Read Moroccan Standard Translation رِسَالَةْ أَفَسُسْ 2 Bible Online

رِسَالَةْ أَفَسُسْ 2 - Moroccan Standard Translation bible

رِسَالَةْ أَفَسُسْ 2

¹الْفَصْلْ التَّانِي وْنْتُمَ كْنْتُو مْيّْتِينْ بْالدّْنُوبْ وْالْمَعْصِيَّاتْ دْيَالْكُمْ،

²اللِّي كْنْتُو عَايْشِينْ فِيهُمْ مْنْ قْبَلْ فْهَادْ الدّْنْيَا، مْلِّي كْنْتُو تَابْعِينْ رَئِيسْ قُوَّاتْ الشَّرّْ الرُّوحِيَّة اللِّي بِينْ السّْمَا وْالْأَرْضْ، وْرَاهْ هُوَ الرُّوحْ اللِّي دَابَا كَيْتّْحَكّْمْ فْالنَّاسْ اللِّي مَا كَيْطِيعُوشْ اللَّهْ.

³وْحْتَّى حْنَا كَامْلِينْ كْنَّا كَنْعِيشُو بْحَالْهُمْ عْلَى حْسَابْ الشَّهَوَاتْ دْيَالْ الدَّاتْ دْيَالْنَا، وْكَنْدِيرُو دَاكْشِّي اللِّي كَتْبْغِيهْ الدَّاتْ وْالْأَفْكَارْ دْيَالْنَا. وْبْالطّْبِيعَة دْيَالْنَا كْنَّا كَنْسْتَاهْلُو الْغَضَبْ دْيَالْ اللَّهْ بْحَالْ لْخْرِينْ.

⁴وَلَكِنْ الرَّحْمَة دْيَالْ اللَّهْ كْتِيرَة، وْبْسْبَابْ الْمْحَبَّة دْيَالُه الْكْبِيرَة اللِّي بْغَانَا بِيهَا،

⁵وْحْتَّى مْلِّي كْنَّا مْيّْتِينْ فْالدّْنُوبْ دْيَالْنَا، حْيَانَا مْعَ الْمَسِيحْ، وْهَكَّا بْالنِّعْمَة دْيَالْ اللَّهْ نْجِيتُو.

⁶وْفْالْمَسِيحْ يَسُوعْ، بْعَتْنَا مْنْ الْمُوتْ وْݣَلّْسْنَا مْعَاهْ فْالسّْمَا.

⁷بَاشْ يْبَيّْنْ فْالزّْمَانْ اللِّي جَايْ، النِّعْمَة دْيَالُه الْكْبِيرَة بْزَّافْ بْاللُّطْفْ دْيَالُه لِينَا فْالْمَسِيحْ يَسُوعْ.

⁸حِيتْ بْالنِّعْمَة دْيَالْ اللَّهْ نْجِيتُو بْالْإِيمَانْ، وْهَادْشِّي مَاشِي مْنّْكُمْ وَلَكِنْ رَاهْ اللَّهْ نْعَمْ عْلِيكُمْ بِيهْ.

⁹مَاشِي بْالْأَعْمَالْ دْيَالْكُمْ بَاشْ حْتَّى وَاحْدْ مَا يْفْتَخْرْ.

¹⁰حِيتْ حْنَا الْخَلِيقَة دْيَالُه، مْخْلُوقِينْ فْالْمَسِيحْ يَسُوعْ بَاشْ نْدِيرُو الْأَعْمَالْ الْمْزْيَانَة، اللِّي وَجّْدْهَا لِينَا اللَّهْ مْنْ قْبَلْ.

¹¹عْلَى دَاكْشِّي تْفَكّْرُو نْتُمَ آ اللِّي مَاشِي يْهُودْ فْالْأَصْلْ، كِيفَاشْ كَانْتْ حَالْتْكُمْ مْنْ قْبَلْ! رَاهْ لِيهُودْ كَانُو كَيْسَمِّيوْكُمْ مَا مْخَتّْنِينْشْ وْكَيْسَمِّيوْ رَاسْهُمْ مْخَتّْنِينْ، الْخْتَانَة اللِّي كَتْدَارْ فْالدَّاتْ بْالْيْدّْ.

¹²وْتّْفَكّْرُو بْلِّي فْدَاكْ الْوَقْتْ كْنْتُو بْلَا الْمَسِيحْ، بْرَّانِيِّينْ عْلَى شَعْبْ إِسْرَائِيلْ، وْبْرَّانِيِّينْ عْلَى الْعُهُودْ اللِّي مْبْنِيِّينْ عْلَى الْوَعْدْ دْ اللَّهْ، وْمَا كَانْ عَنْدْكُمْ لَا رْجَا وَلَا إِلَاهْ فْهَادْ الدّْنْيَا.

¹³وَلَكِنْ دَابَا فْالْمَسِيحْ يَسُوعْ، نْتُمَ اللِّي كْنْتُو مْنْ قْبَلْ بْعَادْ، وْلِّيتُو قْرَابْ بْدْمّْ الْمَسِيحْ.

¹⁴حِيتْ هُوَ الْهْنَا دْيَالْنَا، اللِّي رَدّْ لِيهُودْ وْالشّْعُوبْ اللِّي مَاشِي يْهُودْ شَعْبْ وَاحْدْ، وْرَيّْبْ الْحِيطْ دْيَالْ الْعْدَاوَة اللِّي كَانْ كَيْفَرّْقْ بِينَاتْهُمْ.

¹⁵وْلْغَى الْوْصِيَّاتْ وْالْفْرَايْضْ دْيَالْ الشّْرَعْ، بَاشْ يْدِيرْ مْنّْهُمْ بْجُوجْ شَعْبْ وَاحْدْ جْدِيدْ، وْدَارْ الْهْنَا بِينَاتْهُمْ.

¹⁶وْهَكَّا صَالْحْهُمْ بْجُوجْ مْعَ اللَّهْ فْدَاتْ وَحْدَة بْالصّْلِيبْ، اللِّي بِيهْ قْتَلْ الْعْدَاوَة.

¹⁷وْجَا وْبَشّْرْكُمْ بْالْهْنَا، نْتُمَ اللِّي بْعَادْ وْحْتَّى نْتُمَ اللِّي قْرَابْ.

¹⁸عْلَاحْقَّاشْ بْالْمَسِيحْ نْقَدْرُو نْجِيوْ كُلّْنَا عَنْدْ الْآبْ بْرُوحْ وَاحْدْ.

¹⁹إِيوَا رَاكُمْ مَا بْقِيتُوشْ غْرَابْ وْبْرَّانِيِّينْ، وَلَكِنْ وْلِّيتُو مُوَاطِنِينْ مْعَ النَّاسْ الْمْقَدّْسِينْ وْوْلِّيتُو مْنْ شَعْبْ اللَّهْ،

²⁰مْبْنِيِّينْ عْلَى السَّاسْ دْيَالْ الرُّسُلْ وْالْأَنْبِيَا، وْالْمَسِيحْ يَسُوعْ بْرَاسُه هُوَ الْحَجْرَة دْيَالْ السَّاسْ،

²¹اللِّي فِيهْ كَيْطْلَعْ الْبْنِي كُلُّه مْعَ بْعْضِيَّاتُه وْكَيْعْلَى، بَاشْ يْوَلِّي بِيتْ اللَّهْ الْمْقَدّْسْ لْلرَّبّْ،

²²اللِّي فِيهْ حْتَّى نْتُمَ تّْبْنِيتُو مْعَ بْعْضِيَّاتْكُمْ بَاشْ تْوَلِّيوْ السُّكْنَى دْ اللَّهْ بْالرُّوحْ دْيَالُه.