مَا يْطِيحْشْ حْتَّى هُوَ فْالتَّجْرِبَة.

²هْزُّو الْحْمَلْ عْلَى بْعْضِيَّاتْكُمْ، وْهَكَّا غَتْكَمّْلُو الشّْرَعْ دْيَالْ الْمَسِيحْ.

³إِلَا كَانْ شِي وَاحْدْ كَيْحَسّْ بْرَاسُه مُهِمّْ وْهُوَ وَالُو، رَاهْ كَيْخْدَعْ رَاسُه.

⁴وَلَكِنْ وَاجْبْ عْلَى كُلّْ وَاحْدْ يْشُوفْ دَاكْشِّي اللِّي كَيْدِيرْ، وْدِيكْ السَّاعَة يْقْدَرْ يْفْتَخْرْ بْرَاسُه، بْلَا مَا يْقَارْنُه مْعَ لْخْرِينْ،

⁵حِيتْ كُلّْ وَاحْدْ غَيْهَزّْ الْحْمَلْ دْيَالُه.

⁶وْاللِّي كَيْتّْعَلّْمْ كْلَامْ اللَّهْ، خَاصُّه يْشَارْكْ ݣَاعْ الْخِيرْ اللِّي عَنْدُه مْعَ الْمُعَلِّمْ دْيَالُه.

⁷مَا تْخَدْعُوشْ رَاسْكُمْ حِيتْ اللَّهْ مَا كَتْخْفَى عْلِيهْ حْتَّى حَاجَة. وْرَاهْ دَاكْشِّي اللِّي كَيْزْرْعُه بْنَادْمْ كَيْحَصْدُه،

⁸حِيتْ اللِّي كَيْزْرَعْ دَاكْشِّي اللِّي كَتْبْغِيهْ الدَّاتْ دْيَالُه، غَيْحْصَدْ دَاكْشِّي اللِّي كَتْبْغِيهْ هَادْ الدَّاتْ، اللِّي هُوَ الْهْلَاكْ. وْاللِّي كَيْزْرَعْ دَاكْشِّي اللِّي كَيْبْغِيهْ الرُّوحْ الْقُدُسْ، غَيْحْصَدْ دَاكْشِّي اللِّي كَيْبْغِيهْ هَادْ الرُّوحْ، اللِّي هُوَ الْحَيَاةْ الدَّايْمَة.

⁹وْهَكَّا خَاصّْنَا نْدِيرُو الْخِيرْ بْلَا مَا نْفَشْلُو، حِيتْ إِلَا بْقِينَا كَنْدِيرُوهْ بْلَا مَا نْعْيَاوْ غَنْحَصْدُو فْالْوَقْتْ دْيَالُه.

¹⁰وْمَا حَدّْ عَنْدْنَا الْوْجْبَة خَاصّْنَا نْدِيرُو الْخِيرْ مْعَ النَّاسْ كَامْلِينْ وْبْالْخُصُوصْ مْعَ الْخُوتْ الْمُومْنِينْ.

¹¹شُوفُو شْحَالْ كْبِيرَة الْكْتْبَة اللِّي كْتَبْتْهَا لِيكُمْ بْيْدِّي!

¹²رَاهْ هَادُوكْ اللِّي كَيْلَزّْمُو عْلِيكُمْ بَاشْ تْتْخَتّْنُو، كَيْبْغِيوْ غِيرْ يْبَانُو وْيْكُونُو مْقْبُولِينْ قُدَّامْ النَّاسْ، وْكَيْدِيرُو هَادْ الْأُمُورْ بَاشْ النَّاسْ مَا يْتّْعَدَّاوْشْ عْلِيهُمْ بْسْبَابْ الصّْلِيبْ دْ الْمَسِيحْ.

¹³حِيتْ هَادُوكْ اللِّي مْخَتّْنِينْ بْرَاسْهُمْ مَا كَيْدِيرُوشْ بْفْرَايْضْ الشّْرَعْ، وَلَكِنْ رَاهُمَ بْغَاوْكُمْ تْتْخَتّْنُو بَاشْ يْفْتَخْرُو حِيتْ دْرْتُو بْكْلَامْهُمْ.

¹⁴أَمَّا مْنْ جِهْتِي أَنَا، رَاهْ مَا غَنْفْتَخْرْ غِيرْ بْالصّْلِيبْ دْيَالْ رَبّْنَا يَسُوعْ الْمَسِيحْ، اللِّي بِيهْ تّْصَلْبَاتْ الدّْنْيَا مْنْ جِهْتِي وْتّْصْلَبْتْ حْتَّى أَنَا مْنْ جِهْةْ الدّْنْيَا.

¹⁵عْلَاحْقَّاشْ مَاشِي مُهِمّْ يْكُونْ الْوَاحْدْ مْخَتّْنْ وْلَا مَا مْخَتّْنْشْ، وَلَكِنْ الْمُهِمّْ هُوَ يْتّْخْلَقْ الْوَاحْدْ مْنْ جْدِيدْ فْاللَّهْ.

¹⁶وْيْكُونْ الْهْنَا وْالرَّحْمَة لْݣَاعْ النَّاسْ اللِّي كَيْدِيرُو بْهَادْ الْكْلَامْ وْلْإِسْرَائِيلْ شَعْبْ اللَّهْ.

¹⁷رَاهْ مْنْ دَابَا، مَا خَاصّْ حْتَّى وَاحْدْ مْنّْكُمْ يْقَلّْقْنِي فْرَاحْتِي، حِيتْ عَنْدِي فْالدَّاتْ دْيَالِي عَلَامَاتْ كَتْبَيّْنْ بْلِّي أَنَا دْيَالْ يَسُوعْ.

¹⁸النِّعْمَة دْيَالْ رَبّْنَا يَسُوعْ الْمَسِيحْ تْكُونْ مْعَ رُوحْكُمْ آ الْخُوتْ. آمِينْ.