Read Moroccan Standard Translation رِسَالَةْ أَفَسُسْ 3 Bible Online

رِسَالَةْ أَفَسُسْ 3 - Moroccan Standard Translation bible

رِسَالَةْ أَفَسُسْ 3

¹الْفَصْلْ التَّالْتْ وْهَادَا عْلَاشْ أَنَا بُولُسْ، مْسْجُونْ عْلَى وْدّْ الْمَسِيحْ يَسُوعْ وْعْلَى وْدّْكُمْ نْتُمَ آ الشّْعُوبْ اللِّي مَاشِي يْهُودْ،

²وْبْلَا شْكّْ رَاكُمْ سْمَعْتُو عْلَى الْخْدْمَة اللِّي بْالنِّعْمَة دْ اللَّهْ تّْعْطَاتْ لِيَّ عْلَى وْدّْكُمْ،

³وْبْلِّي فْالرُّؤْيَا وْرَّانِي السِّرّْ، كِيفْ سْبَقْ لِيَّ وْكْتَبْتُو لِيكُمْ بْاخْتِصَارْ.

⁴وْرَاكُمْ إِلَا قْرِيتُو دَاكْشِّي اللِّي كْتَبْتْ، غَتْقَدْرُو تْفَهْمُو الْمَعْرِفَة دْيَالِي لْلسِّرّْ دْ الْمَسِيحْ.

⁵هَادْ السِّرّْ رَاهْ مَا بَيّْنُوشْ اللَّهْ لْلنَّاسْ اللّْوّْلِينْ، كِمَا بَيّْنُو دَابَا بْالرُّوحْ لْلرُّسُلْ الْمْقَدّْسِينْ وْالْأَنْبِيَا دْيَالُه:

⁶بْلِّي بْالْإِنْجِيلْ غَيْتّْشَارْكُو الشّْعُوبْ اللِّي مَاشِي يْهُودْ مْعَ لِيهُودْ فْوْرْتْ وَاحْدْ، وْغَيْتّْشَارْكُو فْدَاتْ وَحْدَة، وْغَيْكُونْ عَنْدْهُمْ الْحَقّْ فْدَاكْشِّي اللِّي وَاعْدْ بِيهْ اللَّهْ فْالْمَسِيحْ.

⁷وْرَانِي وْلِّيتْ كَنْخْدَمْ لْلْإِنْجِيلْ بْالنِّعْمَة اللِّي نْعَمْ بِيهَا عْلِيَّ اللَّهْ عْلَى حْسَابْ الْقُوَّة دْيَالُه.

⁸وْرَاهْ أَنَا اللِّي شَانِي صْغَرْ مْنْ شَانْ ݣَاعْ الْمُومْنِينْ الْمْقَدّْسِينْ، تّْعْطَاتْنِي هَادْ النِّعْمَة بَاشْ نْخَبّْرْ وَسْطْ الشّْعُوبْ اللِّي مَاشِي يْهُودْ بْالْبَرَكَاتْ دْيَالْ الْمَسِيحْ اللِّي بْلَا حْسَابْ.

⁹وْنْبَيّْنْ لْلنَّاسْ كُلّْهُمْ السِّرّْ اللِّي كَانْ مْخْفِي مْنْ زْمَانْ عَنْدْ اللَّهْ اللِّي خْلَقْ كُلّْشِي.

¹⁰وْهَادْشِّي بَاشْ بْالْكْنِيسَة تّْعْرَفْ دَابَا حْكْمَةْ اللَّهْ الْمْتْنَوّْعَة عَنْدْ الرُّؤَسَا وْالْقُوَّاتْ اللِّي فْالسّْمَا،

¹¹عْلَى حْسَابْ الْقَصْدْ الدَّايْمْ اللِّي حَقّْقُه اللَّهْ فْالْمَسِيحْ يَسُوعْ رَبّْنَا،

¹²اللِّي بِيهْ عَنْدْنَا الشَّجَاعَة بَاشْ نْتّْقَرّْبُو لْلَّهْ بْكُلّْ تِقَة بْالْإِيمَانْ دْيَالْنَا بِيهْ.

¹³عْلَى هَادْشِّي، كَنْطْلَبْ مْنّْكُمْ بَاشْ مَا تْفَشْلُوشْ بْسْبَابْ الْمْحَايْنْ اللِّي كَنْدُوزْ فِيهُمْ عْلَى وْدّْكُمْ، حِيتْ هُمَ الْإِفْتِخَارْ دْيَالْكُمْ.

¹⁴هَادْشِّي عْلَاشْ كَنْتّْحْنَى عْلَى رْكَابِيَ قُدَّامْ الْآبْ،

¹⁵اللِّي مْنُّه كُلّْ عَائِلَة فْالسّْمَا وْفْالْأَرْضْ كَتَاخُدْ الْإِسْمْ دْيَالْهَا.

¹⁶بَاشْ يْعْطِيكُمْ عْلَى حْسَابْ الْعَزّْ دْيَالُه الْكْتِيرْ، الْقُوَّة بْالرُّوحْ دْيَالُه اللِّي غَيْقَوِّي لْدَاخْلْ دْيَالْكُمْ،

¹⁷وْبَاشْ يْسْكُنْ الْمَسِيحْ فْقْلُوبْكُمْ بْالْإِيمَانْ، وْتْكُونُو مْجَدّْرِينْ وْتَابْتِينْ فْالْمْحَبَّة.

¹⁸بَاشْ تْقَدْرُو تْفَهْمُو مْعَ ݣَاعْ الْمُومْنِينْ الْمْقَدّْسِينْ، شْحَالْ كْبِيرَة الْمْحَبَّة دْيَالْ الْمَسِيحْ فْالْعَرْضْ، وْالطُّولْ، وْالْعْلُو، وْالْغُرْقْ.

¹⁹وْتْعَرْفُو هَادْ الْمْحَبَّة اللِّي فُوقْ كُلّْ مَعْرِفَة، بَاشْ تّْعَمّْرُو حْتَّى تْوَصْلُو لْلْكَمَالْ دْيَالُه.

²⁰وْاللَّهْ اللِّي قَادْرْ يْدِيرْ كْتَرْ مْنْ ݣَاعْ دَاكْشِّي اللِّي كَنْطْلْبُوهْ وْلَا كَنْتْخَيّْلُوهْ، عْلَى حْسَابْ الْقُوَّة دْيَالُه اللِّي كَتْخْدَمْ فِينَا،

²¹لِيهْ الْعَزّْ فْالْكْنِيسَة فْإِسْمْ الْمَسِيحْ يَسُوعْ لْݣَاعْ الْجْيَالْ دِيمَا وْعْلَى الدّْوَامْ. آمِينْ.