Read Moroccan Standard Translation رِسَالَةْ أَفَسُسْ 1 Bible Online

رِسَالَةْ أَفَسُسْ 1 - Moroccan Standard Translation bible

رِسَالَةْ أَفَسُسْ 1

¹الْفَصْلْ اللّْوّْلْ مْنْ بُولُسْ، رَسُولْ الْمَسِيحْ يَسُوعْ بْمُرَادْ اللَّهْ، لْلنَّاسْ الْمْقَدّْسِينْ اللِّي فْأَفَسُسْ، وْالْمُومْنِينْ بْالْمَسِيحْ يَسُوعْ.

²النِّعْمَة وْالْهْنَا مْنْ اللَّهْ بَّانَا وْالرَّبّْ يَسُوعْ الْمَسِيحْ لِيكُمْ.

³يْتْبَارْكْ اللَّهْ بُو رَبّْنَا يَسُوعْ الْمَسِيحْ، اللِّي بَارْكْنَا فْالْمَسِيحْ بْݣَاعْ الْبَرَكَاتْ الرُّوحِيَّة مْنْ السّْمَا.

⁴كِمَا خْتَارْنَا فْالْمَسِيحْ قْبَلْ مَا تّْخْلَقْ الدّْنْيَا بَاشْ نْكُونُو مْقَدّْسِينْ وْبْلَا عِيبْ قُدَّامُه فْالْمْحَبَّة،

⁵وْحْسَبْنَا مْنْ قْبَلْ وْلَادُه بْيَسُوعْ الْمَسِيحْ، بْالْفَرْحَة كِيفْ بْغَا هُوَ.

⁶عْلَى هَادْشِّي خَاصّْنَا نْسَبّْحُوهْ عْلَى الْعَزّْ دْ النِّعْمَة دْيَالُه الْكْبِيرَة اللِّي نْعَمْ عْلِينَا بِيهَا بْوَلْدُه الْعْزِيزْ.

⁷اللِّي بْالدّْمْ دْيَالُه تّْفْدِينَا، وْتّْغَفْرُو دْنُوبْنَا عْلَى حْسَابْ النِّعْمَة دْ اللَّهْ الْكْتِيرَة،

⁸اللِّي عْطَاهَا لِينَا بْلَا قْيَاسْ بْكُلّْ حْكْمَة وْفْهَامَة.

⁹وْخْلَّانَا نْعَرْفُو السِّرّْ دْيَالْ الْمُرَادْ دْيَالُه، اللِّي بْالْفَرْحَة وَجّْدُه مْنْ قْبَلْ فْالْمَسِيحْ،

¹⁰بَاشْ يْكَمّْلُه فْاللّْخْرْ دْ الزّْمَانْ، وْيْجْمَعْ ݣَاعْ دَاكْشِّي اللِّي فْالسّْمَا وْاللِّي فْالْأَرْضْ عْلَى يْدّْ الْمَسِيحْ.

¹¹اللِّي بِيهْ خْدِينَا حَقّْنَا اللِّي وَجّْدُه اللَّهْ مْنْ قْبَلْ عْلَى حْسَابْ الْخُطَّة دْيَالُه، وْرَاهْ كَيْدِيرْ كُلّْشِي كِيفْ بْغَا هُوَ، عْلَى حْسَابْ الْمُرَادْ دْيَالُه،

¹²بَاشْ نْسَبّْحُوهْ عْلَى الْعَزّْ دْيَالُه، حْنَا [١]اللِّي سْبَقْ وْدْرْنَا رْجَانَا فْالْمَسِيحْ.

¹³وْرَاهْ فِيهْ حْتَّى نْتُمَ دْرْتُو رْجَاكُمْ مْلِّي سْمَعْتُو كْلَامْ الْحَقّْ، اللِّي هُوَ الْإِنْجِيلْ دْ النّْجَا دْيَالْكُمْ، وْمْلِّي آمْنْتُو بِيهْ تّْرْشَمْتُو بْالرُّوحْ الْقُدُسْ اللِّي وَاعْدْ بِيهْ.

¹⁴وْهَادْ الرُّوحْ هُوَ الْعَرْبُونْ دْ الْوَرْتْ دْيَالْنَا، حْتَّى يْفْدِي اللَّهْ الشَّعْبْ دْيَالُه بَاشْ نْسَبّْحُوهْ عْلَى الْعَزّْ دْيَالُه.

¹⁵عْلَى هَادْشِّي، مْلِّي سْمَعْتْ عْلَى إِيمَانْكُمْ بْالرَّبّْ يَسُوعْ، وْالْمْحَبَّة دْيَالْكُمْ لْݣَاعْ الْمُومْنِينْ الْمْقَدّْسِينْ،

¹⁶وْأَنَا بَاقِي كَنْشْكَرْ اللَّهْ عْلَى وْدّْكُمْ وْكَنْتّْفَكّْرْكُمْ فْالصّْلَاة دْيَالِي،

¹⁷بَاشْ إِلَاهْ رَبّْنَا يَسُوعْ الْمَسِيحْ مُولْ الْعَزّْ، يْعْطِيكُمْ رُوحْ الْحْكْمَة اللِّي غَيْبَيّْنُه لِيكُمْ بَاشْ تْعَرْفُوهْ مْزْيَانْ،

¹⁸وْيْنَوّْرْ لِيكُمْ عْقَلْكُمْ بَاشْ تْعَرْفُو أَشْنُو هُوَ الرّْجَا اللِّي عَيّْطْ لِيكُمْ لِيهْ، وْتْعَرْفُو شْحَالْ كْتِيرْ الْغِنَى دْيَالْ الْعَزّْ دْ الْوَرْتْ دْيَالُه مْعَ الْمُومْنِينْ الْمْقَدّْسِينْ،

¹⁹وْشْحَالْ كْبِيرَة الْقُوَّة دْيَالُه لِينَا حْنَا الْمُومْنِينْ، وْهِيَ نَفْسْ الْقُوَّة الْكْبِيرَة،

²⁰اللِّي بِيهَا بْعَتْ الْمَسِيحْ مْنْ الْمُوتْ وْݣَلّْسُه عْلَى لِيمْنْ دْيَالُه فْالسّْمَا،

²¹فُوقْ ݣَاعْ الرُّؤَسَا وْالسُّلُطَاتْ وْالْقُوَّاتْ وْالْمْسْؤُولِينْ، وْفُوقْ كُلّْ إِسْمْ مْعْرُوفْ، مَاشِي غِيرْ فْهَادْ الزّْمَانْ وَلَكِنْ حْتَّى فْالزّْمَانْ اللِّي جَايْ.

²²وْرَاهْ اللَّهْ دَارْ كُلّْشِي تَحْتْ رْجْلِينْ الْمَسِيحْ، وْخْلَّاهْ يْكُونْ رَئِيسْ عْلَى كُلّْشِي فْالْكْنِيسَة

²³اللِّي هِيَ الدَّاتْ دْيَالُه، وْرَاهَا كَامْلَة بْالْمَسِيحْ اللِّي كَيْكَمّْلْ كُلّْشِي.